Kancelari gjerman Friedrich Merz shkaktoi zemërim tek disa në publik me deklaratën e tij se Bundestagu “nuk është një cirk për të valëvitur flamuj sipas dëshirës në të”.
“Është një deklaratë shumë e paqëlluar dhe kancelari duhet ta mendojë përsëri”, tha Armand Zorn, nënkryetar i grupit parlamentar të Partisë Socialdemokrate të Gjermanisë (SPD).
Zorn beson se në kohën kur anëtarët e komunitetit LGBTQ përjetojnë armiqësi të hapur, deklarata e Kancelarit “nuk është e duhur”.
Edhe nga radhët e Unionit të tij Kristian Demokrat CDU/CSU, Merz po përballet me kritika. “Mendoj se deklarata është e gabuar dhe do ta diskutoj personalisht me kancelarin”, tha Soenke Siegman, presidente e Federatës së Lezbikeve dhe Homoseksualëve brenda Unionit.
Në të njëjtën kohë, kryetari i grupit parlamentar të Demokristianëve dhe një nga politikanët më të shquar gjermanë që nuk e ka fshehur kurrë se jeton në një marrëdhënie homoseksuale, Jens Spahn, e mori kancelarin në mbrojtje.
“Kancelari ka plotësisht të drejtë. Nuk mendoj se ky debat i zgjatur mbi këtë temë po kontribuon që komuniteti LGBTQ në Gjermani të gëzojë më shumë liri”, tha Spahn.
Kancelari gjerman Merz (Unioni Kristian Demokrat CDU) mbrojti Presidenten e Bundestagut, Julia Kloeckner mbrëmë në një intervistë për shërbimin publik ARD, e cila refuzoi të varte flamuj ylberi në ndërtesën e Bundestagut gjatë paradës në Berlin në fund të korrikut.
“Bundestagu nuk është një tendë cirku mbi të cilën mund të varen flamuj sipas dëshirës”, tha Merz.
Merz, i cili ka qenë në krye të qeverisë Demokristiane-Socialdemokrate që nga fillimi i majit, njihet brenda partisë së tij CDU, të cilën ai e drejton, si anëtar i krahut konservator.