Kurti me një njoftim të rëndësishëm, ka një thirrje për qytetarët

Kryeministri i Kosovës, Albin Kurti, e ka shfrytëzuar të dielën që të ftojë qytetarët e vendit që të aplikojnë për Çmimin e Vullnetarizmit.

Kurti ka thënë se shumë qytetarë angazhohen vullnetarisht për të avancuar shoqërinë.

 

 

“Shumë qytetarë angazhohen vullnetarisht për ta avancuar shoqërinë tonë. Këto kontribute e meritojnë të promovohen dhe falënderohen. Çmimet e Vullnetarizmit në Kosovë janë një hap në këtë drejtim”.

“Ju bëj thirrje të gjithë juve qytetarë të nderuar që të nominoni të rinjtë, komunat, bizneset, përfaqësuesit e diasporës dhe figurat publike që janë angazhuar ose e kanë përkrahur vullnetarizmin në Kosovë”, ka shkruar Kurti në Facebook.

Komuna e Prishtinës ndihmon qytetarët me sëmundje kronike dhe kancer me nga 250 euro në muaj

350 mijë euro është shuma e ndarë nga Komuna e Prishtinës për personat që vuajnë nga kanceri dhe sëmundjet tjera të rënda kronike. Kështu ka bërë të ditur Drejtori i Shëndetësisë, Izet Sadiku.

Sadiku ka thënë se ky vendim është marrë për t’u dalë sado pak në ndihmë qytetarëve të Prishtinës që vuajnë nga këto sëmundje të rënda.

Ai ka thënë se shuma që mund të përfitojë një qytetar është 250 euro në muaj, ndërsa e ka konsideruar të pamjaftueshëm buxhetin e ndarë.

“Ne e kemi ndarë një shumë ka qenë e rritur, 350 mijë sivjet shuma. Ne jemi munduar që me i përkrah sado pak personat që kanë sëmundje malinje dhe sëmundje të rënda kronike me komplikime dhe realisht është treguar që nevojat janë shumë të mëdha dhe ne prioritet u kemi dhënë personave me kancere të ndryshme, veçanërisht atyre me kancer të gjirit por edhe kancereve tjera dhe pastaj edhe sëmundje të rënda me komplikime të cilat i kanë pasur qytetarët”, ka thënë Sadiku, i cili ka konsideruar se ky buxhet është i pamjaftueshëm.

Tutje, Sadiku ka thënë që aplikimi ka filluar që nga janari i këtij viti.

“Është një grup punues që ne e kemi dhe në mënyrë të vazhdueshme po shqyrton kërkesat për ta shpenzuar këtë buxhet i cili është ndarë për qytetarët e Prishtinës. Jam i sigurt që është i pamjaftueshëm, por duke pasur parasysh fatkeqësisht që numri i qytetarëve që kanë nevojë për përkrahje financiare është i madh. Në janar ka filluar aplikimi dhe që shtatë muaj është komisioni që vazhdimisht ndanë grupet”, u shpreh Sadiku.

EO ka kontaktuar me Grupin Punues për të pyetur se sa është numri i aplikimeve dhe përfituesëve, por nuk ka marrë përgjigje.

Kosova rrezikon të mbetet jashtë Procesit të Berlinit, shkak masa e sigurisë me Serbinë

Kosova mund të mbetet jashtë procesit të Berlinit nëse nuk reflekton në kërkesën që Manuel Sarrazin i’a bëri për përfaqësimin e saj në CEFTA.

Një mundësi të tillë e përmendi edhe vet emisari gjerman, i cili po kërkon heqjen e ndalesës së importit të mallrave serbe, si masë e sigurisë.

Brenda më pak se 10 ditësh, përfaqësuesi i Gjermanisë për Ballkanin Perëndimor Manuel Sarrazin vizitoi dy herë Kosovën.

Herën e dytë foli në publik për vendimmarrjen në CEFTA, që është bllokuar për shkak të mospajtimeve të Kosovës në lidhje me përfaqësimin e saj në këtë mekanizëm.

Ani pse duket që Kosova arriti një marrëveshje me Sarrazin në lidhje me këtë aspekt, kushti i Serbisë ndaj Kosovës për heqjen e ndalimit të importit të mallrave serbe, bllokoi prapë këtë marrëveshje.

Kështu, kishte thënë amabasadori gjerman në Kosovë Jorn Rohde që me anë të një postimi në platformën X tha se ka tërhequr vërejtjen se nëse është e nevojshme do të vazhdohet pa Kosovën në këtë proces.

Jeton Zulfaj, këshilltari i kryeministrit të Kosovës, Albin Kurti, ka thënë se në samitin që do të mbahet me 14 tetor, është e rëndësishme të ketë rezultate konkrete drejt synimeve të Procesit të Berlinit.

Duke folur për kritikat e emisarit special gjerman ndaj Kosovës në lidhje me CEFTA-n, Zulfaj thotë se Kosova është treguar konstruktive në këtë proces duke kontribuar për një zgjidhje kompromisi.

“Procesi i Berlinit nuk ka një listë të gjërave që janë vetëm në proces, por merr nga iniciativat e ndryshme, duke përfshirë edhe ato që janë në kuadër të tregut të përbashkët rajonal, por ndonjëherë kontribuon edhe në zgjidhjet e çështjeve bilaterale… Besoj se në këtë drejtim është deklarata e Sarrazin që lidhet me vendimet që udhët t’i marrin në CEFTA, ku shumica e tregut të përbashkët rajonal varet nga mënyra sesi funksionon CEFTA… Ka të bëjë me vendime që janë në CEFTA dhe janë një listë që po presin vendimmarrje”, tha ai.

Për të koordinuar agjendën e samitit në tetor, emisari gjerman Sarrazin ka qëndruar javën e kaluar dhe këtë javë në vendet e rajonit dhe në Kosovë.

Selmanaj: Koha e zgjedhjeve, prandaj i duhet Kurtit të vjedhë pak lavdi nga Rugova

Deputeti i Lidhjes Demokratike të Kosovës, Driton Selmanaj, ka reaguar lidhur me pjesëmarrjen e kryeministrit Albin Kurti në inagurimin e shtatores së ish-presidentit Ibrahim Rugova, sot në Podujevë.

Selmanaj ka shkruar në Facebook se tani që është koha e zgjedhjeve, i duhet Kurtit të vjedh pak lavdi nga Rugova.

Sipas tij, Kurti dhe politika e tij nuk kanë asgjë të përbashkët me Rugovën.

Postimi i plotë i Selmanajt:

Koha e zgjedhjeve, prandaj i duhet Kurtit të vjedhë pak lavdi nga Rugova.

Ju dhe politika juaj nuk keni asgjë të përbashkët me Rugovën. Nderi më i madh që mund t’i bëni Rugovës është të heshtni.

Rugova krijonte miq ndërkombëtarë.
Kurti krijon armiq ndërkombëtarë.

Rugova i hapte dyer Kosovës.
Kurti po ia mbyll dyert Kosovës.

Rugova i ndihmoi Kosovës të fitonte lirinë.
Kurti i ndihmoi që Kosova të futej nën sanksione.

Rugova e kishte adresë kryesore Uashingtonin.
Kurti e ka adresë kryesore Ohrin.

Rugova kishte plan dhe vizion kombëtar për Kosovën.
Kurti ka vizion vetëm për veten (madje as për partinë e tij jo).

Rugova me pak para arriti që të sensibilizojë opinionin ndërkombëtar dhe të ketë shumë takime ndërkombëtare me burrështetas botërorë.
Kurti me 12 miliardë euro buxhet, dhe me dhjetëra ambasada e konsullata të Kosovës nëpër botë, nuk e pret askush.

Rugova bashkëpunonte me shqiptarët në Maqedoni, Luginë dhe me Shqipërinë.
Kurti i përçan ata dhe kërkon pushtet në Shqipëri, Maqedoni dhe Luginë.

Rugova bashkëpunonte me opozitën.
Kurti i quan argat të Serbisë kushdo që mendon ndryshe.

Rugova rrethonte veten me intelektualë.
Kurti rrethon veten vetëm me të padijshëm dhe me zemljak të Radojçiqit.

Ndërsa ju “guximtarët”, bashkë me “krye-guximtaren” që sot është presidente, ju që guxuat të shanit e të hidhni vrerë mbi LDK-në, nuk guxuat as me gjysmë fjale të kundërshtonit Kurtin në të gjitha skandalet e mësipërme.

Madje as kur ua shuajti partinë nuk guxuat të bëni zë.

Kurti: Ibrahim Rugova kishte udhëhequr Alternativën për pavarësi me një rezistencë paqësore

Kryeministri i Kosovës, Albin Kurti, ka marrë pjesë sot në përurimin e shtatores së presidentit Ibrahim Rugova, në qytetin e Podujevës, me rastin e 34 vjetorit të Kushtetutës së Kaçanikut.

Kurti ka shkruar se derisa Anton Çetta i kishte prirë pajtimit të gjaqeve dhe Adem Demaçi ishte kthyer tek populli pas 28 vitesh burg, Ibrahim Rugova kishte udhëhequr Alternativë për pavarësi me një rezistencë paqësore.

Tutje, ai ka shkruar se me fjalën e qetë dhe të urtë, me punën e vazhdueshme dhe të durueshme, Rugova përfaqësonte politikat e tij në Kosovë dhe jashtë saj, për liri, për demokraci dhe për pavarësi.

Postimi i plotë:

Në përvjetorin e 34-të të Kushtetutës së Republikës së Parë të Kosovës, e njohur si Kushtetuta e Kaçanikut, sot me 7 shtator, në Podujevë u zbulua shtatorja e Dr. Ibrahim Rugovës, Presidentit të parë të Kosovës (24 maj 1992) dhe njëkohësisht Presidentit të parë të Kosovës së çliruar (4 shkurt 2002).

Fillimi i dekadës së fundit të shekullit të kaluar ishte i rëndë dhe i vështirë, por: Dr. Gazmend Zajmi ishte në krye të hartimit të kushtetutës për mëvetësi me vetëvendosje; Anton Çetta i printe pajtimit të gjaqeve mes shqiptarëve; Adem Demaçi u kthye te populli i tij pas gjithsej 28 vite nëpër burgje; Dr. Ibrahim Rugova e udhëhiqte Alternativën për pavarësi me një rezistencë paqësore; Dr. Ejup Statovci ishte në krye të rimbëkëmbjes së Universitetit të Prishtinës; Ukshin Hoti organizonte demonstrata popullore e shkruante për demokraci autentike; Akademik Rexhep Qosja dominonte debatet historike dhe frymëzonte rininë patriotike; etj. E në fillim të asaj dekade, pasi ishin kthyer nga stërvitjet ushtarake në Shqipëri, Adem Jashari, Zahir Pajaziti dhe Sali Çekaj organizonin grupet e armatosura drejt formimit të UÇK-së.

Qëndresa shoqërore që i parapriu protestave aktive studentore dhe luftës së lavdishme çlirimtare, kërkonte angazhim intelektual e kontribut qytetar, përkushtim kombëtar e nivel kulturor, vetëdije politike e afirmim ndërkombëtar. Me fjalën e qetë dhe të urtë, me punën e vazhdueshme dhe të durueshme, Presidenti Rugova përfaqësonte politikat e tij në Kosovë dhe jashtë saj, për liri, për demokraci dhe për pavarësi.

Kjo shtatore e Presidentit Ibrahim Rugova në Podujevë, e realizuar si vepër arti nga skulptori Gëzim Muriqi, e pasuron ikonografinë e shesheve tona publike në nderim dhe kujtim për të.

Ekskluzive: Djali i Adem Jasharit i shtrirë në QKUK, i shpëton më të keqes

Djali i Adem Jasharit, Lulzimi e ka fituar edhe një betejë.

Burime të Indeksonline bëjnë të ditur se djali i komandantit legjendar dyshohet se i ka mbijetuar një ataku kardiak.

Lulzim Jashari ndodhet i shtrirë në repartin e kardiologjisë në QKUK ku edhe është stentuar.

Betejën më të vështirë në paqe, Luli ka vendosur që ta sfidojë në duart e mjekëve kosovarë dhe jo në spitalet e huaja.

Redaksia e Indeksonline uron shërim sa më të shpejt për djalin që bartë histori në vete.

Rrahja në Emshir, zbulohen detaje si ndodhi

Gjykata Themelore Prishtinë, Departamenti i Përgjithshëm – Divizioni për Çështje Penale përmes një komunikate për media ka bërë të ditur se ka vendosur sipas kërkesës së Prokurorisë Themelore në Prishtinë,  për caktimin e masës së Paraburgimit në çështjen penale ndaj të pandehurve A.H.1, A.H.2 dhe J.H si dhe ndaj të pandehurit M.H për caktimin e masës Paraqitja në stacionin policor, për shkak se në bashkëkryerje dyshohen se kanë kryer veprën penale Lëndimi i rëndë trupor dhe veprën penale në bashkëkryerje Lëndimi i lehtë trupor.

Gjyqtari i procedurës paraprake ka aprovuar si të bazuar kërkesën e Prokurorisë Themelore në Prishtinë për caktimin e masës së paraburgimit ndaj të pandehurve A.H.1, A.H.2 dhe J.H dhe të pandehurit M.H për caktimin e masës Paraqitja në stacionin policor, andaj të pandehurve A.H.1, A.H.2 dhe J.H iu është caktuar masa e paraburgimit në kohëzgjatje prej një (1) muaji për secilin, ndërsa të pandehurit M.H iu është caktuar masa e sigurisë Paraqitja në stacioni policor në kohëzgjatje prej një muaj.

Pamje të reja nga rrahja në Emshir, përdoren edhe shkopinjtë, britma femrash

Gjykata vlerësoj se janë plotësuar kushtet për caktimin e paraburgimit, pasi nëse të pandehurit  lihen në liri, ekziston rreziku i ikjes së tyre dhe të shmangen nga procedura penale, duke pasur parasysh rrethanat dhe mënyrën, sesi pretendohet se janë kryer veprat penale, po ashtu edhe raportet familjare ndërmjet të pandehurve dhe të dëmtuarve në këtë çështje penale, gjykata vlerëson se lënia në liri e të pandehurve mund të rrezikojë në masë të madhe zhvillimin e drejtë të procedurës penale dhe ndikimin në dëshmitarë me qëllim të lirimit të të pandehurve nga përgjegjësia penale, si dhe të njëjtit mund të përsërisin veprën penale apo mund të kryejnë vepër penale edhe më të rëndë.

Ekziston dyshimi i bazuar se më datën 05.09.2024 rreth orës 20:30 në lagjen Emshir në Prishtinë për shkak të mosmarrëveshjeve me familjen H., të pandehurit në bashkëkryerje edhe me tre të mitur, me dashje dhe me qëllim të shkaktimit të lëndimeve trupore përgatiten dhe marrin mjete të përshtatshme për të shkaktuar lëndime të rënda trupore dhe shkojnë në vendin ku po qëndronin të dëmtuarit A.H, N.H, S.H dhe B.H, ku pas një fjalosje të shkurtër, fillojnë ti godasin në pjesë të ndryshme të trupit me ç’rast të dëmtuarit A.H i shkaktojnë lëndime të rënda trupore. Ndërsa në të njëjtë datë, kohë dhe vend për shkak të mosmarrëveshjeve me familjen H., të pandehurit në bashkëkryerje edhe me tre të mitur, me dashje dhe me qëllim të shkaktimit të lëndimeve trupore, përgatiten dhe marrin mjete të përshtatshme për të shkaktuar lëndime të rënda trupore dhe shkojnë në vendin ku po qëndronin të dëmtuarit N.H, S.H dhe B.H, ku pas një fjalosje të shkurtër fillojnë ti godasin në pjesë të ndryshme të trupit, me ç’rast të njëjtëve ju shkaktojnë lëndime të lehta trupore.

“Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës  Themelore në Prishtinë”, thekson Gjykata.

Zbulohet shtatorja e Ibrahim Rugovës në Podujevë – PAMJE

Është zbuluar në Podujevë, shtatorja e Ibrahim Rugovës, ish-presidentit historik të Republikës së Kosovës.

Shtatorja u zbulua nga Teuta Rugova, vajza e ish-presidentit, presidentja Vjosa Osmani, kryeministri Albin Kurti, kryetari i Podujevës, Shpejtim Bulliqi si dhe nga ish-presidenti Fatmir Sejdiu.

Është zbuluar në Podujevë, shtatorja e Ibrahim Rugovës, ish-presidentit historik të Republikës së Kosovës.

Shtatorja u zbulua nga Teuta Rugova, vajza e ish-presidentit, presidentja Vjosa Osmani, kryeministri Albin Kurti, kryetari i Podujevës, Shpejtim Bulliqi si dhe nga ish-presidenti Fatmir Sejdiu.

Kjo vepër është punuar nga artisti Gëzim Muriqi.

Presidentja Osmani: Rugova po i kthehet Llapit në bronz, banorë i përhershëm i Podujevës!

Presidentja e shtetit, Vjosa Osmani ka thur fjalë miradije për ish-presidentin, Ibrahim Rugova, me rastin e shpalosjes së shtatores në Podujevë.

“Jam e nderuar që sot ndodhem në Podujevë. Në mesin e njerëzve që në kohët më të vështira u radhitën tek njeriu vizionar presidentit historik, Dr. Ibrahim Rugova.

Sot Rugova po i kthehet Llapit në bronz duke u bërë banorë i përhershëm i Podujevës.

Njësoj sikurse ishte kthyer nga Italia në Kosovën e lirë, i gjithë Llapi ishte quar në këmbë për ta pritur atë.

Shtatorja e presidentit Ibrahim Rugova po përurohet në 7 shtatorin historik, ditën kur ishte miratuar Kushtetuta e Kaçanikut”, ka thënë ajo, transmeton Indeksonline

Ai kurrë askujt nuk i punoi pas shpine. Për të parimet nuk ishin idale, por forca udhëheqese që ndërmori për Kosovën.

Hiqen bllokadat në Jarinje, Policia: Qarkullimi vijon pa probleme

Në pikën kufitare në Jarinje është hequr bllokada për qytetarët me dokumente të Kosovës, dhe tani qarkullimi vijon pa probleme.

Këtë për Indeksonline e ka konfirmuar zëvendësdrejtori për rajonin e veriut, Veton Elshani.

“Në Jarinje po qarkullojnë veturat, për momentin nuk ka asnjë problem”, tha Elshani.

Ndërsa, pikat kufitare në Merdarë dhe Bërnjak, vazhdojnë të jenë të mbyllura.