Kjo komunë drejt zgjedhjeve të jashtëzakonshme për Asamble të Komunës, Kryesuesi u zgjodh me një ditë vonesë

Kuvendi Komunal i Junikut ka gjasa të shkojë drejt zgjedhjeve të jashtëzakonshme për këshilltar lokal. MAPL me ligjin për Vetëqeverisjen Lokale obligohet ta njoftojë Qeverinë kur Komunat dështojnë ta zgjedhin Kryesuesin e Kuvendit të tyre brenda 30 ditësh nga themelimi.

Kuvendi i Junikut e kreu këtë votim në ditën e 31-të. Me ligj, Qeveria mund ta shpërndajë kuvendin lokal, që shkaku i shkeljes së afatit të përcaktuar me ligj konsiderohet jofunksional.

Ruzhdi Shehu më 12 dhjetor 2025 dha betimin për mandatin e dytë në krye të Junikut. Pos tij, në të njëjtën seancë u betuan edhe 15 asamblistët e Kuvendit Komunal, të dalë nga zgjedhjet e 12 tetorit 2025, duke themeluar kështu legjislaturën e re lokale në komunën e vogël të rajonit të Dukagjinit.

Për dallim nga Shehu që me betimin para Kuvendit Komunal nisi funksionalizimin e mandatit të ri në krye të qytezës, përfaqësuesit e zgjedhur të asamblesë së Junikut kishin për obligim ta kryenin edhe një detyrë: Zgjedhjen e kryesuesit të tyre. Brenda afatit të caktuar. Në rastin e kundërt u rrezikohet mandati të 15-ve.

Ligji për Vetëqeverisjen Lokale që rregullon funksionimin e Komunave dhe Kuvendeve të tyre Komunale, parasheh që kjo të bëhet brenda 30 ditësh nga themelimi i tyre.

Në rast se nuk ndodhë, i njëjti ligj, nënparagrafin a) të paragrafit të dytë të nenit 50, me automatizëm parasheh që Kuvendi i Komunës konsiderohet jofunksionues, shkruan gazeta online Reporteri.net.

Kuvendi i Junikut kryesuesin e zgjodhi tek më 12 janar 2026. 31 ditë pas betimit të kryetarit dhe këshilltarëve komunal, që nënkupton themelimin e legjislaturës së re lokale.

Në krye të saj u vu Leonard Llolluni i AAK-së, i cili i siguroi edhe votat e LVV’së, duke ia marrë kështu opozita postin e rëndësishëm LDK-së, e cila me Ruzhdi Shehun qeverisë komunën.

Ligji për Vetëqeverisjen Lokale, në paragrafin 3 të Nenit 50, thotë se në raste të tilla kur kuvendi komunal konsiderohet jofunksional, pasi ka dështuar që brenda 30 ditësh ta zgjedhë Kryesuesin, Ministria përgjegjëse për qeverisje lokale [MAPL] e njofton Qeverinë e Republikës së Kosovës për mosfunksionimin e komunës.

“Qeveria mund ta shpërndajë kuvendin e komunës jofunksionues”, thuhet në të njëjtin paragraf.

Shpërndarja e Kuvendit të Komunës, në këtë rast, nënkupton me automatizëm shkuarjen në zgjedhje të jashtëzakonshme vetëm për 15 përfaqësuesit e Kuvendit të Junikut, por jo edhe për Kryetar të Komunës, i cili në balotazhin e 9 nëntorit siguroi edhe katër vitet e ardhshme në krye të Junikut, shkruan gazeta online Reporteri.net.

“Zgjedhjet e reja për kuvendin e komunës mbahen në pajtim me ligjin për zgjedhjet komunale”, thuhet në paragrafin e 4 të Nenit 50 të Ligjit për Vetëqeverisje Lokale.

Të pyetur rreth kësaj situate të krijuar në Junik, Ministria e Administrimit të Pushtetit Lokal, të enjten, deri në publikimin e këtij artikulli, nuk kanë kthyer përgjigje nëse janë duke e shqyrtuar rastin dhe nëse Kuvendi Komunal atje do të shkojë në zgjedhje të reja, të jashtëzakonshme. As Qeveria e Kosovës nuk tregoi nëse janë njoftuar nga MAPL-ja për situatën në Junik dhe nëse do ta shpërndajë kuvendin e komunës jofunksionues.

Bazuar në Ligjin për Zgjedhjet Lokale, data e shpalljes së zgjedhjeve nëpër komuna, pas shpërbërjes së Kuvendit Komunal, kur janë të parakohshme shpallen nga Presidenti i vendit, jo më vonë se 10 ditë nga shpërbërja e Asamblesë, nëse brenda 5 ditësh nuk parashtrohet ndonjë ankesë tek Gjykata Kushtetuese.

“Zgjedhjet e parakohshme nuk mund të mbahen më herët se tridhjetë (30) ditë dhe jo më vonë se dyzetepesë (45) ditë pas shpërbërjes”, thuhet në paragrafin 4 të Nenit 4 të Ligjit për Zgjedhjet Lokale.

“Zgjedhjet e parakohshme qeverisen përmes ligjeve të njëjta dhe rregullat e KQZ-së sikurse edhe zgjedhjet tjera, përveç se KQZ-ja mund të ndryshojë afatet kohore në rast se kjo nevojitet për shkak të rrethanave”.

Për dallim nga Juniku, Mitrovica e Jugut e “evitoi rrezikun për zgjedhje të reja komunale” duke mbledhur Kuvendin lokal në mbrëmjen vonë të 12 janarit 2026, para se të hynin në ditën e 31-të të afatit. Aty Kryesues u zgjodh Safet Kamberi i LDK-së që arriti marrëveshje bashkëqeverisëse me Faton Pecin, kryetarin e komunës nga LVV-ja.

Këta janë kandidatët e LVV-së që humbën afro 300 vota nga rinumërimi në Malishevë

Rinumërimi i plotë i kutive të votimit po vazhdon edhe sot në Qendrën e Numërimit dhe Rezultateve (QNR). Nga gjithsej 75 vendvotime në Komunën e Malishevës, deri më tani janë rinumëruar 67 prej tyre, shkruan Insajderi

Të dhënat e deritanishme tregojnë se kandidati i Lëvizjes Vetëvendosje që ka humbur më së shumti vota nga rinumërimi është Valon Hoti me 277 vota më pak.

Pas tij renditet Gani Krasniqi.

Lista e kandidatëve të LVV-së me humbje votash në Malishevë është si më poshtë:

• Gani Krasniqi – 253 vota
• Adnan Rrustemi – 62 vota
• Albin Kurti – 47 vota
• Albulena Haxhiu – 22 vota
• Glauk Konjufca – 22 vota

Rinumërimi i votave: Fetah Paçarizi shtyhet “kokë më kokë” me këtë kandidat të PDK’së për heqje votash

Fenomeni i heqjes së votave tek Partia Demokratike e Kosovës është shfaqur edhe në Komunën e Malishevës.

Teksa janë rinumëruar 71 nga 75 kuti apo 94,67 për qind të votave në Malishevë, janë shtuar dyshime për manipulim të votave, shkruan Insajderi.

Tek Partia Demokratike e Kosovës, numër i madh i votave i janë hequr kandidatit për deputet nga ky subjekt politik, Gazmend Maliqaj. Pra, 878 sosh.

Pas tij qëndron kandidati tjetër për deputet i PDK’së, Adnan Thaçi, me 689 vota të hequra.

Numër i madh i votave iu është hequr edhe kandidatit të famshëm të PDK’së, Fetah Paçarizit. Atij iu janë minusuar 610 vota. Numri total i votave të hequra në nivel vendi si shkak i rinumërimit i Paçarizit është 6,638.

Themelohet Bordi i Paqes, presidentja Osmani nënshkruan deklaratën përkrah Trumpit

Presidenti i SHBA-së, Donald Trump, zbuloi “Bordin e Paqes” në Davos të Zvicrës, me ceremoninë e nënshkrimit ku morën pjesë rreth 20 vende, mes tyre edhe Kosova.

Bordi do të mbikëqyrë rindërtimin e Gazës dhe do të kërkojë zgjidhjen e konflikteve globale.

Deklaratën e pjesëmarrjes e nënshkroi edhe presidentja e Kosovës, Vjosa Osmani, shkruan gazeta online Reporteri.net.

Trump tha që Bordi i Paqes do të punojë me Kombet e Bashkuara për t’i dhënë fund konflikteve në botë.

Presidenti Trump tha se ky Bord e ka potencialin të jetë “një nga organet më të rëndësishme të krijuara ndonjëherë”, duke shtuar se është i nderuar që është kryetar.

“Po funksionon bukur… pothuajse çdo vend dëshiron të jetë pjesë e tij”, tha ai.

Kurti në Davos: Ekonomia në Kosovë po rritet çdo vit

Kryeministri në detyrë, Albin Kurti, gjatë qëndrimit në Davos ku po mbahet Forumi Ekonomik Botëror, tha se partnerëve ndërkombëtarë dhe atyre potencialë u kanë prezantuar mundësitë për investime në Kosovë, duke theksuar rolin e qeverisë si partnere e besueshme, stabilitetin institucional dhe potencialin e të rinjve të vendit.

“Ne të gjithë partnerëve ndërkombëtarë dhe partnerëve të mundshëm ndërkombëtarë u tregojmë mundësitë për investime në Kosovë, prej faktit që atje do të kemi një qeveri që është partnere – jo vetëm një treg apo vetëm një platformë për prodhimtari të lirë, por edhe një shtet me politika fiskale të favorshme dhe me mundësi për të angazhuar të rinjtë tanë, të cilët janë energjikë, të talentuar dhe shumëgjuhësh,” tha Kurti për RTK-në.

Ai theksoi se Kosova ofron mundësi unike për krijimin e degëve apo bizneseve të reja, duke qenë në zemër të rajonit EMEA.

“Është një mundësi unike që të krijojnë degët e tyre apo bizneset e tyre në vendin tonë, i cili është në zemër të këtij rajoni që njihet në mënyrë të popullarizuar si EMEA – Evropa, Lindja e Mesme dhe Afrika Veriore,” u shpreh ai.

Kurti theksoi rëndësinë e besimit dhe stabilitetit institucional në kohë turbulencash gjeopolitike.

“Kërkojmë që sa më shumë, për shkak të miqësisë dhe afërsisë në kohë turbulencash gjeopolitike dhe kur kemi çrregullim të linjave botërore tregtare, te Kosova ta kenë edhe shtetin demokratik me sundim të ligjit dhe parashikueshmëri institucionale,” tha ai.

Sipas tij, Kosova po shënon rritje të vazhdueshme ekonomike. “Është një ekonomi që sa vjen e rritet çdo vit dhe ku ndërmarrjet me pronësi të huaj, krahasuar me para katër viteve, janë rritur për plot 55%,” theksoi Kurti.

Duke folur për pjesëmarrjen në Davos, Kurti tha se këtë vit aktivitetet kanë qenë më intensive.

“Rregullisht, Qeveria e Kosovës merr pjesë, përveç meje zakonisht edhe disa ministra. Por kësaj radhe është e veçantë, aktivitetet që kemi zhvilluar në Shtëpinë e Kosovës kanë qenë më të dendura se kurrë më parë. Kemi pasur më shumë panele se herën e kaluar, më shumë takime bilaterale,” tha ai.

Ai falënderoi edhe ndërmarrësit nga mërgata. “Dua të falënderoj ndërmarrësit nga mërgata, të cilët kanë kontribuar kaq shumë që në Davos, që është një kryeqendër e përkohshme e globit, të ketë kaq shumë mysafirë nga e gjithë bota në Shtëpinë e Kosovës, e cila këtë herë u quajt edhe Shtëpia apo Vatra e Talentit,” u shpreh Kurti.

Kurti potencoi se në fjalimet e tij në “Shtëpinë e Shteteve të Bashkuara të Amerikës” në Davos, foli për çështjen e besimit në politikë dhe rëndësinë e tij për shoqërinë dhe ekonominë.

“Aty ishte çështja e besimit në politikë. Unë besoj se besimi në institucionet publike dhe besimi i qytetarëve në shoqëri tek njëri-tjetri kanë edhe një aspekt të fuqishëm, jo vetëm për kohezionin social dhe për mbijetesën në kriza, por edhe për hovin ekonomik edhe për shanset më të mëdha për zhvillim dhe progres. Besimi është shumë i rëndësishëm, sa i përket besimit të qytetarëve në udhëheqësi, por edhe vetëbesimit të udhëheqësve kur ata ndodhen në kauza dhe ide fisnike që i shërbejnë interesit të përgjithshëm,” tha Kurti.

Vendimi i Trumpit: SHBA-ja sot tërhiqet nga një nga organizatat më të rëndësishme botërore

Shtetet e Bashkuara të Amerikës pritet të largohen zyrtarisht nga Organizata Botërore e Shëndetësisë ditën e sotme, përballë paralajmërimeve se vendimi do të godasë si shëndetin amerikan ashtu edhe atë global, si dhe në shkelje të një ligji amerikan që kërkon që Washingtoni t’i paguajë agjencisë së shëndetësisë të OKB-së 260 milionë dollarë në tarifa që i detyrohen.

Presidenti Donald Trump njoftoi se SHBA do të largohej nga organizata në ditën e parë të presidencës së tij në vitin 2025, nëpërmjet një urdhri ekzekutiv.

Sipas ligjit amerikan, ajo duhet të japë njoftim njëvjeçar dhe të paguajë të gjitha tarifat e papaguara para largimit.

Të enjten, një zëdhënës i Departamentit të Shtetit të SHBA-së tha se dështimi i OBSH-së për të përmbajtur, menaxhuar dhe ndarë informacionin i kishte kushtuar SHBA-së triliona dollarë dhe presidenti kishte ushtruar autoritetin e tij për të ndaluar transferimin e ardhshëm të çdo fondi, mbështetjeje ose burimi të qeverisë amerikane tek OBSH-ja. “Populli amerikan i ka paguar më shumë seç duhet kësaj organizate dhe kjo goditje ekonomike është përtej një pagese fillestare për çdo detyrim financiar ndaj organizatës”, tha zëdhënësi me email.

Gjatë vitit të kaluar, shumë ekspertë globalë të shëndetit kanë kërkuar një rimendim, përfshirë së fundmi Drejtorin e Përgjithshëm të OBSH-së, Tedros Adhanom Ghebreyesus.

OBSH-ja tha gjithashtu se SHBA-të ende nuk i kanë paguar tarifat që u detyrohen për vitet 2024 dhe 2025. Shtetet anëtare janë gati të diskutojnë largimin e SHBA-së dhe se si do të trajtohet në bordin ekzekutiv të OBSH-së në shkurt, tha një zëdhënës i OBSH-së për Reuters me email. “Kjo është një shkelje e qartë e ligjit amerikan”, tha Lawrence Gostin, drejtor themelues i Institutit O’Neill për Ligjin Global të Shëndetit në Universitetin Georgetown në Washington, një vëzhgues i afërt i OBSH-së.

Washingtoni tradicionalisht ka qenë deri tani mbështetësi më i madh financiar i agjencisë së shëndetit të OKB-së, duke kontribuar rreth 18% të financimit të saj të përgjithshëm. OBSH-ja do të shkurtojë gjithashtu rreth një të katërtën e stafit të saj deri në mesin e këtij viti.

Agjencia tha se ka punuar me SHBA-në dhe ka ndarë informacione gjatë vitit të kaluar. Nuk është e qartë se si do të funksionojë bashkëpunimi në të ardhmen.

Ekspertët globalë të shëndetit thanë se kjo përbënte rreziqe për SHBA-në, OBSH-në dhe botën.

Gjykata merr vendim për Arianit Sllamnikun

Gjykata Themelore në Gjilan ka njoftuar se i ka caktuar një muaj paraburgim Arianit Sllamnikut, që dyshohet për dy vepra penale.

Në njoftimin e gjykatës thuhet se nga periudha e papërcaktuar kohore e deri më datë 20.01.2026, në Gjilan, në rrugën ’’17 Shkurti’’, në lokalin e regjistruar si ‘’Consulence’’, i pandehuri, me dashje dhe me qëllim të përfitimit të kundërligjshëm, pa kualifikim përkatës profesional, pa licencë dhe pa autorizime ligjore për ushtrimin e veprimtarisë mjekësore apo farmaceutike, përkundër se i vetëdijshëm se nuk posedonte kualifikime të posaçme dhe të domosdoshme sipas ligjit ka ushtruar veprimtari të kundërligjshme.

“Ashtu që në lokalin ‘’Consulence’’ ka kryer trajtime mjekësore dhe vizita mjekësore e këshilluese kinse për shërimin e Autizmit duke përshkruar e rekomanduar përdorimin e terapive të ndryshme të pa verifikuara e të pa konfirmuara, përkundër se nuk ka pasur njohuri e as kualifikim për këtë fushë mjekësore, ashtu që pas raportimit të lajmit për ushtrimin e kësaj veprimtarie të kundërligjshme gjatë zbatimit të urdhër kontrollit UGJK nr.5/2026 nga NJHP në Gjilan, në lokalin ‘’Consulence’’, gjendet edhe një dëshmitar i cili pas marrjes së terminit kishte shkuar për tu konsultuar për trajtimin Autizmit, e po ashtu gjenden edhe medikamente të ndryshme mjekësore të cilat sekuestrohen”.

“Më këto veprime i pandehuri ka kryer veprën penale “ushtrimi i kundërligjshëm i veprimtarisë mjekësore ose farmaceutike”, vepër e sanksionuar me Kodin Penal të Republikës së Kosovës (KPRK).”

“Gjithashtu i pandehuri edhe përmes komunikimit elektronik nga llogaria e tij dhe përmes telefonit, pa autorizim dhe në kundërshtim me ligjin për veprimtarinë farmaceutike dhe rekomandimet e OBSH-së, ka kryer eksperimente mjekësore duke rekomanduar terapi farmaceutike të pa verifikuar për probleme shëndetësore konkrete, ashtu që pas vizitave të drejtpërdrejta apo edhe kontaktit përmes komunikimit elektronik tek persona të ndryshëm, kryesisht fëmijë të prekur nga spektri Autik ka rekomanduar, përshkruar dhe udhëzuar marrjen e terapisë të pa verifikuar dhe të pa testuar kinse për largimin e metaleve dhe shërimin e Autizmit dhe në këmbim të këtyre shërbimeve pranon shuma të ndryshme të pagesave, i vetëdijshëm se terapitë e këshilluara nuk ishin të testuara në njerëz dhe për probleme të tilla shëndetësore e për të cilat nuk kishte njohuri bazike as për efektet anësore.”

“Më këto veprime i pandehuri ka kryer veprën penale “eksperimentet e kundërligjshme mjekësore dhe testimi i barërave” nga neni 257 paragrafi 1 të KPRK-së. Gjyqtarja e  procedurës paraprake ka vlerësuar se qëndrojnë arsyet ligjore për caktimin e paraburgimit ndaj të pandehurit, duke i marrë për bazë të gjitha ato që u thanë më lart, masat tjera alternative do të ishin të pamjaftueshme për zhvillimin me sukses të procedurës penale. Palët kanë të drejtën e ankesës ndaj këtij vendimi në Gjykatën e Apelit të Kosovës.”

Paralajmërohet protestë me 17 shkurt

Më 17 shkurt kur edhe Kosova feston festën e Pavarësisë së saj, organizatat e dala nga lufta njoftojnë se do të mbajnë protestë gjithpopullore në mbrojtje të ish-krerëve të UÇK-së.

Ai u ka bërë thirrje qytetarëve që t’iu bashkohen dhe në këtë mënyrë të bëhet e ditur që krime ka kryer vec Serbia, e UÇK-ja bërë luftë për liri.

“Nën Organizimin e OVL-UÇK me 17 Shkurtë protestë gjithëpopullore pa dallim partish në mbrojtje të vlerave të luftës sonë të shejtë dhe në mbrojtje te Krerëve të UÇK-së. Andaj bashkohuni shqiptar kudo që jeni qe të jem së bashku në ketë protestë. Dhe t’ia bëjmë me dije kësaj gjykate se UÇK-ja ka bërë luftë për liri dhe s’ka bërë krime. Krime ka bërë vetëm Serbia”, ka shkruar ai.

“E shtrëngoi për fyti” – Djali ia mori jetën nënës, detaje tronditëse nga ngjarja në Dragash

Prokuroria Themelore ka kërkuar nga Gjykata Themelore në Prizren, caktimin e masës së paraburgimit në afat prej 30 ditësh, ndaj të dyshuarit Ferzidin Boza për vrasjen e nënës së tij në Dragash.

I dyshuari gjendet në ndalim 48 orësh, për shkak të dyshimit të bazuar se i njëjti ka kryer veprën penale “Vrasje e rëndë” nga neni 173 par.1 nënpar. 1.3 të Kodit Penal të Republikës së Kosovës (KPRK).

Sipas kërkesës së prokurorisë, “i dyshuari F.B., më datë 20.01.2026, në fshatin Restelicë- Komuna e Dragashit, në shtëpinë e tij familjare ku jetonte së bashku me viktimën, me dashje privon nga jeta nënën e tij, viktimën T.B., në atë mënyrë që fillimisht e godet me grushte në pjesë të ndryshme të trupit dhe më pas e shtrëngon për fyti me duar, me ç’rast viktima nga lëndimet e marra ndërron jetë në vendin e ngjarjes”.

Me këto veprime, i njëjti dyshohet se ka kryer veprën penale “Vrasja e rëndë” sipas KPRK-së.

“Prokuroria Themelore në Prizren, vazhdon të mbetet e përkushtuar në luftën ndaj kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligjin”, thuhet në njoftim.

Ngritet aktakuza e parë për zgjedhjet e 28 dhjetorit

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025. Sipas njoftimit, aktakuza ka lidhje me veprën penale “Asgjësimi i dokumenteve të votimit”, raporton Periskopi.

Aktakuza është ngritur ndaj personit me inicialet M.A.

Njoftimi i plotë:

Prokuroria Themelore në Ferizaj njofton opinionin publik se ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”, e paraparë me nenin 217 paragrafi 1 të Kodit Penal të Republikës së Kosovës.

Sipas aktakuzës, më 28 dhjetor 2025, në një qendër të votimit në qytetin e Shtimes i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës. Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda. Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit”, thuhet në komunikatën për media të Prokurorisë Themelore në Ferizaj.