Fillojnë kërcënimet e drejtpërdrejta ndaj zyrtarëve policorë në Lipjan nga profile të rreme në rrjete sociale, të cilat përdorin gjuhë fyese, denigruese dhe etiketime të rënda kundër pjesëtarëve të Policisë së Kosovës.
Sipas Sinjalit, një zyrtar policor nga Lipjani ka raportuar se është kërcënuar në Facebook nga një profil me emrin “Ha Wk”, ku janë shpërndarë publikisht fotografi të tij dhe bashkëshortes së tij, të shoqëruara me mbishkrimin: “Rritet numri i terroristëve në Kosovo Police (organizatë terroriste)”.
Përveç kësaj, i njëjti profil ka publikuar edhe fotografi të zyrtarëve të tjerë të Stacionit Policor në Lipjan, me mbishkrime si “Kosovo Police terrorist group”, duke përhapur gjuhë urrejtjeje dhe kërcënimi që ka shkaktuar shqetësim dhe ndjenjë pasigurie te zyrtari dhe familja e tij.
Sipas të njëjtave informacioneve, rasti është konsideruar i ndjeshëm dhe me rrezikshmëri të lartë, ndaj janë njoftuar menjëherë: Njësia e hetimeve rajonale, Prokurori për krime të rënda dhe Prokuroria Speciale e Republikës së Kosovës.
Pas vlerësimit të përmbajtjes dhe natyrës së kanosjes, rasti është transferuar te Njësia për Hetime Kibernetike, e cila tashmë ka nisur procedurat për identifikimin e autorit pas profilit të rremë dhe për vlerësimin penal të veprave të kryera përmes rrjeteve sociale.
Hetimet janë në zhvillim, ndërsa institucionet po e trajtojnë rastin si kërcënim serioz ndaj sigurisë së zyrtarëve policorë dhe autoritetit të Policisë së Kosovës.
Ibrahim Nela, Artidon Konxheli, Liridon Rrahmani, Albian Ratkoceri dhe Endrit Beqiri kanë arritur në gjykatë në seancën ku po dyshohen për vrasje nga pakujdesia të Agon Zejnullahut, 27-vjeçarit nga Lipjani.Ndaj tyre pritet të shqyrtohet kërkesa e Prokurorisë Themelore në Prishtinë për caktimin e masës së paraburgimit prej 30 ditësh, raporton Insajderi.
Mediat janë lënë jashtë oborrit të objektit të degës së gjykatës në Lipjan.
Gazeta Insajderi ka siguruar pamje ku shihen të dyshuarit teksa hyjnë në Gjykatë.
Ndërsa pas hyrjes e tyre në seancë, zyrtarët policorë që ishin në detyrë nuk kanë mundur që të përmbahen emocionalisht, ata u panë duke fshirë lotët.
Kryeministri në detyrë i Kosovës, Albin Kurti, ka reaguar për herë të parë lidhur me vdekjen e 27-vjeçarit Agon Zejnullahu, i cili ndërroi jetë të hënën në Lipjan, në një rast ku dyshohet për përfshirjen e pesë zyrtarëve policorë.
Në hapje të mbledhjes së Qeverisë këtë të mërkurë, Kurti tha se është i tronditur nga ngjarja dhe se duhet pritur verdikti i plotë i institucioneve përkatëse.
“Dua t’i shpreh ngushëllime familjes Zejnullahu. Lajmi për vdekjen e tij na ka tronditur të gjithëve,” u shpreh Kurti.
Ai theksoi se për të kuptuar tërësisht atë që ndodhi në natën e 7 korrikut, është i domosdoshëm një hetim profesional dhe i pavarur nga të gjitha institucionet përkatëse.
Kurti u shpreh se bashkëpunimi mes Policisë së Kosovës, IPK-së, Institutit të Mjekësisë Ligjore dhe Prokurorisë është kyç për zbardhjen e së vërtetës.
“Pres hetim të thellë dhe të shpejtë që zbardh të gjitha rrethanat, në mënyrë që të vendoset drejtësia dhe të ketë llogaridhënie. Nuk do të ketë strehë për askënd që ka tejkaluar kompetencat apo ka thyer ligjin gjatë detyrës zyrtare,” theksoi ai.
Megjithatë, Kurti kritikoi edhe reagimet që sipas tij përbëjnë anti-fushatë ndaj Policisë së Kosovës, duke i cilësuar ato si të dëmshme.
“Thirrjet për drejtësi dhe përgjegjësi janë të drejta, por ato duhet të bazohen në rezultatet e hetimeve dhe në verdiktin profesional,” tha Kurti.
Në fund, ai nënvizoi se drejtësia dhe parandalimi i rasteve të tilla mund të arrihen vetëm përmes një hetimi të plotë dhe vendimeve institucionale.
Mediat kanë publikuar pamje të reja nga momenti i arrestimit të ndjerit Agon Zejnullahun.
Sipas pamjeve që ka publikuat “T7”, shihet se si policia e ngulfati të ndjerin Agon Zejnullahu.
Për pasojë, Inspektorati Policor i Kosovës ka arrestuar pesë zyrtarë policorë të përfshirë në këtë rast, ndërsa hetimet janë në zhvillim për të zbardhur plotësisht rrethanat e vdekjes së Zejnullahut.
Ndryshe, Prokurori i shtetit ka bërë kërkesë për caktimin e masës së paraburgimit ndaj pesë policëve nga Lipjani që u përfshinë në rastin ku vdiq 27-vjeçari Agon Zejnullahu.
Sonte nga ora 20:30, para Teatrit Kombëtar u organizua aksion për ndezjen e qirinjve në nderim të Agon Zejnullahut.
Ai vdiq në rrethana ende të paqarta në Lipjan . Pesë zyrtarë policorë, në mesin e të cilëve edhe një rreshter po hetohen për rastin e vdekjes së 27-vjeçarit.
Ata u suspenduan dhe u ndaluan për 48 orë me urdhër të Prokurorit të Shtetit.
Zjarrfikësi i Brigadës së Zjarrfiksëve të Gjakovës, Kaqun Lima, ka ndërruar jetë pas një aksidenti tragjik që ndodhi sot rreth orës 15:30 në fshatin Mejë.
Lima, i cili ishte shef i Operativës, ishte duke kryer detyrën e tij kur ndodhi aksidenti. Ai u dërgua menjëherë në QKUK në Prishtinë, ku nuk arriti të mbijetojë.
“Sot në orën 20:20 kemi pranuar informatën që njëri prej të lënduarve ka ndërruar jetë në QKUK”, tha për Sinjalin, Vlera Krasniqi – Zyrtare e lartë për informim dhe marrëdhënie me publikun.
Për herë të parë, presidenti amerikan, Donald Trump, tregoi periudhën kur ndaloi shumë luftëra të reja të ndodhnin në botë, përfshirë atë të Serbisë kundër Kosovës. “Gjithçka ndodhi 3 javë më parë apo pak më shumë”, u shpreh kreu i Shtëpisë së Bardhë.
“Ne bëmë një punë të mirë me Indinë dhe Pakistanin, gjithashtu me Serbinë dhe Kosovën, Ruandën dhe Kongon Dhe e gjithë kjo ndodhi gjatë tre javëve të fundit a më shumë, apo jo Marko? Dhe (ne ndaluam) të tjerë që ishin gati të luftonin, dhe ne ndaluam shumë përleshje. Mendoj se ndaluam shumë luftëra të mëdha të them të drejtën. Shumë të mëdha. Ishte India dhe Pakistani. Ndaluam luftën përmes tregtisë. Po merremi me Indinë, me Pakistanin, dhe ne u thamë se nuk do të merremi fare me ju nëse do të luftoni. Ndoshta ishin gati në një fazë të bënin një luftë bërthamore, pasi siç e dini janë fuqi bërthamore. Ne e ndaluam dhe kjo ishte shumë e rëndësishme. Po mundohemi që të ndihmojmë në mbylljen e këtij përbindëshi të krijuar nga Biden, për luftën që po ndodh mes Rusisë dhe Ukrainës. Është diçka e tmerrshme. Nuk jam aspak i lumtur me presidentin Putin. Por kjo është diçka që s’do kishte ndodhur kurrë nëse do të isha president. Kjo është një luftë që me mua nuk do kishte ndodhur kurrë”, ka thënë Trump.
Lidhja Demokratike e Kosovës (LDK), ka thirrur për të enjten një mbledhje të kKryesisë së partisë, ku pritet të zyrtarizohen kandidatët për kryetarë të komunave në kuadër të zgjedhjeve lokale që do të mbahen më 12 tetor.
Sipas rendit të ditës, të cilin e ka siguruar televizioni Dukagjini, mbledhja do të mbahet nga ora 16:00.
Deri tani, LDK-js ka shpallur zyrtarisht kandidatët e saj në disa komuna, përfshirë Gjilanin, Podujevën, Lipjanin, Vitinë, Vushtrrin dhe të tjera.
Pritet që në mbledhjen e së enjtes të përmbyllet lista e plotë me emrat që do të garojnë nën siglën e kësaj partie.
Me pranga në duar, një 27-vjeçar vdiq në Lipjan, i rrethuar nga disa policë. Në lidhje me rastin, pesë zyrtarë policorë janë ndaluar për 48 orë. Raporti preliminar, konstaton në përgjithësi, se përtej gjendjes paraprake që kishte 27 vjeçari para se të prangosej nga policët, tashmë të suspenduar e nën masën e ndalimit, vdekja mund të jetë shkaktuar nga ndrydhja.
Gazeta Insajderi ka siguruar një video ekskluzive, ku shihet se zyrtarët policorë i hidhnin ujë Zejnullahut për ta këndellur.
Më pas në vendngjarje erdhi autoambulanca dhe e vendosën në lese Agon Zejnullahun. Ai ishte nën pranga tërë kohën.
Alban Zejnullahu, ka treguar se vëllai i tij Agon Zejnullahu, kishte shenja të mëdha në trup.
Sipas tij kishte 20 shenja duke pretenduar se mund të kishte edhe gjymtyrë të thyera.
“Ka pasur mbi 20 shenja në trup. Vetulla ka qenë e çarë, balli me shenja dhe ka pasur goditje në qafë. Ka shenja shumë të theksune në bri sa mendoj se i ka të thynë, këmbët i ka pasur me gunga. Nuk ka ndonjë pjesë të trupit që nuk ka pasë goditje”, tha ai në një prononcim për Insajderin.
Alban Zejnullahu tha se zyrtarët policor që u arrestuan dje, ishin edhe në emergjencë kur familjarë kanë shkuar atje pasi kanë marrë lajmin për vdekjen e tij.
Ai tha se policët i njeh personalisht dhe nuk i shprehen ngushëllime
“Policet e arrestun i kemi pa ne emergence kur kemi shku. Shumicën prej tyne I njoh personalisht ama atë nate mbajshin distancë, as per me m’shpreh ngushëllime nuk jane afru. Përveç njanit”, tha ai.
Te pesë zyrtarët policorë janë arrestuar dhe janë ndaluar për 48 orë.
Gazeta Insajderi ka raportuar se në Inspektoratin Policor të Kosovës që po e heton rastin me autorizim të Prokurorisë, tashmë ka arritur raporti fillestar i Institutit të Mjekësisë Ligjore (IML).
Raporti preliminar, konstaton në përgjithësi, se përtej gjendjes paraprake që kishte 27 vjeçari para se të prangosej nga policët, tashmë të suspenduar e nën masën e ndalimit, vdekja mund të jetë shkaktuar nga ndrydhja.
Në raportin fillestar ende nuk është specifikuar nëse ndrydhja ka shkaktuar sulmin në zemër, apo asfiksion (pengim të rrugëve të frymëmarrjes), por një zgjerim i raportit pritet të bëhet ditëve në vazhdim.
Ditëve në vazhdim, IML pret, siç merr vesh Insajderi, që të përfundoi edhe raportin në pjesën tjetër, sa i përket toksikologjisë, duke dalë me rezultate se çfarë lloje substancash mund të ketë pasur në trup viktima para se të ndërronte jetë.
Pesë policë u arrestuan për veprën penale “Vrasje nga Pakujdesia” për rastin e arrestimit të 27-vjeçarit Agon Zejnullahu në Lipjan, i cili dyshohej se po sulmonte me veturë kalimtarët në rrugën “Haradin Bajrami” në Lipjan.
Prokuroria Themelore në Prishtinë në një përgjigje për Insajderin ka konfirmuar arrestimin e policëve, por refuzoi të japë më shumë detaje meqë tha se mund të dëmtohet integriteti i hetimeve.
“E konfirmoj se janë arrestuar pesë zyrtar policor për veprën penale “Vrasje nga pakujdesia” nga neni 175 të Kodit Penal të Republikës së Kosovës. Për momentin nuk mund të ofrojmë më shumë detaje sepse mund të dëmtojmë integritetin e hetimeve”, tha prokuroria në përgjigje.
Rasti i vdekjes së 27-vjeçarit tashmë është cilësuar si vdekje e dyshimtë.
Pas thirrjes së qytetarëve, njësitë policore kanë ndërhyrë duke e arrestuar atë. Gjatë ndërhyrjes, atij iu vendosen prangat. Policia raporton se përkundër përpjekjeve të ekipit mjekësor, 27‑vjeçari ndërroi jetë në vendin e ngjarjes./Insajderi
Ministri në detyrë i Punëve të Brendshme, Xhelal Sveçla, ka reaguar pas vdekjes së Agon Zejnullahut para mëngjesit të djeshëm në Lipjan.
Ai ka kërkuar hetim urgjent dhe profesional nga Inspektorati Policor i Kosovës dhe bashkëpunim të plotë nga Policia e Kosovës.
“Si Ministër i Punëve të Brendshme, sapo jam informuar për ngjarjen, kam kërkuar angazhim urgjent dhe profesional nga Inspektorati Policor i Kosovës si dhe bashkëpunim të plotë të Policisë së Kosovës gjatë këtij hetimi. Në kuadër të kësaj, hetimet tashmë janë duke u zhvilluar me intensitet maksimal”, ka shkruar Sveçla.
“Bashkëpunimi mes Policisë së Kosovës, Inspektoratit Policor, Institutit të Mjekësisë Ligjore dhe Prokurorisë është kyç për zbardhjen e plotë të rrethanave të kësaj ngjarjeje të rëndë”, tha tutje ai.
Ministri në detyrë gjithashtu u shprehu ngushëllimet më të sinqerta familjarëve të të ndjerit, duke theksuar se besimi i qytetarëve në Policinë e Kosovës duhet të ruhet përmes transparencës, drejtësisë dhe përgjegjësisë në çdo rast.
