Erdogan: Derisa KFOR-i turk është në veriun e Kosovës, aty s’do të ketë asnjë problem

Presidenti i Turqisë, Recep Tayyip Erdogan, ka deklaruar se derisa KFOR-i turk është në veriun e Kosovës, aty nuk do të ketë asnjë problem.

Presidenti Erdoğan është pyetur nga një gazetar nga Kosova gjatë konferencës për media pas samitit të NATO-s në Hagë lidhur me KFOR-in turk që po qëndron në veri të vendit, pjesën e banuar me shumicë të minoritetit serb në Kosovë.

“KFOR-i Turk ndodhet në atë zonë, pse ndodhet aty? Për paqe, për qetësi dhe derisa KFOR-i Turk ndodhet aty, inshallah aty nuk mundet dhe nuk do ketë ndonjë problem”, tha Erdogan, transmeton Anadolu.

Samiti dyditor i NATO-s përfundoi sot. Në këtë ngjarje morën pjesë liderët e 32 vendeve anëtare të NATO-s, si dhe rreth 20 mijë pjesëmarrës.

Gjatë samitit, vendet e NATO-s kanë rënë dakord të rrisin shpenzimet e tyre të mbrojtjes në 5 për qind të produktit të tyre të brendshëm bruto (PBB) deri në vitin 2035.

“Jo më masakra me 40 euro shezlloni”, kryetari i Lezhës: Katër euro në qendër të Shëngjinit, pesë euro në Ranën e Hedhun

Kryetari i Bashkisë së Lezhës, Pjerin Ndreu, ka deklaruar se çështja e shezllonëve në plazhe po shkon drejt një zgjidhjeje të qëndrueshme dhe të drejtë.

Ai në Debat Plus ka theksuar se është vendosur një formulë e re që parashikon të drejtën për të vendosur shezllone vetëm për hoteleritë, në raportin një me dy – pra, për çdo 50 dhoma hoteli, do të lejohen deri në 100 çadra.

“Është në rrugën e duhur, të themi njëherë e përgjithmonë ka punë. Kam qenë iniciatori i projektit të ri bashkë me ministren e Turizmit. Është debatuar gjatë në fund kemi gjetur formulën që vetëm hoteleritë mund të përfitojnë, pra hoteleritë në sistemin një me dy, nëse ke 50 dhoma mund të kesh 100 qadra. Pra nuk mund të kesh më shumë. Këtë vit kemi një problem që janë disa kontrata pesë vjeçare që për shkak se janë në vitin e fundit dhe nuk i zhbëjmë dot. Vitin tjetër do të ketë një situatë akoma më të mirë”, ka deklaruar Ndreu.

Ndreu ka përmendur se bashkia e Lezhës është e vetmja që ka ndërtuar një sistem menaxhimi të kontrolluar me pagesë të arsyeshme, në dallim nga çmimet e larta të aplikuara në zona të tjera.

“Gjithsesi plazhet publike janë të dukshme aty, bashkësia e Lezhës le të themi se është e vetmja që ka ndërtuar një sistem edhe menaxhimi me pagesë. Që do të thotë që nëse iu kërkojnë shërbim por çmimi është në kuota të pranueshëm dhe nuk ka më masakra të tilla shembull 15 euro 20 – 25 deri në 40 euro që mund të paguajë një pushues, pro ne kemi shkuar tre euro në Tale katër euro në qendër të Shengjinit, pesë euro në Ranën e Hedhun. Por nëse dëshiron mund të shkosh me qadrën tënde dhe e ke të lirë”, ka deklaruar ai.

“Me neve nuk mundet, e kanë Listën Serbe”, Memli Krasniqi i prerë në qëndrimin e tij ndaj Vetëvendosjes

Kryetari i Partisë Demokratike të Kosovës (PDK), Memli Krasniqi, ka folur lidhur me situatën e bllokimit të Kuvendit.

Mbi këtë çështje, ai u pyet: A mund ta krijojë një shumicë VV-ja me juve?

“Me Listën Serbe ndoshta, me neve s’mundet”, tha Krasniqi në T7.

“Nuk ka mundësi, ne nuk e diskutojmë. Mendoj që dy palët e dimë që kemi distancë të mjaftueshme njëri nga tjetri që as mos me diskutu si opsion. E kan opsion Listën Serbe, nëse dëshirojnë mund ta bëjnë me ta shumicën”, shtoi Krasniqi.

“Prej refuzimeve të tjera vetëm ai opsion ju ka mbetë”, pohoi Krasniqi.

Krasniqi: Urani e ka përkrahjen e qytetarëve për Prishtinën

Kryetari i Partisë Demokratike të Kosovës (PDK), Memli Krasniqi, konfirmoi se Uran Ismaili do të jetë kandidat për kryetar të Prishtinës.

Gjithashtu, Krasniqi dha detaje edhe për kandidatët e komunave të tjera.

“Shumica dihen, ka me qenë Agim Aliu për Ferizaj, Shaqir Totaj për Prizren, Ferid Idrizi për Vushtrri…”, u shpreh Krasniqi në T7.

“Kemi situata në degë te caktuara ku munden me qenë dy apo më shumë kandidatë”, shtoi ai.

“Krejt Prishtina e dinë që Urani ka me qenë, jo vetëm ne në PDK, por edhe qytetarët që janë duke e kërku. Në kuptimin formal Urani do ta shpallë kandidaturën e tij shpejt, e s’po ja prishim me folë më shumë për atë shpallje”, tha Krasniqi.

“Në Mitrovicë nuk do të jetë Bedri Hamza, besoj që kryesia ja jep besimin Arian Tahirit – nënkryetarit të komunës”, tha Krasniqi për Mitrovicën.

Kritika e ashpër nga Haradinaj: Deputetët të testohen për drogë, shumë prej tyre janë konsumues

Deputeti i betuar i Aleancës për Ardhmërinë e Kosovës, Daut Haradinaj, ka folur për bllokimin e Kuvendit, i cili po vazhdon edhe më tej, duke thënë se ata kanë ofruar zgjidhje dhe janë të gatshëm për kompromis.

“Ne kemi ofruar, po ofrojmë zgjidhje, jemi të gatshëm të japim kompromis, kemi thënë pa asnjë kusht, nuk kemi asnjë pengesë për të dalur nga kjo situatë, por është e pandershme tash me kërku prej opozitën për egon e një individi që për 37 seanca insiston dhe e din që produkti është i njëjtë”, është shprehur ai në Klan Kosova.

Tutje, ai ka thënë gjithashtu se një pjesë e mirë e deputetëve janë narko-konsumues.

“Ka të drejt zonja Mihali kur thotë deputetët, sepse po shihet kush parfumoset e kush bën sfilitë. Nëse do të jemi ndonjëherë në pushtet, kushti i parë do të jetë testimi i narko konsumueve, mos me qenë deputet, sepse mendoj që një pjesë e mirë e tyre janë narko konsumues, edhe do të ishte shumë më mirë ajo me u përqëndru edhe me u fokusu tek deputetët që konsumojnë substanca”, u shpreh ai.

As Muja, as Bahtiri, ky është kandidati i VV-së për Mitrovicën

Faton Peci do të jetë kandidat i Vetëvendosjes për zgjedhjet e tetorit në Mitrovicë.

Burime të Indeksonline bëjnë të ditur se kryetari i Guxo e ka fituar garën me Armend Mujën dhe Agim Bahtirin që synonin të ishin kandidatë në zgjedhjet lokale.

Kryeministri Kurti pritet të jetë nesër në Mitrovicë ku edhe do të bëhet nominimi i Pecit si kandidat për kryetar të komunës.

Kandidimi i Pecit pritet që të ketë kundërpërgjigje nga Agim Bahtiri, kandidati që lakmonte më së shumti nominimin si kandidat i VV-së.

Ka zëra që thonë se Bahtiri mund të dal si i pavarur në zgjedhjet e 12 tetorit.

Ngarkesa me mish të kontaminuar kthehet në Rumani – AUV: S’ka pasur rrezik për qytetarët

Raportimet për praninë e salmonelës në mishin e pulës së ngrirë, të ardhur nga Rumania dhe të blerë nga një kompani përpunuese në Kosovë, i ka sqaruar Agjencia e Ushqimit dhe Veterinarisë së Kosovës. Rasti kishte ndodhur vitin e kaluar, ndërsa u aktualizua në media gjatë kësaj jave. Sipas AUV-së, ngarkesa ishte paraqitur në pikën kufitare në Han të Elezit dhe, pas rezultateve laboratorike, u ndalua përpunimi dhe shitja e saj, e më pas u kthye në vendin e origjinës. Ndërkohë, pronari i kompanisë përpunuese, Burim Piraj, tha se ai mish ka qëndruar në depon e kompanisë së tij nën mbikëqyrjen e AUV-së dhe se ata nuk kanë përgjegjësi për cilësinë e mallit të importuar.

Pas raportimeve në media se një kompanie të mishit i është asgjësuar mish pule me salmonellë, Radio Kosova ka kontaktuar me Agjencinë e Ushqimit dhe Veterinarisë (AUV) dhe me pronarin e kompanisë, Burim Piraj. Rasti me mishin e kontaminuar kishte ndodhur vitin e kaluar dhe, duke qenë se nuk paraqiste rrezik për qytetarët, AUV ka deklaruar se nuk ka parë të nevojshme ta bëjë publik.

Agjencia e Ushqimit dhe Veterinarisë ka kthyer një ngarkesë mishi pule të ngrirë, të importuar nga Rumania, pasi në analizat laboratorike është zbuluar prania e bakterit Salmonella spp.

“Ngarkesa ishte paraqitur në pikën kufitare në Han të Elezit më 10 qershor 2024, e shoqëruar me dokumentacion të rregullt dhe e kontrolluar nga inspektorët veterinarë. Pas marrjes së mostrave dhe analizimit në Laboratorin e Ushqimit dhe Veterinarisë, është konstatuar se mishi nuk ishte i sigurt për konsum. Më 21 qershor 2024, AUV ka ndaluar përpunimin dhe tregtimin e kësaj ngarkese, duke i dhënë kompanisë mundësinë që ta kthejë mallin në vendin e origjinës ose të kërkojë asgjësimin e tij. Më pas, me vendim të datës 5 gusht 2024, është përcaktuar që ngarkesa të kthehet”, thuhet në përgjigjen e AUV.

Agjencia e Ushqimit, thotë tutje se “Kompania ka kërkuar kthimin e mallrave në Rumani, dhe kjo është realizuar më 13 gusht 2024, duke respektuar të gjitha procedurat ligjore dhe sanitare. Gjatë gjithë kësaj kohe, ngarkesa ka qenë në depon tonë por nën mbikëqyrjen e AUV-së dhe e bllokuar në depo frigoriferike, pa pasur kontakt me tregun”.

AUV konfirmon se konsumatorët nuk kanë qenë të rrezikuar në asnjë moment, prandaj rasti nuk është konsideruar i nevojshëm për t’u bërë publik.

Ndërkohë, pronari i kompanisë përpunuese të mishit, Burim Piraj, i tha Radio Kosovës se kompania nuk ka faj për cilësinë e produkteve të importuara. Ai theksoi se, pas analizave në pikën kufitare në Han të Elezit, është konstatuar se mishi nuk është i sigurt dhe, për pasojë, është kthyer në vendin e origjinës.

“Bëhet fjalë për një import të rregullt të lëndës së parë dhe, në bazë të analizave mikrobiologjike që janë kryer në pikën kufitare, është konstatuar se produkti në fjalë nuk i ka plotësuar standardet për konsum. Për këtë arsye, Agjencia e Ushqimit dhe Veterinarisë ka urdhëruar që ky produkt ose të asgjësohet, ose të kthehet në vendin e origjinës. Ne kemi kërkuar që produkti të kthehet, sepse edhe neve na ka konvenuar një zgjidhje e tillë. Kjo mund t’i ndodhë çdokujt dhe nuk është faji i importuesit”, tha Piraj.

Ndërkohë, Agjencia e Ushqimit dhe Veterinarisë mbetet e përkushtuar për ruajtjen e shëndetit publik. Ditë më parë, ajo ka bërë thirrje edhe për kujdes ndaj sëmundjes së dhenve, duke marrë parasysh shpërthimin e sëmundjes PPR (Mortaja e Dhenve dhe Dhive) në disa zona të Shqipërisë. AUV ka kërkuar kujdes të shtuar nga fermerët në zonat kufitare të Kosovës.

Pas armëpushimit Izrael-Iran, Sekretari i NATO-s indirekt i thotë Trumpit se është “Baba”

Sekretari i NATO-s, Mark Rutte, dhe presidenti amerikan, Donald Trump, sot kanë mbajtur një konferencë të përbashkët për media në kuadër të Samitit të NATO-s që po mbahet në Hagë, shkruan Express.

Në një moment, Trump duke folur për luftën mes Izraelit dhe Iranit dhe arritjes së marrëveshjes së armëpushimit, përplasjen mes dy vendeve e ka krahasuar me atë të dy fëmijëve kur zihen në shkollë.

“Ata patën një luftë të ashpër, si dy të fmijë në shkollë, po luftonin keq sa që s’mund t’i ndash”, ka thënë Trump.

Pastaj ka ndërhyrë Sekretari i NATO-s me humor , duke thënë se “pastaj babës i duhet ndonjëherë që të përdor gjuhë të ashpër”.

Sekretari i NATO-s ka vlerësuar bombardimin e caqeve nukleare të Iranit nga SHBA.

Qytetari alarmon me faturën: 715 euro rrymë për një market 170 metra

Rritja e çmimit të energjisë elektrike ka filluar të vë në pah efektet negative tek qytetarët.

Një person ka publikuar fotografinë e faturës së rrymës në rrjetet sociale, ku pretendon se ia kanë regjistruar 715 euro borxh për një lokal 170 metra katrorë, shkruan Insajderi.

Sipas tij, deri para një muaji, paguante energji 400-450 euro.

Shkrimi i plotë:

Si është e mundur me mbijetu me 715 euro rrymë?

Këtë muaj më ka ardhur fatura e rrymës 715 euro për një market prej 170 metrash katrorë. Deri para një muaji më ka ardhur nga 400 deri në 450 euro. Kjo rritje është e pakuptimtë dhe e papërballueshme për një biznes të vogël.

Na kanë zënë në gjumë si qytetarë të Kosovës. Sot, pasojat i ndjejmë ne – qytetarët dhe bizneset e vogla, por edhe ato të mëdha, sepse ky shtet mbahet nga bizneset private. Shtetërore nuk di çka ka që prodhon! Kjo qeveri nuk mendon për qytetarët, e më së paku për bizneset, prej të cilave vetë i merr të gjitha të hyrat dhe pagat.

Ky nuk është vetëm problem imi – është problem i të gjithëve!

Tërmet në Maqedoni të Veriut

Një tërmet me magnitudë sipas shkallës së Rihterit prej ML 2.4 ballë u regjistrua në orën 3 e 59 minuta të mëngjesit me epiqendër në Peshtani-Ohër-Strugë, rreth 115 kilometra në jugperëndim të Shkupit.

Observatori sizmologjik në Fakultetin e Shkencave natyrore- matematikore në Shkup kumtoi se, sipas të dhënave të deritashme, tërmeti u ndje në Ohër dhe zonën përreth me një intensitet prej III ballë sipas Shkallës evropiane makroseizmike, raporton Alsat M.

Nuk ka informacione për dëme materiale nga ky tërmet.