Kur dhe si mund të tërhiqen kursimet pensionale nga Trusti: Udhëzues i pIotë për qytetarët

Kursimet pensionale përbëjnë një nga shtyllat kryesore të sigurisë financiare për qytetarët pas përfundimit të jetës aktive të punës. Megjithatë, shumë kontribuues ende nuk janë të qartë kur, si dhe në çfarë rrethanash mund t’i tërheqin këto mjete nga Fondi i Kursimeve Pensionale i Kosovës (FKPK), shkruan Kujdestari.info.

Më poshtë paraqiten të gjitha rastet ligjore të tërheqjes së kursimeve pensionale, procedurat përkatëse dhe dokumentacioni i nevojshëm.

Pensioni i moshës – forma më e zakonshme e tërheqjesKur mund të tërhiqen kursimet?

Tërheqja e kursimeve pensionale bëhet kur kontribuuesi arrin moshën 65 vjeç. Aplikuesi duhet të dëshmojë moshën përmes një dokumenti valid identifikimi.

Si bëhet tërheqja?

Mënyra e tërheqjes varet nga bilanci i kursimeve në momentin e aplikimit:

Nëse bilanci është deri në 3,000 euro
Kursimet tërhiqen përnjëherë. Kontribuuesi mund të ofrojë llogari në cilëndo bankë në Kosovë. FKPK-ja i mbulon shpenzimet e transferit dalës, ndërsa tarifat eventuale hyrëse mbulohen nga përfituesi.

Nëse bilanci është mbi 3,000 euro
Kontribuuesi kalon në programin e Tërheqjes në Faza, i rregulluar me ligj dhe me rregullore të Bankës Qendrore të Kosovës.
Përfituesi mund të:

tërheqë 20% të kursimeve përnjëherë

pjesën tjetër ta pranojë përmes kësteve mujore, minimumi 200 euro në muaj, ose maksimumi 1% e bilancit total (kur shuma tejkalon 20 mijë euro).

Pagesat mujore realizohen përmes bankave të kontraktuara nga FKPK-ja dhe vazhdojnë derisa të shterret i gjithë bilanci.

Dokumentet për pensionin e moshës

Dokument valid identifikimi

Deklarim për bankën e përzgjedhur

Llogari aktive bankare (kur bilanci është nën 3,000 euro)

Trashëgimia e kursimeve pensionale

Në rast se kontribuuesi ndërron jetë para arritjes së moshës së pensionit, kursimet pensionale trashëgohen dhe paguhen përnjëherë, minus tatimi në të ardhurat personale.

Rendi i trashëgimisë:

Bashkëshorti/ja

Fëmijët

Përfituesit tjerë/alternativë

Nëse ekziston vetëm bashkëshorti/ja, ai/ajo trashëgon 100% të kursimeve. Në mungesë të bashkëshortit/es, fëmijët trashëgojnë sipas aktit të trashëgimisë.

Dokumentet për trashëgimi:

Dokument identifikimi i trashëgimtarit

Llogari aktive bankare në Kosovë

Akt i trashëgimisë nga noteri ose gjykata

Regjistrimi i vdekjes në regjistrin civil (verifikohet digjitalisht nga FKPK)

Pensioni invalidor- tërheqje e pjesshme

Para moshës së pensionimit, kontribuuesit që përfitojnë pension invalidor mund të aplikojnë për tërheqje të pjesshme të kursimeve pensionale.

Vendimi për pension invalidor lëshohet nga Administrata Pensionale pranë MPMS-së për periudha 1, 3 ose 5 vjet. Bazuar në këtë kohëzgjatje, FKPK-ja aprovon pagesa mujore prej 200 euro, deri në përfundimin e vlefshmërisë së vendimit.

Shembull:
Nëse pensioni invalidor është i vlefshëm për 3 vjet, përfituesi mund të tërheqë deri në 7,200 euro (36 muaj × 200 euro), ose më pak nëse kursimet nuk e mbulojnë këtë shumë.

Dokumentet për pension invalidor:

Dokument valid identifikimi

Vendimi për pension invalidor

Deklarim për bankën e përzgjedhur

Tërheqja nga shtetasit e huaj

Shtetasit e huaj me qëndrim të përkohshëm në Kosovë kanë të drejtë të tërheqin kursimet pensionale të paguara gjatë kohës së punësimit në Kosovë.
Nëse ata kanë fituar qëndrim të përhershëm ose shtetësi kosovare, kjo e drejtë nuk aplikohet.

Dokumentet e nevojshme:

Numër Individual Tatimor ose lejeqëndrim i përkohshëm

Vërtetim nga Regjistri Civil për statusin e shtetasit të huaj

Llogari bankare në Kosovë ose në vendin e origjinës

Tatimi mbi tërheqjet pensionale

FKPK-ja thekson se çdo tërheqje e kursimeve pensionale, qoftë për pension moshë, trashëgimi, invaliditet apo shtetas të huaj, i nënshtrohet tatimit në të ardhurat personale, sipas legjislacionit në fuqi.

Tërheqja e kursimeve pensionale është një proces i rregulluar qartë me ligj, por që kërkon informim të saktë dhe dokumentacion të plotë. Qytetarët këshillohen të planifikojnë me kujdes tërheqjen e kursimeve, veçanërisht në rastet e tërheqjeve të përsëritura, pasi këto mund të ndikojnë negativisht në shumën përfundimtare të përfitimit.

Specialja merr vendim për Thaçin

Në rastin ku Hashim Thaçit së bashku me Bashkim Smakajn, Fadil Falziun, Isni Kilajn dhe Hajredin Kuçin akuzohen për vepra penale kundër administrimit të drejtësisë, Thaçit i është vazhduar paraburgimi.

Vendim është marrë më 3 shkurt 2026 nga gjyqtari i vetëm në këtë rast, Christoph Gosnell, raporton “Betimi për Drejtësi“.

Në këtë vendim, është konstatuar se ekziston rreziku real që në rast që ai lirohet, mund të pengojë ecurinë e procesit dhe të kryejë vepra të tjera penale.

Ndryshe, fillimi i gjykimit ndaj Hashim Thaçit, Bashkim Smkajt, Isni Kilajt, Fadil Fazliut dhe Hajredin Kuçit për vepra penale kundër administrimit të drejtësisë, është caktuar për 27 shkurt 2026.

Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.

Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës./BetimipërDrejtësi

Familja shqiptare në Itali u shua nga monoksidi i karbonit, këta janë viktimat

Mediat italiane kanë zbardhur të tjera detaje në lidhje me tragjedinë e rëndë të ndodhur në Itali, ku 4 anëtarë të një familje shqiptare humbën jetën si pasojë e helmimit nga monoksidi i karbonit në banesën e tyre në zonën e Luccës.

Viktimat janë babai Arti Kola, 48 vjeç, nëna Jonida Kola, 43 vjeçe, si dhe dy fëmijët e tyre, djali Hadjar Kola, 22 vjeç, dhe vajza Xhesika Kola, 15 vjeçe, raporton A2CNN.

Gjatë ndërhyrjes janë helmuar lehtë edhe dy efektivë të policisë që hynë në banesë për të dhënë ndihmën e parë, por ata janë jashtë rrezikut për jetën.

Kjo është gjendja shëndetësore e të plag*osurit në Gjilan

40-vjeçari Arsim Krasniqi, i cili mbeti i plagosur mbrëmë nga të shtënat me armë zjarri në afërsi të një pike karburanti në rrugën Gjilan-Kamenicë, i ishte  nënshtruar  ndërhyrjes kirurgjike në Qendrën Klinike Universitare të Kosovës (QKUK).

Sipas burimeve të gazetare­s Arbreshë Uka, ai fillimisht është pranuar në Qendrën Emergjente, ku më pas është dërguar në sallën e operacionit. Në ndërhyrje kanë qenë të përfshira ekipet e Ortopedisë, Kirurgjisë Vaskulare dhe Anestezionit.

Të njëjtat burime, bëjnë të ditur se operacioni ka përfunduar dhe i plagosuri ka dalë nga salla e operacionit.

Aktualisht, ai është transferuar për trajtim të mëtejmë në Njësinë e Mjekimit Intensiv Qendror (MIQ), ku po vazhdon mbikëqyrja mjekësore.

Katër anëtarë të një familje shqiptare humbin jetën në Itali, ky është shkaku

Katër anëtarë të një familje, të dyshuar si shqiptarë, kanë humbur jetën nga helmimi me monoksid karboni në një shtëpi në Rughi, një qytet në provincën e Luccës në Itali.

Tragjedia ndodhi mbrëmjen e së mërkurës, kur të gjithë anëtarët e familjes u gjetën të vdekur nga helmimi i shkaktuar nga një shpërthim i monoksidit të karbonit.

Sipas raportimeve të Tgcom24. po hetohet për të zbuluar më shumë detaje mbi ngjarjen, teksa emrat e viktimave nuk janë zbuluar ende nga autoritetet.

Alarmi u dha nga një i afërm i familjes, kur ai nuk mundi të kontaktonte asnjë prej anëtarëve.

Kur shërbimet e urgjencës mbërritën në shtëpi, ata njoftuan se ishin katër viktima dhe një person në gjendje kritike.

Makina e shpëtimit nga Lucca, ambulancat, si dhe shërbimet e zjarrfikësve, reaguan menjëherë, duke hyre në shtëpi për të shpëtuar ata që mund të ishin ende të gjallë.

“Familja e viktimave dyshohet të jetë me origjinë të huaj, me shumë mundësi nga Shqipëria”.

Ky është zyrtari i Doganës që u gjet i vdekur në banesën e tij

Një ngjarje e rëndë është regjistruar dje në Prizren, ku një person është gjetur pa shenja jete brenda banesës së tij.

Rreth orës 11:30 të datës 4 shkurt 2026, Policia ka pranuar informatën se në rrugën “Alush Kryeziu” ndodhej një person mashkull pa shenja jete. Lajmi fillimisht është konfirmuar nga njësiti i emergjencës, i cili kishte dalë në vendin e ngjarjes.

Patrulla policore, së bashku me mbikëqyrësin përkatës, kanë dalë menjëherë në lokacion, ku është konstatuar vdekja e Enis Thaçi rreth 52 vjeç, i cili është gjetur pa shenja jete në banesën e tij.

Burime bëjnë me dije se viktima ishte punonjës i Doganës së Kosovës, për çka është njoftuar edhe institucioni përkatës.

Në vendin e ngjarjes kanë dalë njësia e hetimeve të stacionit policor, hetimet rajonale si dhe është kontaktuar Prokurori kujdestar, i cili ka urdhëruar inicimin e rastit “Hetimi i vdekjes”.

Pas procedurave fillestare, trupi i pajetë i është dorëzuar familjarëve.

Rrethanat e sakta të vdekjes mbeten ende të paqarta, ndërsa organet kompetente janë duke vazhduar hetimet për zbardhjen e plotë të rastit.

Tragjedi në Rahovec – një person gjendet pa shenja jete në një shtëpi, trupi dërgohen për obduksion

Një ngjarje tragjike ka ndodhur dje në Rahovec.

Një i moshuar raportohet të jetë gjetur pa shenja jete, në një banesë në rrugën “Halil Hamza”.

Sipas mediave rasti është raportuar në polici nga një familjar, i cili ka njoftuar se gjatë vizitës tek kushëriri i tij, i cili jetonte i vetëm, e ka gjetur të shtrirë në tokë viktimën.

IndeksOnline ka kontaktuar Policinë e Kosovës dhe do t’iu mbajë të informuar mbi rastin.

Vdes mësuesja e njohur, u nda nga jeta në ditëlindjen e saj

Mitrovica ka humbur sot një prej mësimdhënëseve të saj, Sebahate Halili-Peci.

Lajmi për ndarjen e saj nga jeta ka pikëlluar familjarë, kolegë, nxënës dhe qytetarë të shumtë, të cilët e njohën dhe e vlerësuan për përkushtimin e saj në arsim.

E ndjera u nda nga jeta në një ditë simbolike – në ditëlindjen e saj – duke e bërë këtë humbje edhe më të rëndë për të afërmit dhe të gjithë ata që e deshën.
Sebahate Halili-Peci do të kujtohet si një mësimdhënëse e përkushtuar, e dashur dhe e respektuar, e cila për vite me radhë kontribuoi në edukimin dhe formimin e gjeneratave të reja në Mitrovicë.

‘Një kilogram mish në Kosovë kushton rreth 14 euro ndërsa në Gjermani vetëm 7 euro’

Eksperti i ekonomisë Jakup Bellaqa ka folur për dallimin e madh të çmimeve mes Kosovës dhe Gjermanisë, transmeton gazeta “Kosova Sot Online”.

Sipas tij, çmimet e produkteve bazë në Kosovë janë dukshëm më të larta, duke përmendur se një kilogram mish në Kosovë kushton rreth 14 euro, ndërsa në Gjermani vetëm 7 euro.

“1 kg mish në Kosovë 14 euro derisa në Gjermani 7 euro”, ka theksuar ai.

Ai thekson se kjo diferencë e çmimeve nuk përputhet me nivelin e pagave dhe fuqinë blerëse të qytetarëve në Kosovë.

Kurti tregon se kur pritet konstituimi i institucioneve

Kryeministri në detyrë Albin Kurti nga Podujeva ka thënë se kabineti qeveritar i tij do t’i ketë emrat pothuajse ata emra që i kishte prezantuar vet ai si mandatar për kryeministër dhe Glauk Konjufca por që nuk morën votat e mjaftueshme.

Ai foli edhe për çështjen e postit të presidentit apo presidentes për çka shprehet optimist se do të ecën mirë si proces.

Kurti ka përmendur rëndësinë që sa më shpejtë të formohen institucionet e vendit në mënyrë që Kuvendi t’i miratojë edhe marrëveshjet ndërkombëtare me Bankën Botërore, Planin e Rritjes me Bashkimin Evropian por edhe buxhetin e Kosovës, e për këtë të fundit thekson se nuk mund të vazhdohet me 1/12 edhe në muajin mars.

“Do të ketë shumë prej emrave që tashmë i kam prezantuar unë dhe Glauk Konjufca vjeshtën e vitit të kaluar, mirëpo nuk do të jenë identikë. Do të ketë edhe emra të tjerë. Ne po përgatitemi që së pari ta konstituojmë Kuvendin dhe sa më shpejt ta formojmë qeverinë, sepse, siç e dini, kemi tri marrëveshje ndërkombëtare me Bankën Botërore dhe njëkohësisht e kemi edhe planin e rritjes me Bashkimin Evropian, që është 882.6 milionë euro dhe që duhet sa më parë ta miratojmë në Kuvendin e Republikës, pa harruar që kemi më së shumti përgjegjësi, obligim, por do të thosha edhe preferencë, e ky është buxheti për vitin 2026. Ju e dini që me 1/12 qeveria në detyrë mund të vazhdojë veç edhe për muajin shkurt, për muajin mars nuk mund të vazhdohet kësisoj. Andaj, në muajin shkurt duhet ta kemi të përmbyllur edhe çështjen e buxhetit”, tha Kurti.

E për postin e presidentes apo presidentit i tha se fillimisht duhet të kryhen tri cështjet e lartcekura.

“Njëherë këto tre hapa do t’i përmbyllim, pastaj edhe te hapi i katërt do të ecim mbarë e mirë”, tha ai./EO