Imami Husamedin Abazi parashikon rezultatin e zgjedhjeve

Imami i njohur, Husamedin Abazi ka parashikuar rezultatin e zgjedhjeve.

Sipas Abazit, VV i fiton zgjedhjet me 49-51%.

Më poshtë postimi i tij:

Rezultati i këtyre Zgjedhjeve sipas përshtypjeve të mia:

1. VV – 49-51%
2. PDK – 20-22%
3. LDK – 16-18%
4. AAK- 4.00-5.5%

P.s Ti mos u nervozo me mua, se unë nuk e përcaktoj rezultatin. Sidomos ju miq, që ju kam nga të gjitha partitë, mos ma nxini për të madhe, sepse unë vetëm po prognozoj dhe asgjë më shumë!

Dhashtë Zoti e të ndodh më e mira për Atdheun dhe Fëmijët tanë!

Shala: Me i thanë Albin Kurtit JO sot është si me i thanë Slobodanit JO në të 98-tën

Analisti Azdren Shala ka thënë që t’i thuhet JO Albin Kurtit më 2025 është sikur t’i thuhet JO Slobodan Milosheviqit 27 vjet më parë.

Ai këtë deklaratë e dha teksa po pyeste Lutfi Hazirin nga Lidhja Demokratike e Kosovës nëse ata po komplimentoheshin për qëndrimin kundër Kurtit, dhe se cila e ka ngjizur më shumë elektoratin e tyre gjatë fushatës.

“ Për mua është vlerë e veçantë: Me i thanë Albin Kurtit JO sot është si me i thanë Slobodanit JO në të 98-tën”, ka deklaruar Shala.

“Është mendim i imi. Kostoj e baj vetë”.

Ai më vonë e krahasoi qasjen e Kurtit me atë të diktatorit shqiptar, Enver Hoxhës.

“Qasja e tij është komuniste. Si e Enver Hoxhës”.

“Prandaj është jetike me e hjekë këtë”, shtoi Shala.

Abdixhiku: Elektoratin ma ke quajt hajvan, bashkëpunëtorët njerëz të Serbisë – me juve nuk bëj qeveri

Kryetari i LDK-së, Lumir Abdixhiku, ka kritikuar gjuhën që është përdorur ndaj tyre nga Vetëvendosje.

Ai ka thënë se nuk pranon të bëjë qeveri, me ata që e kanë ofenduar LDK-në skajshmërisht.

“Elektoratin ma ke quajtur hajvan. Bashkëpunëtorët tanë i ke quajt njerëz të Serbisë. Unë me juve nuk bëj qeveri”, tha Abdixhiku.

Abdixhiku,  po ashtu ka komentuar deklaratat e liderëve të Vetëvendosjes për gjuhën ndaj partisë që drejton.

Ai ka thënë se nuk ia fal Albin Kurtit kur doli në foltore e tha që LDK-në po e do Serbia.

“Këta kanë kërku 500 mijë vota, nuk kanë lyp partner. Nuk kërkon partner në studio, ndërton partneritet, respekt ndaj votuesit. Momentin që Kurti del në foltore e i drejtohet LDK-së juve po iu do Serbia, ka rrënu secilën urë bashkëpunimi. Pa qartësim të kësaj, nuk mundet me iu afru LDK-së. Kemi qenë shumë korrekt. LDK-ja në EPP ka mbajt prezencë solide, kemi ofruar resolute për liberalizim të vizave. Sa herë që ka pasur nevojë kemi ofru komunikim. Nuk i bëjmë publike, janë tema me interes publik. Në momente shumë të vështira, LDK i ka thënë atij jemi në tërësi të përbashkët, për interesa e qëllime. Kemi folur për aleatë e aleanca. Nuk e kemi prit që ai ndërton gjuhë kundër LDK-së”, tha Abdixhiku në RTV Dukagjini.

Abdixhiku tutje ka thënë se nuk ofendon Kurtin e elektoratin e tij, sado që s’pajtohet me atë çfarë përfaqëson.

Madje sipas tij një pushtet që kërcënon demokracinë e vendit, është rrezik.

“Unë nuk e ofendoj as Kurtin as elektoratin e tij. Mund të mos pajtohem me atë çfarë përfaqëson. Një pushtet që kërcënon demokracinë e vendit, ai kërcënon më shumë se sa vetëm fjalë, është e rrezikshme. Turmat janë të rrëzikshme. Ata kanë rrënuar çdo urë të komunikimit me ne. Ne kemi qenë korrekt me ta, ata kanë ofenduar dhe propaganduar. Në anën tjetër besoj që mirë që e kanë kuptuar se gjuha duhet të ndërrohet”, tha Abdixhiku.

Abdixhiku: Qytetarët nuk kanë rrymë, faturat me rritje, këta thonë “jeta është e mirë”

Kandidati i LDK-së për kryeministër, Lumir Abdixhiku ka kritikuar qasjen e Vetëvendosjes, për të mos shkuar në debate.

Abdixhiku ka thënë se ka pasur mungesë ballafaqimi.

“Fushatës i ka munguar ballafaqimi. Do të doja që njerëzit tanë të ekonomisë të përballen me të VV-së, por kur nuk ke me kënd ballafaqohesh, ske. Ai që shan, dhe e ka mendjen te ofendimi, ai nuk e do debatin, është humbës. Debati e çmonton propagandën”, tha Abdixhiku.

Ai po ashtu ka kritikuar gjuhën e Vetëvendosjes, për jetën e qytetarëve.

Ai ka thënë se qytetarët kanë halle me rrymë e fatura, përderisa VV-ja thotë që jeta është e mirë.

“Qytetarët nuk kanë rrymë, iu kanë ardhë faturat me rritje, tregoju që jeta është më mirë. Një pushtet po mendon që qytetarët e kanë jetën mirë, nuk e kanë as mendjen me ua ndreq jetën, çmimet nuk janë rrit, rrogat janë rrit, ekonomia po lulëzon. Nuk kanë bo gjë. Këta e marojnë një sistem paralel e nuk e kanë mendjen me i ndihmu qytetarëve”, tha Abdixhiku në RTV Dukagjini.

Abdixhiku  ka folur edhe për pjesëmarrjen e mërgatës në tubimet e LDK-së.

Sipas tij, kjo prezencë e tyre ishte madhështore. Prandaj, Abdixhiku tha se LDK ka një mërgatë të fuqishme e kjo do të shihet pozitivisht nesër në votën totale të LDK-së

“LDK ka një mërgatë të fuqishme. E ka pasur gjithherë, është punuar shumë këto 4-5 vitet e fundit dhe besoj që nesër kemi me i pa pozitivisht në votën totale të LDK-së efektin e kësaj prezence”, tha Abdixhiku.

Shifra rekord nga diaspora: 81% e mërgimtarëve tashmë kanë votuar

Qytetarët e Kosovës sot i drejtohen kutive të votimit në zgjedhjet e parakohshme parlamentare.

Një proces i tillë ka përfunduar mbrëmë në 25 përfaqësi diplomatike të Kosovës ku kanë ushtruar të drejtën e tyre mërgimtarët.

Sipas të dhënave të Komisionit Qendror të Zgjedhjeve, votimi është përmbyllur në 25 përfaqësitë diplomatike në shtetet, si: Turqi, Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikë Çeke, Hungari dhe në Mbretërinë e Bashkuar, ndërkaq, në orën 01:00 të ditës së diel, sipas kohës lokale në Kosovë, do të përfundojë votimi në 4 përfaqësitë tjera, në ShBA dhe Kanada.

Kryesuesi i KQZ-së, Kreshnik Radoniqi njoftoi se gjatë ditës së votimit jashtë vendit, KQZ ka qenë në kontakt të vazhdueshëm me përfaqësitë diplomatike dhe se procesi i votimit është zhvilluar pa ndonjë pengesë.

“Sipas të dhënave nga 25 përfaqësi diplomatike ku është mbyllur votimi, por edhe nga të dhënat e orës 13:00 nga votimi në ShBA dhe Kanada, nga 19,187 votues të regjistruar, kanë votuar 81.29% apo 15,597 votues”, deklaroi ai.

Bazuar në procedura, këto fletëvotime nuk do të numërohen në përfaqësi diplomatike, por gjatë ditëve në vazhdim do të sillen në Kosovë dhe numërimi i tyre do të bëhet në vendin tonë.

Sipas Komisionit Qendror të Zgjedhjeve, numri i përgjithshëm i votuesve është 2 milionë e 76 mijë e 290 votues, derisa brenda territorit të vendit 1 milion e 999 mijë e 204 qytetarë, kurse jashtë saj 77 mijë e 86 votues.

Këtu mund ta gjeni qendrën tuaj të votimit

Komisioni Qendror i Zgjedhjeve ka njoftuar të gjithë qytetarët me të drejtë vote se përmes platformës elektronike https://qv.kqz-ks.orgmund të kontrollojnë me lehtësi se ku është Qendra e Votimit ku është caktuar të votojë.

Bëhet e ditur se për t’u qasur në platformën e KQZ-së, votuesi duhet të shënojë numrin personal të Republikës së Kosovës dhe datën e lindjes.

“Pas kësaj menjëherë do të hapet një faqe e re që do të shfaq të dhënat e votuesit, përfshirë adresën e saktë të Qendrës së Votimit ku është caktuar të votojë, e cila mund të shikohet përmes GoogleMap”.

Paralajmërohet rritja e pensionit në 250 euro

Kandidati i PDK-së për Kryeministër, Bedri Hamza, ka vazhduar me fjalimin e tij në tubimin përmbyllës të fushatës.

“Gjatë kësaj fushate kam takuar mijëra qytetarë. Kam pasur biseda të këndshme, por edhe të rënda. Megjithatë, një takim nuk do ta harroj kurrë. Një pensionist më tha: “Unë nuk kërkoj luks. Dua vetëm të mos detyrohem që të zgjedh mes ilaçeve dhe ushqimit”. Ky nuk është rasti i vetëm që e kam dëgjuar në këto takime. Sepse, kjo është përditshmëria e shumë familjeve në Kosovë. Frikë nga e tashmja dhe nga e ardhmja. Unë e di çfarë do të thotë ta presësh fundin e muajit. E di çfarë do të thotë t’i numërosh shpenzimet. Të mendosh për faturat, për ushqimin, për shkollën e fëmijëve. Dhe pikërisht për këtë arsye unë dhe Partia Demokratike e Kosovës po e kërkojmë besimin tuaj, votën tuaj. Sepse, ju kuptojmë dhe kemi përgjigje për ju, kemi zgjidhje për ju. Ne nuk premtojmë mrekulli. Por premtojmë vendime të drejta dhe të ndjeshme në xhepin e qytetarit”, ka thënë Hamza.

Ai ka premtuar rritje 50% të pagave, që puna të shpërblehet me dinjitet. Rritje 50% e pensioneve dhe ndihmave sociale, sepse, siç ka thënë Hamza, askush nuk duhet të jetojë në pasiguri.

Hamza ka thënë se pensioni më i ulët do të jetë 250 euro.

“0% TVSH për produktet esenciale, që shporta e familjes të jetë më e përballueshme. 0% TVSH për energjinë elektrike, që fatura të mos jetë barrë. Ulje të tatimit në të ardhura, që më shumë para të mbeten tek ju. Këto janë vendime që ua ndryshojnë jetën. Por, këto ndodhin vetëm nëse ju dilni dhe votoni për Partinë Demokratike të Kosovës”, ka thënë Hamza.

E rëndë: Djali 21-vjeçar e kap për fyti nënën dhe e rrah

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë është regjistruar mbrëmjen e 26 dhjetorit 2025 në rrugën “Knjaz Milos” në Mitrovicë të Veriut, ku një djalë dyshohet se ka ushtruar dhunë fizike ndaj nënës së tij.

Sipas informatave që ka mësuar Sinjali, rreth orës 18:30, viktima B. B, rreth 40-vjeçare ka raportuar se derisa ndodhej në banesën e saj, djali i saj D. B., rreth 21-vjeçar kishte ardhur dhe kishte fjetur. Pas zgjimit, i dyshuari kishte filluar të bërtasë dhe të kërkojë para, ndërsa situata kishte eskaluar në momentin kur viktima ka tentuar të kërkojë ndihmë nga Policia.

Burimet bëjnë me dije se në atë moment, i dyshuari e ka kapur nënën për fyti dhe e ka shtyrë, duke i shkaktuar frikë dhe shqetësim serioz.

Pas pranimit të informatës, njësitë policore kanë ndërmarrë veprime operative dhe kanë arritur ta lokalizojnë dhe arrestojnë të dyshuarin. Gjatë testimit me alkool, tek D. B është konstatuar 1.52 promilë alkool në gjak.

Në koordinim me hetuesen për dhunë në familje dhe Prokurorin kujdestar të Shtetit, rasti është iniciuar si “Sulm”, ndërsa i dyshuari është dërguar në mbajtje.

Hetimet lidhur me rastin janë duke vazhduar.

E trishtë: Ky është 64-vjeçari që u gjet pa sheja jete

Gazeta Sinjali ka mësuar se Shukri Peci, rreth 64-vjeçar është personi që u gjet pa shenja jete në rrugën ‘Miran Hajra’, në Mitrovicë të Jugut.

Në vendin e ngjarjes kanë dalë njësitet përkatëse, ndërsa ekipi mjekësor ka konstatuar vdekjen e viktimës.

Po ashtu, me vendim të prokurorit, trupi i pa jetë dërgohet në IML për obduksion.

Mot i ftohtë dhe reshje bore gjatë ditës së sotme

Instituti Hidrometeorologjik bën të ditur se në fundjavë do të mbajë mot i vranët dhe me intervale me diell, ndërkaq temperaturat do të jenë në minus.

IHK thekson se të shtunën do të mbajë vranësirat në viset e larta malore parashihen të sjellin riga dhe fjolla të dobëta bore.

Temperaturat minimale do të lëvizin ndërmjet -3 deri -1 grade Celsius, ndërsa maksimalet e ditës parashihen të lëvizin ndërmjet 2-4 gradë Celsius.

Do të fryjë erë e lehtë deri mesatare nga drejtimi i veriperëndimit.

Ndërkaq, edhe të dielën parashihet të mbajë mot kryesisht i ngjashëm por me temperatura më të ulëta, kryesisht ato minimalet.

Temperaturat minimale parashihen të lëvizin ndërmjet -2 deri -6 gradë Celsius, ndërsa maksimalet e ditës parashihen të lëvizin ndërmjet 0-3 gradë Celsius.

Do të fryjë erë kryesisht nga veriperëndimi e lehtë deri mesatare.