Pak para mbylljes së votimeve, Kurti del me këtë ‘njoftim’

Kryeministri në detyrë i Kosovës, Albin Kurti u ka bërë thirrje qytetarëve të dalin për të votuar, kur kanë mbetur edhe pak deri në mbylljen e qendrave të votimit.

Kurti ka thënë se sa më e madhe pjesëmarrja në zgjedhje as më i madh është legjitimiteti i institucioneve të ardhshme të vendit.

“Janë më pak se dy orë e gjysmë nga koha kur do të mbyllën vendvotimet. Sa më e gjerë pjesëmarrja në zgjedhje aq më i madh legjitimiteti i institucioneve të ardhshme të vendit. Sot është dita kur secili prej nesh mund të jemi përcaktues për katër vitet e ardhshme. Prandaj, dilni dhe votoni, ftoni të gjithë miqtë, familjarët të dalin e të votojnë dhe në këtë mënyrë të bëhen pjesë e demokracisë dhe vendimmarrës. Dil dhe voto. Mos e le pa dalë. Mos e le për moment të fundit. Ju dua”, ka shkruar Kurti.

PDK konferencë për media, Stavilevci thotë se po presin “rezultat historik”

Blerand Stavilevci i Partisë Demokratike të Kosovës tha në një konfernecë për shtyp se të dhënat e tyre nga terreni u japin indikacione për “rezultat historik” të PDK-së.

Ai tha se “janë pozitive” të dhënat që po marrin dhe se “ka mbështetje për ndryshim”.

“Deri në këto momente, më pak se 4 orë nga mbyllja e vendvotimeve, të dhënat që po marrim nga terreni janë pozitive. Ka mbështetje për ndryshim.

Sipas të dhënave ëq kemi marrë, po skhon drejt një rezltati të mirë për PDK-në, të njl numri votash që për neve janë historike.

Nëse ende nuk e keni votuar, mos e lini votën në shtëpi.

Sot secili nga e ka në dorë përgjegjësinë e madhe, ju që ende nuk e keni votuar, dilni votoni”, tha ai.

Dita e zgjedhjeve, PDK-ja ndërrmer këtë veprim

Partia Demokratike ka thirrë konferencë për media në ora 15:15.

Në njoftim nuk është bërë e ditur arsyeja.

Stuhia dimërore godet këtë vend, shënohen dy të vdekur

Dy persona kanë vdekur në Suedi pasi një stuhi e fuqishme dimërore përfshiu vendet nordike, duke shkaktuar ndërprerje të udhëtimit dhe energjisë elektrike.

Instituti Meteorologjik Suedez lëshoi alarme për erëra të forta për pjesë të mëdha të vendit që u godit nga stuhia Johannes.

Një burrë rreth të 50-ave vdiq pasi u godit nga një pemë në vendpushimin e skive Kungsberget në jug të vendit, raportuan mediat lokale dhe policia; ndërsa kompania rajonale e shërbimeve, Hemab, tha se një nga punonjësit e saj vdiq në një aksident “në fushë”.

Dhjetëra mijëra shtëpi në Suedi, Norvegji dhe Finlandë kanë mbetur pa energji elektrike.

Në Suedi, më shumë se 40,000 shtëpi u prekën nga ndërprerjet e energjisë elektrike dhe shumë shërbime hekurudhore u anuluan, raportoi agjencia suedeze e lajmeve TT.

Disa fluturime, shërbime hekurudhore dhe rrugore në pjesë të vendeve nordike janë anuluar.

Përleshje mes votuesve në një qendër, ndërhynë policia

Një përleshje mes votuesve raportohet të ketë ndodhur në Zhegër të Gjilanit.

Pamjet janë publikuar nga RTV Dukagjini.

Nuk dihen arsyet që kanë çuar deri tek ky veprim, megjithatë siç shihet në pamje, në rast kanë intervenuar zyrtarët policorë.

Këto janë komunat me daljen më të madhe në zgjedhje deri në orën 09:00

Mbi 50 mijë qytetarë kanë votuar deri në orën 09:00 në zgjedhjet e parakohshme.

Sipas përditësimit të KQZ-së,  52,785 apo 2,64% është dalja e votuesve deri më tani.

Komunat me daljen më të madhe janë ato në veri.

Kurse, komunat me shumicë shqiptare me dalje më të madhe janë Prishtina e Fushë Kosova.

Tentim vrasje në qendër të Prishtinës

Një rast i vrasjes në tentativë është raportuar mbrëmjen e së premtes në kryeqytet, thuhet në raportin e Policisë së Kosovës.

Sipas policisë, ngjarja ka ndodhur më 27.12.2025, rreth orës 22:30, në Sheshin “Ibrahim Rugova” në Prishtinë. Viktima, mashkull kosovar, dyshohet se është sulmuar me një mjet të mprehtë nga një i dyshuar, po ashtu mashkull.

Si pasojë e sulmit, viktima ka pësuar lëndime trupore dhe është dërguar për tretman mjekësor, ndërsa gjendja e tij po monitorohet nga ekipet shëndetësore.

Policia ka bërë të ditur se i dyshuari ndodhet në arrati, ndërsa njësitë policore janë duke ndërmarrë veprimet e nevojshme hetimore për identifikimin dhe arrestimin e tij. Rasti është në procedurë hetimi.

“VRASJE NË TENTATIVË Sheshi Ibrahim Rugova, Prishtinë 27.12.2025, 22:30. Është raportuar se viktima m/k është sulmuar me një mjet të mprehtë nga i dyshuari m/k. Viktima është dërguar për tretman mjekësor, ndërsa i dyshuari gjendet në arrati.”, thuhet në njoftimin e policisë.

Imami Husamedin Abazi parashikon rezultatin e zgjedhjeve

Imami i njohur, Husamedin Abazi ka parashikuar rezultatin e zgjedhjeve.

Sipas Abazit, VV i fiton zgjedhjet me 49-51%.

Më poshtë postimi i tij:

Rezultati i këtyre Zgjedhjeve sipas përshtypjeve të mia:

1. VV – 49-51%
2. PDK – 20-22%
3. LDK – 16-18%
4. AAK- 4.00-5.5%

P.s Ti mos u nervozo me mua, se unë nuk e përcaktoj rezultatin. Sidomos ju miq, që ju kam nga të gjitha partitë, mos ma nxini për të madhe, sepse unë vetëm po prognozoj dhe asgjë më shumë!

Dhashtë Zoti e të ndodh më e mira për Atdheun dhe Fëmijët tanë!

Shala: Me i thanë Albin Kurtit JO sot është si me i thanë Slobodanit JO në të 98-tën

Analisti Azdren Shala ka thënë që t’i thuhet JO Albin Kurtit më 2025 është sikur t’i thuhet JO Slobodan Milosheviqit 27 vjet më parë.

Ai këtë deklaratë e dha teksa po pyeste Lutfi Hazirin nga Lidhja Demokratike e Kosovës nëse ata po komplimentoheshin për qëndrimin kundër Kurtit, dhe se cila e ka ngjizur më shumë elektoratin e tyre gjatë fushatës.

“ Për mua është vlerë e veçantë: Me i thanë Albin Kurtit JO sot është si me i thanë Slobodanit JO në të 98-tën”, ka deklaruar Shala.

“Është mendim i imi. Kostoj e baj vetë”.

Ai më vonë e krahasoi qasjen e Kurtit me atë të diktatorit shqiptar, Enver Hoxhës.

“Qasja e tij është komuniste. Si e Enver Hoxhës”.

“Prandaj është jetike me e hjekë këtë”, shtoi Shala.

Abdixhiku: Elektoratin ma ke quajt hajvan, bashkëpunëtorët njerëz të Serbisë – me juve nuk bëj qeveri

Kryetari i LDK-së, Lumir Abdixhiku, ka kritikuar gjuhën që është përdorur ndaj tyre nga Vetëvendosje.

Ai ka thënë se nuk pranon të bëjë qeveri, me ata që e kanë ofenduar LDK-në skajshmërisht.

“Elektoratin ma ke quajtur hajvan. Bashkëpunëtorët tanë i ke quajt njerëz të Serbisë. Unë me juve nuk bëj qeveri”, tha Abdixhiku.

Abdixhiku,  po ashtu ka komentuar deklaratat e liderëve të Vetëvendosjes për gjuhën ndaj partisë që drejton.

Ai ka thënë se nuk ia fal Albin Kurtit kur doli në foltore e tha që LDK-në po e do Serbia.

“Këta kanë kërku 500 mijë vota, nuk kanë lyp partner. Nuk kërkon partner në studio, ndërton partneritet, respekt ndaj votuesit. Momentin që Kurti del në foltore e i drejtohet LDK-së juve po iu do Serbia, ka rrënu secilën urë bashkëpunimi. Pa qartësim të kësaj, nuk mundet me iu afru LDK-së. Kemi qenë shumë korrekt. LDK-ja në EPP ka mbajt prezencë solide, kemi ofruar resolute për liberalizim të vizave. Sa herë që ka pasur nevojë kemi ofru komunikim. Nuk i bëjmë publike, janë tema me interes publik. Në momente shumë të vështira, LDK i ka thënë atij jemi në tërësi të përbashkët, për interesa e qëllime. Kemi folur për aleatë e aleanca. Nuk e kemi prit që ai ndërton gjuhë kundër LDK-së”, tha Abdixhiku në RTV Dukagjini.

Abdixhiku tutje ka thënë se nuk ofendon Kurtin e elektoratin e tij, sado që s’pajtohet me atë çfarë përfaqëson.

Madje sipas tij një pushtet që kërcënon demokracinë e vendit, është rrezik.

“Unë nuk e ofendoj as Kurtin as elektoratin e tij. Mund të mos pajtohem me atë çfarë përfaqëson. Një pushtet që kërcënon demokracinë e vendit, ai kërcënon më shumë se sa vetëm fjalë, është e rrezikshme. Turmat janë të rrëzikshme. Ata kanë rrënuar çdo urë të komunikimit me ne. Ne kemi qenë korrekt me ta, ata kanë ofenduar dhe propaganduar. Në anën tjetër besoj që mirë që e kanë kuptuar se gjuha duhet të ndërrohet”, tha Abdixhiku.