Ka ndërruar jetë pjesëtarja e policisë së Kosovës, Hasime Muqolli.
59- vjeçarja ka ndërruar jetë pas një sëmundje të shkurtër.
Varrimi it ë ndjerës bëhet sot, në varrezat e fshatit Katund i ri- Pejë.
Ymeri thotë se Shqipe Selimi kishte të drejtë që votoi kundër Donika Gërvallës
Analisti politik, Visar Ymeri ka komentuar votën e deputetes Shqipe Selimi, kundër zgjedhjes së Donika Gërvallës kryeparlamentare.
Ymeri në “VV Show” u shpreh se, reagimi i Selimit ka qenë i duhur, edhe pse sipas tij erdhi vonë dhe jo aq sa do të duhej.
“Unë mendoj që reagimi i Shqipës ka qenë i duhuri edhe pse për mendimin tim jo sa u dasht dhe pak vonë, unë mendoj që Shqipja ka pas plotësisht të drejtë dhe legjitimitet të plotë me votu kundër Donika Gërvallës”, tha Ymeri.
Ai shtoi se Selimi nuk është dashur ta pranojë me qetësi Gërvallën as si ministre të Punëve të Jashtme.
“Nuk mendoj që Shqipja është dasht madje as me kaq qetësi me pranu Donika Gërvallën si ministre të Punëve të Jashtme, Donika Gërvalla ka të drejtë me ndryshu mendimin e vet, por nuk kam pa distancim nga këto deklarata të Donika Gërvallës”, u shpreh ai.
Duke folur për qëndrimet e Gërvallës, Ymeri tha se ajo ka ndryshuar perceptimin ndaj Rexhep Selimit.
“Donika Gërvalla mendon që ish-kryetari i grupit parlamentar të Lëvizjes Vetëvendosje, Rexhep Selimi ka qenë deputet i Lëvizjes Vetëvendosje deri sa ka shku në Hagë, tash Donika Gërvalla mendon për këtë deputet që vjen nga bota e krimit”, deklaroi Ymeri.
Tahiri: Jemi deputetë të PDK-së, jo të Kurtit – nuk votojmë sa herë i teket atij
Deputeti i Partisë Demokratike të Kosovës, Abelard Tahiri, ka folur për ngjarjen që ndodhi në seancën e sotme të Kuvendit të Kosovës, e cila u ndërpre pas kërkesës së këtij subjekti për një pauzë 10-minutëshe.
Në emisionin “Info Magazine” në Klan Kosova, ai ka pohuar se ishin të bindur se pauza do t’u jepej, por ajo nuk iu mundësua, njofton Klankosova.tv.
“Për çudi, një gjë e tillë nuk na u mundësua dhe u abstenua. Kemi qenë të bindur se do të na jepej një pauzë prej dhjetë minutash. Fatkeqësisht, siç e patë, një gjë e tillë u pamundësua dhe, në mënyrë arbitrare, u përfundua seanca. Unë mendoj se sot kryetari i Kuvendit ka mundur të ishte çështje e përfunduar, pra të ishte i zgjedhur.”
“Dhjetëminutëshin e kam kërkuar aty për aty, pra para se të vinte në votim kandidati i fundit që u propozua nga Lëvizja Vetëvendosje. Me kërkesë të grupit tonë parlamentar, kërkuam një pauzë dhjetëminutëshe për një konsultë – t’i ftonim të gjitha grupet parlamentare për një propozim që e kishim. Normalisht, ajo do të mund të ishte një çështje e përfunduar edhe për nënkryetarët”, ka thënë Tahiri.
Tahiri ka theksuar se Partia Demokratike e Kosovës vazhdimisht ka ofruar bashkëpunim për të zgjidhur çështjen e ngërçit në Kuvendin e Kosovës, por sipas tij, ata nuk janë deputetë të kryetarit të LVV-së që të drejtohen nga ai sa herë që ai dëshiron për të votuar.
“Ne nuk jemi deputetë të udhëhequr nga Albin Kurti, ne jemi deputetët të Grupit Parlamentare të Partisë Demokratike të Kosovës dhe si tillë dhe normalisht nuk jemi të gatshëm aty të votojmë sa herë do Zotëri Kurti, apo sa herë të tjerëve iu teket të për diçka të tillë. Ne normalisht që e kemi ofruar edhe konsensusin edhe bashkëpunimin tonë pa u kërkuar fare vetëm që të dalim nga ky ngërç, por kur janë kaq të papërgjegjshëm dhe kur nuk e kanë vullnetin”.
“Ju e dini se si PDK-ja i është përgjigjur të gjitha kërkesave të tyre – qoftë kur takimi është ftuar nga z. Kurti, qoftë nga kryesuesi i seancës. Pra, kemi qenë jashtëzakonisht të përgjegjshëm. Sot, po ashtu, kemi qenë të bindur se do të merrnim një pauzë prej 10 minutash dhe do të diskutonim për çfarë kishim ne. Pastaj do të ktheheshim për të votuar dhe besoj se ajo do të ishte çështje e përfunduar”, ka thënë Tahiri.
Ukraina etiketon kosovarët si “terroristë” dhe i kthen nga kufiri
Kryetari i AKR-së, Behgjet Pacolli ka bërë të ditur sot se disa qytetarë të Kosovës janë ndaluar në kufirin mes Moldavisë dhe Ukrainës, ku sipas tij, janë trajtuar në mënyrë fyese dhe poshtëruese nga autoritetet ukrainase.
Pacolli tha se shtetasit kosovarë jo vetëm që u refuzuan të hyjnë në Ukrainë, por edhe u ofenduan e u maltretuan, duke i quajtur “terroristë”.
Ai kujtoi se ky nuk është rasti i parë, duke përmendur edhe skandalin e disa viteve më parë kur kombëtarja e Kosovës në futboll u detyrua të zhvillonte ndeshjen në Gjeorgji, pasi Ukraina nuk lejonte hyrjen e ekipit në territorin e saj.
“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina i ktheu qytetarët e Kosovës në kufi, duke i fyer e poshtëruar. Ne vazhdojmë të tregojmë solidaritet për ta, ndërkohë që ata nuk respektojnë as dinjitetin tonë minimal”, theksoi ai.
“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina ka kthyer shtetasit e Kosovës në pikën kufitare me Moldavinë – jo vetëm që i ka refuzuar, por i ka ofenduar dhe maltretuar, madje duke i quajtur “terroristë”. Ky nuk është rasti i parë: para disa vitesh, e njëjta Ukrainë veproi në mënyrë skandaloze me ekipin tonë kombëtar të futbollit, të cilët u detyruan të udhëtonin në Gjeorgji për të zhvilluar ndeshjen”.
Sipas Pacollit, ky trajtim nxit nevojën që Kosova të rishqyrtojë qëndrimet e saj ndaj vendeve që nuk e respektojnë, raporton Paparaci.
“Ne këtu në Kosovë vazhdojmë të tregojmë solidaritet dhe dhimbje për ta – ndërkohë që ata na poshtërojnë. A nuk është koha të rishqyrtojmë qëndrimet tona ndaj atyre që nuk na respektojnë as dinjitetin më minimal?”, thotë ai.
Mujeci i Vetëvendosjes i kapur në Shqipëri me 11 mijë doza ekstazi, lirohet me kusht nga burgu
Ish-asamblisti i Lëvizjes Vetëvendosje në Prishtinë, Besnik Mujeci, i cili u arrestua para dy vitesh në Shqipëri pasi u kap me 11 mijë doza ekstazi me vlerë rreth 400 mijë euro, është liruar me kusht nga Gjykata shqiptare.
Sipas raportimit të “Koha.net”, Gjykata ka vendosur që Mujeci të lirohet në një periudhë prove prej katër vjetësh.
“Lënien në fuqi të vendimit Nr.3114, datë 26.12.2024 të Gjykatës së Shkallës së Parë të Juridiksionit të Përgjithshëm Tiranë, me këtë ndryshim: Bazuar në nenin 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Mithat Ramadani, për një periudhë prej 4 (katër) vjet. – Bazuar në nenin 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Besnik Mujeci, për një periudhë prej 4 (katër) vjet. – Urdhërohen të pandehurit të mbajnë kontakte me shërbimin e provës. – Urdhërohet lirimi i menjëhershëm i të pandehurve Mithat Ramadani dhe Besnik Mujeci, nëse nuk mbahen për shkaqe të tjera të ligjshme”, thuhet në vendim.
Kandidati i VV-së kapet me plantacion kanabisi në Gjilan
Njëri prej të arrestuarve në aksionin e djeshëm të Policisë së Kosovës në Zhegoc të Gjilanit, ku u zbuluan rreth 500 bimë të llojit “kanabis sativa”, është kandidat i Lëvizjes Vetëvendosje për Asamblenë Komunale në Novobërdë, Rinas Zeqiri.
Kandidatura e tij ishte bërë publike nga Abdyl Gashi, kandidat për kryetar të komunës së Novobërdës dhe bartës liste i VV-së, raporton Paparaci.
Pas arrestimit, Gashi reagoi duke konfirmuar lajmin dhe duke shprehur keqardhje për rastin.
”Të nderuar qytetarë të Artanës. Dua t’ju njoftoj se, sipas raportimeve në media, kandidati për Asamble komunale nga lista e Lëvizjes Vetëvendosje, Rinas Zeqiri, është arrestuar nga Policia e Kosovës nën dyshimin për përfshirje në mbjelljen e bimëve narkotike. Rinasi i është bashkuar listës sonë vetëm para rreth një muaji, me iniciativë personale dhe dëshirë për të kontribuar. Ai nuk ka qenë më parë aktivist apo anëtar i Lëvizjes Vetëvendosje. E kemi njohur së fundi dhe kemi besuar se si i ri, me gatishmëri për të punuar, mund të jepte një kontribut në Asamble. Për fat të keq, prezantimi i tij rezultoi ndryshe nga pritshmëritë tona. Megjithatë, ne mirëpresim veprimin e Policisë së Kosovës dhe besojmë se drejtësia do të veprojë. Për këtë akt, kërkojmë përgjegjësi të plotë dhe të qartë nga çdo veprim i kundërligjshëm”.
Operacioni policor ishte zhvilluar nga Drejtoria për Hetimin e Trafikimit me Narkotik, Njësia në Gjilan, në koordinim me institucionet e tjera të sigurisë. Bimët ishin të mbjella në katër sera dhe ndodheshin në një fazë të avancuar zhvillimi.
Gjatë kontrollit, policia ka konfiskuar edhe një armë të gjatë dhe dëshmi të tjera që lidhen me rastin.
“Tre persona të dyshuar janë arrestuar dhe, me vendim të prokurorit, janë dërguar në mbajtje për 48 orë”, njoftoi PK-ja.
Policia bëri të ditur se shkatërrimi i bimëve narkotike do të kryhet në koordinim me prokurorinë kompetente.
VV u dha sot qytetarëve për kryeparlamentar dy emra, Bashën me 1-sha në shkollë, Nagavcin që diplomoi me vonesë!
Lëvizja Vetëvendosje ka dështuar edhe sot të sigurojë mbështetje për kandidatët e saj për pozitën e kryeparlamentarit për të zhbllokuar konstituimin.
Pas dështimit me Albulena Haxhiun dhe Hekuran Muratin, ishin Dimal Basha dhe Arberie Nagavci, emrat e rinj sot, të cilët po nuk morën votat e nevojshme në seancën konstituive për kryekuvendar, transmeton klankosova.tv.
Partitë rivale të VV-së, duke i refuzuar këta dy emra, kanë treguar se edhe pas fushatës për “ndryshim”, partia e parë nuk është në gjendje të ofrojë liderë të kualifikuar dhe të përgatitur për pozita të rëndësishme.
Për më tepër, ky dështim ka nxjerrë në pah performancën e dobët akademike të dy emrave të propozuar, duke theksuar një përpjekje të paqartë për të vendosur individë me rezultate të pamjaftueshme për pozita kyçe.
Deputeti Dimal Basha një kritik i ashpër i sektorit të arsimit, ka pasur një histori të dobët të performancës përgatitore. Një dëftesë e shkollës tregon se në vitin e tretë ai ka pasur nota 1 në Biologji, duke e detyruar të riprovonte për të kaluar dhe të tjerat lëndë po shumë larg vlerësimit të lartë.
Ky rezultat jo vetëm që dëshmon mungesën e përgatitjes së Bashës, por është në kontradiktë të plotë me akuzat e tij ndaj mësuesve dhe grevave në sektorin e arsimit. Ndaj dhe propozimi i tij për pozita të larta në Kuvend është një tallje me qytetarët, duke i ofruar atyre një kandidat që vetë nuk ka arritur të kalojë një lëndë të rëndësishme në shkollë.
Ministrja në detyrë e Arsimit, Arberie Nagavci, gjithashtu njihet për një performancë të dobët akademike, pasi ka përfunduar studimet me një mesatare prej vetëm 6.46. Ky rezultat, i konsideruar i ulët për dikë që kërkon të mbajë pozita kyçe politike, ka shkaktuar reagime të shumta në publik, duke nxjerrë në pah një tjetër anë të Lëvizjes Vetëvendosje: zgjedhjen e individëve që nuk plotësojnë kërkesat minimale për të udhëhequr. Pavarësisht se Nagavci ka mbaruar studimet pas një periudhe të gjatë, e cila përfshin një dekadë (2009-2019), mesatarja e saj e ulët lë shumë për të dëshiruar në lidhje me përgatitjen e saj për funksione të larta politike.
Dështimi për të marrë votat në Kuvend është një reflektim i kësaj mungese të kualifikimeve dhe një sinjal për qytetarët e Kosovës që Lëvizja Vetëvendosje nuk po ofron liderët e nevojshëm për të udhëhequr vendin.
Ky proces përzgjedhjeje është një tallje e hapur me qytetarët dhe një goditje për besueshmërinë e kësaj partie, e cila ka premtuar ndryshim, por që në fakt po ofron emra të paaftë për të udhëhequr.
Njëjtë vlerësoi edhe sot kryetari i PDK-së, Memli Krasniqi, i cili shfaqi hapur shqetësimin e tij, se kreu i VV-së, Albin Kurti po luan hapur me fatin e qytetarëve.
”Nuk bëhet kjo punë në mënyrë klandestine. Po nxjerr emra prej xhepi si në lloto”, deklaroi ai me të përfunduar seanca e sotme e cila dështoi me konstituimin për të vazhduar më 26 gusht në ora 11:00.
PZAP obligon KQZ-në ta certifikojë Listën Serbe për zgjedhjet e 12 tetorit
Paneli Zgjedhor për Ankesa dhe Parashtresa (PZAP) ka marrë vendim në favor të subjektit politik Lista Serbe, duke aprovuar ankesën e këtij subjekti kundër vendimit të Komisionit Qendror të Zgjedhjeve (KQZ) për moscertifikimin e listës së kandidatëve të saj për zgjedhjet lokale të 12 tetorit 2025.
Me këtë vendim, PZAP e ka anuluar vendimin e KQZ-së të datës 21 gusht, në të cilin KQZ kishte refuzuar certifikimin e kandidatëve të Listës Serbe për shkak të vlerësimit se disa kandidatë nuk i përmbushnin kriteret ligjore për të qenë pjesë e garës zgjedhore.
Sipas arsyetimit të PZAP, vendimi i KQZ-së nuk ka qenë i bazuar në mënyrë të duhur në ligj dhe nuk është dëshmuar bindshëm që kandidatët në fjalë janë në kundërshtim me nenin 29 të Ligjit për Zgjedhjet e Përgjithshme, i cili përcakton kriteret për të drejtën për t’u zgjedhur.
PZAP i ka kërkuar KQZ-së që të bëjë certifikimin e listës së kandidatëve të Listës Serbe për komunat ku ka aplikuar për të marrë pjesë në zgjedhjet lokale
Ishte me gruan e djalin, çka i mori jetën gazetarit Zheji
I papritur qe lajmi i ndarjes nga jeta të gazetarit të mirënjohur Artur Zheji.
Ishte policia që dha detajet e para për ngjarjen e ndodhur rreth orës 16:00 në Sarandë.
E media që Zheji drejtonte deri sot ka ndarë detaje të tjera.
Mësohet se gazetari Artur Zheji ishte duke drekuar me bashkëshorten dhe djalin ku dyshohet se ka pësuar arrest kardiak, shkruan 360gradë.al.
Më pas është transportuar me autoambulancë drejt urgjencës së spitalit “Petro Nako” të Sarandës, por pa jetë.
Zheji ishte djali i eruditit të shquar shqiptar Petro Zheji dhe aktores së njohur shqiptare Besa Imami, duke u rritur në një familje me traditë të thellë kulturore e intelektuale.
Zheji është angazhuar për dekada në fushën e gazetarisë dhe publicistikës në Shqipëri. Veprimtaria e tij përfshin analiza politike, shkrime editoriale dhe drejtimin e programeve televizive.
Që nga viti 2017, ai është drejtues i emisionit politik dhe analitik “360 Gradë” në ABC News.
Shqiptari që vrąu gruan flet pas arrestimit: Nuk pendohem për asgjë, ia bëra mirë
Fjalët e autorit 40-vjeçar të vrasjes së grave në Volos, Pandeli Nakoleci, menjëherë pas arrestimit të tij nga oficerët e policisë, janë tronditëse.
Sipas informacionit nga mediat greke, burri, dukshëm i rraskapitur pas 29 orësh i fshehur 200 metra larg shtëpisë, sapo iu vunë prangat, iu drejtua oficerëve të policisë duke thënë: “Ia bëra mirë, e meritonte, nuk pendohem për asgjë” .
Këto deklarata nga autori i krimit kanë shkaktuar zhgënjim, pasi konfirmojnë ftohtësinë me të cilën ai e pranoi aktin e tij, duke këmbëngulur se nuk ndien asnjë pendim për vrasjen e gruas së tij 36-vjeçare.