Magazine PRO

Përparim Kryeziu, zëdhënës në Qeverinë e Kosovës, ka reaguar në lidhje me pretendimet se personi me inicialet A.M., serbe nga Mitrovica, e cila është arrestuar nga autoritetet kroate për dyshime për spiunazh për Serbinë, ka pasur lidhje edhe me Zyrën e Kryeministrit të Kosovës.”

“… në krye të herës duam ta bëjmë të qartë për publikun se Zyra e Kryeministrit përbëhet nga stafi civil i përhershëm dhe kabinetet e kryeministrit dhe zëvendëskryeministrave të cilat përbëhen nga të emëruar politikë. Më tej, duam të theksojmë se qasja në informacione të rëndësishme dhe konfidenciale të Zyrës së Kryeministrit është strikt e kufizuar.

Andaj ne hedhim poshtë çdo pretendim se personi në fjalë mund të ketë siguruar informacione të rëndësishme dhe konfidenciale të Zyrës së Kryeministrit.

Viteve të fundit, si pasojë e humbjes së kontrollit në veri përmes rrjetit kriminal të udhëhequr nga Millan Radojiçiq, Serbia ka rritur aktivitetet e spiunazhit dhe ne vazhdimisht kemi ngritur në publik shqetësimet tona mbi aktivitetet e inteligjencës serbe në territorin e Republikës së Kosovës. Ju kujtojmë se në muajin korrik një toger i Policisë së Kosovës, i etnisë serbe, ishte arrestuar mbi dyshime të bazuara për veprimtari spiunazhi në Republikën e Kosovës, për interesa të Agjencisë për Siguri dhe Informim (BIA), me synim rrezikimin e sigurisë në përgjithësi dhe operacionet e Policisë së Kosovës në veçanti. Kurse në shkurt ishte arrestuar një person tjetër mbi dyshime për spiunazh, po ashtu e etnisë serbe, e cila punonte në misionin e OSBE-së në Kosovë. Institucionet tona të sigurisë dhe inteligjencës po punojnë në vazhdimësi e me vigjilencë të lartë, dhe suksesshëm po i kundërvihen përpjekjeve të dashakeqe dhe destabilizuese të Serbisë në Kosovë.

Duke qenë se veprimtaria e A.M. dhe shtetasit kroat, të dy të arrestuar në Kroaci, është zhvilluar në Kosovë, institucionet tona janë në gatishmëri të plotë që të bashkëpunojnë me institucionet e Kroacisë për zhvillimin e mëtejmë të hetimeve dhe zbardhjen e plotë të aktiviteteve dhe rrjetit të veprimit”, thuhet në reagim.

Instituti Kombëtar i Shëndetësisë Publike të Kosovës (IKShPK) ka njoftuar se të gjithë fëmijët që regjistrohen në çerdhe, kopshte dhe shkolla fillore duhet të pajisen me dëshmi vaksinimi, në përputhje me ligjin për parandalimin dhe kontrollin e sëmundjeve ngjitëse dhe udhëzimet administrative të MAShTI-t dhe Ministrisë së Shëndetësisë.

Sipas IKShPK-së, kjo masë synon të mbrojë shëndetin e fëmijëve dhe të komunitetit shkollor, duke parandaluar përhapjen e sëmundjeve ngjitëse dhe duke garantuar një mjedis të sigurt arsimor.

Instituti thotë se prindërit që kanë paqartësi ose pyetje mund të drejtohen në Qendrën më të afërt të Mjekësisë Familjare për ndihmë dhe këshillim.

IKShPK thekson se mbrojtja e shëndetit të fëmijëve është përgjegjësi e përbashkët e gjithë shoqërisë.

Një pilot i Forcave Ajrore Kroate J.I. (54) dhe partnerja e tij A.M. (46), përfunduan në paraburgim për të mos penguar hetimin.

Zyra e Prokurorit të Shtetit të Qarkut të Splitit konfirmoi vetëm sot se kishte hapur një hetim kundër tyre për spiunazh, përcjell KosovaNews.

Piloti akuzohet për një formë më të rëndë të krimit, për të cilën mund të dënohet deri në 10 vjet burg, pasi sipas prokurorisë ishte ai që zbuloi informacion sekret.

Partnerja e tij përballet me një deri në pesë vjet burg pasi dyshohet për mbledhjen e informacionit sekret dhe transmetimin e tij. Ajo u urdhërua të qëndronte në paraburgim, për shkak të rrezikut të arratisjes, për të cilin ajo mund të ofrojë lirim me kusht në vazhdimin e hetimit.

 

 

Edhe pse prokuroria kërkoi që ata të urdhëroheshin të qëndronin në paraburgim për shkak të rrezikut të përsëritjes së krimit, gjykata arriti në përfundimin se kjo nuk mund të ndodhte më pasi piloti nuk është më i angazhuar në misionin në Kosovë.

J.I., dyshohet se po i jepte partneres së tij informacione që i kishte në dispozicion si anëtar i forcave ndërkombëtare.

J.I dhe A.M. u takuan në vitin 2016 në Kosovë. Atë kohë, J.I. ishte anëtar i kontingjentit kroat në KFOR, ndërsa A.M. punonte përkthyese në EULEX.

Marrëdhënia e tyre ka qenë e vazhdueshme, me ndërprerje, për nëntë vjet. A.M. ka ardhur shpesh në Kroaci gjatë viteve, ku përfundimisht u arrestua në ishullin Vis.

Piloti dyshohet se u ka pohuar hetuesve, të cilët i morën në pyetje pas fillimit të këtyre procedurave, se partnerja e tij i dërgonte vetëm të dhëna të motit që ishin të rëndësishme për fluturimin e tij.

Ai mohoi se ata kanë shkëmbyer informacione konfidenciale. Megjithatë, sipas prokurorisë, ai i dha asaj të dhëna mbi lëvizjet dhe pozicionet e forcave të KFOR-it, dhe ajo ia përcolli ato duke përdorur aplikacione të koduara.

Ai vetë, sipas prokurorisë, pranoi se supozonte se A.M. mund të tregtonte të dhëna sekrete. Hetimi do të vazhdojë të hedhë dritë mbi atë që saktësisht ishte e përfshirë. Konkretisht, A. M. ishte punësuar gjithashtu si ndërmjetës, ose një person në terren për ekipe të shumta të mediave.

Era Krasniqi dhe Flamur Krasniqi, çifti myslimanë i konvertuar në katolikë, duket se kanë probleme në fshatin e tyre.

E rreth këtyre problemeve, çifti ka folur këtë të enjte në emisionin “Kosova Today”.

Zotëri Flamuri thotë se nuk janë konvertuar, por që janë kthyer në rrënjët e tyre, pra sipas tij, në fenë e paraardhësve të tyre.

Nga ana tjetër, zonja Era thotë se vendimin e kanë marr bashkë me bashkëshortin e saj, transmeton Klankosova.tv.

Flamur Krasniqi thotë se ai është kërcënuar nga bashkëfshatar të tij.

Kryeministri në detyrë i Kosovës, Albin Kurti, ka liruar nga detyra e zëvendëskryeministres Emilija Rexhepi, pas emërimit të saj nënkryetare e Kuvendit.

“Kryeministri në detyrë i Republikës së Kosovës, Albin Kurti, e ka liruar dje nga detyra zëvendëskryeministren për Çështje të Pakicave dhe të Drejtat e Njeriut, Emilija Rexhepi, pas emërimit të saj në pozitën e nënkryetares së Kuvendit nga radhët e komuniteteve joshumicë joserbe”, thuhet në njoftim.

Kujtojmë se një ditë më parë Kurti, ka caktuar Blerim Sallahun si ushtrues i detyrës së Ministrit të Drejtësisë, i cili deri më tani ka ushtruar detyrën e zëvendësministrit të Drejtësisë.

Gjykata Supreme ka hedhur poshtë ankesën e kandidatit të Partisë Demokratike të Kosovës (PDK) për kryetar të Deçanit, Korab Mushkolaj, kundër vendimit të Panelit Zgjedhor për Ankesa dhe Parashtresa (PZAP), pasi këtij të fundit iu refuzua certifikimi për zgjedhjet e 12 tetorit.

Në vendimin e Supremes thuhet se ankesa e Mushkolajt është “e pa themeltë”, duke konfirmuar konstatimin e PZAP-së dhe Zyrës për Regjistrim, Certifikim dhe Kontrollin Financiar të Subjekteve Politike.

Kjo e fundit kishte refuzuar certifikimin e kandidaturës së Mushkolajt, pasi ai është i angazhuar me aktemërim të përhershëm në Ministrinë e Punëve të Jashtme si zyrtar i lartë – çka bie ndesh me Ligjin për Shërbimin e Jashtëm, i cili ndalon kandidimin e anëtarëve të këtij shërbimi.

PDK kishte refuzuar kërkesën që ta zëvendësonte Mushkolajn me një kandidat tjetër, ndërsa pjesa tjetër e listës është certifikuar pa pengesa.

Gjykata Supreme ka theksuar se moscertifikimi i Mushkolajt nuk është i kundërligjshëm dhe se nuk përbën diskriminim apo cenim të së drejtës së tij për të zgjedhur dhe për t’u zgjedhur.

“Vendimi është i drejtë dhe nuk janë shkelur as parimet themelore të procesit zgjedhor e as të drejtat e garantuara me Kushtetutën e Kosovës dhe Konventën Evropiane për të Drejtat e Njeriut”, thuhet në aktvendimin e Supremes.

Hysni Gucati, kryetar i Organizatës së Veteranëve të Luftës, ka ngritur një dilemë të fortë gjatë një konference për media lidhur me lidhjet e disa individëve brenda Lëvizjes Vetëvendosje me Gjykatën Speciale.

Ai tha se disa nga këta individë janë pjesë e VV-së dhe kanë lidhje me procedurat e Speciales.

“Nga VV ne e dimë që ka edhe dëshmitarë në Gjykatën Speciale, duke filluar nga Donika Gërvalla e cila ka dorëzuar dokumentacione në atë kohë që vet e ka pranu. Të tjerët që do të dalin me emra, sepse nuk kemi frikë nga askush. Mos të na matin impulsin, atë na e ka mat Serbia dhe ka dal humbëse. Dimal Basha me kategoritë e dala nga lufta, sidomos me veteranë të UÇK-së, invalidë dhe dëshmorë do të dal humbës. Ne do të marrim veprime të tjera shumë shpejt.”, u shpreh Gucati.

Ministria e Mbrojtjes e Turqisë ka njoftuar se vendi do të marrë përsëri komandën e misionit paqeruajtës të NATO-s në Kosovë (KFOR) në tetor 2025, për një mandat njëvjeçar. Ky do të jetë rikthimi i komandës turke pas drejtimit të suksesshëm të forcave gjatë periudhës 2023–2024.

Zëdhënësi i Ministrisë së Mbrojtjes, kontradmirali Zeki Akturk, konfirmoi se Turqia do të udhëheqë sërish misionin ndërkombëtar, duke theksuar angazhimin e Ankarasë për sigurinë dhe stabilitetin në rajonin euroatlantik.

“Vendi ynë, i cili ka dhënë kontribute të rëndësishme dhe vendimtare për sigurinë e NATO-s dhe rajonit euroatlantik, do të vazhdojë ta bëjë këtë edhe në të ardhmen”, deklaroi Akturk.

“Detyra do të përmbushet në mënyrë neutrale dhe transparente, në përputhje me rezolutat e NATO-s dhe Kombeve të Bashkuara.”

Një ngjarje tronditëse ka ndodhur dje në fshatin Brod të Shtërpcës, ku një fëmijë pesëvjeçar u sulmua nga një ujk. Fëmija është tërhequr zvarrë disa metra derisa babai ia arriti ta shpëtojnë nga nofullat e kafshës.

Fëmija është dërguar në QKUK, ku po merr trajtim mjekësor të specializuar.

Drejtori i kirurgjisë torakale Nazmi Kolgeci, që po kujdeset për fëmijën, tha se ai ka pësuar lëndime në gjoks dhe shpinë dhe ka trauma psikologjike nga sulmi.

Deklarata e plotë:

VIDEO: KLIKO