Vdes 26-vjeçarja e aksidentuar disa ditë më parë nga një veturë në Pejë

Ka ndërruar jetë 26-vjeçarja Zana Gjevukaj, e cila ishte goditur nga një veturë më 1 prill në fshatin Qyshk të Pejës.

Lajmin për vdekjen e saj e kanë bërë të ditur familjarët përmes një postimi në Facebook.

E reja kishte pësuar lëndime të rënda trupore si pasojë e aksidentit dhe, pavarësisht përpjekjeve për trajtim mjekësor, nuk arriti t’u mbijetojë plagëve.

Sipas informacioneve të para nga policia, shoferi i automjetit dyshohet se nuk e kishte përshtatur shpejtësinë me kushtet në rrugë, duke bërë që nga pakujdesia të godasë viktimën.

Kujtojmw se personi që e shkaktoi aksidentin është zyrtar policor.

Mot i paqëndrueshëm gjatë javës në Kosovë – Java nis me diell, por përfundon me…

Insituti Hidrometeorologjik i Kosovës (IHMK) tha se java e ardhshme me kushte të paqëndrueshme meteorologjike.

Parashikimi i Motit për pesë ditë (05 -09 maj 2025)

E hëne. Mot me diell dhe vranësira te pjesëshme. Temperaturat minimale do të lëvizin ndërmjet 6-10 gradë Celsius, ndërsa maksimalet e ditës parashihen të lëvizin ndërmjet 21 -26 gradë Celsius. Do të fryjë erë nga drejtimi i juglindjes.

E marte- Mot i vranët dhe me intervale me diell. Vranësirat gjatë ditës do të shoqërohen me riga shiu dhe shkarkime rrufesh. Temperaturat minimale do të lëvizin ndërmjet 7-10 gradë Celsius, ndërsa maksimalet e ditës parashihen të lëvizin ndërmjet 20-24 gradë Celsius. Do të fryjë erë nga jugperendimi me shpejtësi 1-9m/s.

E merkure- Mot i vranet dhe me intervale me diell.Vranësirat gjatë ditës parashihen të dendësohen duke krijuar kushte për riga shiu dhe shkarkime rrufesh. Temperaturat minimale do të lëvizin ndërmjet 6-10gradë Celsius, ndërsa maksimalet e ditës parashihen të lëvizin ndërmjet 19-22 gradë Celsius. Do të fryjë erë e lehtë deri mesatare nga drejtimi i veriperendimit.

E enjte- Mot me diell dhe vranesira te shperndara. Vranësirat gjatë ditës vende-vende mund te sjellin riga shiu. Temperaturat minimale do të lëvizin ndërmjet 6-10 gradë Celsius, ndërsa maksimalet e ditës parashien të lëvizin ndërmejt 18-22 gradë Celsius. Do të fryjë erë nga drejtimi i veriperendimit me shpejtesi 1-7m/s.

E premte- Mot i vranët dhe me riga shiu. Parashihen edhe shkarkime rrufesh nëpër disa zona të kufizuara.. Temperaturat minimale do të lëvizin ndërmjet 5-8 gradë Celsius, ndërsa maksimalet e ditës parashihen të lëvizin ndërmjet 18-20 gradë Celsius. Do të fryjë erë nga veriperendimi me shpejtesi 1-5m/s./

E rëndë në Batllavë – Gruaja gjendet pa shenja jete në liqen, zbardhen detaje të reja

Gazeta Sinjali ka mësuar ekskluzivisht se viktima që u gjet sot e pajetë në Liqenin e Batllavës, në afërsi të vendit të njohur si “Te Plepat”, është Teuta Kaçiu, rreth 45 vjeçare, e cila ishte nga fshati Lupç i Podujevës.

Sipas informacioneve që ka siguruar Sinjali, ajo dyshohet se ka dalë nga shtëpia rreth orës 10:00 të mëngjesit, ndërsa rreth orës 12:16 qytetarë të rastit kanë sinjalizuar autoritetet se në liqen është parë një trup në ujë.

Menjëherë në vendin e ngjarjes kanë dalë: Njësitë patrulluese, hetuesit dhe forenzika, njësia B-10, si dhe ekipi mjekësor dhe emergjenca, të cilët kanë bërë nxjerrjen e trupit nga uji dhe kanë konstatuar vdekjen.

Pas verifikimit, është bërë identifikimi zyrtar i viktimës, ndërsa autoritetet janë duke punuar për të sqaruar rrethanat e kësaj vdekjeje që për momentin mbetet e dyshimtë.

 

 

Me urdhër të Prokurorit të Shtetit, trupi i viktimës është dërguar për obduksion, ndërsa hetimet janë në zhvillim e sipër.

Putin lëshon paralajmërimin e ftohtë: Armët bërthamore janë opsion – Ende s’ka nevojë… por gjithçka është e mundur

Presidenti rus, Vladimir Putin, tha se nuk ka pasur nevojë për përdorimin e armëve bërthamore në Ukrainë dhe shpreson që të mos ketë.

 

 

 

Në një pjesë të shkëputur të intervistës me televizionin rus – që do të transmetohet e plotë më vonë – që u publikua të dielën në Telegram, Putin tha se Rusia ka fuqinë dhe mjetet për ta çuar konfliktin në Ukrainë në një “përfundim logjik”.

Duke u përgjigjur në pyetjen lidhur me sulmet ukrainase në territorin rus, Putin tha: “Nuk ka pasur nevojë për përdorimin e këtyre armëve [bërthamore]… dhe shpresoj që të mos ketë nevojë”.

“Ne kemi mjaftueshëm fuqi dhe mjete për të sjellë, atë që nisi më 2022, në një përfundim logjik, me rezultatin që Rusia kërkon”, tha ai.

 

 

Në nëntor të vitit 2024, Putin nënshkroi versionin e rishikuar të doktrinës bërthamore të Rusisë, ku përcaktohen rrethanat që i lejojnë atij të përdorë arsenalin bërthamor të Moskës – më të madhin në botë, raporton rel.

Ky version i përditësuar i doktrinës, uli kriteret, duke i dhënë atij mundësinë që të përdorë armët bërthamore edhe si përgjigje ndaj një sulmi konvencional, të mbështetur nga një fuqi bërthamore.

Deklaratat e Putinit vijnë në kohën kur pushtimi rus i Ukrainës është në vitin e tretë dhe kur dyja palët kanë mosmarrëveshje lidhur me propozimet për një armëpushim.

Të shtunën, presidenti ukrainas, Volodymyr Zelensky, tha se njoftimi i Moskës për një armëpushim 72-orësh javën e ardhshme në Ukrainë për të shënuar Ditën e Fitores në Luftën e Dytë Botërore ishte një “shfaqje teatrale”, teksa Rusia planifikon që 9 majin ta festojë me një sërë ngjarjesh, përfshirë një paradë ushtarake në Moskë.

Ai ka kërkuar një pauzë 30-ditore, që fillimisht ishte propozuar nga Shtetet e Bashkuara, por që nuk ishte pranuar nga Rusia.

Dhimbje në gjoks dhe kthim urgjent nga SHBA – Si është gjendja shëndetësore e Vuçiqit?

Gjendja shëndetësore e presidentit serb, Aleksandar Vuçiq, është stabile dhe e kënaqshme, sipas kardiologut Dragan Dinçiq nga spitali ushtarak në Beograd. Vuçiq kishte shfaqur simptoma shëndetësore gjatë një vizite në Shtetet e Bashkuara, ku mori menjëherë ndihmë mjekësore, raporton Gazeta Sinjali.

“Në ditët në vijim, nuk është reale të pritet që presidenti të jetë në gjendje t’i kthehet aktiviteteve të tij të rregullta”, deklaroi Dinçiq, duke sqaruar se pas analizave të fundit, Vuçiq pritet të dalë nga spitali gjatë ditës.

Gjatë qëndrimit në SHBA, Vuçiq përjetoi dhimbje në gjoks dhe presion të lartë të gjakut. “Mjekët në Amerikë kryen të gjitha kontrollet dhe presidenti, në kundërshtim me rekomandimin e tyre, vendosi të kthehej në Serbi”, tha Dinçiq.

Pasi mbërriti në Serbi, ai u ndje mirë dhe nuk pati komplikime gjatë udhëtimit. Ndërkohë, vizita e tij në SHBA përfshinte një takim me ish-kryetarin e Nju Jorkut, Rudy Giuliani, si dhe ishte planifikuar të takonte zyrtarë të Partisë Republikane – takime që u anuluan për shkak të shëndetit të përkeqësuar.

 

 

I dërguari i posaçëm i presidentit amerikan, Richard Grenell, përmes një postimi në X, i uroi Vuçiqit shërim të shpejtë, duke shprehur keqardhje për mungesën e takimit të planifikuar.

Vuçiq pritet të marrë pjesë më 9 maj në ceremoninë e Ditës së Fitores në Moskë, vizitë që është kritikuar nga Bashkimi Evropian. Serbia, ende nuk ka vendosur sanksione ndaj Rusisë për luftën në Ukrainë, megjithëse BE-ja i ka bërë thirrje të përsëritura që të harmonizojë politikën e jashtme me atë të bllokut.

E rëndë në Batllavë: Gjetet trup i pajetë i një gruaje – mësohet emri i viktimës

Gazeta Sinjali ka mësuar ekskluzivisht për një ngjarje të rëndë që ka ndodhur sot, më 04 maj 2025, në afërsi të Liqenit të Batllavës, në vendin e njohur si “Te Plepat”.

Rreth orës 12:15, autoritetet kanë pranuar një informacion alarmues, ku është raportuar se në liqen është parë një trup i pajetë, për të cilin fillimisht është dyshuar se i përkiste një gruaje rreth 40-vjeçare.

Menjëherë pas marrjes së informacionit, në vendin e ngjarjes janë aktivizuar njësitë relevante: Njësia patrulluese, njësia e hetimeve, ekipi mjekësor dhe emergjenca.

Pas ndërhyrjes në terren dhe nxjerrjes së trupit nga uji, ekipi mjekësor ka konfirmuar vdekjen, ndërsa më pas është bërë edhe identifikimi i viktimës: bëhet fjalë për Teuta Kaçiu, rreth 45 vjeçare.

Në vendin e ngjarjes janë duke vazhduar procedurat hetimore, ndërkohë që rrethanat e plota të vdekjes së saj mbeten të paqarta në këtë fazë.

Kaos në QKUK – Dr. Bajgora: Ishte si “luftë”, ndiheshim të rrezikuar

Dy persona të lënduar pas një përleshje janë dërguar dje për t’u trajtuar në Qendrën Emergjente.

Njëri i therur në shpinë e tjetri i lënduar në kokë nga mjetet e forta, iu nënshtruan trajtimit mjekësor.

Por, krejt ‘hallakama’ nuk përfundoi me kaq, por vazhdoi edhe brenda objektit të Emergjencës.

Aty pati përleshje mes disa personave, “miq të viktimave”.

Lidhur me rastin detaje ka dhënë për Klankosova.tv mjeku kujdestar Avdush Bajgora.

“Kemi qenë të rrezikuar edhe pacientët e tjerë edhe ne si staf. Ka shkuar luftë brenda mes tyre. Nuk më kujtohet saktë se si është zhvilluar rasti, por mezi kemi shpëtuar”, deklaroi Bajgora.

“E kemi thirrur policinë dhe sigurimin menjëherë të cilët kanë intervenuar në rast, dhe e kanë vënë nën kontroll. Ne shpesh në këso raste ndihemi të rrezikuar dhe e kemi të pamundur ta zhvillojmë punën tonë. Uroj dhe bëj apel që taste të tilla të mos përsëriten më”, deklaroi ai.

Mjeku kujdestar tutje tha se të lënduarit janë pranuar për trajtim në Kirugjinë Torakale.

“Personat e lënduar mund të them se janë jashtë rrezikut për jetë”, deklaroi ai./ Klankosova.tv.

Mbështeti Kurtin, tani po përballet me faturën, Palushi: Rryma po na kushton tri herë më shumë

Pronari i kompanisë Golden Eagle, Shaqir Palushi, ka njoftuar se pas vendimit të ZRrE-së, i cili obligon konsumatorët e mëdhenj të kalojnë në tregun e hapur pas datës 1 qershor 2025, Frutex ka kontaktuar operatorin aktual KESCO për të marrë ofertën për furnizim të mëtejmë dhe sipas kësaj oferte çmimi i energjisë elektrike është 225 për qind më shtrenjtë.

Përmes një njoftimi në Facebook, Palushi thotë se gjatë vitit 2024 Frutex ka paguar 421,000 euro për energji elektrike dhe të njëjtën sasi të konsumuar, pas 1 qershorit do të duhej të paguajmë 1,370,000 euro.

Sipas tij, kjo është një rritje e jashtëzakonshme dhe e papërballueshme për industrinë prodhuese.

Postimi i plotë:

Ftesë për paraqitje të ofertave nga operatorët e licencuar për furnizim me energji elektrike

Frutex fton të gjithë operatorët e licencuar për furnizim me energji elektrike që të paraqesin ofertat e tyre për furnizimin e kompanisë sonë, në përputhje me rregulloren për funksionimin e tregut të hapur të energjisë.

Pas vendimit të Zyrës së Rregullatorit për Energji (ZRRE), i cili obligon konsumatorët e mëdhenj të kalojnë në tregun e hapur pas datës 1 qershor 2025, Frutex ka kontaktuar operatorin aktual KESCO për të marrë ofertën për furnizim të mëtejmë.

Sipas kësaj oferte, çmimi i energjisë elektrike rezulton të jetë 225% më i lartë krahasuar me çmimin aktual.

Për ilustrim, gjatë vitit 2024 Frutex ka paguar 421,000 euro për energji elektrike. Për të njëjtën sasi të konsumuar, pas 1 qershorit do të duhej të paguajmë 1,370,000 euro – një rritje e jashtëzakonshme dhe e papërballueshme për industrinë prodhuese.

Të gjithë operatorët e interesuar ftohen të paraqesin ofertat e tyre apo të na kontaktojnë për informacione shtesë në adresën:
Email: info@goldeneagle-ks.com

Pas rritjes së çmimit të rrymës, rriten çmimet edhe në motele

Pas vendimit për rritjen e çmimit të energjisë elektrike për 16.1%, qytetarët e Kosovës po përballen me rritje të njëpasnjëshme të çmimeve në sektorë të ndryshëm të jetës së përditshme. Fillimisht, çmimi i bukës në shmë qytete të Kosova është shtrenjtuar nga 50 në 60 cent, përderisa në disa zona ka arritur deri në 70 apo 80 cent. Po ashtu, një kafe e zakonshme, e cila më herët kushtonte rreth 1.20 euro, tani në disa lokale në kryeqytet ka arritur deri në 2 euro.

Në këtë valë shtrenjtimesh, së fundmi kanë reaguar edhe pronarët e moteleve, të cilët kanë njoftuar rritjen e çmimit të pushimit. Nga 15 euro sa ishte më parë, çmimi për pushim në shumë motele është rritur në 20 euro, shkruan Gazeta Imazhi.

Ky trend shtrenjtimesh po vlerësohet si barrë e rëndë ekonomike për qytetarët, ndërsa njohësit e ekonomisë kanë paralajmëruar për ndikime të mëdha në fuqinë blerëse dhe jetesën e përditshme të popullatës. Shoqata e Mullistëve ka reaguar ashpër ndaj rritjes së çmimit të bukës, duke e cilësuar atë si të paarsyeshme dhe të motivuar nga fitimet e tepruara, e jo nga kosto reale.

Reagon ashpër Shoqata e Mullistëve: Shtrenjtimi i bukës jo real, u rrit për lluks

Pas vendimit për rritjen e çmimit të energjisë elektrike për 16.1%, qytetarët e Kosovës po përballen me një tjetër goditje në buxhetin e përditshëm.

Çmimi i bukës në Prishtinë është shtrenjtuar nga 50 cent për 60 cent, në qytete tjera të Kosovës raportohet se çmimi i një buke ka shkuar në 70 apo 80 cent, ndërsa një kafe e zakonshme në disa lokale të kryeqytetit nga 1 euro e 20 cent tani kushton deri në 2 euro.

Kjo situatë po vlerësohet si barrë e rëndë ekonomike për konsumatorët dhe shqetësim për këta të fundit.

Njohësit e çështjeve ekonomike, nuk janë pajtuar me rritjen e çmimit të bukës duke i cilësuar si enorme dhe çmime të paarsyeshme.

Kreu i Mullistëve: Rritja e çmimit të bukës është për luks, jo për kosto reale

Kryetari i Shoqatës së Mullistëve, Bashkim Zejnullahu, ka reaguar ashpër ndaj shtrenjtimit të bukës pas rritjes së çmimit të energjisë elektrike për 16.1%.

Sipas tij, rritja nuk ka asnjë bazë reale dhe është bërë për përfitime luksi.

Ai sqaroi për “Front Online” se ndikimi i rrymës në çmimin e bukës është minimal, vetëm rreth 2%.

Tutje, ka shpjeguar edhe deri në sa euro mund të shtrenjtohet çmimi i miellit.

“Veç për luks ka ndodh kjo rritje. Pse ka budalla blerës, asnjë arsye s’ka. Buka shkaku i rrymës është dashur për 2% të shtrenjtohet, kaq është pjesëmarrja e energjisë elektrike në pjesëmarrjen e bukës. Në industrinë tonë mielli rritet gjysmë deri në një cent për kilogram, apo 10 euro për një 10 ton miell. Prej 33 cent që është kilogrami i miellit, do të bëhet 34 cent më së shumti. Për një mijë kilogram 1 euro, për 10 mijë kilogram 10 euro”, u shpreh ai.