Tragjike në Maliq: Zjarri i madh në banesë – vdes nëna me djalin 14 vjeç, vajza 6-vjeçare në gjendje të rëndë

Një ngjarje e rëndë që tronditi qytetin e Maliqit në qarkun e Korçës në Shqipëri, ku nënë e bir humbën jetën si pasojë e një zjarri në banesë.

Vajza 6-vjeçare e familjes është nisur me urgjencë drejt Tiranës, për trajtim të specializuar në një qendër të djegieve.

Mediat në Tiranë raportojnë se gjendja e fëmijës është shumë e rëndë, për shkak të djegieve të shumta në trup.

E mitura është e vetmja e mbijetuar nga ngjarja tragjike që ndodhi në banesën e familjes Azizllari, ku humbën jetën nëna Merjeme Azizllari dhe djali 14-vjeçar.

Dyshohet se zjarri ka nisur nga një dyshek sfungjeri, në rrethana që ende po hetohen nga autoritetet.

Sipas dëshmive të fqinjëve, vajza arriti të shpëtonte vetëm falë ndërhyrjes së një gruaje që ndodhej pranë banesës dhe e pa atë duke kërkuar ndihmë.

Ajo ishte hedhur nga dritarja, ndërsa nëna dhe vëllai i saj nuk arritën të dilnin në kohë për shkak të tymit të dendur.

“Familje punëtore, ishin me ekonomi të dobët. Babai i fëmijëve punonte, ajo mbante dy fëmijët, i ushqente me aq sa kishte mundësi. Bashkia i ndihmonte çdo muaj plus që merrnin dhe ushqime dhe ndihmë ekonomike. Vajza ishte më e vogël se djali, djali në këmbë, vajza nuk lëvizte dhe aq. Nëna nuk kujdesej shumë për fëmijët. Ne të lagjes i flisnim, i thoshim “laji, shpëlaji”. E ndihmonim, çdo gjë i çonim. Si binte në qafë askujt. Të dy fëmijët ishin autikë.

Unë për momentin nuk isha por aty ajo ka një krevat sfungjeri dhe ata fëmijët trazonin zjarrin. Ka rënë zjarri aty, kishte djegur sfungjerit dhe dihet që bëri shumë tym, pa flakë. Vajza është hedhur nga dritarja, kurse ata të dy nuk mundën të dilnin. Vajzën e shpëtoi një zonjë kurse djali mbaroi me të ëmën. Doli kjo zonja rastësisht se e mora në telefon për të marrë diçka. Në atë kohë dëgjoi të thirrurat dhe vajza i binte derës. I binte me shkelma. Dëgjoi komshia, doli dhe komshia tjetër dhe pastaj arritën atje ku kanë arritur”, tha fqinja e familjes, Benereta Pashollari.

Ngjarja e rëndë ndodhi mesditën e kësaj të diele (19 tetor) rreth orës 13:30, në bllokun nr. 3, Maliq.

Fillimisht u raportua se nëna dhe dy fëmijët e saj kishin mbetur të plagosur, por më pas u mësua se gruaja, Merjeme Azizllari kishte ndërruar jetë si pasojë e asfiksisë brenda në shtëpi.

Më vonë, ndërroi jetë në spital edhe djali i saj i madh, 14 vjeç, ndërsa në gjendje të rëndë si pasojë e djegieve vazhdon të jetë fëmija i vogël 6 vjeç.

Nuk dihen ende shkaqet që çuan në përfshirjen e banesës nga flakët, ndërsa shërbimet zjarrfikëse dhe policia ndodhen në vendngjarje për të shuar zjarrin dhe nisur hetimet mbi rrethanat e incidentit.

Rezultate befasuese nga votat e diasporës në Pejë, ja kush po prinë

Kryetari aktual i Pejës, kandidati i LDK-së Gazmend Muhaxheri po merr 50.67% të votave me postë, kur janë numëruar 66,67% e tyre. Aktualisht, ai numëron 342 Vota, sipas të dhënave të fundit të KQZ-së, të përditësuara në 17:41.

Taulant Kelmendi, kandidati i LVV-së për kryetar të Komunës ka 189 vota (28.00%).

Muhaxheri dhe Kelmendi do të garojnë për kryetar të Pejës në një rund të dytë votimi më 9 nëntor.

VV-AAK në koalicion, bëhen bashkë për këtë komunë

Kandidati i Lëvizjes Vetëvendosje për kryetar të Fushë-Kosovës, Valon Prebreza, ka bërë të ditur përmes një postimi në Facebook se do të vazhdojë “rrugëtimin drejt ndryshimit” bashkë me kandidaten e AAK-së, Vildane Latifi.

“Vazhdojmë rrugëtimin bashkë drejt ndryshimit! Na priftë e mbara”, ka shkruar Prebreza, duke publikuar edhe një fotografi të përbashkët me Latifin.

Tashmë ku dy subjektet do të garojnë së bashku për fitoren në raundin e dytë të zgjedhjeve lokale.

LAJM I FUNDIT: Ushtria amerikane sulmon një nëndetëse…

Ushtria amerikane ka kryer një sulm ndaj një anije të dyshuar për transport droge të enjten, duke vrarë dy persona dhe duke arrestuar dy të mbijetuar.

Një video e ndarë nga presidenti i SHBA-së Donald Trump në Truth Social duket se tregon sulmin ushtarak ndaj nëndetëses në Karaibe, e akuzuar si anije që transportonte drogë.

Në klip, një anije mund të shihet duke lundruar, pjesa e përparme e së cilës është zhytur disa centimetra nën sipërfaqen e ujit.

Pastaj, shihen disa shpërthime, me të paktën një mbi pjesën e pasme të anijes.

Sulmi, i kryer të enjten, vrau dy persona, sipas Trumpit.

Dy të mbijetuar u morën në paraburgim dhe më vonë u dërguan përsëri në vendet e tyre të origjinës, Ekuador dhe Kolumbi

“Ishte nder i madh për mua të shkatërroja një NËNTENDËSE shumë të madhe që transportonte drogë, e cila po lundronte drejt Shteteve të Bashkuara në një rrugë tranziti të njohur për trafikim narkotikësh”, tha Trump.

“Inteligjenca amerikane konfirmoi se kjo anije ishte e ngarkuar kryesisht me Fentanyl dhe narkotikë të tjerë të paligjshëm.”

Votat me postë në Prizren, befasi në rezultat

Artan Abrashi, kandidati i LVV-së për kryetar të Prizrenit, ka marrë 594 vota me postë (33.30%).

Sipas të dhënave të publikuara nga Komisioni Qendror i Zgjedhjeve, ai ka vetëm 28 vota më shumë sesa kundërkandidati i tij nga PDK-ja, kryetari aktual i Komunës, Shaqir Totaj, i cili ka marrë 566 vota (31.73%).

Driton Selmanaj i LDK-së ka marrë 203 vota (11.38%).

Totaj dhe Abrashi do të garojnë për kryetar të Prizrenit në një rund të dytë votimi më 9 nëntor.

Lista Serbe ankohet: Operacioni në veri u zhvillua me policë me armatim lufte, thyen dyer e frikësuan qytetarët

Lista Serbe, ashtu si e ashtuquajtura zyrë për Kosovën në qeverinë serbe, e ka quajtur “hakmarrje politike” operacionin policor në veri të vendit, ku u ndaluan e më pas u liruan shtatë serbë. Operacioni, siç njoftoi pak më parë Prokuroria dhe Policia nëpërmjet një komunikate të përbashkët, u zhvillua në Zubin Potok dhe Zveçan në kuadër të një hetimi lidhur me vrasjen e një zyrtari të EULEX-it në vitin 2013.

Sipas partisë më të madhe serbe në Kosovë, operacioni erdhi pas fitores së serbëve në zgjedhjet lokale të mbajtura së fundmi në Kosovë, më 12 tetor.

Lista Serbe e quajti operacionin “terrorizëm të organizuar” ndaj serbëve, ndërsa tha se pjesëtarë të njësive të Policisë së Kosovës ishin të pajisur “me armatim lufte” dhe se “kanë thyer dyer dhe kanë shkaktuar frikë e panik te qytetarët”.

“Bëhet fjalë për demonstrim të pastër force dhe përpjekje për frikësimin e popullit tonë”, tha Lista Serbe në reagim.

“Këto veprime përbëjnë formë të hapur të hakmarrjes politike ndaj popullit serb në veri të Kosovës dhe Metohisë, pas fitores bindëse të Listës Serbe në zgjedhjet e fundit, shprehje të nervozizmit dhe pafuqisë së Prishtinës, e cila përpiqet ta kompensojë humbjen e vet elektorale përmes ndjekjes së të pafajshmëve, e gjitha kjo në kuadër të përgatitjeve për raundin e dytë të zgjedhjeve lokale, në të cilat Kurti dëshiron të fitojë në disa komuna, i vetëdijshëm se nuk ka çfarë tjetër t’u ofrojë votuesve përveç urrejtjes ndaj serbëve”, thuhet tutje në reagim.

Përfundon numërimi i votave me postë në Kaçanik, Jeton Raka i VV-së mbi 50%

Ka përfunduar votimi me postë në komunën e Kaçanikut.

Kandidati për kryetar të kësaj komune nga VV-ja, Jeton Raka nga ka marrë 50.34% të votave të diasporës, derisa Sabedin Vishi i PDK-së ka marr 31.58%.

Ndërsa nga rezultatet preliminare të KQZ-së, Vishi prin në Kaçanik me 40.02% të votave, derisa Raka radhitet i dyti me 37.38%. /IndeksOnline/

Prokuroria Speciale publikon pamjet e aksionit në veri

Prokuroria Speciale e Kosovës ka bërë të ditur se operacioni i sotëm policor në Komunën e Zubin Potokut dhe të Zveçanit, është zhvilluar në kuadër të një hetimi lidhur me vrasjen e zyrtarit të Misionit të Bashkimit Evropian për Sundim të Ligjit në Kosovë ( EULEX ) A.S., me qëllim të verifikimit të informatave dhe identifikimit të mundshëm të provave relevante.

Siç bëhet e ditur në komunikatë, hetuesit policorë nga Drejtoria për Hetimin e Krimit të Organizuar dhe Krimeve të Rënda, kanë kryer bastisje në dy lokacione në Zveçan dhe në shtatë lokacione në Zubin Potok, nën dyshimin për kryerjen e veprave penale “Rrezikimin e personelit të Kombeve të Bashkuara ose personelit në marrëdhënie me to”, “vrasje të rëndë”, si dhe “sulm ndaj personit zyrtarë gjatë kryerjes së detyrës zyrtare”.

Gjatë operacionit, i cili është mbështetur edhe nga njësi të tjera relevante të Policisë së Kosovës, janë shoqëruar në Polici shtatë persona, dhe pas intervistimit janë liruar në procedurë të rregullt.

Ndërsa, gjatë zbatimit të urdhërit për bastisje, si një hap i rëndësishëm procedural në kuadër të një hetimi që është ende në zhvillim, janë gjetur dhe sekuestruar prova materiale sikurse: dy armë, municion, veshje me përmbajtje nacionaliste, dylbi, dokumente dhe pajisje elektronike të ndryshme.

“Prokuroria Speciale dhe Policia e Kosovës, ritheksojnë përkushtimin në luftën kundër krimit të organizuar dhe sjelljen para drejtësisë të atyre që cënojnë sigurinë, ligjin dhe rendin në Republikën e Kosovës”, theksohet në komunikatë.

Shikoni pamjet këtu.

Numërohen 50% e votave të diasporës në Fushë Kosovë, ky është rezultati mes LVV-së dhe LDK-së

Janë numëruar 50 për qind e votave me postë në komunën e Fushë Kosovës.

Valon Prebreza nga Lëvizja Vetëvendosje ka marrë 48.94% të votave, derisa Besnik Osmani i Lidhjes Demokratike të Kosovës ka grumbulluar 39.36%.

Edhe nga rezultatet preliminare të Komisionit Qendror të Zgjedhjeve, Prebreza udhëheq në Fushë Kosovë me 45.14%, derisa Osmani radhitet i dyti me 36.62%.

Numërohen mbi 85% të votave me postë në Gjilan, Alban Hyseni i VV-së po e ‘deklason’ Ismajlin e LDK-së

Në Qendrën e Numërimit dhe Rezultateve (QNR), nga 5 prej 6 vendvotimeve me postë në Komunën e Gjilanit, aktualisht kur janë numëruar 85.71% të këtyre votave të diasporës, kandidati i VV-së për Kryetar, Alban Hyseni ka marrë 687 vota.

Në vend të dytë del të jetë Arbër Ismajli i LDK-së me 482 vota nga diaspora.

I treti është kandidati i PDK-së, Riad Rashiti me 122 vota dhe Nazim Gagica, kandidat i AAK-së ka marrë 20 vota.

Sipas të dhënave zyrtare të KQZ-së, Lëvizja Vetëvendosje në këtë komunë del të jetë e para aktualisht me kandidatin e saj, Alban Hyseni me 49.82%, Arbër Ismajli me 34.30%, në vend të tretë Riad Rashiti i PDK-së me 12.16% dhe në vend të katërt me 1.95% Nazim Gagica i AAK-së.