Gjykata merr vendim për Arianit Sllamnikun

Konspiracionisti Arianit Sllamniku është liruar nga masa e paraburgimit dhe i është zëvendësuar me arrest shtëpiak. Ky vendim është marrë nga Gjykata Themelore e Gjilanit, pas kërkesës së Prokurorisë.

Lajmin e ka konfirmuar për Insajderin zëdhënësi i Gjykatës Themelore në Gjilan, Sabit Shkodra.

“Me kërkesë të Prokurorisë, më 13.02.2026, i është zëvendësuar masa e paraburgimit me arrest shtëpiak”, tha ai.

Më 21 janar 2026, Sllamnikut i ishte caktuar masa e paraburgimit 30-ditor.

Ai dyshohet për veprat penale “ushtrim i kundërligjshëm i veprimtarisë mjekësore ose farmaceutike” dhe “eksperimente të kundërligjshme mjekësore”.

Rasti lidhet me përdorimin e barnave të kafshëve dhe terapi të ndryshme ndaj fëmijëve. Hetimet janë thelluar pas dyshimeve për trajtime të paligjshme, me përfshirjen e Policisë dhe Prokurorisë.

Zbulohet raporti, ushtria amerikane gati të sulmojë këtë shtet nga e shtuna

Zyrtarët amerikanë thanë se ushtria do të jetë gati të godasë Iranin brenda ditësh, ndërsa Donald Trump peshon veprimet, edhe pse bisedimet bërthamore të Gjenevës nxjerrin në pah boshllëqe të mëdha, sipas raportimeve nga shumë media amerikane.

Ushtria amerikane do të jetë gati për një sulm të mundshëm ndaj Iranit nga e shtuna, i kanë thënë zyrtarë të lartë të sigurisë kombëtare Presidentit Donald Trump, sipas raporteve të shumta të mediave amerikane.

Trump nuk ka marrë një vendim përfundimtar për veprimin ushtarak dhe po e diskuton çështjen me këshilltarët kryesorë.

Ndërkohë, Shtëpia e Bardhë po vlerëson rreziqet e përshkallëzimit të tensioneve rajonale dhe implikimet politike dhe ushtarake të përmbajtjes, por retorika është përshkallëzuar ditët e fundit pavarësisht bisedimeve midis Uashingtonit dhe Teheranit në Gjenevë.

“Nëse Irani vendos të mos bëjë një marrëveshje, mund të jetë e nevojshme që Shtetet e Bashkuara të përdorin Diego Garcia-n dhe aeroportin e vendosur në Fairford, në mënyrë që të zhdukin një sulm të mundshëm nga një regjim shumë i paqëndrueshëm dhe i rrezikshëm”, shkroi Trump në Truth Social të mërkurën.

“(Trump) po ngopet. Disa njerëz përreth tij e paralajmërojnë të mos shkojë në luftë me Iranin, por mendoj se ka 90% mundësi që të shohim veprime kinetike në javët e ardhshme”, tha një këshilltar i Trump për Axios.

Çdo operacion ushtarak amerikan ka të ngjarë të jetë një fushatë masive, disajavore, e kryer së bashku me Izraelin, thanë burime për mediat amerikane, dhe administrata Trump ishte “më afër nga sa e kuptojnë shumica e amerikanëve” një lufte të madhe në Lindjen e Mesme.

Mbërritja e aeroplanmbajtëses USS Gerald Ford në Mesdheun lindor në ditët në vijim do të jetë një faktor kyç në përcaktimin e kohës së sulmeve të mundshme, sipas zyrtarëve amerikanë.

Ndërkohë, Pentagoni do të tërheqë përkohësisht një pjesë të personelit nga Lindja e Mesme në SHBA ose Evropë brenda tre ditësh përpara veprimeve të mundshme të SHBA-së dhe hakmarrjes së mundshme iraniane, raportoi CBS, duke cituar zyrtarë të shumtë amerikanë.

Vazhdojnë të mbeten boshllëqe të mëdha në bisedimet e Gjenevës

Këshilltarët e Trump, Jared Kushner dhe Steve Witkoff, u takuan të martën në Gjenevë me Ministrin e Jashtëm iranian, Abbas Araghchi, për tre orë. Të dyja palët thanë se bisedimet kanë bërë përparim, por mbeten ende boshllëqe të mëdha.

Zëvendëspresidenti JD Vance tha se negociatat shkuan mirë në disa aspekte, por Trump kishte vendosur vija të kuqe “të cilat iranianët nuk janë ende të gatshëm t’i pranojnë dhe t’i përfundojnë”, tha Vance për programin “The Story with Martha MacCallum”.

Zëdhënësja e Shtëpisë së Bardhë, Karoline Leavitt, tha të mërkurën se kishte “shumë argumente që mund të nxirreshin në favor të një sulmi kundër Iranit”, ndërsa theksoi se Trump preferon diplomacinë.

“Do të ishte e mençur që Irani të bënte një marrëveshje me Presidentin Trump dhe administratën e tij”, tha ajo.

Pas bisedimeve në Gjenevë, shefi i energjisë atomike të Iranit, Mohammad Eslami, tha se asnjë vend nuk mund ta privojë Republikën Islamike nga e drejta e saj për pasurim bërthamor.

“Baza e industrisë bërthamore është pasurimi. Çfarëdo që të doni të bëni në procesin bërthamor, ju nevojitet karburant bërthamor”, tha Eslami, sipas një videoje të publikuar nga e përditshmja Etemad të enjten.

Programi bërthamor i Iranit po ecën sipas rregullave të Agjencisë Ndërkombëtare të Energjisë Atomike dhe asnjë vend nuk mund ta privojë Iranin nga e drejta për të përfituar në mënyrë paqësore nga kjo teknologji./Euronews.com

Muaji i Ramazanit, Drejtoria e Arsimit në kryeqytet ndryshon orarin e mësimit

Drejtoria e Arsimit në Prishtinë ka vendosur ndryshime në organizimin e procesit mësimor me fillimin e muajit të Ramazanit.

Sipas njoftimit zyrtar, mësimi do të fillojë nga ora 07:30, do të shkurtohet kohëzgjatja e mesndërrimit dhe do të reduktohen pushimet e gjata.

Qëllimi i këtyre ndryshimeve është që procesi mësimor të përfundojë më së largu deri në orën 17:00, “pa u zvogëluar numri dhe kohëzgjatja e orëve mësimore, duke ruajtur cilësinë dhe vazhdimësinë e mësimit”.

“Për shkak të muajit të shenjtë të Ramazanit dhe në respekt të agjëruesve, Drejtoria e Arsimit ka rishikuar organizimin e procesit mësimor. Është vendosur që mësimi të fillojë nga ora 07:30, të shkurtohet kohëzgjatja e mesndërrimit si dhe të reduktohen pushimet e gjata”, theksohet në njoftim.

“Zoti na i faltë gjynahet”, Gjesti gati për Ramazan: Agjëroni o njerëz

Gjesti është gati për agjëruar Ramazanin.

Këtë e ka bërë të ditur vetë ai përmes një videoje të postuar në Instagram gjatë kohës së syfyrit.

Ai thotë se të gjithë duhet ta kryejnë këtë obligim për Zotin, njofton Klankosova.tv.

“U çova në syfyr, po e pres Sabahun me falë dhe me kismet me ndihmën e Zotit me e kry këtë muaj të shenjtë qysh duhet”, tha artisti.

Vrasja e argjentinases në Fushë-Kosovë, Endrit Nika dënohet me 18 vite burgim

Gjykata Themelore në Prishtinë ka shpallur të enjten aktgjykim dënues prej 18 vitesh ndaj të akuzuarit Endrit Nika, i cili akuzohet për vrasjen e shtetases argjentinase në Fushë Kosovë.

Aktgjykimin e shpalli kryetari i trupit gjykues, gjykatësi Gazmend Bahtiri.

“I akuzuari është fajtor për veprën penale vrasje e rëndë, gjykata në bazë të dispozitave të akuzuarin e gjykon me burgim me kohëzgjatje prej 18 viteve”, tha ai.

Sipas aktakuzës së datës 11.02.2025, i pandehuri Endrit Nika po akuzohet se më 01.08.2023, në Fushë-Kosovë, në hotelin “Sonoma”, pas një mosmarrëveshjeje paraprake me të dashurën e tij, tani të ndjerën M.K.U., e godet në vazhdimësi dhe tenton ta shkelë me veturë në parkingun jashtë hotelit.

Më pas, pasi hynë në dhomën e hotelit ku qëndronin, Nika, me dashje për ta privuar nga jeta të ndjerën, vazhdoi përleshjen dhe goditjet ndaj saj, duke e dërguar në qoshe të dhomës nga ku nuk kishte mundësi të largohej. Nga goditjet dhe shtyrjet e Nika-s, ai e nxjerr kornizën e dritares dhe e hedh atë nga kati i gjashtë i dhomës së hotelit, me ç’rast M.K.U. pësoi lëndime të rënda trupore dhe, përkundër trajtimit mjekësor, ndërroi jetë në Qendrën Klinike Universitare të Kosovës (QKUK).

Për shkak të veprimeve të përshkruara, Prokuroria e akuzon Endrit Nikën për kryerjen e veprës penale – vrasje e rëndë.

E dhimbshme: Ky është 31-vjeçari që vdiq në aksidentin e djeshëm në Kutllovc të Mitrovicës

Një 31-vjeçar ka vdekur si pasojë e një aksidenti që ka ndodhur të mërkurën në fshatin Kutllovc të Mitrovicës.

Bëhet fjalë për Dashnor Kërleshin, i cili nuk arriti t’i mbijetojë plagëve të marra nga aksidenti.

“Rreth orës 21:37, Policia në Mitrovicë ka pranuar informacion për një aksident trafiku në fshatin Kutllovc të Mitrovicës. Sipas informatave fillestare, si pasojë e lëndimeve të pësuara në aksident, ka humbur jetën një person mashkull rreth 31-vjeçar”, ka thënë zëdhënësi i Policisë për rajonin e Mitrovicës, Avni Zahiti.

Xheneta Fetahu pëson aksident me veturë, dalin pamje nga vendi i ngjarjes

Xheneta Fetahu, ka bërë të ditur se ka qenë e përfshirë në një aksident me veturën e saj.

Lajmin e ka konfirmuar vetë ajo përmes rrjeteve sociale, ku ka publikuar edhe një fotografi nga aksidenti, duke treguar gjendjen e makinës pas përplasjes.

Aktualisht nuk dihen detaje shtesë lidhur me rrethanat e aksidentit apo gjendjen e saj shëndetësore.

E dhimbshme: Vdes veterani i UÇK-së

Ka ndërruar jetë veterani i Ushtrisë Çlirimtare të Kosovës (UÇK), Skender Ademi.

Lajmin për vdekjen e tij e ka konfirmuar kreu i degës së OVL-UÇK-së në Drenas, Enver Hajdari.

Në njoftimin e organizatës, është vlerësuar lart figura e Ademit, duke theksuar rolin e tij gjatë luftës çlirimtare.

“Varrimi i të ndjerit do të bëhet nesër, e enjte, më 19.02.2026, në ora 14:00, në varrezat e lagjes Ademi, në Dritan (Dobroshec), Komuna e Drenasit”, thuhet në njoftim.

Nysret Pllana pas deklaratës që nxiti reagime: Nuk jemi të pagabueshëm, vetëm Zoti është

Profesori Nysret Pllana ka reaguar pas deklaratës ku kishte kritikuar shqiptarët që japin para për të ndërtuar xhami.

Pllana tha se nuk ishte qëllimi i tij që të nxiste përçarje.

Sipas tij, gabimet duhet të falen.

“Jam lënduar dhe jam prekur nga ata njerëz që po ofendojnë. Kanë kërcënuar dhe sharë vajzat e mia në mënyrat më brutale të mundshme. Jam i lënduar sepse nuk e kam merituar këtë. Kam 50 vite veprimtari, nuk kam ndikuar kurrë në përçarje. Feja nuk është fushë e imja. Atë deklaratë e kanë prerë, tash edhe inteligjenca artificiale ta mbush mendjen mos me i besu as vetes tënde. Me bindje të plotë e them që kurrë s’kam shprehur asgjë kundër popullit tim, cilësdo fe qofshin ata. Nuk jemi të pagabueshëm, vetëm Zoti është”, tha ai.

Ai i ka sulmuar edhe mediat.

“I ftoj institucionet tona të kenë kujdes ndaj këtyre institucioneve, i biri i dreqit kanë çelur portale”, tha ai.

Profesori Nysret Pllana kishte deklaruar shqiptarët janë në gjendje të japin miliona franga për të ndërtuar një xhami, siç thotë ai, “qendër islame arabe”, por nuk janë në gjendje të dhurojnë 100 euro për të shkruar një libër të pastër në shqip, shkruan Insajderi.

Profesori Pllana, i cili është edhe autor librash, ka treguar se si në Zvicër disa shqiptarë po e njollosin fenë dhe kombin duke ndërtuar xhami islame arabe për t’i mësuar nxënësit për historinë arabe e jo atë shqiptare.

“Për një natë ‘shqiptarëzinjtë’ i mbledhin miliona franga për një xhami të hamamit, e për një libër të pastër shqip nuk i japin 100 euro. Nuk po i fus të gjithë në një thes, por e kam fjalën për një numër jo të vogël. Qindra xhami vetëm në Zvicër janë bërë me dedikim për qendra kulturore islame shqiptare. S’ka lidhje ajo me shqiptarinë. E kthejnë në qendër islame arabe. I mësojnë nxënësit kush janë pejgamberët në Arabi. E jo kush është Skënderbeu. Në shekullin e 21-të, me lejuar ne këtë poshtërim, nuk na ka hije”, është shprehur Pllana në këtë takim me qytetarë.

Vdes 31 vjeçari kosovar që jetonte në Gjermani

Një lajm i rëndë ka prekur familjen, miqtë dhe bashkëqytetarët, pasi në moshë të re ka ndërruar jetë mërgimtari mitrovicas, Argjend Salihu.

I ndjeri jetonte dhe vepronte prej vitesh me banim në Gjermani.

Familjarët kanë bërë të ditur se njoftimet për ceremoninë mortore, procedurat dhe datën e varrimit do të bëhen publike në ditët në vijim.