Këtu mund ta gjeni qendrën tuaj të votimit

Komisioni Qendror i Zgjedhjeve ka njoftuar të gjithë qytetarët me të drejtë vote se përmes platformës elektronike https://qv.kqz-ks.orgmund të kontrollojnë me lehtësi se ku është Qendra e Votimit ku është caktuar të votojë.

Bëhet e ditur se për t’u qasur në platformën e KQZ-së, votuesi duhet të shënojë numrin personal të Republikës së Kosovës dhe datën e lindjes.

“Pas kësaj menjëherë do të hapet një faqe e re që do të shfaq të dhënat e votuesit, përfshirë adresën e saktë të Qendrës së Votimit ku është caktuar të votojë, e cila mund të shikohet përmes GoogleMap”.

Paralajmërohet rritja e pensionit në 250 euro

Kandidati i PDK-së për Kryeministër, Bedri Hamza, ka vazhduar me fjalimin e tij në tubimin përmbyllës të fushatës.

“Gjatë kësaj fushate kam takuar mijëra qytetarë. Kam pasur biseda të këndshme, por edhe të rënda. Megjithatë, një takim nuk do ta harroj kurrë. Një pensionist më tha: “Unë nuk kërkoj luks. Dua vetëm të mos detyrohem që të zgjedh mes ilaçeve dhe ushqimit”. Ky nuk është rasti i vetëm që e kam dëgjuar në këto takime. Sepse, kjo është përditshmëria e shumë familjeve në Kosovë. Frikë nga e tashmja dhe nga e ardhmja. Unë e di çfarë do të thotë ta presësh fundin e muajit. E di çfarë do të thotë t’i numërosh shpenzimet. Të mendosh për faturat, për ushqimin, për shkollën e fëmijëve. Dhe pikërisht për këtë arsye unë dhe Partia Demokratike e Kosovës po e kërkojmë besimin tuaj, votën tuaj. Sepse, ju kuptojmë dhe kemi përgjigje për ju, kemi zgjidhje për ju. Ne nuk premtojmë mrekulli. Por premtojmë vendime të drejta dhe të ndjeshme në xhepin e qytetarit”, ka thënë Hamza.

Ai ka premtuar rritje 50% të pagave, që puna të shpërblehet me dinjitet. Rritje 50% e pensioneve dhe ndihmave sociale, sepse, siç ka thënë Hamza, askush nuk duhet të jetojë në pasiguri.

Hamza ka thënë se pensioni më i ulët do të jetë 250 euro.

“0% TVSH për produktet esenciale, që shporta e familjes të jetë më e përballueshme. 0% TVSH për energjinë elektrike, që fatura të mos jetë barrë. Ulje të tatimit në të ardhura, që më shumë para të mbeten tek ju. Këto janë vendime që ua ndryshojnë jetën. Por, këto ndodhin vetëm nëse ju dilni dhe votoni për Partinë Demokratike të Kosovës”, ka thënë Hamza.

E rëndë: Djali 21-vjeçar e kap për fyti nënën dhe e rrah

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë është regjistruar mbrëmjen e 26 dhjetorit 2025 në rrugën “Knjaz Milos” në Mitrovicë të Veriut, ku një djalë dyshohet se ka ushtruar dhunë fizike ndaj nënës së tij.

Sipas informatave që ka mësuar Sinjali, rreth orës 18:30, viktima B. B, rreth 40-vjeçare ka raportuar se derisa ndodhej në banesën e saj, djali i saj D. B., rreth 21-vjeçar kishte ardhur dhe kishte fjetur. Pas zgjimit, i dyshuari kishte filluar të bërtasë dhe të kërkojë para, ndërsa situata kishte eskaluar në momentin kur viktima ka tentuar të kërkojë ndihmë nga Policia.

Burimet bëjnë me dije se në atë moment, i dyshuari e ka kapur nënën për fyti dhe e ka shtyrë, duke i shkaktuar frikë dhe shqetësim serioz.

Pas pranimit të informatës, njësitë policore kanë ndërmarrë veprime operative dhe kanë arritur ta lokalizojnë dhe arrestojnë të dyshuarin. Gjatë testimit me alkool, tek D. B është konstatuar 1.52 promilë alkool në gjak.

Në koordinim me hetuesen për dhunë në familje dhe Prokurorin kujdestar të Shtetit, rasti është iniciuar si “Sulm”, ndërsa i dyshuari është dërguar në mbajtje.

Hetimet lidhur me rastin janë duke vazhduar.

E trishtë: Ky është 64-vjeçari që u gjet pa sheja jete

Gazeta Sinjali ka mësuar se Shukri Peci, rreth 64-vjeçar është personi që u gjet pa shenja jete në rrugën ‘Miran Hajra’, në Mitrovicë të Jugut.

Në vendin e ngjarjes kanë dalë njësitet përkatëse, ndërsa ekipi mjekësor ka konstatuar vdekjen e viktimës.

Po ashtu, me vendim të prokurorit, trupi i pa jetë dërgohet në IML për obduksion.

Mot i ftohtë dhe reshje bore gjatë ditës së sotme

Instituti Hidrometeorologjik bën të ditur se në fundjavë do të mbajë mot i vranët dhe me intervale me diell, ndërkaq temperaturat do të jenë në minus.

IHK thekson se të shtunën do të mbajë vranësirat në viset e larta malore parashihen të sjellin riga dhe fjolla të dobëta bore.

Temperaturat minimale do të lëvizin ndërmjet -3 deri -1 grade Celsius, ndërsa maksimalet e ditës parashihen të lëvizin ndërmjet 2-4 gradë Celsius.

Do të fryjë erë e lehtë deri mesatare nga drejtimi i veriperëndimit.

Ndërkaq, edhe të dielën parashihet të mbajë mot kryesisht i ngjashëm por me temperatura më të ulëta, kryesisht ato minimalet.

Temperaturat minimale parashihen të lëvizin ndërmjet -2 deri -6 gradë Celsius, ndërsa maksimalet e ditës parashihen të lëvizin ndërmjet 0-3 gradë Celsius.

Do të fryjë erë kryesisht nga veriperëndimi e lehtë deri mesatare.

Zgjedhjet e 28 dhjetorit, Mehmetaj del me projeksion: Kaq deputetë do t’i fitojë LVV

Analisti politik dhe gazetari i njohur, Lirim Mehmetaj ka bërë publike parashikimet e tij për përbërjen e Kuvendit të Kosovës pas zgjedhjeve të 28 dhjetorit, duke dhënë shifra konkrete për secilën parti politike.

Në një paraqitje në emisionin “Debat Plus”, Mehmetaj deklaroi se, bazuar në trendet aktuale elektorale, sondazhet në terren dhe lëvizjet e votuesve në ditët e fundit të fushatës, rezultati final pritet të jetë si vijon: Lëvizja Vetëvendosje me 45 deputetë, PDK me 25, LDK me 21 dhe Aleanca për Ardhmërinë e Kosovës me 9 deputetë.

Sipas Mehmetajt, këto shifra tregojnë se Vetëvendosje do të mbetet forca e parë politike në vend, por pa arritur shumicën e nevojshme për të qeverisur e vetme. Ai theksoi se rritja e pjesëmarrjes në zgjedhje, veçanërisht nga diaspora, do të ketë ndikim të drejtpërdrejtë në shpërndarjen e mandateve.

Kadri Kryeziu: Këto do të jenë rezultatet e partive politike më 28 dhjetor

Juristi i njohur, Kadri Kryeziu ka dhënë një projekcion të rezultateve të zgjedhjeve të jashtëzakonshme të 28 dhjetorit, duke u bazuar në sondazhe dhe vlerësime konfidenciale që, sipas tij, përdoren edhe nga qarqet ndërkombëtare.

Kryeziu thekson se pjesëmarrja në zgjedhje pritet të jetë më e lartë krahasuar me zgjedhjet e shkurtit, ku kishin votuar rreth 46.5 për qind e qytetarëve. Sipas tij, më 28 dhjetor pritet që pjesëmarrja të arrijë nga 49 deri në 52 për qind.

“Rritja e pjesëmarrjes lidhet kryesisht me praninë e votuesve nga diaspora, të cilët kanë ardhur në vend për festat e fundvitit dhe pritet të shfrytëzojnë të drejtën e votës,” ka shkruar Kryeziu, transmeton Gazeta Imazhi.

Sa i përket rezultateve, ai paraqet këto projeksione elektorale:

• Lëvizja Vetëvendosje: 47–51 për qind
• Partia Demokratike e Kosovës (PDK): 20–22 për qind
• Lidhja Demokratike e Kosovës (LDK): 17–19 për qind

Sipas Kryeziut, këto shifra reflektojnë trendet aktuale politike dhe lëvizjet e elektoratit në prag të zgjedhjeve.

Analiza e plotë, e cila përfshin të dhëna më të detajuara nga sondazhet dhe vlerësimet konfidenciale, është publikuar në seksionin e komenteve.

Murati jep lajmin e madh – 3 vendime të reja, përfitues të gjitha familjet

Ministri i Financave, Punës dhe Transfereve, Hekuran Murati, ka njoftuar për masa të reja mbështetëse që do të zbatohen qysh në fillim të mandatit të ardhshëm të Qeverisë Kurti 3.

Përveç shtesës së njëhershme prej 100 eurosh për fëmijët dhe pensionistët, Murati bëri të ditur se do të ketë edhe mbështetje financiare për studentët, të punësuarit në sektorin privat, si dhe rikthim të masës për subvencionimin e qytetarëve që kursejnë energjinë elektrike.

Sipas tij, këto masa do të jenë pjesë e Pakos për Përballje me Inflacionin 2.0, e cila pritet të miratohet ndër pesë vendimet e para të Qeverisë Kurti 3, me synim lehtësimin e barrës ekonomike për qytetarët përballë rritjes së çmimeve.

LAJMI I FUNDIT: Ekzekutohen nga 100 euro për këtë kategori

Ministria e Financave, përkatësisht Thesari i Shtetit ka ekzekutuar subvencionet prej 100 euro.

Burimet marrin vesh se studentët kanë pranuar në llogaritë e tyre shumën prej 100 eurove.

Grupi i parë i studentëve ka pranuar pagesën para disa javësh.

Ndërsa, sot janë ekzekutuar për grupin e dytë.

“Nuk do të përsëritet asnjë veprim më”, zbutet në gjykatë militanti i Kurtit që kërcënoi Klan Kosovën

Valton Hasani, militanti i Lëvizjes Vetëvendosje, i arrestuar për kanosje ndaj stafit të mediumit Klan Kosova, ka kërkuar falje në seancën dëgjimore të mbajtur ndaj tij.

Ai ka kërkuar po ashtu që të mos i caktohet masa e sigurisë me paraburgim, pasi është kryefamiljar

Mes tjerash, Hasani thotë se nuk do e përsërisë asnjëherë më këtë veprim.

“I pandehuri Valton Hasani në seancën dëgjimore të mbajtur, ka theksuar se “E mbështes deklarimin e avokatit, dua të shtoj se jam 24/7 i gatshëm për të u paraqitur në organet e rendit siç jam paraqitur për herë të parë në ora 16:30 pasi që jam kthyer nga Italia dhe po e pranoj sa kam sha e kam fyer, por kur e kam parë lajmin që më kanë quajtur sekser edhe në afekt kam sharë e kam fyer, mirëpo asnjëherë s’kam kërcënuar askënd. Kërkoj falje të dëmtuarit Adriatik Kelmendit dhe mediumin në të cilin ai punon, Klan Kosova, të cilët i kam bërë tag në statusin tim dhe nuk do të përsëritet asnjë veprim më. I propozoj gjykatës që të më lirojë se jam kryefamiljar dhe të mos më caktojë masën e paraburgimit dhe më punën time mbaj familjen dhe çdo herë që më thirrni jam i gatshëm të përgjigjem”, thuhet në vendimin e Gjykatës Themelore mbi çështjen e caktimit të masës së sigurisë.

Gjykata Themelore e Prishtinës e ka hedhur poshtë kërkesën e prokurorisë për paraburgim me arsyetimin se është e pabazuar.

Ndërkohë, vet Hasani kishte njoftuar për lirimin e tij, dy ditë pas ndalimit të tij për 48 orë.

“Ju Pershendet Militaniti i Sapo Liruar e Kismet me 28 +50% Respekt e VVazhdojme..”, ka shkruar ai.

Hasani prej kohësh ka bërë postime të ndryshme në faqen e tij në Facebook, përmes të cilave ka ushtruar mashtrim dhe kërcënime.

Megjithatë, Valton Hasani, i cili në profilin e tij shfaqet si admirues dhe i fiksuar pas kryeministrit në detyrë, Albin Kurti, ka përdorur termin “Klan Serbia” në disa mesazhe që dukeshin të drejtuara ndaj udhëheqësit të Lëvizjes Vetëvendosje, të cilit i referohet si “babë”.

Mesazhet e Hasanit pasuan një lajm të publikuar nga Klan Kosova tre ditë më parë, ku televizioni raportoi për dallaveret në konkursin e “Ibër-Lepencit”, duke iu referuar si sekserë Dejona Mihalit dhe ministres në detyrë, Artane Rizvanolli.

Valton Hasani u arrestua për veprën penale të kanosjes më 20 dhjetor të këtij viti.

“Me urdhër të Prokurorit të Shtetit, është arrestuar një person për një kohëzgjatje prej 48 orësh, pasi i njëjti dyshohet se ka kryer veprën penale ‘Kanosje’, në bazë të nenit 181 të Kodit Penal të Republikës së Kosovës. Prokurori i shtetit ndodhet në fazën e ndërmarrjes së veprimeve konkrete hetimore, në bashkëpunim me institucionet e tjera relevante”, thuhej në njoftimin e Prokurorisë.