Hamza iu premton qytetarëve: Një prej vendimeve të para do të jetë rritja e pagave dhe pensioneve të të gjitha kategorive

Kandidati për kryeministër nga PDK, Bedri Hamza ka bërë një premtim për qytetarët

Ai i ka siguruar ata, që me ardhjen e tij në pushtet do të rriten pagat dhe pensionet, rritje të cilën e ka quajtur kualitative.

Hamza ka treguar edhe se çka është e nevojshme për qytetarët në këtë aspekt.

“Qytetarët duan parashikueshmëri, çdo përkrahje e qytetarëve është e mirëseardhur, është e mirë por ata duan parashikueshmëri dhe qëndrueshmëri. Kjo nënkupton ti duhesh të rritësh pagat, dhe pagat të jenë në kontinuitet, pensionet të jenë në kontinuitet, jo me iu dhënë një ndihmë të njëhershme dhe qytetari të mos e dij kur i vjen tjetra dhe a ndodh tjetra. Përtej kësaj, kjo duhet të bëhet në kohë dhe me ligj, në procedurë ligjore, në kohë dhe me qenë të përhershme”, ka thënë Hamza në ATV.

Ai ka treguar se për cilët kategori të pensioneve do të ketë rritje.

“Prandaj, prej vendimeve të para ka me qenë rritja e pagave, rritja e pensioneve të të gjitha kategorive, edhe pensioneve bazike edhe atyre kontributdhënëse, edhe kategoritë e dala nga lufta, personat paraplegjikë, tetraplegjikë, viktimat e dhunës seksuale”, ka thënë Hamza.

Ai ka thënë se për t’u arritur kjo duhet të rritet buxheti, për të cilin ka treguar se mund të zgjidhet.

Hamza është kandidat i PDK-së për kryeministër për herë të dytë, pasi ai kishte kandiduar edhe në zgjedhjet e 9 shkurtit. Nga rezultati i dal prej atyre zgjedhjeve, nuk u arrit të formohet një Qeveri.

Zgjedhjet e 28 dhjetorit pritet të sjellin rezultat të mirë për formimin e institucioneve, e më pas ai që do të fitoj këto zgjedhje dhe do të formoj Qeverinë, pritet t’i realizoj premtimet e dhëna para dhe gjatë fushatës.

Aksident me pasoja fatale në veri: Vdes një serb ndërsa të tjerë shtrihen në spitalin e Mitrovicës

Policia e Kosovës, Drejtoria Rajonale e Policisë Mitrovicë Veri, më datë 09.12.2025 rreth orës 16:20, është informuar për një aksident trafiku të ndodhur në magjistralen Mitrovicë – Leposaviq, ku kanë qenë te përfshira dy automjete civile, një me targa vendore dhe një me targa të huaja.

Njësitë e hetimeve të trafikut janë duke e hetuar rastin dhe sipas hetimeve fillestare, dyshohet se njëra nga veturat ka kaluar në shiritin e kundërt, duke u përplasur me automjetin që po vinte në kahje të kundërt.

Si pasojë e aksidentit, pesë persona kanë pësuar lëndime: dy shoferët dhe tre pasagjerë. Fatkeqësisht, njëri nga pasagjeret, i identifikuar me inicialet V. M. (1999), ka ndërruar jetë në spitalin rajonal të Mitrovicës Veri, rreth orës 20:30 trupi i pajetë është dërguar në Institutin e Mjekësisë Ligjore për procedurat e mëtejshme ligjore.

Njësitë kompetente policore kanë ndërmarrë veprimet e nevojshme në vendngjarje dhe hetimet po vazhdojnë për sqarimin e plotë të rrethanave të aksidentit.

Policia e Kosovës apelon tek të gjithë pjesëmarrësit në komunikacion që të respektojnë rregullat e trafikut, të shmangin tejkalimet e rrezikshme, të përshtatin shpejtësinë me kushtet e rrugës dhe të kenë kujdes të shtuar gjatë vozitjes. Çdo pakujdesi në trafik mund të rrezikojë jetën dhe sigurinë e qytetarëve.

Ndërron jetë legjenda e boksit kosovar

Ka vdekur Nazif Gashi, njëri prej emrave më të mëdhenj të historisë së sportit të Kosovës.

Gashi, 74-vjeçar, ka pasur një karrierë të pasur si boksier. Ai ishte pjesë e gjeneratës së artë të Prishtinës, e cila për shumë vjet dominoi në shtetin e dikurshëm federativ.

Për vdekjen e Gashit kanë njoftuar familjarë të tij.

Në vitet shtatëdhjeta dhe tetëdhjeta të shekullit të kaluar, Gashi dhe boksierët e tjerë të Prishtinës kishin bërë krenarë gjithë Kosovën me paraqitjet e tyre.

Ganimete Musliu: Nëse Kurti i merr sërish 42%, unë vetë do ta votoj në Kuvend sepse populli po e zgjedh vetë vuajtjen

Ganimete Musliu, kandidate për deputete nga Partia Demokratike e Kosovës, ka bërë një deklaratë të fortë në emisionin “Infokus Live”, ku foli për rezultatin e mundshëm të zgjedhjeve dhe qëndrimin e saj ndaj një qeverie të mundshme të Albin Kurtit.

Musliu rikujtoi deklaratat e saj të kaluara kundër votimit të qeverisë së Vetëvendosjes, por theksoi se nëse qytetarët përsëri i japin Kurtit një shumicë të lartë, ajo do të respektojë vullnetin e tyre.

“Unë pata thanë se më përpara e këpus dorës se sa ta votojë qeverinë e LVV-së në Kuvend dhe nuk e kam votua. Mirëpo, nëse Kurti i merr 42% sërish në zgjedhje, unë vetë me dorën time do ta votojë në Kuvend qeverinë e tij, sepse ky popull po e do dhe po e zgjedh vetë vuajtjen.”

Deklarata e saj ka ngjallur reagime të menjëhershme, pasi përmban një kritikë të drejtpërdrejtë ndaj vendimeve elektorale të qytetarëve dhe një qëndrim të fortë politik për zgjedhjet e 28 dhjetori

E dhimbshme: Vdes në moshë të re anëtari i FC Prishtina

Ka vdekur në moshë të re Dren Ferataj, anëtar i stafit të FC Prishtina, njëherësh IT i grupit.

Në një telegram ngushëllimi, skuadra prishtinase thotë se Dreni ishte më shumë se një bashkëpunëtor ai ishte mik, mbështetës i palodhur i ekipit dhe person i dashur për të gjithë lojtarët dhe stafin.

“Me urtësinë, qetësinë dhe pozitivitetin e tij të përhershëm, ai la gjurmë të pashlyeshme në klubin tonë.Do ta kujtojmë gjithmonë për buzëqeshjen e sinqertë, gatishmërinë për të ndihmuar dhe shpirtin e tij të mirë që e sillte çdo ditë në punë. Ngushëllimet më të sinqerta familjes Ferataj, miqve dhe të gjithë atyre që e kanë njohur. Qoftë i paharruar kujtimi i tij”, thuhet në telegramin e ngushëllimit.

Është bërë e ditur se varrimi i të ndjerit do të bëhet nesër, në ora 14:00, me namazin e Ikindisë, në varrezat e Dragodanit.

Lëvizja nga PDK tek Vetëvendosje, Andin Hoti tregon pse iu bashkua Kurtit në parti

Kandidati i LVV-së për deputet, Andin Hoti, në një intervistë për FRONTAL të T7 ka treguar për lëvizjen e tij politike drejt partisë që drejton Albin Kurti, pasi që para disa vitesh kishte qenë në PDK dhe kishte kandiduar për deputet nga po e njëjta parti.

Hoti ka thënë se në vitin 2020 kishte refuzuar kandidimin e tij për deputet nga PDK-ja dhe se lëvizja e tij drejt partisë Lëvizja Vetëvendosje ka qenë disi e natyrshme edhe për shkak të angazhimit që ka marrë tek Komisioni Qeveritar për Personat e Zhdukur.

“Kjo lëvizje është pak e natyrshme për shkak të punës së përbashkët qe kemi pasur me kryeministrin Kurti dhe përkrahjen e pa rezervë të Kurtit në fushën që unë e mbuloj, por edhe për shkak të bindjeve të mia”, ka thënë ai.

Paga minimale rritet në 425 euro nga muaji i ardhshëm – bizneset e quajnë vendim të ngutshëm

Nga muaji i ardhshëm paga minimale në Kosovë pritet të rritet nga 350 në 425 euro bruto, vendim ky i bërë i ditur sot nga kryeministri në detyrë, Albin Kurti. Megjithatë, nga komuniteti i biznesit ky vendim po konsiderohet politik, si dhe i ngutshëm, pasi që sipas tyre, është marrë pa konsultim dhe pa analizë të thelluar.

Ndërkaq, sipas njohëseve të ekonomisë ky vendim për pagën minimale mund të ndikojë në rritje të informalitetit sa i përket deklarimit të pagave për punëtorë.

Kryetari i Odës Ekonomike të Kosovës, Lulzim Rafuna vlerëson se vendimi për pagën minimale është marrë me procedurë të shpejtuar dhe pa analizat e nevojshme.

Është shqetësim tek bizneset që po merren vendimet kaq shpejtë, pa konsultim, thekson Rafuna.

“Ka qenë një ftesë shumë e shpejtë, që brenda 24 orëve të takohemi dhe të vendosim për pragun e pagës minimale nga ana e ish-ministrit të Financave të cilën e kemi refuzuar për arsyeje se është çështje që kërkon studim dhe hapësirë më të madhe. E keqja më e madhe e kësaj qeverie ka qenë që gjitha vendimet që janë marrë që kanë prek biznesin janë marrë pa një studim të hollësishëm dhe konsultim me sektorin privat, mirëpo gjithmonë biznesi është befasuar. Nuk jemi kundër rritjes së pagës minimale, jemi për të bërë një studim, dhe t’i, japim hapësirë biznesit që me ardhur me një qëndrim ose vendim konkret me propozim se sa duhet të jetë paga minimale…Nuk po themi që paga minimale e propozuar që është e lartë apo e ulet, mendojmë se nëse do të jepnin hapësirë dhe kohë të analizojmë dhe të shkojmë me një propozim konkret tek qeveria sa i përket pagës minimale ndoshta kish me qenë edhe me e lartë se kaq. Është shqetësim tek bizneset që po merren vendimet kaq shpejtë, pa konsultim”, thotë Rafuna.

Drejtori i Dhomës së Tregtisë dhe Industrisë Kosovë (DHTIK), Kushtrim Ahmeti, e cilëson këtë proces si pjesë të fushatës zgjedhore.

“Është plotësisht fushata dhe ne kemi qenë kundër, kemi marrë pjesë në takim dhe jemi plotësisht kundër. Kemi kërkuar që qeveria duhet me qenë funskionale e plotë, për të dalë një vendim i tillë, e jo të merret në këtë periudhë, ku edhe qeveria është qeveri në detyre, ministrat shumica prej tyre janë bërë deputet, nuk ka asnjë logjike… Periudha kur po merret ky vendim është kohë që po behet puro për fushatë politike”, thotë Ahmeti.

Njohësi i ekonomisë, Naim Huruglica thotë se ndikimi real i pagës minimale në treg është i kufizuar, pasi shumica e punëdhënësve tashmë paguajnë më tepër, porse sipas tij ekziston rreziku që mund të rritet informaliteti.

“Me folë në realitet nga gjendja në tregun e punës, mund të them se shumica e sektorëve industrial ose sektorët ku kosovaret punojnë tani pagë minimale nuk ka nër 500 euro, pagë reale. Mirëpo, nëse rritja vërtetë është bërë në momentin e fundit mund të interpretohet pse është prit të bëhet tash, por nuk është bërë më herët…Paga minimale edhe kur caktohet në mënyrë ligjore, nuk do të thotë që ka me pas një ndikim direkt në përcaktimin e çmimit të tregut të punës, sepse çmimi i punës veç ka ik më lartë seç është ai. Ekziston vetëm një rrezik, nëse ka diku që paguhen njerëzit më pak mund t’i fus në informalitet”, thekson Huruglica.

Kryetari i Sindikatës se Punëtorëve të Sektorit Privat, Jusuf Azemi thotë se paga minimale e propozuar nuk e përballon koston reale të jetesës.

“Në një takim që e kemi mbajtur së fundi si këshill ekonomiko social me ministrin Murati, kërkesa ime ka qenë që paga minimale duhet të jetë 600 euro, por ai ka dalë me propozimin e tij që duhet të jetë 500 euro dhe me këtë propozim ka shkuar në qeveri të Kosovës…Sot paga minimale nëse marrim koston e shpenzimeve për katër anëtar të një familje, atëherë çdo gjë që mbetet nën 800 euro paga minimale nuk i mbulon shpenzimet…Kemi telashe, sepse edhe në të kaluarën, kur u mor vendim që paga minimale të jetë 350 euro ajo edhe sot nuk po zbatohet”, thotë Azemi.

Kryeministri në detyrë i Kosovës, Albin Kurti bëri të ditur sot se paga minimale nga muaji i ardhshëm do të bëhet 425 euro bruto nga 350 euro sa është tash.

Kurti përmes një postimi në Facebook tha se nga 1 korriku fillon zbatimi i fazës së dytë ku paga minimale do të bëhet 500 euro.

Ai tha se nga rritja e pagës minimale do të përfitojnë 150 mijë punëtorë të sektorit privat.

Kurti thotë se para qeverisjes së tij paga minimale ishte 130/170 euro që ishte e pandryshuar për më shumë se një dekadë.

Me 31 tetor Qeveria në detyrë mori vendim për rritjen e pagës minimale për vitin 2026. Paga minimale u tha se do të rritet në dy faza: nga 1 janari i vitit 2026 paga minimale do të jetë 425 euro, ndërkaq nga korriku i vitit 2026 paga minimale do të bëhet 500 euro.

Aktualisht paga minimale në vendin tonë është 350 euro bruto. Kjo rritje u bë në gusht të vitit të kaluar, disa ditë pasi hyri në fuqi Ligji për pagën minimale, i cili parashihte një rritje të pagës minimale në 264 euro bruto. Deri në fuqizimin e Ligjit të ri, paga minimale në Kosovë ishte 130 euro për punëtorët nën 35 vjeç dhe 170 euro për punëtorët deri në 65 vjeç.

Spalletti e konfirmon/ Ja kur do të luajë Zhegrova nga fillimi i ndeshjes

Më në fund vjen një lajm i mirë nga Italia rreth yllit të kombëtares së Kosovës, Edon Zhegrovës.

Ylli dardan do të startojë nga fillimi në ndeshjen ndaj Pafosit në Ligën e Kampionëve.

Këtë e ka konfirmuar vetë trajneri i Juventusit, Luciano Spalletti.

Në konferencë për shtyp, para ndeshjes së nesërme me Pafosin, Spalletti ka thënë se Zhegrova do të luajë nga fillimi, i cili deri më tani asnjëherë nuk ka startuar për “Zonjën e Vjetër”.

“Diçka do të ndryshojë, Zhegrova do të startojë. Javën e kaluar ai mungoi në stërvitje. Nëse bëjmë teste, rezulton se nuk është në formë të plotë, dhe ky është një argument i dyfishtë. Ose i jep 20 minuta deri në gjysmë ore, ose e përdor për aq sa mundet. Këtë herë do të provoj këtë; djali po stërvitet mirë dhe e meriton. Problemi i vetëm është se testet na tregojnë këtë”, tha ai.

Zhegrova u transferua te Juventusi në ditën e fundit të afatit kalimtar, për një shumë që kapte pothuajse shifrën prej 20 milionë eurove.

Krasniqi: Qytetarët do ta ndëshkojnë me votë keqqeverisjen e Kurtit dhe LVV-së

Kandidatja për deputete nga LDK, Rrezarta Krasniqi, është shprehur se qytetarët me votë do ta ndëshkojnë keqqeverisjen e Albin Kurtit, raporton Gazeta Online Veriu.info.

Mes tjerash gjatë një interviste Krasniqi ka thënë se për 4 vite kjo qeveri nuk ka bërë asnjë punë dhe sot jeta e qytetarit është e vështirësuar për shkak të inflacionit të madh.

Ajo ka thënë se Vetëvendosje do të ketë përgjysmim të votave.

Krasniqi kandidon për deputete në listën e LDK-së me numër 36.

Deklarimin mund ta shikoni në këtë VIDEO

Lumbardhi dhe Alba bashkë, por gjithë vëmendja te reagimi i Kaderit

Pas dy vitesh heshtje, kjo është pyetja që po bën gjithë rrjeti orët e fundit!

Prisni, mos u nxitoni me konkluzionet, sepse situata është pak më ndryshe nga ç’duket në pamje të parë!

Të gjithë e mbani mend dramën e Big Brother VIP Kosova 2. Lumbardhi, fituesi që nuk i fshehu ndjenjat, dhe Alba, bukuroshja që i preu shpresat me atë “JO-në” e famshme dhe të prerë. Që nga finalja… asgjë! Raporti i tyre ishte inekzistent. Zero komunikim.

Por papritur, akulli u thye! Të dy kanë filluar të ndiqen në Instagram dhe kjo mjaftoi që fansat të ndiznin teoritë: A po lind diçka e vonuar tani që janë jashtë presionit të kamerave?

Epo, e vërteta është kjo: Nuk ka romancë, ka vetëm punë! Dyshja kanë lënë pas të shkuarën dhe hatërmbetjet për t’u bërë bashkë në një projekt të rëndësishëm xhirimesh për “MetDaan”.

Ata janë bërë bashkë si kolegë, duke provuar veten në aktrim.

Dhe ironia e fatit? Regjisori Artan Korenica ka futur një detaj epik në skenar. Batuta kryesore e Albës në video është sërish…

“JO!”. Duket si një “déjà vu” artistike e refuzimit ikonik brenda shtëpisë, por këtë herë gjithçka është për hir të rolit.

Në gjithë këtë zhurmë, të gjithë, sidomos fansat besnikë sytë i kishin nga një reagim – ai i Kaderit!

Por, mungoi edhe më e vogla lëvizje që mund të interpretohej si përgjigje! Nga ish-partnerja e Lumbardhit në lojë nuk ka as edhe një shenjë, as edhe një koment.

Duket se për të, kapitulli “Big Brother” dhe dramat e vjetra janë mbyllur përfundimisht dhe ajo po vazhdon jetën e saj e qetë, plotësisht e distancuar nga këto ribashkime.

Të jemi të qartë, shanset që Alba e Lumi të jenë çift janë zero! Por, për të gjithë ju që digjeshit t’i shihnit në skena të afërta bashkë… urime!

Dëshira juaj u realizua pas dy vitesh. Ja ku i keni, sërish pranë njëri-tjetrit, por… vetëm për film! Shijojeni këtë moment në ekran, sepse në realitet, historia është mbyllur me kohë, ende pa nisur! /Prive By Liberta Spahiu