Lëvizja Vetëvendosje e ka fituar deputetin e 52’të, nga 92.51% e votave të numëruara, shkruan Reporteri.net.
PDK ka rënë në 22 deputetë.
LDK vazhdon t’i ketë 19 ulëse, ndërsa AAK 7./Reporteri.net
Ministri në detyrë i Financave, Hekuran Murati, ka njoftuar se tashmë janë ekzekutuar pagesat për përfituesit e masës së mbështetjes prej 100 eurosh, të dedikuar për punëtorët e sektorit privat në kuadër të Pakos për Përballje me Inflacionin 2.0.
Sipas Muratit, mjetet janë transferuar për të gjithë ata qytetarë që kanë përmbushur kriteret e përcaktuara për përfitim nga kjo skemë mbështetëse, ashtu siç ishte paralajmëruar më herët nga institucionet përgjegjëse.
Ndërkohë, ai bëri të ditur se procesi për mbështetjen financiare të studentëve është ende në fazën e vlerësimit. Komisioni përgjegjës po shqyrton aplikimet e pranuara dhe, sipas ministrit, publiku do të njoftohet sapo të përfundojë përgatitja e listave për ekzekutimin e pagesave.
Në Qendrën e Numërimit dhe Rezultateve është duke vazhduar numërimi i votave me postë.
Deri në orën 14:30 janë numëruar 40,81% të votave.
Nga votat e numëruara deri më tani, LVV ka marrë 70.28% apo 23,972 vota. LDK 14.28% apo vota 5,055.
PDK është e treta me 7.70% apo 2,625, kurse Aleanca ka 5.22% apo 1,779 vota.
Procesi i numërimit të votave me postë sipas KQZ-së pritet të përfundojë në mesjavë.
Nga votat e numëruara, LVV ka siguruar 51 ulës, PDK 23, LDK 19, Aleanca 7.
Gjykata Themelore në Prishtinë, ka shpallur aktgjykim dënues ndaj ish-ministrit të Tregtisë dhe Industrisë, Endrit Shala, duke e dënuar me 2 vjet burgim pasi iu ricilësua vepra penale nga “Keqpërdorim i detyrës zyrtare” në “Konflikt interesi”.
Aktgjykimi ndaj Shalës u shpall të hënën nga kryetarja e trupit gjykues, Violeta Namani-Hajra dhe anëtarët Medie Bytyqi e Kujtim Krasniqi, raporton “Betimi për Drejtësi“.
Sipas gjykatëses Namani-Hajra, nuk janë përmbushur elementet e veprës penale “Keqpërdorim i detyrës zyrtare”, andaj Shala u shpall fajtor dhe u dënua për “Konflikt interesi” nga neni 417, paragrafi 2 lidhur me paragrafin 1 të Kodit Penal. Dënimi me burgim, do të ekzekutohet pasi aktgjykimi të marrë formën e prerë.
I akuzuari obligohet të paguajë edhe shpenzimet e procedurës- 100 euro për paushallin gjyqësor dhe 100 euro për Fondin për Kompensimin e Viktimave të Krimit.
Ndaj këtij vendimi, palët kanë të drejtë ankese në afat prej 30 ditësh.
Shala nuk ishte i pranishëm në shpallje.
Ndryshe, në këtë rast akuzohet edhe ish-ministri Vesel Krasniqi po që seanca e 1 dhjetorit 2025 kishte dështuar në mungesë të të akuzuarit Shala. Në atë rast, avokati Artan Qerkini që mbron të akuzuarin Krasniqi, kishte kërkuar që çështja penale të veçohet në mënyrë që të procedohet më shpejtë. Andaj, Gjykata jashtë seancës ka marrë vendim për veçimin e procedurës penale.
Dy të akuzuarit në seancën fillestare të mbajtur më 27 nëntor 2024 janë deklaruar të pafajshëm lidhur me akuzat për keqpërdorim të detyrës zyrtare.
Themelorja dhe Apeli kanë konfirmuar aktakuzën e Prokurorisë Speciale ndaj dy ish-ministrave Krasniqi dhe Shala, e cila dy të akuzuarit i ngarkon për keqpërdorim të detyrës zyrtare.
Kujtojmë se Gjykata Themelore në Prishtinë më 20 shtator 2024 kishte paraqitur kërkesë në Prokurorinë Speciale për plotësimin/përmirësimin e aktakuzës.
Ndryshe, Prokuroria Speciale e Republikës së Kosovës (PSRK) më 30 gusht 2024 ka ngritur aktakuzë ndaj dy ish-ministrave të Tregtisë dhe Industrisë, Vesel Krasniqi dhe Endrit Shala, të cilët i ngarkon me veprën penale “Keqpërdorim i pozitës apo autoritetit zyrtar”.
Sipas aktakuzës, Vesel Krasniqi në cilësinë e ministrit të Tregtisë dhe Industrisë akuzohet se me dashje dhe dijeni, ka tejkaluar kompetencat e tij zyrtare dhe pa autorizim ka iniciuar dhe zbatuar procedurat ligjore për përgatitjen e Udhëzimit Administrativ për Kontrollin dhe Cilësinë e Karburanteve të Lëngëta të Naftës, të cilin e ka miratuar më 11 nëntor 2020.
Ky UA sipas aktakuzës përmban disa nene të cilat janë në dëm të interesit publik dhe në dobi të interesit privat, përkatësisht me nenet 51 dhe 54 të këtij udhëzimi, Doganës së Kosovës i është hequr kompetenca për vlerësimin e cilësisë së naftës me rastin e importimit dhe futjes në territorin doganor të Kosovës, të cilën deri në miratimin e këtij akti nënligjor të kundërligjshëm e kryente Dogana pa kosto shtesë.
Aktakuza thotë se kjo çështje me këtë vendim ka kaluar te operatorët ekonomikë privatë dhe si rrjedhojë e kësaj në një proces jotransparent dhe të parregullt të zbatuar nga MTI, me vendimin e 30 dhjetorit 2020 kishte emëruar kompaninë zvicerane OE “Sicpa SA” si trupë që do të kryente shënjimin dhe monitorimin e derivative të lëngëta të naftës.
Ndërsa, thuhet se më 14 janar 2021, kishte nëshkruar kontratën me këtë OE, nga e cila ishte dëmtuar interesi publik në shumën 11 milionë e 235 mijë e 706 euro e 31 centë, duke krijuar kosto shtesë të produkteve të derivateve të naftës me qëllim përfitimi për kompaninë private dhe duke rritur çmimin final të karburanteve për konsumatorët në tregun e Republikës së Kosovës, si dhe duke e ekspozuar shtetin ndaj rreziqeve nga inicimi i procedurave ligjore me bazë kontraktore.
Me këto veprime, Krasniqi akuzohet se ka kryer veprën penale “Keqpërdorimi i pozitës apo autoritetit zyrtar” nga neni 414, par.2 lidhur me par.1 të Kodit Penal.
Kurse, Endrit Shala akuzohej se në cilësinë e ministrit të Tregtisë dhe Industrisë, me dashje dhe dijeni, nuk e ka përmbushur detyrën zyrtare në mënyrë që të përfitojë dobi pasurore personi tjetër.
Në aktakuzë thuhet se duke i anashkaluar dispozitat e Ligjit për Parandalimin e Konfliktit të Interesit në ushtrimin e funksionit publik, ka nënshkruar përkatësisht miratuar vendimin me të cilin operatori ekonomik “Euro Inspekt” dhe emri i biznesit Valdet S.Teneqja, është emëruar si trupë inspektuese për vlerësimin e karburanteve të lëngëta të naftës në Kosovë, e cila kompani është në pronësi të Valdet Teneqes, të cilin sipas aktakuzës, Shala e ka baxhanak.
Me këtë veprim, thuhet se i ka mundësuar atij dhe biznesit në pronësi të Teneqes, realizimin e dobisë pasurore në lartësi 732 mijë e 642 euro e 28 centë.
Andaj, për këto veprime, Shala ngarkohej se ka kryer veprën penale “Keqpërdorimi i pozitës apo autoritetit zyrtar” nga neni 414, par.2 lidhur me par.1 të Kodit Penal.
Përmes kësaj aktakuze, prokurori special Milot Krasniqi ka kërkuar që ndaj të akuzuarve krahas dënimit kryesor të shqiptohet edhe dënimi plotësues- Ndalimi i ushtrimit të funksionit në administratën publike ose në shërbim publik.
Ndryshe, Shala ishte ministër i Tregtisë dhe Industrisë në periudhën 2018-2020, kurse Krasniqi në periudhën qershor 2020- mars 2021.
Një incident fizik dyshohet se ka ndodhur në një stadium në Pejë, ku janë përfshirë një zyrtar policor dhe një ish-polic.
Rastin e ka konfirmuar për Gazetën Enigma zëdhënësi i Prokurorisë Themelore në Pejë, Shkodran Nikçi, i cili ka bërë të ditur se lidhur me ngjarjen janë njoftuar edhe Inspektorati Policor i Kosovës (IPK) dhe Policia e Kosovës.
Sipas tij, është iniciuar rast dhe po ndërmerren veprime hetimore për zbardhjen e plotë të rrethanave të incidentit.
Hetimet janë duke vazhduar për të sqaruar motivet dhe përgjegjësitë e të përfshirëve në rast.
Kandidatja e Lidhjes Demokratike të Kosovës (LDK) për deputete, Alisa Jetullahu, ka reaguar pas deklaratës së gazetarit dhe kryeredaktorit të ATV-së, Leart Hoxha, i cili tha në emision televiziv se e din një rast kur një kandidate për deputete ka shpenzuar rreth 250 mijë euro për t’u bërë deputete.
Përmes një postimi në “Facebook”, Jetullahu kërkoi nga Hoxha të sqarojë deklaratën e tij dhe të bëjë publike faktet nëse aludimet lidhen me të.
Postimi i saj i plotë:
“Në një emision, gazetari Leart Hoxha, kryeredaktor në ATV, deklaroi se ai e di një rast kur një kandidate për deputete ka shpenzuar rreth “çerek milion euro” për t’u bërë deputete.
Si gazetar, e veçanërisht si kryeredaktor në një medium jo të vogël, ai, derisa supozohet se i mëson gazetarët e deskut të tij se duhet për secilin informacion të kenë faktim të deklarimeve e për më tepër nga dy-tre burime dhe se duhet të jenë konkret, preciz, të saktë e të qartë, vetë Hoxha në deklaratë nuk u tregua as konkret, as i saktë, as preciz e as i qartë.
Por, derisa emër nuk përmendi, kjo deklaratë për mua nuk nënkuptonte asgjë, përveç njohje të faktit se gazetaria më të vërtetë sot ka probleme, kur një kryeredaktor flet pa të dhëna konkrete në emision. Megjithatë, më vonë, pash një organizim të strukturuar duke aluduar se Hoxha e kishte për mua kur po fliste.
Prandaj, shtyhem të reagoj. Së pari, unë absolutisht e kam ditur sa terren i vështirë është politika. Veçanërisht për vajza e gra të reja. Jo rastësisht, ne ende na duhet kuotë për të garuar, sepse ekziston një strukturë e tërë e ndërtuar mirë, me tone patriarkale, që e ka angazhim të vazhdueshëm luftën sepcifikisht e veçanërisht kundër grave në politikë. Jo rastësisht, deri me 80 për qind e grave janë të papuna në Kosovë.
Jo rastësisht, gratë paguhen më pak për punë të njëjtë si burrat në Kosovë. Jo rastësisht, derisa diplomojnë çdo vit shumë më shumë gra se burra, vazhdojnë të punësohen shumë më shumë burra se gra. E kjo çfarë po them unë nuk është viktimizim. Ky është fakt. E di çdo grua.
E di edhe unë. Pikërisht se e di kam dashur të futem në politikë që të lëvizë një gur, sado të vogël, në përmirësimin e këtyre statistikave që për gratë nuk janë veç të dhëna, por jetë e vështirë e përditshme.
Tani, kërkoj nga Leart Hoxha, ta konkretizojë deklarimin e tij. Ta thotë me emër se a bëhet fjalë për mua në atë çfarë ai e tha si thashethem në studio. Kërkoj nga ai të publikojë fakte, të dhëna.
Të përmend emra. Dhe këto t’i bëjë në publik vullnetshëm, sepse në Gjykatë do të jetë i detyruar, pasi unë, në momentin që ai e konkretizon se e kishte për mua, do të procedojë me padi për shpifje. Si përfundim, në këtë situatë unë nxjerr diçka pozitive.
Kur e vërteta të flitet, të faktohet e të jetë prezente publikisht, do të kuptohet se nuk kishte asgjë nga aludimet në raport me mua, por në anën tjetër unë do jem person më i njohur publikisht e njohja më e gjerë në politikë gjithmonë është e mirëseardhur.
Falënderoj të gjithë ata që më kanë votuar në zgjedhjet e fundit. Vërtetë nuk janë pak e jam fort mirënjohëse.
Nuk e marrë për të garantuar asnjë votë. Dhe i siguroi, se situata e fundit ishte veç forcim shtesë i bindjes time që e kisha edhe më herët, se lufta ime për gra të forta e të barabarta duhet të vazhdojë e terreni pa diskutim është politika. Me respekt,E juaja Alisa.”, ka shkruar ajo.
Ka ndërruar jetë biznesmeni i njohur nga Mitrovica, Hilmi Brahimi.
Ai ishte emër i njohur në biznesin kosovar, duke qenë njëri nga pronarët e HEBS Kosova.
Familjarët kanë bërë të ditur se varrimi i të ndjerit do të bëhet sot, në ora 20:22, në varrezat e Shipolit në Mitrovicë.
Një konflikt familjar në fshatin Kobaj të Prizrenit ka përfunduar me një viktimë dhe disa të arrestuar, mes tyre edhe nëna e të dyshuarit.
Zëdhënësi i Policisë për rajonin e Prizrenit, Shaqir Bytyqi, për Sinjalin ka konfirmuar se e dyshuara është arrestuar nën dyshimin për veprën penale “Shtytje në vrasje”.
Rasti tragjik ka ndodhur pasi Albion Osmanaj, 27 vjeç, ka humbur jetën pasi është goditur me thikë nga kushëriri i tij, ndërsa babai i viktimës ka mbetur i lënduar.
Sinjali raporton se në total janë ndaluar tre persona lidhur me këtë rast, përfshirë edhe nënën e të miturit, e cila dyshohet për veprën penale “Shtytje në vrasje”.
Me vendim të Prokurorit kujdestar, e dyshuara është ndaluar për 48 orë, ndërsa hetimet për zbardhjen e plotë të rrethanave të ngjarjes po vazhdojnë.
Juristi Ali Sefaj ka publikuar letrën që kryeministri në detyrë Albin Kurti la në librin e përkujtimeve për komandantin Sahit Jasharin, shkruan GazetaDemos.
Ai kritikoi Kurtin për shkrimin duke thënë se “kryeministri arrin të shkruajë disa rreshta të zbehtë, me formulime të paqarta, pa peshë historike, pa thellësi mendimi dhe pa ndjeshmërinë që kërkon një rast i tillë”.
“Kush dreqi na e shiti Albin Kurtin për intelektual? Sepse në këto pak rreshta mungon gjithçka që pret nga një intelektual: mendimi, artikulimi, kultura historike dhe ndjenja njerëzore”, shkruan Sefaj në Facebook.
Postimi i plotë:
Shënimi i kryeministrit Kurti në librin e zisë për komandant Sahit Jasharin është dëshmia ma e mirë qe e çmonton narrativën që prej vitesh përpiqen të na paraqesin Albinin si intelektual.
Po flasim për Sahit Jasharin, një nga themeluesit e UÇK-së, bashkëluftëtar i Adem Jashari, veprimtar i palodhur i çështjes kombëtare dhe një nga figurat që barti mbi supe jo vetëm luftën, por edhe kujtesën historike të saj. Një figurë që përfaqëson një kapitull të tërë të rezistencës shqiptare për çlirim.
E megjithatë, përballë një personaliteti të tillë, kryeministri arrin të shkruajë disa rreshta të zbehtë, me formulime të paqarta, pa peshë historike, pa thellësi mendimi dhe pa ndjeshmërinë që kërkon një rast i tillë. Teksti nuk arrin as të shpjegojë kush ishte Sahit Jashari, as pse jeta e tij ka rëndësi për historinë e Kosovës.
Intelektuali njihet kur përballet me historinë, jo kur mban fjalime politike. E kur përballë ke një nga themeluesit e UÇK-së dhe bashkëluftëtarët më të afërt të Adem Jasharit, ndërsa prodhon një tekst që ngjan me një formular administrativ, atëherë pyetja lind vetvetiu:
Kush dreqi na e shiti Albin Kurtin për intelektual? Sepse në këto pak rreshta mungon gjithçka që pret nga një intelektual: mendimi, artikulimi, kultura historike dhe ndjenja njerëzore.
Por nuk mund as nuk di të shkruash, për atë qe kurrë se ke ndjerë!
Sot në varrezat e fshatit Skijanë do të varroset futbollisti 24-vjeçar i KF Dukagjinit të Gjakovës, Bajram Rragamaj, i cili ka ndërruar jetë pas një sëmundjeje të rëndë.
Sipas njoftimit të familjes, ceremonia e varrimit do të nisë në orën 17:00.
I riu ishte pjesë e KF Dukagjinit dhe njihej si sportist premtues, ndërsa prej kohësh kishte qenë duke u përballur me një sëmundje të rëndë.
Familjarët dhe të afërmit kanë njoftuar se ai ishte duke luftuar me një tumor agresiv, të cilit nuk ka arritur t’i mbijetojë.
Ngushëllime për ndarjen e tij nga jeta janë shprehur nga familjarë, miq dhe figura publike, të cilët e kanë përshkruar atë si një të ri me ëndrra dhe potencial të madh.
Ceremonia e varrimit pritet të mbahet në prani të familjarëve, bashkëlojtarëve dhe qytetarëve që duan t’i japin lamtumirën e fundit.
