Lahi Brahimaj: Xhelal Sveçla ka qëndruar vetëm një ditë ushtar dhe ka gjuajtur uniformën

Lahi Brahimaj, nga Aleanca për Ardhmërinë e Kosovës, në një intervistë për TV Dukagjini ka folur për situatën në veri dhe për përpjekjet e Policisë së Kosovës, duke komentuar edhe figurat publike dhe mungesën e tyre në luftë.

“Prej ditës së parë është KFOR-i amerikan përgjegjës për kufirin, nuk ka asnjë ndryshim. Unë kam qenë në veri kur kam qenë në mandatin 2012-2013, në çdo lagje të veriut, edhe sot isha te Kulla e Isa Boletinit. Atëherë ka pasur, sot ka simbole serbe; ka pasur ndonjë pengesë aty-këtu, por çdo herë Policia e Kosovës ka qenë kujdestare dhe e ka kryer punën me përpikëri, dhe është e rëndë me iu hup atë mund, atë djersë atyre djemëve, atyre vajzave që shërbejnë në veri, policë të Kosovës, që ka djem të rinj e çika të reja; edhe janë vrarë në veri policët tanë, që përulem para gjakut të tyre edhe në të kaluarën por edhe tani”.

“Neve po na fajësojnë se nuk ka kaluar buxheti i Kosovës, por jo: mbani mend, bash ata polic që u përballën me bandat serbe kriminale në rastin “Banjska”, po ata polic me ardhë me protestu në oborrin e Qeverisë për mëditjet e tyre që iu takojnë nga kjo qeveri; ata polic që edhe kryeministri edhe Xhelal Sveçla krenohen me punën e tyre që e çliruan veriun, i detyruan me ardhë me protestu para Qeverisë. Me ardhë me të shit mend Xhelal Sveçla e Elbert Krasniqi që e çliruan veriun, është e rëndë”.

Brahimaj komentoi më tej figurat publike:

“Xhelal Sveçla ka nejt një ditë ushtar dhe e ka gjuajtur uniformën. Elbert Krasniqi është ministër mirë boll tash, ai mundet me shit mend që e ka çliruar Kosovën, kur Xhelal Sveçla e ka gjuajtur uniformën. Xhelal Sveçla — nuk po them në atë formën klasike që e ka gjuajtur uniformën në baltë, por ka ikur nga lufta, nuk e ka përballuar; është njerëzore edhe me u tut nuk ka asgjë të keqe. Xhelal Sveçla nuk ka qëndruar në luftë fillim e mbarim, sikurse Albin Kurti nuk ka qëndruar në luftë nga dita e parë. Unë kam qenë kur ka ardhur bashkë me Adem Demaçin në malet e Berishës. Albin Kurti në asnjë rrethanë nuk ka pranuar me qenë pjesë e luftës. Adem Demaçi e ka propozuar që të jetë sekretar i zyrës, por me kohën ka dhënë dorëheqje edhe nga ajo detyrë”.

LDK arrin marrëveshjen e parë të bashkëpunimit për zgjedhjet e 28 dhjetorit

Aleanca Kosova e Re (AKR) do të garojë në zgjedhjet e 28 dhjetori si pjesë e listës së Lidhjes Demokratike të Kosovës.

Vesel Makolli, kryetar aktual i AKR-së ka konfirmuar se kanë arritur marrëveshje me kreun e LDK-së, Lumir Abdixhiku.

“Po është e vërtetë, unë sot pasdite kisha takim me z.Abdixhiku, ku u morëm vesh të jemi pjesë e listës së tyre. Vendimin e kemi marrë pas përsiatjeve të situatës aktuale politike dhe pas sugjerimeve të presidentit tonë z. Behgjet Pacolli. Nënshkrimin e marrëveshjes do ta bëjmë në mënyrë ceremoniale të martën e ardhshme, deri atëherë do të merremi vesh për detajet e marrëveshjes”, ka thënë Makolli për KlanKosovën.

Lidhja Demokratike e Kosovës është shprehur e hapur për të gjitha partitë politke.

Në një konferencë për media të mërkurën, Armend Zemaj nga LDK-ja konfirmoi se janë në bisedime edhe me Nismën Socialdemokratike.

Tërhiqet Lista Serbe, ftesat për seancën në Mitrovicë të Veriut i dërgon me emrin “Republika e Kosovës”

Lista Serbe ka dërguar ftesa të reja për inaugurimin e kuvendeve komunale, ku tashmë përfshihet edhe emërtimi zyrtar “Republika e Kosovës”.

Ftesa për seancën konstituive të Kuvendit të Mitrovicës së Veriut është shkruar gjithashtu në gjuhën shqipe, duke përmbushur kërkesat ligjore.

Vendimi ka ardhur pasi Ministria e Administrimit të Pushtetit Lokal, që ka rol mbikëqyrës mbi komunat, kishte refuzuar mbajtjen e seancës më 5 dhjetor, duke argumentuar se mungesa e emrit “Republika e Kosovës” në dokumentacion e bën të pavlefshme thirrjen e seancës.

Megjithatë, kryetari i sapozgjedhur i Kuvendit, Milan Radojeviq, dhe Lista Serbe kanë njoftuar më herët se nuk do të respektojnë rendin kushtetues të vendit.

Sipas ligjit, çdo dokument zyrtar i institucionit komunal duhet të përmbajë shënimin “Republika e Kosovës” dhe të jetë në të dyja gjuhët zyrtare, shqipe dhe serbe.

Brahimaj: Vuçiqi e Radojçiqi u forcuan gjatë mandatit të Kurtit

Ish-deputeti i AAK-së, Lahi Brahimaj, ka drejtuar kritika ndaj qeverisë së udhëhequr nga Albin Kurti.

Brahimaj në FIVE të TV Dukagjinit tha se është “paradoksale” mënyra se si Kurti u referohet të tjerëve si “kumbarë me Vuçiqin”, ndërkohë që, sipas tij, presidenti serb Aleksandar Vuçiq dhe njerëzit rreth tij “nuk kanë qenë kurrë më të fortë në Kosovë” sesa që nga ardhja e Vetëvendosjes në pushtet.

“Është e çuditshme kur ai i thotë dikujt “kumbari me Vuçiqin”, edhe Vuçiqi e të gjithë ata që i përmend, prej ardhjes së tij në pushtet, kurrë më të fortë nuk kanë qenë. Edhe e dini aferën Kusari-Lila me Radojçiqin… Edhe votimit në sallë kanë qenë dhe kanë votuar Lista Serbe dhe Vetëvendosje, që ishte për pagën minimale kundër kategorive të dala nga lufta. Edhe u zgjodh presidentja – kush e ka bërë kuorumin? VV-ja dhe Lista Serbe… Radojçiqi nuk ka hyrë në Kosovë deri në ardhjen e Kurtit në Qeveri. Vila e Radojçiqit, nëse e sheh prej hartave satelitore, ajo është ndërtuar gjatë mandatit të Albin Kurtit…Me ardhë me të shit mend Xhelal Sveçla e Elbert Krasniqi që e çliruan veriun është e rëndë. Xhelal Sveçla ka qëndruar një ditë ushtar dhe ka hedhur uniformën… Sikur Albin Kurti që nuk ka qëndruar në luftë. Ai nuk ka pranuar në asnjë rrethanë me qenë pjesë e luftës. Dhe si sekretar i Adem Demaçit ka dhënë dorëheqje”, ka thënë Brahimaj.

“VV-ja votoi se nuk pat qare”, Lushaku e ashpër: Ish-anëtari i juaj kallxoi që jeni edhe hajna

Ish-deputetja e LDK-së, Jehona Lushaku-Sadriu ka komentuar votimin e VV-së për bartjen buxhetore të Prishtinës, të premten në Asamblenë Komunale të Prishtinës.

Ajo ka thënë se VV-ja ka votuar se nuk pati qare tjetër.

 

 

Sipas saj, VV-ja e ka parë që mund të dënohet më 28 dhjetor për bllokadën. Për këtë shkak, sot votoi në Prishtinë.

“VV votoi bartjen buxhetore të Prishtinës sot, se nuk pat qare!  A po menoni, që qytetarët e harrojnë që, pa protesta, VV as në seanca nuk vinte me votu buxhetin?! A nuk ju kujtohet shefi juj qysh i ka shkulë mikrofonat në seancë për buxhetin? Tash kur e patë që qytetarët protestuan e dojnë me ju dënu më 28 dhjetor, erdhët dhe i votuat”, ka shkruar Lushaku në Facebook.

 

 

“Mbajeni në mend, qytetarët kanë me ju detyru me ikë prej pushtetit, se jeni sabotues e bllokues; për ma shumë jeni hajna: s’po e them unë, po kallxoi Beqir Lahu sot, asambleisti i VV-së”, ka thënë ajo.

Ky është 28-vjeçari që vdiq në aksidentin tragjik në autostradën Tiranë-Durrës

Akil Gjeçi është 28-vjeçari që humbi jetën në aksidentin tragjik të ndodhur gjatë mesnatës në autostradën Tiranë-Durrës.

I riu me origjinë nga Tropoja dyshohet se ka humbur kontrollin mbi automjetin, i cili më pas është përplasur me bordurat anësore të rrugës, raporton JOQ.

28-vjeçari nuk ka mundur t’i mbijetojë plagëve të marra dhe ka vdekur në spital.

Murati reagon pas miratimit të 28 milionë eurove nga Kuvendi i Prishtinës: Meritat janë të VV-së

Ministri në detyrë i Financave, Hekuran Murati, ka reaguar pas vendimit të Kuvendit Komunal të Prishtinës për të miratuar bartjen e mjeteve nga viti 2024 në vitin 2025, në vlerë prej 28 milionë eurosh.

Ai i ka dhënë meritat për këtë lëvizje partisë së tij në Asamblenë e Prishtinës, që votuan në favor të bartjes së këtyre mjeteve.

“Sot, asamblistët e Lëvizjes Vetëvendosje e votuan bartjen e të hyrave vetanake në Kuvendin Komunal të Prishtinës. Pra, atë që nuk e bëri Lumir Abdixhiku dhe LDK-ja në Kuvendin e Republikës së Kosovës, e bëri Lëvizja Vetëvendosje në Kuvendin Komunal, për të zhbllokuar pagesat për shërbimet esenciale publike. Sepse, siç është vërtetuar tash e sa herë, për Lëvizjen Vetëvendosje interesat e qytetarëve çdoherë kanë prioritet”, ka shkruar Murati.

 

 

Gjatë seancës së Kuvendit Komunal, kryetari i Prishtinës, Përparim Rama, ka përsëritur thirrjen e tij ndaj Muratit që edhe 30 milionë eurot e tjera për kryeqytetin të zhbllokohen nga ai.

A do t’i bashkohet LDK-së – NISMA merr vendimin

Negociatat mes Lumir Abdixhikut të Lidhjes Demokratike e Kosovës dhe Fatmir Limajt të NISMA’s Socialdemokrate kanë dështuar pa ndonjë marrëveshje për bashkëpunim, tash për tash.

Sipas mediave, pengesë ka qenë numri i vendeve që i janë ofruar Limajt në listën e kandidatëve të LDK-së për deputetë dhe shkrirja e tyre në listën e partisë së Lumir Abdixhikut, pa siglën e Nismës.

Mediat kanë kontaktuar të enjten Limajn, por i njëjti nuk është përgjigjur në thirrjet e mediumit e as nuk ka kthyer përgjigje me shkrim. Dje vetë kreu i NISMA’s konfirmoi se po zhvillojnë negociata me LDK-në, duke i hedhur poshtë disa raportime se po negocion edhe me PDK-në.

Po ashtu, edhe kreu i LDK’së, Lumir Abdixhiku, deklaroi të hënën se një pjesë e listës së kësaj partie për zgjedhjet e 28 dhjetorit mbetet e hapur, përfshirë edhe për NISMA’n e Fatmir Limajt

“LDK do të kujdeset që një pjesë të listës së vetë, ta hapë për partitë e tjera, përfshirë edhe z. Limaj me deputetët e vetë. Për këtë çështje do të diskutojmë ditëve në vijim, por le të themi se kemi gatishmëri”, deklaroi ai.

“Jemi të hapur edhe për partitë, edhe për individë”, deklaroi Abdixhiku.

Lahu ia nxjerr sekretet VV-së: Keni bo pazare me prona, thojshi hajde te lajna Prishtinën bërllog me mujt Ramën

Berat Lahu, asamblist i pavarur, ia ka nxjerrë sekretet VV-së.

Lahu ka akuzuar Gëzim Sveçlën për pazare me prona.

“Ke bo takime e pazare tinza edhe grupit tënd parlamentar, edhe partisë tënde. 4 vjet kryetarit Rama nuk janë të mira, ka plot ngecje, plot çështje që kisha bo ndryshe. Prishtina është keq. Shkoj boj della me Rrahman Haradinain 50 milion euro me ia kalu pronat, kjo më bën me vjell, vjen shitesh në moralin politik që e ka pasur VV-ja dikur, ose e ka ende, po më nuk e ka ma. 4 vjet ia keni bo argatin PDK-së me pru Uran Isamilin në balotazh. VV-ja asnjëherë në Prishtinë nuk ka qenë në vendin e tretë. Mrena grupit ton u thanë hajde te lajna Prishtinën bërllog, e te mujna Ramën”, tha Berat Lahu.

Në mbledhjen e sotme, Qeveria miraton ndarjen e 200 mijë eurove

Qeveria në detyrë e Kosovës ka ndarë 200 mijë euro në formë të shpërblimit për Përfaqësuesen e futbollit pas plasimit historik në barazhin për kualifikimet e Kupës së Botës.

Propozimi i vendimit është kumtuar nga kryeministri në detyrë Albin Kurti.

Kurti e prezantoi propozim-vendimin si “një lajm të mirë për Përfaqësuesen tonë në futboll”

“Për suksesin historik të kalimit në fazën e plej-offit të Kupës së Botës, me vendim të qeverisë sot do të ndajmë 200 mijë euro për djemtë tanë dhe Përfaqësuesen e Kosovës”, tha Kurti.

Kurti tha se qeveria në detyrë zotohet të shpërblejë me premio në vlerë 500 mijë euro fitoren potenciale kundër Sllovakisë, rivalit të Kosovës në gjysmëfinalen e pllej-ofit të Botërorit.

Në rast të kualifikimit në Kupën e Botës, Kurti tha se qeveria zotohet edhe për një milion euro të tjera për Përfaqësuesen e Kosovës.

Kësisoj, në rast të triumfit në gjysmë-finale dhe pastaj në finale, djemtë e kombëtares së futbollit do të përfitonin 1.5 milion euro premio nga shteti.