Vendim i rëndësishëm në Hagë: Caktohet gjyqtari që do ta gjykojë Hashim Thaçin

Pas njoftimit se më 12 nëntor 2025, dosja gjyqësore do i kalojë trupit gjykues për gjykim në rastin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, është caktuar edhe gjyqtari i vetëm për këtë rast.

Sipas vendimit të kryetares së Dhomave të Specializuara të Kosovës (DhSK) në Hagë, Ekaterina Trendafilova, gjyqtari i caktuar është Christopher Gosnell, raporton “Betimi për Drejtësi“.

Gosnell do të jetë gjyqtari i vetëm në këtë rast për shkak se akuzat në këtë rast nuk klasifikohen si krime të rënda.

Ndryshe, më 11 nëntor 2025 gjyqtarja e procedurës paraprake, Marijorie Masselot njoftoi që dosja gjyqësore t’i dorëzohet trupit gjykues më 12 nëntor 2025.

“Pasi ka përfunduar të gjitha hapat e nevojshëm brenda juridiksionit të saj në çështjen e Prokurorit të Specializuar kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, Gjyqtarja e Procedurës Paraprake konfirmon se dosja e plotë e çështjes, në përputhje me Rregullën 98 të Rregullave, do të jetë gati për t’iu përcjellë Panelit Gjyqësor të Mërkurën, më 12 nëntor 2025, dhe e njofton për këtë Kryetaren e Dhomave të Specializuara m”, thuhet në njoftim.

Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe vitin e kaluar i është ngritur aktakuza kundër administrimit të drejtësisë.

Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.

Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.

Hill: Rexhep Selimi nuk ishte në pozitë të lartë në UÇK

Christopher Hill ka deklaruar se nuk e mban mend të ketë thënë ndonjëherë se Rexhep Selimi mbante pozitë të lartë në UÇK, “por kishte qëndrime të vlefshme”, transmeton gazeta “Kosova Sot Online”.

Duke iu përgjigjur pyetjeve të prokurorit, Hill tha se gjatë takimit në Likoc më 1998 “ne e kuptuam se Selimi do të ishte në pozitë për të na dhënë përgjigje, por në fakt ishte nga grupi i Drenicës”.

Hill shtoi se pasi “nuk morëm përgjigje, ne menduam se ai thjesht po përfaqësonte ca opinione të grupit të Drenicës”.

Ministri i propozuar nga Kurti mbron gazetarin Kërquki pas sulmeve të Gërvallës

I propozuari i Albin Kurtit për ministër të Kulturës në qeverinë e re, aktori Fatmir Spahiu e ka mbrojtur gazetarin Leonard Kërquki nga sulmet e Donika Gërvallës, zëvendëskryeministres në detyrë të Qeverisë së Kosovës.

Spahiu e ka vlerësuar Kërqukin si “personin, gazetarin dhe moderatorin më ballansues në Kosovë”.

Reagimi i tij ndërlidhet me sulmin e rëndë të Donika Gërvallës ndaj gazetarit.

Zëvendëskryeministrja në detyrë e quajti ‘rrugaç’ Kërqukin të martën në mbrëmje, pas një debati televiziv që përshkallëzoi gati në përplasje fizike mes dy të ftuarve në studion e emisionit Pressing. Dy protagonistët ishin gazetari Parim Olluri dhe deputeti Nezir Kraki.

“Leonard Kerquki është personi, gazetari dhe moderatori më ballansues në Kosovë”, tha Spahiu. “Autor i kronikave dhe dokumentarve që kanë zgju interesim të madh tek publiku! Person që meriton respekt, nëse ka mbet diku naj atom prej tij në Kosovën momentale”.

Spahiu, i cili rreth tri javë më parë u propozua si anëtar i kabinetit qeveritar të Qeverisë Kurti III – e cila nuk mori mbështetjen e deputetëve në Kuvend, tha se në emisionin Pressing të Kërqukit ka hapësirë për gjithëkënd.

“Ne Pressingun e tij, për aq sa e kam përcjell unë, kanë gjetë hapësirë prej Noel Malcolmit e deri tek zavendësdrejtorët e ujësjellseve rajonale”, vazhdoi Spahiu në një shkrim të postuar në Facebook të mërkurën.

Ai, vuri në dukje edhe prezencën e tepërt të politikës në media.

“Nëse publiku shqiptar i Kosovës dikur zbavitej me premierligë e kafene, etj, sot zbavitet me fatin e vet në debate të shumta”, tha ai.

Spahiu rekomandoi që protagonistët e politikës e medias të përpiqen të imitojnë mënyrën e komunikimit të Ibrahim Rugovës e Fehmi Aganit, dy personaliteteve të ndjera të njohur për gjuhën e butë të komunikimit.

Vazhdon verifikimi i votave në Mitrovicë – a po ndryshon rezultati?

Në Qendrën Komunale të Numërimit në Mitrovicë së Jugut është duke vazhduar procesi i verifikimit të rezultateve të raundit të dytë mes Faton Pecit të VV-së dhe Arian Tahirit të PDK-së.

Deri më tani janë procesuar 69 vendvotime, që kanë rezultuar me këto të dhëna: Peci (51,27%) dhe Tahiri (48,73%)

Prokurori që do ta hetojë rastin e dyshimeve të ngritura është ndërruar, ndërsa po vazhdojnë polemikat mes akterëve të dy partive për garën në Mitrovicë./Klankosova.tv

 

Verifikohen rezultatet e 75 vendvotimeve në Mitrovicë të Jugut

Në Qendrën Komunale të Numërimit në Mitrovicën e Jugut po vazhdon procesi i verifikimit të rezultateve të raundit të dytë të zgjedhjeve për Kryetar të Komunës, pas vendimit të Prokurorisë Themelore në Mitrovicë për rifillimin e numërimit të ndërprerë hënë për shkak të dyshimeve për manipulim me fletëvotime.

Sipas zëdhënësit të KQZ-së, Valmir Elezi, deri në orën 09:00 të ditës së sotme janë verifikuar rezultatet e 75 vendvotimeve nga gjithsej 105 sa i takojnë kësaj komune.

“Ky proces planifikohet të përfundojë gjatë ditës së sotme”, tha Elezi.

Numëruesit që po verifikojnë votat kanë bërë të ditur për Ekonomia Online se edhe gjatë ditës së sotme kanë hasur në fletëvotime me gabime teknike.

Vendimi i Prokurorisë për rifillimin e procesit është marrë pas sqarimit zyrtar nga kompania sllovene CETIS, e cila ka printuar fletëvotimet për zgjedhjet komunale në Kosovë. Në njoftimin e saj, kompania ka sqaruar se problemi me mospërputhjen e numrave serikë ka ndodhur si pasojë e një defekti teknik në njërën nga pllakat e printerit që përdoret për shtypjen e kodit të qendrës së votimit.

“Kjo pasi kompania CETIS mbi printimin e fletëvotimeve për zgjedhjet komunale në Kosovë, përmes një njoftimi ka shpjeguar se problemi i numërimit ndodhi ekskluzivisht në njërën nga katër kokat/pllakat e printerëve me ngjyrë, përgjegjëse për printimin e numrit të qendrës së votimit, dhe se marrin përgjegjësi për këtë gabim, sipas të cilës në rrethana normale do të ishte pothuajse i pamundur të ndodhte”, thuhet në komunikatën e kompanisë.

Për të ruajtur integritetin e procesit të numërimit, Prokuroria Themelore në Mitrovicë ka bërë të ditur se ka caktuar dy hetues policorë, të cilët do të jenë të pranishëm gjatë gjithë kohës së verifikimit për të mbikëqyrur procesin dhe për të garantuar transparencë të plotë.

Numërimi i votave në QKN, ngushtohet diferenca mes Pecit e Tahirit

Bajrami për votat në Mitrovicë: Kushdo që ka guxuar të prekë vullnetin e qytetarëve e ka vendin në burg

Deputetja e Lidhjes Demokratike të Kosovës, Hykmete Bajrami, është deklaruar lidhur me numërimin e votave në Mitrovicë të Jugut, ku dyshohet se ka manipulime me vota.

Bajrami vlerëson se kushdo që ka prekur votat dhe kushdo që ka guxuar të prekë vullnetin e qytetarëve e ka vendin në burg, njofton Dukagjini.

Mes tjerash, deputetja i ka bërë thirrje urgjente Komisionit Qendror të Zgjedhjeve, Prokurorisë, Policisë që të veprojnë dhe të qartësojnë krejt çka ka ndodhur në Mitrovicë.

“I bëj thirrje urgjente KQZ-së, Prokurorisë, Policisë dhe institucioneve tjera ligj zbatuese të veprojnë dhe të qartësojnë gjithçka që ka ndodhur në Mitrovicë. Nuk duhet dhe nuk guxon të kalojë si diçka normale një gabim i ashtuquajtur “teknik” në fletëvotime. Askush nuk duhet të frikësohet nga zbardhja e së vërtetës. Procesi elektoral është lënduar dhe duhet sa më shpejt të ketë përgjigje dhe përgjegjësi!”, ka shkruar Bajrami.

Olluri i reagon Gërvallës pas debatit me Krakin: Ti je nxitesja e gjuhës ofenduese kundër mediave

Gazetari, Parim Olluri i ka reaguar diplomatës së detyrë, Donika Gërvalla, e cila reagoi pas përplasjes së të parit me deputetin e VV-së, Nezir Krarin në një studoi televizive, ku përveç debatit të ashpër transpemtimi u ndërpre për shkak të indikacioneve për sulm fizik, raporton GazetaDemos.

Gërvalla ‘eskaloi’ në ofendimi në këtë reagim, duke thënë; “Televizion rrugaç.. Moderator rrugaç. “Analist” mercenar rrugaç. Por me prof. Nezir Krakin kot e keni. As nuk mateni e as nuk ia dilni dot. Në mes të llumit tuaj shkëlqen dija dhe dinjiteti i tij. Marre ju koftë!”.

Për këtë gjuhë të përdorur, Olluri deklaroi se vetë ministrja në detyrë është nxitja dhe promotorja e gjuhës ofenduese kundër mediave në Kosovë.

“Gjuha fyese dhe shpifese e eksponenteve te pushtetit kunder gazetareve beri qe debati te eskalonte. Shpreh keqardhje ndaj publikut qe nuk meritonte te shihte pamje te tilla. Debati eskaloi dhe perfundoi ne menyren qe nuk do te deshiroja.

Sa i perket postimit te kryediplomates ne detyre, Donika Gervalles, qe s’paska lene gje te zeze pa thene, ajo vec e paska konfirmuar edhe njehere qe eshte nxitesja dhe promotorja e gjuhes ofenduese kunder mediave”, tha ai.

Vrasja e 37 vjeçarit nga Gjilani- Sot merret vendimi final ndaj dy të akuzuarve

Sot pritet aktgjykimi për rastin e vrasjes tinëzare të Sokol Osmanit në Gjilan

Në Gjykatën Themelore të Gjilanit është paraparë që sot të përmbyllet procesi gjyqësor për rastin e vrasjes së 37-vjeçarit Sokol Osmani, i cili u vra në mënyrë tinëzare në nëntor të vitit 2024 në qytetin e Gjilanit.

Pas disa muajsh seanca gjyqësore dhe dëgjimi të të gjithë dëshmitarëve, sot pritet të shpallet aktgjykimi ndaj dy të pandehurve në këtë rast, Valmir Salihu dhe Florian Mitev, të cilët po mbahen në paraburgim që nga vetëdorëzimi i tyre para autoriteteve pas një periudhe të gjatë kërkimi nga Policia e Kosovës..

Gjatë shqyrtimit gjyqësor, dëshmitarët kanë dhënë deklaratat e tyre për rrethanat e ngjarjes tragjike që tronditi opinionin publik në nëntor të vitit të kaluar. Prokuroria ka ngritur aktakuzë ndaj të pandehurve për vrasje të rëndë, ndërsa mbrojtja ka kërkuar lirimin e tyre me arsyetimin se nuk ekziston bazë e mjaftueshme provuese.

Familja Osmani ka qenë e pranishme në seancat kryesore dhe ka kërkuar drejtësi për djalin e tyre të vetëm, Sokol Osmanin, duke theksuar se humbja e tij ka lënë një boshllëk të madh në familje dhe komunitet.

Aktgjykimi pritet të shpallet gjatë ditës së sotme në orën 13:00, pas shqyrtimit përfundimtar të provave dhe deklarimeve nga gjykata.

Kërquki reagon pas ofendimeve të Donika Gërvallës, e cila e quajti rrugaç

Moderatori dhe autori i emisionit “Pressing”, Leonard Kërquki, ka reaguar pas situatës së fundit në emisionin e tij, për të cilin reagoi edhe ministrja në detyrë, Donika Gërvalla-Schwarz.

Kërquki kërkoi falje për atë çfarë ndodhi gjatë emisionit, duke thënë se ndjen keqardhje.

“Ndjej thellësisht keqardhje për situatën e krijuar sonte ne “Pressing”. As nuk ishte e nxitur, e aq me pak e dëshiruar prej anës time. Te gjithë mysafiret janë njoftuar për panelistët që i kanë në studio qysh në mesditë. Ashtu sikurse për temën e debatit: pretendimet e PDK’së për keqpërdorimin e votave në Mitrovicë. Zhvillimi i debatit pastaj është edhe në dorën e të ftuarve, poaq sa në timen. Sonte, shkoi keq dhe ndjej keqardhje”, thuhet në reagimin e Kërqukit në Facebook.

Përpos kërkim faljes, Kërquki nuk u mor me ofendimet e Gërvallës. Ai tha se nuk bie në nivelin e ministres në detyrë.

“Tash që po e shkruaj këtë sqarim po shoh qe Ministrja Donika Gërvalla më paska quajt rrugaç. Njëjtë sikur edhe televizionin!!! Zonja Gërvalla para disa muajsh, me kërkesën e saj, ka ardhur pikërisht në emisionin tim. E kam trajtuar denjësisht sikurse çdo të ftuar tjetër. Te njëjtën hapësirë sikurse ajo e ka pasur në javën vendimtare të zgjedhjeve edhe Faton Peci, si kandidat për Kryetar të Mitrovicës. Te njëjtën hapësirë do ta kenë edhe në të ardhmen; “Pressing” nuk është platforma ime personale, por e publikut qe i drejtohet. Sa për ofendimin qe e bën zonja Gervalla, personalisht nuk e ndjej të nevojshëm t’i përgjigjem. Ky është niveli i saj – dhe në atë nivel nuk dua të bie.

Gjatë emisionit të mbrëmshëm ku po zhvillohej debati për votimin në Mitrovicë, analisti Parim Olluri ishte fjalosur me deputetin Nezir Kraki.

Minstrja Gërvalla kishte reaguar pas përfundimit të emisionit, duke i cilësuar si “rrugaç” moderatorin Kërquki, televizionin T7 dhe Ollurin.

Gërvalla sulmon T7 dhe analistët duke i dalë krah Krakit: Në mes të llumit tuaj shkëlqen dija dhe dinjiteti i tij