Hoti kritikon Qeverinë: Mandati më i dobët qeverisës ndonjëherë

Deputeti i Lidhjes Demokratike të Kosovës (LDK), Avdullah Hoti thotë se qeveria aktuale ka dështuar në implementimin e projekteve të mëdha ekonomike.

Ish-kryeministri po ashtu ka pasur kritika ndaj pushtetit sa i përket mospërmbushjes së premtimeve në arsim e shëndetësi.

Hoti thotë se veprimet e Qeverisë Kurti kanë qenë të pakta dhe larg çdo standardi për përmirësimin e kushteve në sektorët kyç.

Ai po ashtu thotë se as projektet që janë lënë në gjysmë nga qeveritë kaluara nuk kanë shkuar përpara.

“Është mandati më i dobët ndonjëherë qeverisës në vend dhe këto nuk janë vlerësime të opozitës, por mund të verifikohen në terren në secilin prej sektorëve një nga një, sheh se nuk janë realizuar as premtimet jo se jo, por nuk janë ndërmarrë edhe veprimet karshi situatave të krijuara që ka pas nevojë për ndërhyrje të qeverisë. Te premtimet, në aspektin ekonomik gati që nuk ka asnjë projekt të madh kapital që ndryshon situatën ekonomike në vend. As projekte që janë lënë në gjysmë nga qeveritë e kaluara nuk kanë shkuar përpara. Premtimet në arsim e shëndetësi kanë qenë mashtrime të qytetarëve dhe të sektorëve të caktuar. Të shohësh tash se kryeministri që shkon dhe promovon salla të caktuara në kuadër të shërbimit spitalor të Kosovës, ndërkohë që katër vjet nuk bisedon për sigurime shëndetësore, ose për të rregulluar njëherë e përgjithmonë furnizimin me barna nga lista esenciale, ose ofrimin e disa shërbimeve më të specializuara brenda QKUK-së, në mënyrë që njerëzit të mos kenë nevojë të dalin jashtë. Në fushën e arsimit është e njëjta gjë”, thotë Hoti.

Hoti tha se të ardhurat për kokë banori kanë rënë rreth 67 për qind krahasuar me vitet e kaluara kur kanë qenë rreth 74 për qind.

“Në vitet e kaluara së paku kemi qenë jo vendi fundit për nga varfëria në Evropë, sigurisht kemi qenë në pjesën e poshtme të renditjes për shkak trashëgimisë që kemi si ekonomi. Por, ajo që ka ndodhë në tre vjetët e fundit në veçanti në bazë të dhënave të Bankës Botërore tregon që nuk kemi pas një konvergjencë ekonomike të Kosovës sa i përket të ardhurave për kokë banori me mesataren rajonale te të ardhurave për kokë banori me mesataren e të ardhurave për kokë banori me vendet e BE-së, por kemi pas një divergjencë, ka shkuar ende më poshtë mesatarja e të ardhurave për kokë banori në Kosovë krahasuar me regjionin. Ndërkohë që vendet tjera në regjion, në veçanti Shqipëria, por edhe Mali i Zi, vendet e tjera janë duke lëvizur shumë më shpejt drejt mesatares së BE-së, ne jemi duke shkuar poshtë, edhe ndaj mesatares së BE-së edhe ndaj mesatares së vendeve të Ballkanit. Dikur ka qenë rreth 74 për qind të ardhurat për kokë banori në vend si mesatare e vendeve të Ballkanit Perëndimor, tani kemi rënë rreth 67 për qind”, tha Hoti.

Ndërsa sa i përket ligjit të punës, Hoti gjithashtu kritikon mungesën e dialogut social dhe thotë se kjo barrë financiare duhet t’i ngarkohet buxhetit të shtetit.

“Përvojat ndërkombëtare janë të tilla që kjo barrë financiare duhet të ngarkohet shoqërisë, që është buxheti i shtetit, por, edhe në këtë pjesë po bëhen katër vjet që nuk kemi një dialog social, ku ulen odat ekonomike si përfaqësues të bizneseve, ku ulen sindikatat si përfaqësues të punëtorëve dhe qeveria, në mënyrë që të dialogohen këto çështje dhe të gjenden zgjidhje”, tha Hoti.

Hoti shprehet se Kosova është shndërruar në një vend me probleme të sigurisë, duke përmendur sanksionet e BE-së dhe mungesën e investitorëve të jashtëm.

“Nuk është vetëm vlera 300 milionë, se po të ishte vetëm ajo, do të kishim mundësi disi t’i zëvendësojmë ato përmes buxhetit dhe do të ishin mbuluar. Janë efektet edhe ekonomike dhe politike që shkaktojnë sanksionet. Jemi vendi i vetëm në Evropë që jemi nën sanksione nga BE për shkak të veprimeve të gabuara të vazhdueshme të kësaj qeverie. Imazhin që këto sanksione çojnë te partnerët tanë, tek investitorët e jashtëm, është shumë negativ. Po bëhen katër vjet që pothuajse nuk kemi asnjë investitor të madh serioz të jashtëm që bënë investime në Kosovë. Kosova tani është shndërruar prej një vendi që ka pasur sfida të zhvillimit, të integrimit euroatlantik, sfida të reformave në arsim, drejtësi, shëndetësi, pra, jemi parë nga aleatet tanë, nga BE si një vend që ka nevojë për mbështetje për të reformuar sektorët e caktuar, për të ndihmuar në zhvillimin ekonomik, tani jemi kthyer në një vend që shihemi me probleme të sigurisë, dhe ky është sinjali më i keq që jepet në arenën ndërkombëtare në fushën e ekonomisë”, përfundon Hoti./KP

Osmani: Vuçiqi i ktheu strukturat ilegale paralele në Kosovë në banda mafioze

Presidentja Vjosa Osmani ka thënë se Serbia nuk i ka zbatuar marrëveshjet e arritura në Bruksel.

Madje ajo tha se nuk e ka zbatuar as atë që ajo e konsideron si më të rëndësishmen, për shpërbërjen e strukturave ilegale paralele në Kosovë.

Në vend që t’i shpërbënte ato struktura, presidentja Osmani në diskutimin në Forumin GLOBSEC 2024, tha se presidenti i Serbisë, Alleksandar Vuçiq i ka forcuar ato duke i shndërruar në “banda mafioze”.

“Asnjë prej marrëveshjeve nuk është zbatuar, veçanërisht ajo e rëndësishmja e vitit 2013, e cila e obligon Serbinë që t’i shpërbëjë të gjitha strukturat e saj ilegale paralele nëpër Kosovë, në veçanti në veri. Ajo që ka ndodhur këto 10 vjet, është që në vend që t’i shpërbëjë ato struktura, Serbia vazhdimisht i ka forcuar ato deri në atë pikë sa që këto struktura ilegale janë kthyer në banda mafioze dhe janë kthyer po ashtu në rrezikun më të madh për komunitetin serb që jeton në veri të Kosovës”.

“Këto struktura ilegale janë grupe kriminale që paguhen, emërohen dhe mbështeten politikisht nga Serbia, dhe tani pasi që kryen një akt agresioni kundër Kosovës në shtator, u fshehën nga Serbia në Serbi në mënyrë që të mos përballen me drejtësinë për aktin e agresionit”, tha Osmani, duke iu referuar sulmit nga grupi i Millan Radoiçiqit në Banjskë 24 shtatorin e vitit të kaluar.

Ajo tha se ata dyshohen edhe për krime tjera, si “vrasja e politikanëve serbë, djegia e shtëpive dhe veturave të serbëve në veri, si kërcënimin e fëmijëve në kopshte… Pra, ata që po vuajnë më së shumti nga këto banda mafioze, të paguara dhe mbështetura nga Vuçiqi në Serbi, janë në të vërtetë serbët në Kosovë”.

Osmani tha se të gjitha këto kanë ndodhur në 10 vitet e fundit, ndërsa kritikoi BE-në që po i vë masa Kosovës, e jo Serbisë.

“Pavarësisht gjithë këtyre, qëlloni se cila është pala nën masa të BE-së? Është pala e cila është 100 për qind e harmonizuar me BE-në në çdo politikë vendimmarrëse të jashtme e të sigurisë, është palë që kurrë nuk blen armë nga Rusia, Kina apo Irani, është palë ku 90 për qind e popullit janë në favor të BE-së, është pala që asnjëherë nuk ka kryer akt agresioni kundër fqinjëve, që nuk destabilizon fqinjët, nuk organizon grusht-shtete kundër fqinjëve, që nuk përdor MIG29 rusë që të fluturojë mbi fqinjët e vetë. Kjo është pala që është nën masa – Kosova. Prandaj, tavolina është e rrëzuar”, potencoi presidentja Osmani në diskutimin në forumin GLOBSEC në Pragë.

Në fund, ajo foli edhe për tërheqjen e Serbisë nga marrëveshja e Ohrit e vitit 2023.

“Pika e fundit për dialogun: një marrëveshje u arrit në shkurt 2023, dhe aneksi më vonë në atë vit, e cila parasheh obligime si për Kosovën ashtu edhe Serbinë. Sipas BE-së dhe ShBA-së, dhe edhe unë pajtohem me këtë interpretim, është traktat ligjërisht i obligueshëm. Josep Borrell, Përfaqësuesi i Lartë, e ka njoftuar po ashtu edhe Sekretarin e Përgjithshëm të OKB-së se është traktat ligjërisht i obligueshëm. Por, për të gjithë ekspertët: çka ndodh nëse njëra palë formalisht tërhiqet nga një traktat? Pra, parimi themelor i ligjit ndërkombëtar, as pala tjetër nuk ka obligim për ta zbatuar”.

“Serbia është tërhequr formalisht nga kjo marrëveshje përmes letrave të dërguara nga ish-kryeministrja (Ana Bërnabiq, shën.red.) ndaj BE-së, përmes deklarimeve nga presidenti i vendit (Alleksandar Vuçiq, shën.red) dhe nga kryeministri aktual (Millosh Vuçeviq, shën.red.), që thonë: kjo nuk është marrëveshje ligjërisht obliguese, dhe nuk do ta zbatojmë. Tani, pavarësisht këtyre deklarimeve, shumica në BE thonë se Kosova duhet ta zbatojë njëanshëm këtë marrëveshje”.

“Besoj fuqishëm se jemi në një situatë ku duhet ta rikthejmë barazinë në tavolinë. Nëse palët trajtohen në mënyrë të barabartë, atëherë mund të kemi sukses dhe jemi shumë të bindur se me ndryshimet në BE, me një Përfaqësues të Lartë që po vjen, atëherë barazia po vjen në tavolinë”, potencoi presidentja Vjosa Osmani.

Ambasada amerikane: ShBA mbetet e përkushtuar ndaj një Kosove sovrane, multietnike e demokratike

Ambasada amerikane në Kosovë, ka dalë me një njoftim, ku shprehë mirënjohje për presidenten Vjosa Osmani, e cila sipas ambasadës, pati përkushtimin për të biseduar me ndihmëssekretarin e ri të ShBA-ve rreth aksioneve të Kosovës në veri, ku u mbyllën pesë objekte të komunave ilegale.

Ambasada thotë se “vlerësojmë përkushtimin e presidentes Osmani për një koordinim të tillë, i cili është thelbësor për avancimin e trajektores evropiane dhe euroatlantike të Kosovës dhe arritjen e stabilitetit rajonal, normalizimit dhe integrimit ekonomik”.

“Në Forumin GlobSec të Pragës sot ndihmëssekretari i ri i ShBA-ve Alexander Kasanof dhe presidentja Vjosa Osmani diskutuan për një sërë çështjesh kyçe, duke përfshirë veprimet e pakoordinuara të së premtes nga Qeveria e Kosovës dhe rëndësinë e konsultimit me bashkësinë ndërkombëtare.  E vlerësojmë përkushtimin e Presidentit Osmani për një koordinim të tillë, i cili është thelbësor për avancimin e trajektores evropiane dhe euroatlantike të Kosovës dhe arritjen e stabilitetit rajonal, normalizimit dhe integrimit ekonomik. ShBA mbetet e përkushtuar ndaj një Kosove sovrane, multietnike e demokratike”, thuhet në njoftimin e ambasadës.

Abazi: Kurti po bën progress në ndarjen e Kosovës

Deputeti Haki Abazi ka komentuar veprimet e fundit të Qeverisë së Kosovës në veri, duke thënë se kryeministri Albin Kurti është duke progresuar në ndarjen e Kosovës.

Sipas tij, Kurti po krijon një realitet të ri, atij të kalimit nga bashkëpartneriteti dhe përkrahja e NATOs për Kosovën dhe popullin e saj, në një përplasje me NATOn dhe interesat e botës demokratike.

“Kurti nuk ka mandat për të krijuar një situatë dhe raport të tillë. Të gjithë qytetarët Shqiptarë janë për Kosovën në NATO dhe në BE. Veprime të koordinuara dhe veprime me vlerë e argumentime në tavolinë me partnerët ndërkombëtar. Përplasja e Kosovës më NATO është agjendë e Serbisë dhe Rusisë!

Fushatë elektorale me fatin e Kosovës nuk bëhet!”, shkroi Abazi në Facebook.

Postimi i plotë:

Kurti është duke progresuar në ndarjen e Kosovës dhe krijimin e një realiteti të ri, atij të kalimit nga bashkëpartneriteti dhe përkrahja e NATOs për Kosovën dhe popullin e saj, në një përplasje me NATOn dhe interesat e botës demokratike.

Kurti nuk ka mandat për të krijuar një situatë dhe raport të tillë. Të gjithë qytetarët Shqiptarë janë për Kosovën në NATO dhe në BE. Veprime të koordinuara dhe veprime me vlerë e argumentime në tavolinë me partnerët ndërkombëtar. Përplasja e Kosovës më NATO është agjendë e Serbisë dhe Rusisë!

Fushatë elektorale me fatin e Kosovës nuk bëhet!

Aksioni i fundit në veri, vjen reagimi edhe nga NATO

Aleanca e NATO-s është shprehur e zhgënjyer me aksionet e fundit në veri të Kosovës, ku janë mbyllur disa komuna paralele serbe.

Në një reagim zedhenjesa e NATO-s, Farah Dakhlallah ka thënë se aksioni ishte i pakoordinuar edhe pse Qeveria i kishte premtuar se do të koordinohej me ta.

NATO ka ripërsëritur se duhet angazhim i plot në dialog.

“Shumë i zhgënjyer nga aksionet e djeshme në veri të Kosovës të cilat nuk ishin të koordinuara me KFOR-in pavarësisht premtimeve të përsëritura për ta bërë këtë. KFOR-i është plotësisht i përgatitur për të mbështetur mandatin e tij të OKB-së Rezoluta 1244 për të gjitha komunitetet në Kosovë. Duhet de-përshkallëzimi dhe angazhimi i plotë në Dialogun e BE-së”, thuhet në reagim.

Osmani: Veprimet për shtrirje të sovranitetit janë legjitime, suksesi varet nga bashkëpunimi me aleatët

Presidentja e Kosovës, Vjosa Osmani, i ka thënë të shtunën Radios Evropa e Lirë se veprimet për shtrirje të sovranitetit në Kosovë, janë veprime legjitime dhe në përputhje me Kushtetutën e Kosovës, por që suksesi dhe qëndrueshmëria e tyre varen prej bashkëpunimit me aleatët.

Ajo i ka bërë këto deklarata, pasi është pyetur rreth reagimeve të Perëndimit më 30 gusht, pas mbylljes së pesë objekteve paralele në veri të Kosovës. Sipas Qeverisë së Kosovës, këto institucione kanë funksionuar nën udhëheqjen e Serbisë dhe kanë cenuar kushtetutshmërinë dhe ligjet e vendit.

Ndihmëssekretari amerikan i Shtetit për Çështjet Evropiane dhe Euroaziatike, James O’Brien, i ka bërë thirrje kryeministrit të Kosovës, Albin Kurti, të ndalë, siç ka thënë ai, “veprimet e pakoordinuara që ndikojnë negativisht në partneritetin tonë”.

Për aksionin në veri kanë reaguar edhe ambasadorët e Gjermanisë, Francës dhe Britanisë së Madhe.

“Situata në veri të Kosovës është shumë sfiduese, sepse përkundur Marrëveshjes së vitit 2013, e cila kërkon që të gjitha strukturat ilegale të shpërbëhen, ato janë forcuar nga [presidenti serb, Aleksandar] Vuçiq në këtë dekadë, dhe janë shndërruar në grupe mafioze, të cilat edhe sfidojnë sigurinë, edhe sovranitetin, por edhe vetë jetën e qytetarëve që jetojnë në veriun e veriut”, ka thënë Osmani në Pragë, ku po merr pjesë në forumin e sigurisë Globsec.

Ajo ka bërë thirrje që të mos lejohet “asnjë forcë e errët, asnjë shtet që ka qëllime dashakëqija ndaj Kosovës dhe rajonit, të krijojë ndarje mes neve dhe aleatëve”.

“Kjo ndarje, në afatgjatë, Kosovës i kushton shumë. Kosova ka mundësi që të jetë e suksesshme në shtirje të sovranitetit, bashkë me aleatët. Kërkohet më shumë komunikim, më shumë konsultim, më shumë koordinim”.

E pyetur nëse zyrtarë të lartë amerikanë, përfshirë shefin e Agjencisë Qendrore të Inteligjencës (CIA) e kanë përmendur nëpër takimet e ditëve të fundit përkeqësimin e marrëdhënieve me Qeverinë e Kosovës, ajo ka thënë se SHBA-ja ka qenë e qartë në çdo nivel se raportet me popullin e Kosovës, me Kosovën si shtet, i ka shumë të fuqishme.

“Ne duhet të gjejmë mënyra për ta forcuar partneritetin, ne duhet të gjejmë mënyra që debati në Kosovë të mos jetë asnjëherë se ‘a jemi prishur me Amerikën apo jo?’, por të jetë sa jemi duke i forcuar ato marrëdhënie, sepse është vetëm në interes të Kosovës”.

Ajo ka thënë se do të takohet në kuadër të Globsec-ut me zyrtarë amerikanë për t’i diskutuar të gjitha sfidat aktuale.

Osmani nuk ka dashur të komentojë pse të shtunën, më 31 gusht, është vërejtur një prani e shtuar e forcave të misionit të NATO-s në Kosovë, KFOR mbi urën kryesore mbi lumin Ibër.

Presidentja ka thënë se për këtë gjë duhet pyetur KFOR-i, por as ky institucion nuk u është përgjigjur pyetjeve të Radios Evropa e Lirë.

Një pjesëtar i forcave italiane të KFOR-it në urën i Ibrit i ka thënë më herët për një korrespodente të REL-it se “nuk pritet ndonjë gjë e veçantë” dhe se pjesëtarët aty gjenden aty “për shkak të operacioneve rutinore”.

Osmani e ka përmendur çështjen e urës kur është pyetur se si mund të gjendet mesi i artë mes veprimeve të Qeverisë dhe kërkesave të Perëndimit.

“Mesi është mirëkuptimi i të gjithëve që ka tema të cilat assesi nuk duhet të bëhen pjesë e dialogut me Serbinë, sepse ato qoftë kanë përfunduar si të tilla, sepse janë arritur marrëveshje, plane të zbatimit, siç është çështja e urës, çështja e shpërbërjes së strukturave ilegale, ato janë mbyllur më vitin 2013, dhe ka tema të cilat as nuk është në interes të Kosovës, sepse do të ishte shkelje e sovranitetit dhe Kushtetutës, në qoftë se ato do të hapeshin për negociata me një shtet tjetër, në këtë rast me Serbinë. Në anën tjetër, ne duhet ta kemi të qartë që një prej fuqive më të mëdha të Kosovës, një prej përparësive më të mëdha të Kosovës ndër vite është që aleatët i ka pasur në anën e saj”.

Perëndimi i ka shtuar së fundmi kritikat ndaj Qeverisë së Kosovës, për ato që i konsideron veprime të njëanshme.

Në mesin e tyre përfshihet edhe përpjekja e Qeverisë së Kosovës në fillim të gushtit për hapje të urës kryesore mbi lumin Ibër,, e cila ndan Mitrovicën Jugore me shumicë shqiptare me Mitrovicën Veriore me shumicë serbe.

Ura është e hapur për qarkullim të këmbësorëve, por jo për automjete.

Ambasadori amerikan në Kosovë, Jeffrey Hovenier, pati paralajmëruar ato ditë kundër hapjes së urës, duke thënë se një veprim i tillë rrezikon ushtarët amerikanë.

Edhe misioni i NATO-s në Kosovë, KFOR, i cili ka prezencë të përhershme mbi urë, pati thënë se nuk do të hezitojë të veprojë, nëse rrezikohet siguria në atë pjesë.

Albin Kurti përmend punët e mira të qeverisë për artin e sportin në kryeqytet

Kryeministri Albin Kurti, thotë se qeveria e tij ka dhënë dëshmi të panumërta të punëve, për të cilat ai thotë se janë bërë në dobi të të rinjve të talentuar të Prishtines.

Ai përmendi punët e përfunduara lidhur me këtë, dhe ato që janë në proces e sipër.

49-vjeçari tha se investimet e qeverisë për kushte më të mira infrastrukturore në shërbim të artistëve e sportistëve nuk do të ndalen asnjëherë.

Më poshtë mund të lexoni shkrimin e plotë të Kurtit, të publikuar në Facebook.“Qeveria për artin e sportin në kryeqytet. Kemi dhënë dëshmi të panumërta të punëve në dobi të të rinjve të talentuar të Prishtinës. Investimet tona për kushte më të mira infrastrukturore në shërbim të artistëve e sportistëve nuk do të ndalen asnjëherë. Ka përfunduar rinovimi i tërësishëm i fushës së stadiumit “Fadil Vokrri”. Fusha hibride është fjala e fundit e teknologjisë në botë dhe e para e këtij lloji në shtetin tonë. Kemi rinovuar palestrën e sportit të Pallatit të Rinisë, e cila përveç kampionateve shtetërore, mirëpret plot ngjarje ndërkombëtare të sportit. Për nevojat e futbollit në kryeqytet, vazhdon ndërtimi i stadiumit ndihmës në Bërnicë. Gjithashtu, kemi hartuar projektin zbatues dhe kemi siguruar buxhetin e nevojshëm për ndërtimin e palestrës së re multi-sportive në kryeqytet. Jemi në pritje të ndarjes së lokacionit nga Komuna e Prishtinës për të vazhduar me procedurën e ndërtimit të kësaj palestre me rëndësi të veçantë për sportet.Kemi nënshkruar marrëveshjen e bashkëpunimit me ndërmarrjen publike “Pallati i Rinisë dhe Sportit” për rivitalizimin e njërës nga ndërtesat më ikonike të Prishtinës. Në kuadër të Pallatit, kemi rinovuar amfiteatrin që aktualisht e akomodon Teatrin Kombëtar të Kosovës. Shumë shpejt pritet të nisë edhe rinovimi i sallës së Ateliesë dhe amfiteatrit të dytë ku vepron Teatri ODA dhe shtëpitë e pavarura teatrore të kryeqytetit. Për të vazhduar në radhë me Sallën e kuqe dhe Atriumin.Ndërtesat e institucioneve të kulturës kishin dekada pa investime. Kanë nisur punimet për rinovimin (restaurimin) e tërësishëm të ndërtesës kryesore të Teatrit Kombëtar të Kosovës. Restaurimi ka nisur edhe në ndërtesën e Muzeut Kombëtar të Kosovës, me synim përmirësimin e kushteve ku ruhet thesari më i pasur kulturor i shtetit. Derisa rinovimi i sallës së ushtrimeve të Ansamblit Shota ka përfunduar, aktualisht, edhe Galeria në lagjen Qafa dhe ndërtesa e Agjencisë Shtetërore të Arkivave të Kosovës po i nënshtrohen rinovimit, ndërsa rinovimi i ndërtesës së Galerisë Kombëtare të Kosovës pritet të nisë muajve në vijim. Me të përfunduar dhe miratuar projekti përfundimtar, do të nisim edhe procedurën e restaurimit të Bibliotekës Kombëtare të Kosovës.Në arkeologji në nivel vendi kemi ndërmarrë veprime serioze. Në rajonin e Prishtinës jemi duke zhvilluar punime në dy lokalitete të rëndësishme arkeologjike, në Marec dhe Harilaq.Restaurimi në moment të fundit e pati shpëtuar nga rrënimi Eminxhikun, ndërtesën e Muzeut Etnografik të Prishtinës. Aktualisht po punojmë në instalimin e ekspozitës së përhershme të këtij muzeu që rrëfen historinë e kulturës shqiptare. Një tjetër ndërtesë e kthyer në muze, ish Burgu i Prishtinës, i hapi dyert me ekspozitë të përkohshme, ndërsa tani kemi kontraktuar ekipin profesional që po e koncepton ekspozitën e përhershme. Tri nga shtëpitë e bukura të Prishtinës janë në proces restaurimi. Deri në fund të vitit pritet që t’u kthehet shkëlqimi i dikurshëm shtëpisë së Hynilerëve, shtëpisë së familjes Sylejmani dhe asaj të familjes Safqi.Pas përfundimit të ndërhyrjeve konsoliduese në ndërtesën e ish-Vetfarmit, jemi në përfundim të projektit zbatues për restaurimin e ndërtesës së shkollës së parë shqipe në Prishtinë. Brenda pak javësh pritet të përfundojë restaurimi i Rezidencës së Presidentit Ibrahim Rugova në Velani, ndërsa jemi në fazën e fundit projektuese për restaurimin e ndërtesës së Kryqit të Kuq. Pas një stagnimi mbi një dekadë, ka përfunduar restaurimi i Xhamisë së Çarshisë, ndërsa vazhdon procesi i hartimit të planit të menaxhimit të Hamamit të Madh. Gjithashtu, projekti për restaurimin e Xhamisë Sudi Efendi është në proces të pajisjes me pëlqimin përfundimtar para shpalljes së procedurës së prokurimit.Nuk përfundon me kaq. Jemi duke zhvilluar negociata për kredi ndërkombëtare për investimin e madh në Qendrën e Studentëve të Prishtinës, e cila gjatë Lojërave Mesdhetare “Prishtina 2030” do të shndërrohet në fshatin mesdhetar që do të akomodojë mijëra sportistë nga 25 shtete pjesëmarrëse. Pas themelimit me ligj dhe hartimit të konceptit nga artistë të njohur të Kosovës, ka nisur hartimi i projektit për Muzeun e Artit Bashkëkohor të Kosovës, i cili do të akomodohet brenda aneksit të Pallatit të Shtypit (Rilindja). Po brenda Pallatit të Shtypit do të ndërtojmë amfiteatrin e ri të Prishtinës, aktualisht në proces të hartimit të projektit. Dhe pas konkursit ndërkombëtar, kemi shpallur studion ndërkombëtare fituese për hartimin e projektit të Teatrit të Operës dhe Baletit. Parashihet që pas një viti ta kemi projektin zbatues të TOB, i cili na mundëson të nisim procedurat për ndërtimin e asetit më të madh kulturor të Republikës.Edhe shumë punë na presin. Nuk do të ndalemi. Për Prishtinën tonë, kryeqytetin e Republikës. Për Prishtinën e Manifestës e të Lojërave Mesdhetare”, thuhet në postimin e kryeminsitrit.

Osmani: Kur ka koordinim me aleatët, suksesi është afatgjatë – kur s’ka, është momental

Presidentja e Kosovës, Vjosa Osmani, ka thënë se marrëdhënia e Kosovës me ShBA-në është më e rëndësishmja, më ekzistencialja, dhe marrëdhënia më e domosdoshme nga të gjitha aleancat që vendi i ka ndërtuar përgjatë viteve.

Në bisedën e organizuar në kuadër të Forumit GLOBSEC 2024 që po mbahet në Pragë, me temën “A janë demokracitë liberale aq të brishta sa kurrë më parë?”, Osmani tha se në orët më të errëta, ShBA-ja shpëtoi popullin tonë nga shkatërrimi i planifikuar.

Megjithatë, ajo tha se ditëve të sotme, ka edhe mospajtime ndonjëherë mes ShBA-së dhe Qeverisë së Kosovës. Por thotë se mospajtimet nuk janë për synimin përfundimtar, por për rrugën drejt këtij synimi.

“Ditëve të sotme mund të dëgjoni kohë pas kohe deklarata për mospajtime mes zyrtarëve në ShBA dhe qeverisë së Kosovës për disa prej qasjeve, por kurrë për synimin përfundimtar. Nuk ka mospajtime në faktin se edhe Kosova edhe ShBA-ja duan që Kosova të jetë sovrane, e pavarur brenda kufijve të saj aktualë, të suksesshme, prosperuese, multietnike, bazuar në kushtetutën e saj. Por, qasja ndonjëherë për mbajtjen e një Kosove demokratike, sovrane e të fortë, dhe si ta arrijmë këtë, mund të ndryshojë. Qasja, taktikat, nuancat – kemi dallime në këto, por kurrë s’ka pasur e as që ka tani dallime se çfarë Kosove e duam, se cilat janë vlerat themelore të marrëdhënies sonë”.

“Besoj se kur themelet janë të shëndosha, atëherë gjithçka, përkundër sfidave, mund të tejkalohet”, tha Osmani.

E para e shtetit tha se edhe për rrugën për të arritur diçka, mospajtimet nuk janë për rrugën, por ndoshta se sa shpejt duhet të shkohet në atë rrugë.

“Nuk dua të paraqes se gjithçka është e përkryer, sepse kam qenë shumë e hapur publikisht në pozitën time si presidente, se koordinimi me aleatët kyçë është një prej aspekteve më të rëndësishme të suksesit tonë. Sepse kur koordinohemi me aleatët tanë, veçanërisht me aleatët e sigurisë tonë në terren, atëherë suksesi është më i qëndrueshëm, më afatgjatë. Kur nuk koordinohemi, është sukses momental, mund të duket i mirë, mund të tingëllojë i mirë, por është shumë më fragjil dhe mund të bëhen hapa prapa”.

“Si presidente, këtë qëndrim e kam, dhe besoj fuqishëm që e kemi mësuar këtë se kur mbani aleanca të fuqishme, natyrisht me shtete demokratike, ky është avantazhi juaj, këtu është fuqia juaj. Fuqia jonë më e fortë mbështetet në partneritetet tona”.

Megjithatë, presidentja Osmani e pranoi se “jo të gjithë në Kosovë pajtohet krejtësisht me atë që e them, dhe kjo do të thotë se Kosova është një demokraci e shëndoshë, por sërish, dallimi është mes disave në Kosovë dhe në ShBA se sa shpejt ecim në një rrugë të caktuar, e jo për rrugën apo destinacionin”.

Reagojnë nga VV-ja: KFOR-i dhe karabinierët po e realizojnë një ushtrim në urën qendrore mbi Ibër!

Avni Zogiani nga Vetëvendosja ka reaguar rreth raportimeve për vendosjen e karabinierëve mbu Urën e lumit Ibër në Mitrovicë.

Sipas tij, KFOR-i dhe karabinierët po e realizojnë një ushtrim në urën qendrore mbi Ibër që besoj se është planifikuar më herët, jo mbrëmë natën.

“Ndoshta ka qenë më mirë që KFOR-i ta pres edhe raportin përfundimtar për vlerësimin profesional e teknik të qëndrueshmërisë fizike të urës para se aty të kalohet me automjete të rënda”, ka shkruar ai.

Testimi preliminar para raportit përfundimtar?Dje nuk pati asnjë incident në pesë lokacione kur u mbyllën zyrat e komunave paralele dhe ilegale të Serbisë në veri të Kosovës.

Sot KFOR-i dhe karabinierët po e realizojnë një ushtrim në urën qendrore mbi Ibër që besoj se është planifikuar më herët, jo mbrëmë natën. Ndoshta ka qenë më mirë që KFOR-i ta pres edhe raportin përfundimtar për vlerësimin profesional e teknik të qëndrueshmërisë fizike të urës para se aty të kalohet me automjete të rënda.

Tash për tash e kemi vetëm raportin preliminar. Ky vlerësim ka qenë kërkesë e QUINT-it ndaj nesh si qeveri të cilin po e plotësojmë. Besoj që duhet ta falenderojmë KFOR-in për këtë testim të urës qendrore në Mitrovicë, ndonëse një ndërmarrje e tillë nuk ka qenë pa rrezik.

Bajrami: Kurti e ka gabim, veprimet e tij nuk po e shtrijnë sovranitetin, po na prishin me aleatë

Deputetja e LDK-së, Hykmete Bajrami me anë të një statusi në rrjetin social Facebook, ka reaguar pas aksionit policor dje në mbylljen e institucioneve ilegale në veri, transmeton Gazeta Imazhi.

Bajrami pos tjerash ka thënë se kryeministri Albin Kurti e ka gabim dhe se veprtimet e tij nuk po e shtrijnë sovranitetin në veri, por janë duke i kthyer aleatët kundër Kosovës.

Deputetja Bajrami po ashtu është shprehur se Kosova ka ngelë pa aleatë përderisa kryeministri Kurti paraqitet si “patriot” përmes këtyre ”aksioneve”, duke i dhanë shansë Serbisë dhe Vuçiqit të përfitojnë nga këto sjellje./Gazeta Imazhi/

Postimi i plotë: