Rritja e çmimeve të naftës, Qeveria në detyrë del me këtë vendim

Ministrja në detyrë e Industrisë, Ndërmarrësisë dhe Tregtisë, Rozeta Hajdari, ka njoftuar se ka nënshkruar vendim për caktimin e masave mbrojtëse për produktet e naftës që përdoren në transport.

Hajdari ka thënë se vendimi është marrë me qëllim të mbrojtjes së konsumatorëve dhe konkurrencës së drejtë në tregun vendor.

Sipas vendimit, shitja me shumicë është caktuar deri në 2 cent për litër, teksa për shitjen me pakicë 12 centë për litër, shkruan Reporteri.net.

“Ky vendim është rezultat i mbikëqyrjes së vazhdueshme të tregut të naftës, përmes evidencave të përditshme të Doganës së Kosovës dhe raporteve nga ana e Inspektoratit Qendror të Mbikëqyrjes së Tregut, ku është evidentuar se ndryshimet e çmimeve furnizuese nga importi shpesh pasqyrohen në rritje të menjëhershme të çmimeve të shitjes, ndërsa nuk ndodh një reflektim proporcional në ulje kur çmimet furnizuese bien…Përmes këtij vendimi të sotëm, që hyn në fuqi një ditë pas publikimit në Gazetën Zyrtare të Republikës së Kosovës, parashihet mbikëqyrje e shtuar inspektuese nga Inspektorati i Tregut në bashkëpunim me Doganën dhe Administratën Tatimore”, ka shkruar Hajdari./Reporteri.net

“Kurti me vizionin e tij komunist është më i dëmshëm sesa një hajn ordiner në qeveritë e kaluara”

Analisti Azdren Shala ka deklaruar se kryeministri në detyrë, Albin Kurti, siç thotë ai, me vizionin e tij komunist, raportin me ndërkombëtarët dhe në aspektin diplomatik, i bën më shumë dëm Kosovës, sesa një hajn ordiner që mund të ishte në qeveritë e mëparshme.

Në emisionin “Kosova Today”, Shala po ashtu tha se pavarësisht rritjes së çmimeve në tavan, Qeveria Kurti ka heshtur gjithmonë, transmeton Klankosova.tv.

“Kur vinë mërgimtarët për festat e fundvitit çmimet shkojnë në tavan. Ne nuk kemi pasur ndonjë rritje të naftës, energjisë, por pse po rriten çmimet? Dhe Qeveria hesht, në këtë rast Qeveria Kurti. Unë mendoj që ky në aspektin diplomatik, raporti i tij me ndërkombëtarë, vizioni i tij komunist për botën, pakrahasimisht është më i dëmshëm se një hajn ordiner që ka mundur me qenë në Qeverinë Haradinaj ose në Qeverinë Mustafa e Thaçi”, u shpreh Shala.

Derisa gazetari Ardian Gaxherri ia shtroi një pyetje kryeministrit Kurti.

“A jemi të varfër apo të vjedhur?”, ishte pyetja e tij, duke thënë se me këto gënjeshtra ai erdhi në pushtet.

Merret vendimi: Ndahen nga 600 euro për këta punëtor

Bordi i Drejtorëve të Pallatit të Rinisë ka marrë vendim që të ndajë nga 600 euro për secilin punëtor, si shpërblim për kontributin dhe përkushtimin e treguar gjatë vitit 2025.

Vendimi është marrë në mbledhjen e Bordit, duke u bazuar në performancën pozitive financiare të Ndërmarrjes. Kjo shumë përfaqëson një rritje krahasuar me vitin e kaluar, ndërsa Bordi ka bërë të ditur se synimi është që, në vazhdën e përmirësimeve të vazhdueshme dhe standardeve të vendosura gjatë tre viteve të fundit, vlera e shpërblimit të rritet çdo vit.

Sipas Bordit të Drejtorëve, gjendja financiare e Pallatit të Rinisë është stabile dhe pozitive, me të hyra që kanë tejkaluar planifikimin vjetor për 16.35 për qind.

Çitaku për intervistën e Konjufcës: Paska folur sikur ta kishte dorëzuar librezën e VV-së

Sekretarja e Partisë Demokratike të Kosovës (PDK), njëherit edhe kandidate për deputete, Vlora Çitaku ka ironizuar me intervistën e njeriut të dytë të Lëvizjes Vetëvendosje (LVV), Glauk Konjufca, për të cilin tha se fliste sikur ta kishte dorëzuar librezën e Vetëvendosjes në hyrje të emisionit.

Çitaku ka vlerësuar se intervista e tij mbrëmë ishte sikurse e një mysafir rasti në historinë e Vetëvendosjes.

“Konjufca dje paska folur sikur ta kishte dorëzuar librezën e Vetëvendosjes në hyrje të “Pressing”-ut në T7. Në njërën anë dalin me thirrje patetike “Mos lësho pe”.

Ndërsa, në anën tjetër, Konjufca vetë paska lëshuar pe në gjithçka. Madje, e paska lëshuar edhe Vetëvendosjen, gjuhën e saj, arrogancën e saj, dështimet e saj.

Pesë vjet në pushtet i paska shndërruar në amnezi politike. Paska folur sikur të ishte një mysafir i rastit në historinë e Vetëvendosjes.

Një këshillë miqësore: në vend të një narrative të re në funksion të zgjedhjeve, filloni duke marrë përgjegjësi për përçarjet dhe linçimet që keni ushqyer”, ka shkruar Çitaku për intervistën e Konjufcës  dhënë mbrëmë në në T7.

Faton Peci merr vendimin e parë si kryetar i Mitrovicës

Kryetari i Mitrovicës, Faton Peci ka marrë vendimin e parë si kryetar, për themelimin e komisionit për Identifikimin e Nevojave për Fëmijet me Nevoja të Veçanta Arsimore, transmeton Gazeta Online Veriu.info.

“Ky komision do identifikojë me saktësi nevojat e nxënësve, me fokus ata me vështirësi në të nxënë dhe me nevoja të veçanta”, ka shkruar Peci.

Kujtojmë se Peci u betua si kryetar i Mitrovicës të premtën me 12 dhjetor.

Postimi i plotë:

Mirëmëngjesi

Vendimi i parë si kryetar që e mora është themelimi i komisionit për Identifikimin e Nevojave për Fëmijet me Nevoja të Veçanta Arsimore.

Ky komision do identifikojë me saktësi nevojat e nxënësve, me fokus ata me vështirësi në të nxënë dhe me nevoja të veçanta.

Pasqyra më e mirë e një shoqërie është se si iu qaset këtyre kategorive .

Paralajmërohet borë dhe temperatura -20°C në Kosovë

Menaxheri i departamentit meteorologjik në KANS, Sherif Gosalci ka thënë se do të ketë mjegull edhe në ditët në vijim.

“Zhvillimet aktuale preliminare, na paralajmërojnë për një ndërrim të motmoteve me reshje bore dhe acar që mund të përshkohet me temperatura polare edhe deri – 20°C”, ka thënë Gosalci.

Vrasje në tentativë në Prishtinë, dy persona hyjnë në oborrin e një shtëpie dhe qëllojnë me armë zjarri

Një vrasje në tentativë ka ndodhur dje në Prishtinë.

Policia e Kosovës bën të ditur se se dy persona të panjohur kanë hyrë në oborrin e një personi në Prishtinë dhe kanë shtënë me armë zjarri në drejtim të shtëpisë.

Disa predha kanë depërtuar brenda, duke dëmtuar dhe disa mobilje shtëpiake. Në vendin e ngjarjes janë gjetur dhe sekuestruar 27 gëzhoja.

“Prishtinë / 15.12.2025 – 19:21. Është raportuar se dy persona të panjohur kanë hyrë në oborrin e ankuesit mashkull kosovar dhe kanë shtënë me armë zjarri në drejtim të shtëpisë, ku disa predha kishin depërtuar brenda dhe kishin dëmtuar disa mobile shtëpiake. Në vendin e ngjarjes janë gjetur dhe sekuestruar 27 gëzhoja”, bën të ditur policia.

Vdes kandidati për deputet në Kuvendin e Kosovës

Ka vdekur kandidati për deputet në Kuvendin e Kosovës, Bastri Dubova, i cili ishte pjesë e listës zgjedhore të Partisë Liberale Egjiptiane.

Lajmin e ka bërë të ditur kryetari i kësaj partie, Veton Berisha përmes një postimi në rrjetin social në Facebook.

Berisha tha se Dubova ishte shpallur Qytetar nderi në Komunën e Obiliqit nga kryetari i kësaj komune

“Në emër të Partisë Liberale Egjiptiane, shprehim ngushëllimet tona më të sinqerta për ndarjen nga jeta të z.Bastri Dubova , aktivist kombëtarë, anëtar i Lëvizjes Egjiptiane, anëtar i Partisë Liberale Egjiptiane, si dhe pjesë e listës së kandidatëve për deputet në zgjedhjet e 28 dhjetorit! Bastri Dubova është shpallur Qytetar nderi në Komunën e Obiliqit nga kryetari i kësaj komune  z. Xhafer Gashi, falë punës dhe angazhimit të tij rreth në të mirë të qytetarëve të Obiliqit”.

“Mikun tonë do ta kujtojmë përgjithmonë si një aktivist i palodhur, burrë fisnik e bujar! Humbja e tij është e madhe për familjen, miqtë dhe për gjithë komunitetin tonë Egjiptian. Kontributi dhe angazhimi i tij do të mbetën gjithmonë të çmuara dhe të paharruara”.

“Njoftojmë se varrimi i të ndjerit do të bëhet sot më datë 16.12.2025 në fshatin Medvec Komuna e Lipjanit duke filluar nga ora 12:00h! Partia Liberale Egjiptiane, sot do i ANULOJ të gjitha aktivitetet zgjedhore në kujtim të punës dhe veprës së të ndjerit z. Dubova! Fotografia më poshtë është fotografia e fundit e z.Dubkva, e cila është realizuar më 14.12.2025, në kuadër të përgatitjeve për zgjedhjet e 28 dhjetorit”, ka shkruar ai.

Lahi Brahimaj shokon me deklaratën: Albin Kurti, dezertor i UÇK-së

Gjenerali i UÇK-së dhe kandidati për deputet nga AAK, Lahi Brahimaj, ka komentuar këngën e Edona Llalloshit dedikim për Albin Kurtin.

Në “VV Show”, gazetari Vehbi Kajtazi e pyeti Brahimajn se si e vlerëson që për Kurtin është bërë një këngë, ndërsa për të jo.

“Për Kurtin është bë një këngë e për juve jo, si e sheh këtë, Kurti po na del goxha njëfarë patrioti”, pyeti Kajtazi.

Brahimaj u shpreh se, Kurti nuk ka qenë pjesë e UÇK-së dhe nuk ka marrë pjesë aktive në luftë, madje e ka quajtur edhe “dezertor”.

“Unë i kam pa komentet, por këngën jo. Kom pas fatin me qenë pjesë e Shtabit të UÇK-së që nga themelimi deri në çlirimin e vendit, kam qenë në malet e Berishës kur kanë Muhamet Mavraj dhe Albin Kurti. Dhe ai nuk ka pranu me kanë pjesë e UÇK-së. Unë e kam dëgju komandant Remin, për të cilin kam respekt, e komandant Selimin, që kanë thënë ai është bashkëluftëtar i joni. Në fakt ai, në asnjë rrethanë nuk ka qenë ushtar, nuk ka pas pushkë, nuk ka vesh uniformë, në zyrën e Adem Demaçit ka qenë  si përkthyes. Nuk ka pas asnjë pozicion në strukturat e UÇK-së. Zyra e Adem Demaçit ka qenë në Prishtinë. Demaçi ka qenë i emëruar si përfaqësues i UÇK-së , dhe e ka zgjedh një djalë të ri që ka dit më përkthy anglisht, kaq ka qenë, dhe deri në një moment edhe nga ajo zyre ka dhënë dorëheqje.

Në fakt, nëse ky ka qenë ushtar dhe ka dhënë dorëheqje dhe thotë unë nuk jam që Kosova me pushkë, ai në fakt është dezertor. Dhe për mendimin tim, më mirë është mos me qenë UÇK sesa dezertor. Ata që e njohin ushtrinë, më mirë është mos me kanë fare ushtar sesa dezertor. Për mu nuk është marrë që në atë kohë një djalë nuk ka qenë pjesë e UÇK-së, trimërinë edhe tutën ta falë Zoti. Por është e rëndë dhe e dënueshme, në shtetet demokratike çdo dezertor dënohet.  Nëse ai është ashtu, me pas qenë shteti siç duhet ai ish dënu me ligjet e Kosovës për dezertim. Nëse do me marrë merita se ke qenë atëherë duhet me trajtu edhe atë pjesën që je dezertor”.

Ai shtoi se këngët që lidhen me luftën duhet të fokusohen te ata që kanë sakrifikuar jetën për vendin.

“Më vjen mirë që Edona ka vendos me i këndu dikujt, por më vjen keq që nuk e ka përzgjedh me këndu një nënë të dëshmorit, një djalë dëshmorit. Unë e kam pas fatin me njoft Faruk Elezin, një djalë i ri, student që ka ardh mu bo ushtar dhe Sylejman Selimi e ka refuzu, për shkak se ishte djalë i shumë motrave, prindin e kishte invalid dhe e ka refuzu. Pastaj ka ardh me imponim është bë ushtar, ka ra me 21 maj në hyrje të Grobonicës, Klinës, në mbrojtje të pozicioneve. Ndërsa ai (Kurti) nuk e ka pranu. Edona sigurisht do ishte më mirë me i këndu Faruk Elezit se cilitdo të gjallë, edhe mua. Nëse e do për nder, do duhej një asi djali, që ia shëron plagët një nëne kur e dëgjon këngën e djalit të vet

Konjufca: Lotët e nanës Rukë janë lot të dhimbjes por edhe krenarisë, ata lotë nuk mundet me i gjyku bash kërkush

Nënkryetari i Lëvizjes Vetëvendosje, Glauk Konjufca, ka qenë I ftuar në “Pressing” të T7.

Për deklaratën e zyrtarit të Lëvizjes Vetëvendosje në KQZ, Alban Krasniqi rreth lotëve të nënës së Ramush Haradinaj, Konjufca a thënë se ka qenë deklaratë e gabueshme.

Ai ka thënë se askush nuk mundet t’i gjykojë lotët e nënës Rukë.

“Ka qenë deklaratë e pakujdesshme, mendoj që ka qenë e gabueshme. Lotët e Nënës të Haradinajve, nënes Rukë, janë lot të dhimbjes, por edhe të krenarisë që i ka dhënë djemt për lirnë e Kosovës. Ata lot nuk mundet me i gjyku bash askush”, ka thënë Konjufca.