Gjykata Supreme refuzon ankesën e Vetëvendosjes, vjen reagimi i ashpër nga VV

Anëtari i Lëvizjes Vetëvendosje në Komisionin Qendror të Zgjedhjeve (KQZ), Alban Krasniqi, e ka akuzuar Gjykatën Supreme pasi ajo refuzoi si të pabazuar ankesën e Lëvizjes Vetëvendosje lidhur me vendimin e Panelit Zgjedhor për Ankesa dhe Parashtresa të datës 30 nëntor, për qendrat e votimit jashtë Kosovës për zgjedhjet e parakohshme të 28 dhjetorit.

“Gjykata Supreme njëjtë sikur PZAP paska folur me gjuhën e PDK-së dhe LDK-së në ndërmarrjen e përbashkët të tyre për ta luftuar të drejtën e mërgatës për të votuar. Integriteti i zgjedhjeve nuk rrezikohet nga mërgata, por nga opozita dhe gjykatës të tillë të cilët vendimet i bëjnë sipas porosisë pa trohë integriteti dhe transparence”, ka shkruar Krasniqi përmes një postimi në Facebook.

PZAP-ja ka pranuar si të bazuar ankesën e LDK-së ndaj vendimit të Komisionit Qendror të Zgjedhjeve sa i përket qendrave të votimit jashtë Kosovës, numrit të vendvotimeve si dhe listën e qendrave të votimit. PZAP-ja ka vendosur që si qendra të votimit jashtë Kosovës të caktohen vetëm përfaqësitë diplomatike të Kosovës dhe hapësirat e tyre.

Krasniqi ka vlerësuar se në asnjë nen të Ligjit për zgjedhjet dhe as të rregullave zgjedhore nuk ndalohet votimi në hapësirat që mund t’i siguroj përfaqësia diplomatike për votim.

Ai ka thënë se as integriteti i procesit nuk ndërlidhet me faktin se a je në pallat të kulturës apo në zyre biznesesh si përfaqësi.

“Integriteti ndërlidhet me përgatitjet teknike, logjistike, administrative të organizimit dhe menaxhimit të zgjedhjeve. Pra, nuk e përcakton integritetin kualiteti i ndërtesës. Me logjikën e trurit të peshkut që këto dy shkallë kanë vepruar i bie që pallati i drejtësisë duhet mbyllur sepse nuk i plotëson kriteret e integritetit për shkak të problemeve teknike, ajri, ashensori, bufeja etj. Në fakt integriteti ndërlidhet se sa i organizuar dhe sa i pavarur është sistemi i drejtësisë”, ka shkruar Krasniqi.

E mbajti të fshehur, por ky është emri i vërtetë i Dolces

Një nga personazhet që ka rrëmbyer vëmendjen maksimale në këtë edicion të katërt të “Big Brother VIP Kosova” është padyshim Dolce. Modelja 30-vjeçare ka arritur të kthehet në një nga banoret më të diskutuara, falë natyrës së saj dhe paraqitjes skenike.

Edhe pse ajo është kujdesur me fanatizëm që të mbajë hermetike jetën e saj private dhe të kaluarën, burime për “Insajderi” kanë zbuluar detajin që publiku po kërkonte. Emri i vërtetë i modeles është Valerja Xhekaj.

Dolce, e cila komentohet gjerësisht për format e saj joshëse dhe stilin provokues, është shndërruar menjëherë në një nga vajzat më të pëlqyera të këtij sezoni.

Megjithatë, ajo mbetet ende një enigmë. Përtej emrit të sapozbuluar, për të dihet shumë pak. Në internet nuk gjendet asnjë gjurmë e saj me emrin e vërtetë, çka lë të kuptohet se Valerja është kujdesur mirë të fshijë çdo arkivë vizuale apo digjitale se si dukej në të kaluarën, para hyrjes në shtëpinë e famshme.

“Njerëzit kanë hequr dorë nga ngrohja me dru”, ankohen drushitësit – bizneset e tyre drejt mbylljes

Shumica e popullatës kanë hequr dorë nga ngrohja me dru. Tashmë hapësirat e druve, që në dimrat e kaluar mbusheshin me klientë, janë të zbrazura. Drushitësit ankohen se bizneset e tyre janë drejt mbylljes.

Dimrat e butë e ngrohja me rrymë kanë çuar drejt krizës fushat e druve në Prizren. Sahit Bajrami nga Pirana thotë se ka 26 vjet që biznesin e tij e ushtron me shitjen e druve, por këtë vit ai thotë se ka arritur në pikën më të ulët të shitjes.

“Jemi para mbylljes si biznes, total jemi para mbylljes, do të thotë në të ardhmen, nëse vazhdon kësisoji, atëherë duhet me e mbyll. Këtë vit po e them 70% ka ra puna, plus problemin më të madh e kemi se as letrat nga ana e pylltarisë nuk janë lëshuar”, tha Sahit Bajrami, drushitës.

Sipas Sahit Bajramit, banorët që jetojnë në qytet, kanë më shumë interes të blejnë dru, sesa ato në fshatra.

“Në fshat janë bërë ma zotni, nëse i ka marrë përpara 10 metra, tash i merr 5, nëse i ka marr 5 tash i merr 2, do të thotë s’ka asgjë. Unë përpara kam pagua 50, 60 deri në 70 mijë euro TVSH shtetit, tash jam në bllokadë”, tha Sahit Bajrami, drushitës.

Në një tjetër biznes të këtij lloji, hallet janë pothuajse të njëjta. Daim Ukaj, që për dekada merret me blerjen dhe shitjen e druve, thotë se këtë vit veç 30% të druve ka arritur t`i shesë, ndërsa ky vit është i fundit me këtë biznes familjar.

“Nuk është puna te çmimi, por tash janë bërë modern, drutë janë të kalume ma. Tash ka dalë modernizimi, njerëzit i kanë bo kushtet e mira, veç për qejf, kush merr një metër, jo mu nxeh por veç me pa flakën, jo jo për ngrohje shumë pak marrin. Jemi në përfundim edhe ne, unë i kam një djalë e një vajzë të dy më kanë dal jashtë, edhe vëllai i ka dy i kanë dalë jashtë, i kanë kryer fakultetet e kanë ik”, tha Daim Ukaj, drushitës.

E transportuesi i druve, Nesim Mazreku, nga Mamusha, ka frikë se tani mund të ngelet pa punë.

“Nuk kam punë tjetër, më ka ra edhe mu puna, shumë pak janë duke u shit drutë shumë pak, ma shumë me rrymë i kanë nxemjet me pelet”, tha Nasim Mazreku, transportues.

Blerësit janë shumë të rrallë që shihen në fusha të druve e ata nuk kanë dëshirë të flasin as për çmimin e as për mënyrën se si ngrohen në stinën e dimrit. Dikur, sipas shitësve të druve, radha për t`u furnizuar me dru ishte shumë e gjatë e punëtorët gati e gdhinin për t`i bërë gati kërkesat e shumta të qytetarëve për dru zjarri./RTK

“Qysh ka ble kryetari i LDK-së shtëpi në lagjen Marigona”, “tash zgjedhjet e gjete me tregu”: Kica-Xhelili ‘gozhdohet’ me komente teksa flet për çmimet tavan

Kandidatja për deputete nga radhët e LDK-së, Doarsa Kica-Xhelili, është përballur me një grumbull reagimesh në Facebook, pasi ka kritikuar iniciativën e Qeverisë për vendosjen e çmimeve tavan, duke e cilësuar atë si “propagandë të VV-së” dhe duke theksuar se LDK-ja kishte ofruar “plot alternativa tjera” që, sipas saj, nuk janë marrë parasysh.

Në postimin e saj, Kica-Xhelili shkruante se edhe vetë masa që ka synuar të ndërmarrë Qeveria “ka mundur të bëhet pa shkelur Kushtetutën”, raporton lajmi.net

“Propaganda e VV & E vërteta: LDK ka sugjeruar plot alternativa tjera kundrejt kësaj ideje, e megjithatë asnjëra nuk është marrë parasysh. Por edhe KJO që VV ka “synuar t’a bëjë”, ka mundur të bëhet pa e shkelur Kushtetutën”, theksoi ajo

Por deklaratat e saj nxitën kundërpërgjigje të shumta nga qytetarët në rrjetet sociale. Disa komentues e kritikuan për qëndrimin e saj, ndërsa të tjerë e krahasuan situatën e çmimeve me vendet e Evropës.

Ndër komentet më interesante ishte ai i një qytetari që e pyeti kanidaten për deputete se “si ka mundur kryetari i LDK-së të blejë shtëpi në lagjen Marigona si kryetar i opozitës dhe 42-vjeçar”.

Kica-Xhelili u përgjigj duke thënë se politikanët kanë pasur shtëpi para se të hynin në politikë.

“Pyete ti. Sepse unë e di. Për dallim nga njerëz të tjerë që kanë hyrë në politikë pa kurrfarë përvoje pune, ne kemi pasur pozita, punë dhe shtëpi pa hyrë fare në politikë. Ka pasë njerëz punëtorë Kosova edhe pa politikë – për ju që e jetoni një realitet tjetër”, shkroi ajo.

Një komentues tjetër e akuzoi për mungesë transparence, duke i thënë: “Ku ke qenë më herët që s’i ke treguar? Tash zgjedhjet e egjete me tregu!”.

Kica-Xhelili reagoi sërish ku tha se vazhdimisht kanë treguar për çmimet tavan por që qytetarët nuk e kanë pranuar realitetin.

“Kemi treguar vazhdimisht, por jo të gjithë e kanë pranuar realitetin”, ka përfunduar ajo./Lajmi.net/

Presidenca reagon për fotografinë e manipuluar të Osmanit me Bërnabiqin e Gjuriqin

Presidenca e Kosovës ka dalë me reagim rreth një fotografie të manipuluar që po qarkullon në rrjete sociale.

Nga Presidenca shkruajnë që pamja e montuar me kryeparlamentaren e Serbisë, Ana Bërnabiq dhe ministri i Jashtëm i Serbisë, Marko Gjuriq, është bërë me qëllim që ta dëmtojë figurën e presidentes Osmani.

“Përdorimi i materialeve të rreme për ta goditur Presidenten është jo vetëm i ulët, por edhe i rrezikshëm. Këto tentime për përhapje të dezinformatave nuk janë të rastësishme dhe janë pjesë e një fushate të mirë-organizuar që synon të baltosë Presidenten e Republikës. Presidentja Osmani ka qenë dhe mbetet një zë i fuqishëm i shtetësisë, sovranitetit dhe dinjitetit të Kosovës dhe asnjë foto e rreme nuk mund ta zbehë këtë”, thuhet në reagimin e Presidences.

Ky institucion i ka bërë thirrje Policisë së Kosovës dhe autoriteteve kompetente që të ndërmarrin veprime. /Klankosova.tv

Supremja refuzon ankesën e Vetëvendosjes për qendrat e votimit jashtë Kosovës

Gjykata Supreme e ka refuzuar si të pabazuar ankesën e Lëvizjes Vetëvendosje lidhur me vendimin për organizimin e qendrave të votimit jashtë Kosovës, duke vërtetuar në tërësi vendimin e Panelit Zgjedhor për Ankesa dhe Parashtresa, të datës 30 nëntor 2025.

Me vendimin e tij, PZAP kishte pranuar ankesën e Lidhjes Demokratike të Kosovës dhe kishte ndryshuar vendimin e Komisionit Qendror të Zgjedhjeve, të datës 26 nëntor 2025, duke përcaktuar që qendrat e votimit jashtë Kosovës për zgjedhjet e parakohshme të 28 dhjetorit 2025 të vendosen vetëm në përfaqësitë diplomatike të Republikës së Kosovës ose në hapësirat e tyre.

Ky vendim ishte kundërshtuar nga LVV-ja, që kishte pretenduar shkelje të dispozitave ligjore dhe kishte kërkuar nga Gjykata Supreme që të aprovojë ankesën e saj.

Por, pas shqyrtimit të dokumentacionit, Gjykata Supreme konstatoi se pretendimet e LVV-së janë të pabazuara.

Sipas vlerësimit të Gjykatës, vendimi i PZAP-së është i drejtë dhe në përputhje me ligjin, ndërsa kufizimi i qendrave të votimit vetëm brenda përfaqësive diplomatike përbën një masë mbrojtëse të domosdoshme për të garantuar integritetin e votës.

“Gjykata theksoi se shtetasve të Kosovës që jetojnë jashtë vendit u garantohet e drejta e votës, por ushtrimi i saj duhet të bëhet në pajtim me kushtet ligjore të përcaktuara. Në këtë kuadër, vlerësimi i PZAP-së se ky organizim siguron proces të rregullt dhe të besueshëm zgjedhor është cilësuar i bazuar”, thuhet në njoftimin e Gjykatës Supreme

Lekaj i bindur që VV-ja në zgjedhjet e dhjetorit nuk i merr as 40%

Kandidati i AAK-së për deputet, Pal Lekaj ka folur për rezultatin e zgjedhjeve të jashtëzakonshme që do të mbahen më 28 dhjetor.

Ai tha se Lëvizja Vetëvendosje nuk i merr as 40 për qind të votave.

“Qytetari ka me vendosë më 28 dhjetor që me ia tregu vendin. Të jeni të bindur që as 40 për qind. Jemi gjallë e shëndosh, prapë do të vijë”, tha ai.

Lekaj gjithashtu u shpreh se Albin Kurti do të bindet se ka krijuar strategji të gabuar, që siç u shpreh ai, ka menduar që mashtrohen qytetarët.

“Unë mendoj që më 28 dhjetor, Kurti do të bindet që ka krijuar një strategji të gabuar, që ka menduar që i mashtron lehtë qytetarët. Qytetari jonë nuk mashtrohet”, u shpreh ai në KlanKosova.

Nuk u fut në listë për deputet, reagon Xhafer Tahiri

Ish-kryetari i degës së LDK-së në Vushtrri, Xhafer Tahiri ka reaguar pasi partia e tij nuk e kandidoi për deputet.

Tahiri për këtë ka reaguar në një shkrim në rrjetin social Facebook.

“Interesat janë të përkohshme, ngjarjet ikin e kalojnë, ndërsa qëndrimet dhe karakteri janë ato që na përcaktojnë në kohë!”, ka shkruar Tahiri.

Tahiri i kishte prishur raportet me partinë e tij dhe liderin Lumir Abdixhiku pas lidhjes së koalicionit me Lëvizjen Vetëvendosje në Vushtrri, në zgjedhjet lokale të sivjetme.

Shpërthen virusi i rrezikshëm në Britani, mbyllen disa shkolla, bëhet thirrje për rikthimin e maskave

Një numër i madh nxënësish dhe stafi janë duke munguar në një numër të madh shkollash në Mbretërinë e Bashkuar për shkak të shpërthimeve të gripit dhe viruseve të tjera, duke mbyllur shumë prej tyre përkohësisht.

Drejtuesit e shkollave pohojnë se situata po ngjason me periudhën e pandemisë Covid-19.

Një nga rastet më të prekura është St Martin’s në Caerphilly, Uellsi, ku më shumë se 250 nxënës dhe mësues u sëmurën, duke u rikthyer te mësimi online. Simptomat përfshijnë të vjella, diarre, temperaturë të lartë, kollë dhe lodhje, me një periudhë rikuperimi prej rreth shtatë ditësh.

Daily Mail raporton se në County Londonderry, 170 nxënës munguan në një ditë për shkak të sëmundjeve të ndryshme. Shkollat britanike po përballen me një grip të veçantë, i njohur si H3N2 “supergripi”, që po përhapet më shpejt dhe shkakton simptoma më të rënda. Londra ka trefishuar numrin e pacientëve të shtruar me grip krahasuar me vitin e kaluar, shkruan A2 CNN

Autoritetet shëndetësore po rekomandojnë përdorimin e maskave për të reduktuar përhapjen e virusit, ndërsa NHS paralajmëron për një valë të madhe infeksionesh dhe shtim të ndjeshëm të numrit të të shtruarve në spital.

Gjithashtu, rreth 100 pasagjerë dhe anëtarë ekuipazhi të një anijeje janë prekur nga norovirusi gjatë një udhëtimi nëpër botë. Kjo situatë po shkakton shqetësim të madh në Britani, ku autoritetet paralajmërojnë qytetarët të jenë të kujdesshëm dhe të qëndrojnë në shtëpi nëse shfaqin simptoma./Indeksonline/

I pamëshirshëm, boksieri shqiptar thyen kundërshtarin amerikan në raundin e parë (VIDEO)

Boksieri shqiptar Kristian Prenga, është treguar i pamëshirshëm në ndeshjen e fundit në ‘Atlantic City’ të SHBA-së, duke mposhtur kundërshtarin amerikan, i cili kishte pritshmëri në këtë përballje.

Mjaftuan disa goditje tepër të forta në ije që Brandon Carmack të dorëzohej. Pasi e nisi vrullshëm amerikani mori mësime nga boksieri shqiptar, i cili e fitoi ndeshjen shumë më lehtë se sa pritej.

Me këtë triumf, Kristjan Prenga e rikonfirmoi veten si nga boksierët më të pamëshirshëm kur vjen puna te ‘nokauti’. Të 19 fitoret në karrierë Prenga i ka me ‘nokaut’.

Triumfi i tij ndezi dhe elektrizoi arenën e boksit Bally’s Atlantic City, ku shqiptarët e Amerikës e duartrokiten me krenari të madhe për bashkatdhetarin e tyre.

Fitorja e Prengës jo vetëm e rrit rekordin e tij personal, por edhe e forcon pozicionin e tij si një prej emrave më premtues të boksit shqiptar në arenën ndërkombëtare.