Për të hënën parashikohet mot me vranësira dhe intervale me diell, ku ka mundësi të ketë ndonjë reshje të izoluar në zona të caktuara. Në zonat e larta malore reshje lokale bore gjatë orëve të para të 24-orëshit.
Era do fryjë drejtimesh të ndryshme me shpejtësi prej 10-28 km/h.
Gazetari Slobodan Georgiev deklaroi të dielën se kur është fjala për Kosovën, serbët duhet të përballen me të vërtetën.
Ai theksoi se Serbia ka humbur të gjithë autoritetin atje, se marrëveshja është arritur në masë të madhe dhe se Serbia në fakt tashmë e ka njohur pavarësinë e Kosovës.
“Mendoj se nuk ekziston më asnjë ndërtesë, ndoshta vetëm universiteti në Mitrovicë ku ndodhet stema e Serbisë në Kosovë. Pra, kjo çështje ka përfunduar dhe ne nuk e dimë se çfarë do të diskutojnë më pas”, tha Georgiev, raporton Danas.
Ai beson se marrëveshja për Kosovën tashmë është arritur në Ohër vitin e kaluar dhe shton se e vetmja gjë që nuk e ka të qartë është se pse përfaqësuesit e BE-së dhe SHBA-së thonë se duhet ende të punohet në të.
“Marrëveshja është arritur, siç e shohim po zbatohet”. Kosova arriti administrimin e plotë mbi të gjithë territorin e veriut. Dhe kaq”, theksoi Georgiev.
Mundësitë si për dialog ashtu edhe për konferencë ndërkombëtare janë shterur, tha ai.
“Unë supozoj se një dialog i ri mund të jetë për atë se si Serbia duhet ta njohë apo jo Kosovën, gjë që në fakt e ka bërë tashmë,” është i bindur Georgiev.
Për të çdo konflikt, edhe ai i ngrirë në Kosovë, përfundoi me ngjarjet në Banjskë.
“Kaq ishte, ata pushtuan, nuk bënë atë që donin, Vuçiq e ngriti ushtrinë, Blinken e thirri, Vuçiq e tërhoqi ushtrinë dhe çështja mbaroi”, shpjegoi Georgiev.
Georgiev nuk ka as dilemë për Kosovën apo BE-në, sepse integrimi është ndalur, dhe sipas tij serbët në Serbi janë viktima të mungesës së politikës së zgjerimit.
“Ne e kishim më parë atë dilemë dhe kapitullin 35, çfarë do të bëjmë me të dhe si do ta bëjmë? Është krejtësisht e tepërt. Nuk ka integrim në BE. Nuk ka të bëjë me Serbinë, por në një masë të madhe me BE-në. Evropa nuk di çfarë të bëjë me vetveten”, tha Georgiev.
Ai mendon se nuk do të ndodhë që Kosova të marrë ulëse në Kombet e Bashkuara, por vëren se Serbia as që pyet për këtë.
“Në Këshillin e Sigurimit, në mesin e anëtarëve të përhershëm, kemi së paku tri shtete që janë sponsorë të pavarësisë së Kosovës, kështu që nëse Kosova duhet të jetë anëtare e Kombeve të Bashkuara, kjo është një pyetje për ta, ata duhet ta zgjidhin atë”, shpjegoi Georgiev.
I pyetur për formimin e Asociacionit, Georgiev theksoi se as drejtori i Zyrës për Kosovë, Petar Petkoviq, nuk e përmend më.
Sipas mendimit të tij, çështja e AKS-së “është shpallur dhe pikërisht atëherë kur plani për të bërë diçka në veri të Kosovës dështoi për shkak të ndërhyrjes së Milan Radoiçiqit dhe grupit të tij, dhe që atëherë ajo histori është zhdukur”.
“Prandaj nuk ka as dinarë, as tabela serbe, as targa, as letërnjoftime, as patentë shoferi. Kurti ka vendosur kontroll të plotë mbi të gjithë territorin e veriut dhe tani me këtë po shkon në zgjedhje të reja”, ka saktësuar Georgiev.
Ai nuk e sheh mundësinë e mbajtjes së referendumit për Kosovën dhe beson se nuk do të ndodhë kurrë.
Behgjet Pacolli nga AKR-ja ka folur për sesionin e ri të Kuvendit të Kosovës, atë vjeshtor-dimor, ku në përgjithësi e quan si të dështuar.
Pacolli ka folur edhe për punën e Qeverisë Kurti në këto katër vite.
Sipas tij, çdo gjë që është dashtë me ndodhë, nuk ka ndodhur.
“Nëse mundemi me një fjalë me i përmbledhë të gjitha, Kuvendi ka dështuar, edhe pse ndoshta ka qenë më identiteti më efektiv i këtij legjislacioni.
Çdo gjë që ka ndodhur në këto katër vite i kisha etiketuar me një: Nuk ka, por ka. Do të thotë çdo gjë që është dashtë me ndodhë, nuk ka ndodhur, por çdo gjë e keqe është dashtë mos me ndodhë, ka ndodhur”, tha Pacolli për GazetaBlic.
Zëvendëskryeministri i Serbisë, Aleksandar Vulin, ka thënë që Serbia është në rrugën e integrimit në Bashkimin Evropian, por kjo “duhet të ndryshojë” nëse i kërkohet njohja e Kosovës.
“Nëse përballemi gjatë rrugës me njohjen e të ashtuquajturës Kosovë, obligimin për të pranuar martesat e gjinisë së njëjtë apo përfshirjen në konfliktin me Rusinë dhe Kinën, ne nuk duhet të shkojmë në atë rrugë”, ka thënë ai për “Vecernje Novosti”.
Ai ka theksuar se deri atëherë duhet që Serbia të vazhdojë “forcimin”.
Produktet e konsumit kanë shënuar sërish rritje. Qytetarët po ankohen për çmime të larta e Agjencia e Statistikave të Kosovës ka bërë të ditur se çmimet janë rritur për 1.4 për qind krahasuar me muajin gusht të këtij viti.
Çmimet e produkteve të ndryshme ushqimorë në Kosovë, vazhdojnë të jenë të larta, madje edhe të pa përballueshme. Kështu thonë për RTK, qytetarët.
Edhe Agjencia e Statistikave të Kosovës ka njoftuar se çmimet e konsumit kanë shënuar rritje prej 1.4 për qind krahasuar me muajin gusht të vitit 2023.
Kjo kryesisht sipas ASK-së, është shpjeguar me ngritjen e çmimeve të pemëve, biletave të avionëve, lëndëve djegëse të ngurta, ujit mineral, bukës, drithërave dhe disa produkteve te tjera ushqimore.
Nesër në Dhomat e Specializuara të Kosovës në Hagë do të vazhdojë procesi gjyqësor ndaj ish-krerëve të Ushtrisë Çlirimtare të Kosovës Hashim Thaçit, Kadri Veselit, Rexhep Selimit dhe Jakup Krasniqit.
Nga Zyra e Prokurorit të Specializuar (ZPS), i kanë thënë RTKlive se dëshmitari i së hënës do të dëshmojë në seancë të mbyllur dhe prokurori do të lexojë një përmbledhje të provave.
Ndryshe në këtë rast gjyqësor Dhomat e Specializuara të Kosovës në Hagë kanë njoftuar se Trupi Gjykues ka pranuar dëshmitë dhe provat materiale shoqëruese me shkrim të 9 dëshmitarëve në çështjen gjyqësore kundër ish-krerëve të Ushtrisë Çlirimtare të Kosovës.
Kryeministri i Kosovës, Albin Kurti, ka thënë se është krenar që udhëheq vendin më demokratik në rajon.
Të paktën, kështu ka shkruar ai në X, me rastin e Ditës Ndërkombëtare të Demokracisë.
“Si kryeministër i Republikës së Kosovës, jam krenar që udhëheq vendin më demokratik në rajonin tonë dhe një nga demokracitë me përparimin më të shpejtë në botë”, ka shkruar Kurti.
Po ashtu, i pari i qeverisë ka rikonfirmuar se Kosova qëndron krahë partnerëve demokratë dhe aleatëve në mbarë botën “për të punuar së bashku për të siguruar edhe një herë që qeveria e popullit, nga populli, për popullin, të mos humbasë nga dheu”.
E megjithatë, në Ditën Ndërkombëtare të Demokracisë këtë vit, Kurti thotë se “puna jonë është ende e paplotë. Le të kujtojmë se sa shumë kemi luftuar për të arritur në këtë pikë – dhe sa fort duhet të luftojmë ende për të mbrojtur demokracitë e botës nga kërcënimet binjake të autoritarizmit nga brenda, dhe agresionit nga jashtë”.
Deputeti i Lidhjes Demokratike të Kosovës, Avdullah Hoti ka njoftuar se Kryesia e Degës së LDK-së në Rahovec ka nisur përgatitjet për zgjedhjet e 9 shkurtit.
Ai ka kritikuar Qeverinë Kurti, duke thënë se nuk ka asnjë rezultat, ndërsa shton se janë të vendosur e të përgatitur për të arritur tek secila familje për të kërkuar besimin për qeverisjen e ardhshme të Republikës së Kosovës.
Postimi i plotë:
Në Kryesinë e Degës së LDK-së biseduam për aktivitetet në muajt në vijim në përgatitje për procesin zgjedhor.
1. Kemi mbledhur energji të reja në degë, përfshirë kandidatin për deputet nga qytetit i Rahovecit, Enis M. Durguti
2. Është forcuar besimi në vlerat politike e tradicionale të LDK-së, në veçanti për shkak të qeverisjes aktuale pa asnjë rezultat, e cila e ka izoluar vendin, ka penguar zhvillimin ekonomik dhe ka bllokuar integrimin euro-atlantik të Kosovës.
3. Jemi të vendosur e të përgatitur për të arritur tek secila familje për të kërkuar besimin për qeverisjen e ardhshme të Republikës së Kosovës.
Kryetari i Komunës së Drenasit, Ramiz Lladrovci ka thënë se Partia Demokratike e Kosovës është gati për fitore në zgjedhjet e 9 shkurtit.
Përmes një postimi në Facebook, Lladrovci poashtu përmendi edhe kreun e PDK-së, për të cilin tha se ai nuk njeh humbje e as disfata, gjë për të cilën shtoi se një gjë e tillë mund të mos ju pëlqej disave.
Tutje ai ka shkruar se fitorja e PDK-së në Drenas nuk mund të ndalet nga askush e as nga keqbërësit që e zmadhojnë veten nëpërmjet servilizmit.
Dragisa Mijaçiq nga Konventa Kombëtare Serbe për Kapitullin 35 të bisedimeve të Serbisë me BE-në, beson se nga kërkesat e parashtruara – dhe të ashtuquajturat masa – nga Aleksandar Vuçiq, vetëm ajo për kthimin e prokurorëve dhe gjyqtarëve serbë në institucione tash për tash është e mundshme, ndërsa tjerat jorealiste.
“Sigurisht, Vuçiq nuk është naiv të mendojë se masat e renditura në pikën 1 do të përmbushen – gjendja para status quo-s, por ato qetësojnë opinionin serb”.
“Nga të gjitha masat nga në këtë pikë, ekziston mundësia e kthimit të prokurorëve dhe gjyqtarëve në sistemin e Kosovës, gjë që mund të pritet së shpejti, dhe kjo do të ishte fundi i rrëfimit për këtë pikë, sepse nuk është realiste të përmbushen pikat e tjera dhe as organizimi i zgjedhjeve, ndryshimet në polici, Asociacionit apo lirimi i të arrestuarve”, tha ai, siç e citoi Kossev.
