Prebreza paralajmëron ndëshkime ligjore për zyrtarët e komunës së Fushë Kosovës: Në këto vërshime, askush nuk po iu përgjigjet qytetarëve për ndihmë

Kryetari në ardhje i Fushë Kosovës, i cili ka fituar garën në balotazh në këtë komunë, Valon Prebreza ka shkruar në lidhje me gjendjen pas vërshimeve në këtë komunë.

Ai ka thënë se duhet një reagim urgjent, pasi sipas tij askush nga zyrtarët e Komunës së Fushë Kosovës nuk po iu përgjigjen qytetarëve për të ndërmarrë veprime që u’a lehtësojnë situatën.

Ai ka paralajmëruar ndëshkime ligjore.

Postimi i plotë: 

REAGIM URGJENT!

Kjo është një papërgjegjsi totale e cila nuk do të kalojë pa ndëshkime ligjore.

Në këto momente të vështira nga kushtet atmosferike, shumë familje po ballafaqohen me probleme të mëdha dhe më vërshime.

Askush nga zyrtarët e Komunës së Fushë Kosovës nuk po i’u përgjigjen qytetarëve për të ndërmarrë veprime që u’a lehtësojnë situatën.

Me këtë rast apeloj tek të gjitha familjet për kujdes dhe nga operatorët e kontraktuar që të reagojnë menjëherë!

Kajtazi: VV veç nëse flet me Radoiçiqin se ndryshe s’ka kush ia bën votat

Gazetari Vehbi Kajtazi në Rubikon të Klan Kosova tha se deklarata e Bedri Hazmës sa u përket vijave të kuqe, po lexohet gabim.

“Unë mendoj se Hamza po flet për një proces pas zgjedhjeve që mund të mbahen tash. Bedri Hamza është politikan me shumë përvojë, prandaj Kurti nuk mund ta ketë përshtypjen e gabuar se merret vesh lehtë me të”, tha Kajtazi në Rubikon të Klan Kosovës.

Duke folur për mundësinë e një koalicioni PDK-LVV, Kajtazi tha se beson se kushdo që i jep shans Kurtit për të udhëhequr nga pozita e kryeministrit nuk ia do të mirën vendit, derisa shtoi se gjasat që Glauk Konjufca t’i sigurojë votat në seancën e nesërme janë minimale.

“Kisha pasë qejf me e pa Konjufcën kryeministër për shkak të respektit që e kam për të, është i ndershëm, për këtë arsye një qeveri e zotit Konjufca do të ishte interesante, por ku po do me i marrë votat? Veç nëse flasin me Milanin (Radoiçiqin) përndryshe nuk ka kush me ia ba”, tha Kajtazi.

Zhvillimet në kufirin Kosovë-serbi, reagon KFOR-i

Misioni Paqembajtës i NATO-s në Kosovë, KFOR-i, në një përgjigje me shkrim për Nacionale është deklaruar rreth disa zhvillimeve në kufirin Kosovë – Serbi, përçka Beogradi zyrtar me maçineri të tabloideve, portaleve dhe teevizioneve me frekuencë kombëtare e ka paraqitur për “sulm të armatosur shqiptar ndaj një baze ushtarake serbe” dhe e ka shpërndarë masivisht. Policia e Kosovës e ka demantuar menjëherë për dezinformatë ndërsa tregoi i vetmi rast i shënuar është arrestimi i katër personave gjuetarë, shtetas të Serbisë, të cilët ilegalisht kishin hyrë në territor të Kosovës. KFOR-i tha se po monitoron situtatën nga afër dhe “nuk pati rol në arrestime” ndërsa citoi hetimin që janë duke kryer autoritetet e Kosovës. Për këtë hetim, KFOR-i na tha se “është e rëndësishme që të ec para” dhe që, në ndërkohë, “të mos merren veprime dhe të mos bëhen deklarata që mund të çojnë në rritje të tensioneve të panevojshme”.

…

“KFOR-i po e monitoron situatën nga afër. Misioni ynë nuk ka mandat për zbatimin e ligjit dhe nuk kishte asnjë rol në arrestime. Policia e Kosovës dhe institucionet në Kosovë kanë nisur një hetim për çështjen. Prandaj, ju referojmë atyre për çdo koment. Është e rëndësishme që ky hetim të ecë përpara dhe të mos ndërmerren veprime dhe të mos bëhen deklarata që mund të çojnë në ndonjë rritje të panevojshme të tensioneve. Kjo është çelësi për të mbrojtur sigurinë në të gjithë Kosovën dhe stabilitetin rajonal. KFOR-i vazhdon të zbatojë mandatin e tij të gjatë të OKB-së, duke kontribuar në një mjedis të sigurt për të gjithë njerëzit që jetojnë në Kosovë, në koordinim të ngushtë me Policinë e Kosovës dhe Misionin e BE-së për Sundimin e Ligjit (EULEX), në rolet e tyre përkatëse si reagues të sigurisë”, tha KFOR për Nacionale.

Policia e Kosovës ka hedhur poshtë pretendimet e disa mediave serbe, sipas të cilave një “grup i armatosur shqiptarësh ka hapur zjarr ndaj pjesëtarëve të ushtrisë serbe pranë bazës ‘Debela Glava’”. Në një njoftim zyrtar të publikuar të hënën, institucioni i sigurisë i cilësoi këto raportime si “dezinformata, të pabazuara dhe që nuk korrespondojnë me asnjë informacion zyrtar apo ngjarje të verifikuar”.

Sipas Policisë së Republikës së Kosovës, të gjitha të dhënat operative dhe raportimet nga njësitë policore në terren tregojnë se “nuk është regjistruar asnjë incident i karakterit të pretenduar”. Policia e Kosovës tha se publikimi i lajmeve të pasakta “kontribuon në krijimin e perceptimeve të rreme dhe rritjen e tensioneve të panevojshme në zonat kufitare.”

Policia njoftoi se situata përgjatë vijës kufitare ka qenë e qetë dhe “plotësisht nën kontroll të autoriteteve”. Megjithatë, gjatë operacioneve rutinë, njësitë policore kanë arrestuar katër shtetas serbë të dyshuar për “kallim ilegal të vijës kufitare dhe armëmbajtje pa leje”. Të dyshuarit, të identifikuar si gjuetarë që kishin hyrë nga territori i Serbisë në Kosovë, janë dërguar në mbajtje me vendim të organeve kompetente të drejtësisë, ndërsa armët dhe municioni u konfiskuan.

Policia u bëri thirrje mediave që të mbështeten në burime të verifikuara dhe të shmangin publikimin e informacionit të pakonfirmuar, duke theksuar se lajme të tilla mund të ndikojnë negativisht në rendin dhe sigurinë publike.

“Policia e Kosovës mbetet e përkushtuar në garantimin e sigurisë së përgjithshme, zbatimin e ligjit dhe ruajtjen e rendit publik për të gjithë qytetarët e Republikës së Kosovës”, thuhet në njoftim.

A kanë ndryshuar mendje? LDK-ja tregon qëndrimin final për Konjufcën kryeministër

Të mërkuren pritet të hidhet në votim propozimi për formimin e Qeverisë së re të udhëhequr nga Glauk Konjufca.

Deputeti i LDK-së, Arben Gashi, deklaroi sonte në emisionin Politiko se partia e tij nuk do të japë votat për një Qeveri të udhëhequr nga Konjufca.

“LDK nuk e voton Qeverinë Konjufca,” theksoi Gashi, duke e bërë të qartë qëndrimin e subjektit të tij politik.

Ai gjithashtu kritikoi thirrjen e seancës së parë të parashikuar për buxhetin, duke e cilësuar atë shkelje të Kushtetutës.

Lista Serbe e vetmja parti që mund të ia sigurojë VV-së kuorumin për seancën e buxheti

Lëvizja Vetëvendosje, ka thirrur për të mërkurën dy seanca të jashtëzakonshme.

Seanca e parë, me fillim nga ora 11:00 është thirrur për Buxhetin e vitit 2026 dhe tetë pika të tjera të rendit të ditës.

Lëvizja Vetëvendosje ka kërkuar mbështetjen e partive politike për të miratuar buxhetin.

Megjithatë, partitë shqiptare të përfaqësuara në Kuvendin e Kosovës refuzojnë të marrin pjesë në këtë seancë.

Lidhja Demokratike e Kosovës thotë se nuk bëhet pjesë e “imponimit teatral”.

Partia Demokratike e Kosovës, Aleanca për Ardhmërinë e Kosovës e NISMA, vetëm kanë njoftuar se nuk do të marrin pjesë.

Për të nisur punimet e kësaj seance, duhet të ketë kuorum që garantohet me pjesëmarrjen e 61 deputetëve.

“Kuvendi ka kuorum kur janë të pranishëm më shumë se gjysma e deputetëve të Kuvendit”, thuhet në Rregulloren e Punës së Kuvendit të Kosovës.

Me mospjesëmarrjen e katër partive shqiptare, Vetëvendosjes, kuorumin mund të ia bëjë vetëm Lista Serbe e cila nuk është deklaruar ende nëse do të marrë pjesë në seancën e orës 11:00.

Nëse as Lista Serbe nuk merr pjesë të mërkurën paradite në seancë, atëherë, nuk do të ketë kuorum për mbajtjen e seancës së jashtëzakonshme, pasi në sallë do të jenë vetëm deputetët e Vetëvendosjes dhe ata të pakicave joserbe, që janë të pamjaftueshëm për të vazhduar me punimet e seancës.

Seanca tjetër është thirrur për orën 14:00 e në rend dite ka vetëm një pikë, atë të votimit të qeverisë me mandatarin e dytë, Glauk Konjufcën.

Rama i reagon Muratit: Kosova shumë shpejt do ta ketë kryeministrin e saj, Lumir Abdixhikun

Kryetari i Prishtinës, Përparim Rama, ka reaguar ndaj deklarimeve të ministrit Hekuran Murati, duke i kujtuar se kryeqyteti ka institucionet e veta legjitime dhe se përçarjet nuk i ndihmojnë askujt.

Rama thotë se Prishtina e ka kryetarin dhe se LDK-ja ka fituar mandatin e qytetarëve, ndërsa shprehet i bindur se së shpejti edhe Kosova do ta ketë kryeministrin e ri, Lumir Abdixhikun.

Ai e akuzon Muratin dhe Qeverinë se po përpiqen të krijojnë tensione politike, por thekson se LDK nuk bie në të njëjtin nivel.

“Ne ju shohim, ju lexojmë, por nuk biem në nivelin tuaj. Thjesht punojmë dhe fitojmë. Ashtu siç e fituam kryeqytetin dy herë,” shkruan Rama.

Kryetari i Prishtinës thekson se LDK ka besimin e qytetarëve, ndërsa, sipas tij, ajo që ka Murati është një kallëzim penal dhe një çështje në Gjykatën Kushtetuese për, siç e quan ai, një bllokim të pajustifikueshëm të kryeqytetit, për të cilin thotë se do të ketë përgjegjësi “sot apo nesër”.

Hisen Berisha: Fatmir Sheholli ka ardhë më ka folë, kam mendu që ishte mërgimtar

Përmes një interviste në emisionin Kosova Live në T7, Hisen Berisha kanfolur për raportin e tij me Fatmir Shehollin e ku tha se ka qenë vetëm njohje e thjeshtë, e krijuar në mënyrë krejt të rastësishme.Berisha theksoi se nuk kanë pasur kurrë marrëdhënie bashkëpunimi apo takime të organizuara.

Ai tregoi se të gjitha kontaktet kanë ndodhur spontanisht, në vende publike dhe gjithmonë me iniciativë të vetë Shehollit

.Ai shtoj se në një nga këto takimet spontane të tyre tek kafja e lagjës, Sheholli kishte kërkuar të bënin një foto bashkë e ku më pas kishte bërë simbolin e shqiponjës gjë që atëherë Berishën e kishte bërë ta mendonte se Sheholli isht një person nga diaspora, pasi siq tha ai: “ zakonisht mërgimtarët bojnë foto me shqiponjë”.

Ndërkaq në një prej takimeve i njejti i kishte thënë: “Une jam UDBASH”, gjë që për Berishën kishte qenë komplet e pa pritur nga ana e tij.

VIDEO:

PDK, LDK dhe AAK në sinkron me njëra-tjetrën: Nuk marrin pjesë në seancën për buxhetin

Rendi kushtetues një gjë, rendi i gjërave të Vetëvendosjes diçka tjetër. Sahati kushtetues i fundit godet nesër në ora 23:59 për zgjedhje të qeverisë, çka përcakton fatin përfundimtar të kësaj legjislature të dalë nga zgjedhjet e 9 shkurtit nëse do të shpërbëhet dhe vendi të shkojë në zgjedhje të reja. Glauk Konjufca, mandatari i dytë për formim të qeverisë së re, që “bindi” Vjosa Osmanin, Presidente të Kosovës, se bën shumicë parlamentare për t’u zgjedhur, u dëshmua përfundimisht të ketë dështuar pas publikimit të “agjendës” dhe “rendit të ditës” së Kuvendit të Kosovës kur seancë të jashtëzakonshme u thirr për Buxhet, Komisione Parlamentare dhe Marrëveshje Ndërkombëtare, e tek pastaj seancë për zgjedhje të qeverisë. Në njoftimin e vetë, Vetëvendosja ka kërkuar vota nga ish-opozita për të miratuar ligje, projektligjeve e marrëveshje ndërkombëtare. Konjufca 1, kësisoji, u dëshmua të ketë qenë blerje 15 ditor kohe me Vjosa Osmanin “të bindur”. Tre partitë më të mëdha ish-opozitare, PDK, LDK dhe AAK kanë njoftuar se nuk do të marrin pjesë në këtë “seancë” të parë, sipas tyre, të paligjshme dhe kundër rendit kushtetues të vendit.

…

Kryetari i Lidhjes Demokratike të Kosovës, Lumir Abdixhiku, i quajti “popullistë të rrezikshëm” partinë Vetëvendosje me thirrjen dhe përmbajtësimin e seancës së orës 11:00 “pa asnjë konsultim, komunikim e diskutim” dhe shtoi se “refuzimi i popullistëve është akti më i lartë patriotik sot”.

“LDK nuk bëhet pjesë e shfaqejeve parlamentare të një pushteti në ikje. Nesër nuk marrim pjesë fare në seancën e imponimit teatral të orës 11:00-të. Mblidhuni vet; i bëni muhabet vetes. Luftën me mullinjtë e erës e bëni mirë. Nesër, nga ora 14:00, votojmë me bindje e krenari kundër pakicës që nuk mund të sillet si shumicë më në këtë shtet”, shkroi Abdixhiku në një reagim në rrjete sociale.

Partia Demokratike e Kosovës nuk do të merr pjesë në seancën e parë të jashtëzakonshme të thirrur nga Dimal Basha i Vetëvendosjes, ka konfirmuar për “Nacionale” Sekretarja e Përgjithshme e PDK-së, Vlora Çitaku.

Po ashtu Aleanca për Ardhmërinë e Kosovës nuk do të marrë pjesë në seancën e jashtëzakonshme të orës 11:00 të thirrur nga Vetëvendosje, ku kanë përfshirë çështje votimi i të cilave kërkon që të ketë qeveri legjitime të zgjedhur e të dalë nga zgjedhjet e 9 shkurtit. “Nesër nuk marrim pjesë në seancën e parë, në të dytën votojmë kundër”, tha zëdhënësi i AAK-së, Kushtrim Xhemaili në një përgigje me shkrim për Nacionale.

Arben Gashi i LDK-së e quajti shkelje të pastër të Rregullores së Kuvendit dhe logjikës kushtetuese, thirrjen e seances të jashtëzakonshme për çështje si Buxheti, komisionet parlamentare dhe marrëveshje ndërkombltare nga Vetëvendosje pa u zgjedhur ende qeveri legjitime e dalë nga zgjedhjet e 9 shkurtit.

Ndërkaq nga VV, anipse mesër afati i fundit kushtetues për zgjedhje të qeverisë, me mandatarin e dytë, Glauk Konufcën, ata s’iu referuan si ngjarje. Mimoza Kusari-Lila iu referua seancës “tjetër” të orës 11:00 ku partitë politike ish-opozitare nuk do të marrin pjesë.

“Mirëpresim diskutimet dhe miratimet për agjendën e nesërme”, shkroi ajo.

Zvicra “hap dyert”, 85 mijë vende pune për të huajt me paga deri në 6.500 euro

Zvicra po përgatitet të marrë mijëra punëtorë të huaj pas mungesës së vazhdueshme të stafit të kualifikuar që prej vitit 2020.

Spitalet, hotelet dhe zyrat e inxhinierisë janë në krye të listës së sektorëve që kërkojnë urgjentisht profesionistë me përvojë, por edhe të sapodiplomuar.

Autoritetet paralajmërojnë se hendeku i fuqisë punëtore mund të zgjerohet edhe më shumë muajt e ardhshëm, duke rritur presionin për rekrutim nga jashtë.

Qeveria zvicerane planifikon të punësojë rreth 85 mijë persona nga vende të tjera, duke ofruar paga që nisin nga 3.500 euro në muaj dhe mund të arrijnë deri në 6.500 euro, varësisht nga profesioni. Kërkesat më të mëdha regjistrohen në fushën shëndetësore, turizëm e hoteleri, si dhe në profesionet teknike, informatike dhe inxhinierike, shkruan A2 CNN.

Ndër profesionet më të kërkuara renditen mjekët, inxhinierët, specialistët e teknologjisë, personeli i restoranteve, punëtorët e kualifikuar, mësuesit, personeli i kontrollit, informaticienët, përfaqësuesit e shitjeve dhe punonjësit shtëpiakë. Në disa sektorë kërkesa është e menjëhershme, veçanërisht në shëndetësi, ku një nga katër mjekë është mbi 60 vjeç, duke krijuar nevojë për zëvendësim urgjent.

Një prej rrugëve më të shpejta për punësim është aplikimi përmes agjencive zvicerane të burimeve njerëzore.

Përparësi të madhe kanë kandidatët që zotërojnë gjuhën gjermane, italiane. (A2 Televizion)

Operacioni goditës në veri – ndalet kontrabanda me 600 kg djath, rroba e medikamente

Njësia Antikontrabandë e Doganës së Kosovës, në bashkëpunim me Policinë, ka zbuluar dhe ndalur një tentim kontrabande në Zubin Potok, në fshatin Juankë, pasditen e së hënës.

Autoritetet kanë kapur një automjet që kishte hyrë në Kosovë përmes rrugëve të paautorizuara, i mbushur me 600 kilogramë djathë, veshmbathje tekstili dhe medikamente, me vlerë rreth 7,000 euro. Të gjitha mallrat janë sekuestruar në vendngjarje.

Sipas Doganës, rasti është duke u trajtuar në koordinim me organet hetimore, për të zbardhur plotësisht rrugët, personat e përfshirë dhe përgjegjësitë e mundshme në këtë tentim kontrabande.