Ndalimi i transportit publik në Prishtinë, Murati del me këtë njoftim

Kryetari i Prishtinës, Përparim Rama,konfirmoi ndërprerjen e transportit publik nga dita e nesërme, për shkak të buxhetit të bllokuar.

Pas këtij lajmi, ministri në detyrë i Financave, Hekuran Murati, ka deklaruar se “Thesari e ka alokuar buxhetin e dhjetorit për Komunën e Prishtinës, që të paguheshin disa fatura për shërbime esenciale, siç ishte energjia elektrike”, por sipas tij, stafi i komunës së Prishtinës kishte përfunduar orarin e punës.

Reagimi i tij i plotë:

Të premten pasdite, Thesari e ka alokuar buxhetin e dhjetorit për Komunën e Prishtinës, para kohe, me idenë që të paguheshin disa fatura për shërbime esenciale, siç ishte energjia elektrike.

Mirëpo në fund të ditës, nga Thesari më njoftuan që përkundër alokimit, stafi i Komunës së Prishtinës kishin përfunduar orarin dhe nuk e kishin kryer asnjë pagesë, me arsyetimin se “i kryejmë të hënën”.

Fillimisht u habita, sepse kjo sjellje e tyre nuk përkonte me urgjencën që kishin paraqitur, kur kishin kërkuar alokim të parakohshëm.

Në vend se të paguanin faturat gjatë orarit të punës, Përparim Rama me nënkryetarët e tij kishin vendosur që të bëjnë propagandë anti-qeveri gjatë fundjavës, duke u ankuar për gjoja bllokadën.

Sepse po të paguanin faturat të premten, s’do të mund të vazhdonin propagandën të shtunën e të dielen.

Kjo e sqaron edhe arsyen pse Lumir Abdixhiku me deputetët tjerë të LDK-së nuk e votuan buxhetin për Prishtinën në Kuvend.

Sepse në mungesë të kauzave reale, paskan vendosur që të mos i kursejnë as qytetarët e Prishtinës, me shpresën që mos dikush rastësisht u beson se fajin e paska Qeveria.

Trafiku Urban me njoftim të rëndësishëm, ja kur do të rifillojë qarkullimi i autobusëve

Kryetari i komunës së Prishtinës, Përparim Rama, më herët ka njoftuar se nga nesër, trafiku publik nga Trafiku Urban do të ndërprehet për shkak të buxhetit të cilën nuk ia ka dhënë qeveria në detyrë, kryqytetit.

Lidhur me këtë çështje ka reaguar Trafiku Urban, duke thënë se do të ndërpritet qarkullimi i të gjitha linjave të trafikut urban.

Kurse për rifillimin e transporti është thënë se do të bëhet menjëherë pas lëshimit të mjeteve nga Ministria e Financave.

“Trafiku Urban” ka thënë se ndërmarrja ka bilanc pozitiv dhe stabilitet financiar, por sipas tyre, vonesat e Komunës së Prishtinës në shlyerjen e obligimeve ndaj Trafikut Urban, kanë ndikuar në krijimin e kësaj situate të paqëndrueshme.

Njoftimi i plotë:

Të nderuar qytetarë, Gjatë ditëve të fundit jeni njoftuar për vështirësitë financiare me të cilat po përballet ndërmarrja. Si pasojë e këtyre vështirësive dhe mungesës së karburanteve, përkundër vullnetit tonë, jemi të detyruar të ndërpresim qarkullimin e të gjitha linjave të Trafikut Urban, duke filluar nga e hëna, 24.11.2025.

Shprehim keqardhjen tonë të sinqertë për pasojat që kjo ndërprerje do t’ju shkaktojë. Qarkullimi do të rifillojë menjëherë pas lëshimit të mjeteve nga Ministria e Financave, të cilat i mundësojnë Komunës së Prishtinës të shlyejë obligimet e saj financiare ndaj ndërmarrjes.

Dëshirojmë të sqarojmë se ndërmarrja ka bilanc pozitiv dhe stabilitet financiar; megjithatë, vonesat e Komunës së Prishtinës në shlyerjen e obligimeve ndaj nesh kanë krijuar këtë situatë të paqëndrueshme.

Edhe një herë, u kërkojmë ndjesë qytetarëve për ndërprerjen e shërbimit të transportit publik, i cili do të mbetet i pezulluar deri në lëshimin e mjeteve./21Media

Bora mbulon edhe këtë pjesë të Kosovës, duke i dhënë pamje të mrekullueshme

Rugova e Pejës është zbardhur sot nga bora, duke krijuar pamje të bukura dimërore.

Qytetarët dhe banorët e asaj pjese kanë publikuar pamjet që ka marrë ku vend nga reshjet e para.

Rugova, e cila njihet për bukuritë e saj natyrore dhe për kanionin e thellë, ofron gjithmonë një pamje të bukur gjatë stinës së dimrit, duke u bërë kështu si vend i preferuar për shumë vizitorë qoftë vendor por edhe të huaj, për të kaluar pushimet dimërore por edhe për të shijuar skijimin.

Kujtojmë se meteorologët për sot kanë paralajmëruar reshje bore në viset malore për shkak të rënies së temperaturave.

Përparim Rama: Transporti publik ndalet nga nesër, buxheti ende i bllokuar

Kryetari i Prishtinës, Përparim Rama, në një konferencë për media ka ngritur shqetësime serioze për situatën financiare dhe institucionale në kryeqytet, duke thënë se qytetarët po rrezikohen si asnjëherë më parë, raporton Ekonomia Online.

“Në historinë e shtetit të Kosovës, rrallëherë kemi parë të rrezikohen qytetarët deri në këtë shkallë. Për herë të parë në historinë e Kosovës po ndodh që qeveria qendrore t’i bllokojë hyrat vetanake të Kryeqytetit, shërbime jetike të Kryeqytetit. Bëhet fjalë për funksione elementare për mirëqenien e fëmijëve dhe familjeve tona. Më shumë se një vit, në mënyrë të vazhdueshme dhe plotësisht me dispozitat ligjore kemi kërku alokimin e buxhetit që i duhet kryeqytetit, por buxheti i Prishtinës është bllokuar për çështje politike. Ne kemi dorëzuar kallëzim penal ndaj ministrit Murati për shkelje të ligjit; jemi drejtuar te kryeministri, te presidentja dhe te Gjykata Kushtetuese. Qytetarët e Prishtinës kanë mbetur pa paga”, tha Rama.

Ai bëri të ditur se situata ka arritur në pikën kritike, duke konfirmuar ndërprerjen e transportit publik nga dita e nesërme.

“Sapo e përfundova takimin me ndërmarrjen e transportit publik dhe, që nga nesër, transporti publik fatkeqësisht do të ndalet. Me keqardhje të thellë e them se nuk e kam besuar se qytetarët e këtij vendi do të viheshin në rrezik për shkak të çështjeve të biznesit”, theksoi ai.

Rama u bëri thirrje institucioneve qendrore që të ndërhyjnë menjëherë për të zhbllokuar situatën.

“Në cilësinë e kryetarit të kryeqytetit, qytetarët janë përcaktuar që unë ta drejtoj edhe për një mandat. Ju bëj thirrje të gjitha institucioneve, zyrtarëve dhe ministrave: veproni. Zgjedhjet kanë përfunduar, tani është koha t’u kthehemi punës”, shtoi ai.

Tentim-vrasje mes vëllezërve: Godet vëllain dy herë me thikë në qafë

Një incident i rëndë me pasoja serioze ka ndodhur të shtunën mbrëma në fshatin Gernqar të Komunës së Kllokotit, ku një person dyshohet se ka tentuar ta vrasë vëllain e tij pas një mosmarrëveshjeje familjare.

Ngjarja ka ndodhur më 22.11.2025 rreth orës 22:30, kur patrulla policore dhe ndihma e shpejtë janë njoftuar për një rast dhune në familje. Sipas të dhënave, i dyshuari Sasa Krcmarevic, pas një konflikti verbal me vëllain e tij S.K., ka nxjerrë një thikë dhe e ka goditur dy herë në qafë, duke i shkaktuar lëndime të rënda trupore.

Viktima është dërguar me urgjencë në Emergjencën e Spitalit Regjional në Gjilan, ku po vazhdon trajtimin mjekësor. Ndërkohë, i dyshuari është arrestuar në vendngjarje.

Lidhur me rastin është njoftuar prokurorja kujdestare për krime të rënda, e cila ka urdhëruar inicimin e rastit për veprat penale “Dhunë në familje” dhe “Vrasje në tentativë”, ndërsa i dyshuari është ndaluar për 48 orë.

Në vendin e ngjarjes kanë dalë edhe njësitë e hetimeve dhe forenzika regjionale, të cilat kanë kryer veprimet e nevojshme hetimore dhe kanë siguruar provat materiale.

Hetimet lidhur me rastin janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

E rëndë: Ndërron jetë në intensivë punëtori që mbeti pa oksigjen gjatë pastrimit të pusetës

Një ngjarje e rëndë me pasoja fatale është shënuar në Prizren, ku një punëtor ka humbur jetën pasi kishte mbetur pa oksigjen gjatë kryerjes së detyrës në vendin e punës.

Rasti lidhet me incidentin e ndodhur më 07.07.2025 rreth orës 12:40 në rrugën “Brigada 125”, ku viktima Besnik Hallaçi kishte qenë duke pastruar një pusete, kur për shkaqe ende të pasqaruara kishte mbetur pa oksigjen dhe është dërguar me urgjencë në Emergjencën e Spitalit Rajonal në Prizren.

Fillimisht rasti ishte iniciuar si “Asgjësim, dëmtim ose heqje e pajisjeve mbrojtëse dhe rrezikim i sigurisë në vendin e punës”, ndërsa dje është konfirmuar se viktima ka ndërruar jetë në repartin e kujdesit intensiv të Spitalit Rajonal në Prizren, si pasojë e gjendjes së rëndë shëndetësore.

Lidhur me rastin janë njoftuar të gjitha njësitë relevante dhe Prokurori i Shtetit, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion, me qëllim të sqarimit të plotë të rrethanave të vdekjes.

LDK nesër mban mbledhjen e kryesisë, nominon kandidatin për kryeministër

Lidhja Demokratike e Kosovës nesër pritet të caktojë kandidatin për kryeministër për zgjedhjet e 28 dhjetorit.

Mbledhja e Kryesisë së LDK-së do të nisë nga ora 15:00.

Si pikë e dytë e rendit të ditës është edhe nominimi i kandidatit të LDK-së për kryeministër.

Për zgjedhjet e 9 shkurtit të këtij viti, LDK-ja kishte Lumir Abdixhikun kandidat për kryeministër.

Situata me buxhetin në Prishtinë, Rama ndërmerr këtë veprim

Kryetari i Prishtinës, Përparim Rama, do të mbajë konferencë për media sot në ora 13:00.

Në njoftimin e komunës thuhet se arsyeja e konferencës është situata me buxhetin.

 

“Kryetari i Kryeqytetit, Përparim Rama, do të mbajë konferencë për media lidhur me situatën financiare të krijuar si pasojë e bllokadës nga Ministria e Financave. Konferenca do të mbahet sot, në ora 13:00, në sallën e konferencave, objekti i vjetër i Komunës.”

Bora e parë zbardhë këtë qytet shqiptar

Gjatë orëve të fundit, në lartësitë mbi 1200 metra në juglindje të Shqipërisë janë shënuar reshje dëbore, të cilat kanë prekur kryesisht zonat malore.

Më të evidentuara janë Maja e Biglës në Dardhë dhe zona e Shtyllës deri në majën e Mashkullores, ku trashësia e dëborës varion nga 5 deri në 10 centimetra.

Firmat kontraktore të mirëmbajtjes së rrugëve ndodhen në terren dhe po punojnë për pastrimin dhe qarkullueshmërinë e akseve, përfshirë edhe rrugën e Dardhës.

Dëborë është raportuar në pothuajse të gjitha zonat e thella malore të qarkut, por deri tani nuk evidentohen probleme me qarkullimin rrugor apo situata emergjente. Strukturat përgjegjëse po vijojnë monitorimin e situatës./euronews,al

Paralajmërohen përmbytje të mundshme në disa pjesë të Kosovës

Disa pjesë të Kosovës mund të përballen me përmbytje pasi parashikohen reshje të shiut të shtunën pasdite dhe të dielën, paralajmëroi Instituti Hidrometeorologjik i Kosovës.

Në një njoftim në Facebook, instituti tha se e ka ngritur alarmin në nivel të verdhë, i cili nënkupton se moti është “potencialisht i rrezikshëm”.

Derisa niveli i ujit në lumenj në gjithë vendin ka rënie tani për tani, pasi ato kishin dalë nga shtrati duke shkaktuar përmbytje në pjesë të vendit më herët gjatë javës, pritet të ketë sërish rritje të nivelit të ujit, thuhet në njoftim.

Reshje të shiut parashikohet të ketë në pjesët, lindore, verilindore, qendrore dhe jugore të vendit.

Ato pritet të ndikojnë në ngritjen e niveleve në Lumin Morava e Binçës me degën kryesore Kriva Reka, të cilat mund të shkaktojnë vërshime.

“Situata e tillë do të dominojë edhe në pjesë të tjera të vendit, sidomos pjesa veri-lindore (Pellgu i Llapit), qendrore (Sitnica) dhe jugore (Pellgu i Lepencit)”, thuhet në njoftim.

Ky paralajmërim vjen pasi në fillim të javës, kryeqyteti i vendit, Prishtina, e ndërpreu mësimin në të gjitha shkollat e qytetit të martën, si pasojë e reshjeve të mëdha të shiut dhe rrezikut nga përmbytjet.

Të hënën dhe të martën u raportua për vërshime të vogla në pjesë të vendit, të cilat nuk kanë shkaktuar viktima apo dëme të mëdha.

Kosova është përballur me përmbytje vitet e fundit, të cilat kanë shkaktuar kryesisht dëme materiale.

Vlerësohet se dëmtimi i shtretërve të lumenjve, si pasojë e nxjerrjeve të paligjshme të zhavorrit, kontribuon shumë në përmbytjen e zonave.