Haradinaj godet rëndë kryeministrin: Kurti është arsyeja pse ka ndodhur sulmi në Banjskë

Kryetari i Aleancës për Ardhmërinë e Kosovës, Ramush Haradinaj, sërish ka goditur rëndë kryeministrin e Kosovës, Albin Kurti.

Ai ka thënë se kryeministri Kurti është arsyeja kryesore se pse Serbia është trimëruar dhe ka ndodhur sulmi në Banjskë.

“Arsyet pse është trimëruar Serbia, duke goditur, ashtu siç ka goditur në Banjskë, ka të bëjë me gabimet e Kurtit. Kurti ua ka krijuar terrenin me gabimet e veta, që ata edhe të shpresojnë që nuk do ndëshkohen”, është shprehur Haradinaj.

Tutje, kreu i AAK-së ka thënë se serbët do të inkurajohen sërish për sulme, nëse kryeministri Kurti vazhdon me sjellje të ngjajshme.

 “Nuk mbahet siguria vetëm nga puna e ditore, është komplekse. Nëse, Serbia e dinë që ne i kemi marrëdhëniet shumë të fuqishme me Amerikën, nuk guxon as ëndërr ta sheh Kosovën, por ata i shfrytëzojnë dobësitë tona me na goditë. Kjo i bie, që nëse Kurti vazhdon kështu, ata prap kanë me u inkuraju”, potencoi Haradinaj në Kanal10.

Krasniqi: Unë në veri kam shkuar para Kurtit, pa polici dhe pa përcjellje

Kryetari i PDK-së, Memli Krasniqi, ka komentuar vizitën e kryeministrit Albin Kurti në veri.

Ai ka thënë se për një gjë të tillë kryeministrin e kishte ftuar një vit më parë.

Në një intervistë për “Periskop”, ai ka thënë se veri ka shkuar para kryeministrit dhe pa përcjellje.

“Po e vërtetë kam thënë në seancë në qershor të vitit 2023, por ai nuk shkoj i pari më është dasht me shku mua i pari tre ditë pas deklaratës, me i vizitu komunate Zveçanit edhe Zubin Potokut. Nuk e kam lënë me aq kam shkuar përsëri në nëntor, e Kurti ende nuk kishte shkuar. Normal une kur kam shkuar kam shkuar pa polic, pa përcjellje sepse ne jemi opozitë neve nuk na ruajnë 200 policë si Albin Kurtin.”, ka thënë Krasniqi.

Kearns i kërkon qeverisë britanike të fokusohet urgjentisht tek Ballkani: Vuçiq po e përdor strategjinë e Putin për aneksimin e Veriut

Deputetja konservatore në Mbretërinë e Bashkuar, Alicia Kearns, ka reaguar pas masave që Serbia i shpalli si reagim ndaj veprimeve të Kosovës në Veri.

Presidenti i Serbisë, Aleksandër Vuçiq, të premten kërkoi që në pjesën veriore të Kosovës të kthehet “gjendja e mëparshme” duke kërkuar kthimin e policëve në detyrë, të gjyqtarëve e prokurorëve, pagesat me dinarë, lirimin e “të burgosurve politikë” siç i quajti ai serbët e burgosur për shkak të dhunës në Veri kur atje ishin vendosur barrikada.

Ai po ashtu kërkoi themelimin urgjent të Asociacionit, pa të cilin tha se s’ka bisedime.

Duke reaguar në “X”, depuetja britanike ka thënë se pas deklaratave të Vuçiqit, Qeveria e Mbretërisë së Bashkuar duhet të fokusohet urgjentisht në Ballkan.

Aja ka thënë se Vuçiq po e përdor taktikën e Vladimir Putinit duke shpallur plane për aneksimin e veriut të Kosovës.

 

 

Më tutje, ajo shtoi se ka kaluar gati një vit nga sulmi në Banjska dhe BE-ja akoma nuk ka sanksionuar Serbinë.

“Pas deklaratave të mbrëmshme të Presidentit Vuçiq, Qeveria e Mbretërisë së Bashkuar duhet të fokusohet urgjentisht në Ballkan”.

“Gati një vit pas sulmit në Banjskë ende nuk ka drejtësi, dhe pavarësisht përfshirjes së shtetit serb, ende nuk ka sanksione nga BE-ja (vetëm marrëveshje për litium dhe avionë). Vuçiq po ndjek strategjinë e Putinit, duke shpallur plane për aneksimin e veriut të Kosovës. Kosova është një shtet sovran”.

“Ballkani duhet të largohet nga pikëpamjet sektare, njerëzit e Kosovës së Veriut dhe serbët e Kosovës meritojnë më shumë, jo të përdoren si pengje dhe gurë shahu në ambiciet irredentiste”, ka shkruar ajo në X, të shtunën.

Si gjithnjë, Stano: Kosova të shmangë veprimet e pakoordinuara, mund të rrisin tensionet në veri

Zëdhënësi i Bashkimit Evropian, Peter Stano ka thënë se janë në kontakt të vazhdueshëm me palët në Kosovë pas aksioneve të fundit të Policisë në veri ku u mbyllën pesë institucione paralele.

Sipas tij, situata në veri është e paqëndrueshme dhe se shqetësimi i tyre është se veprime të tilla të pakoordinuara mund të kontribuojnë në rritjen e tensioneve dhe përshkallëzimin e situatës.

“Bashkimi Evropian është në kontakt të vazhdueshëm me palë të ndryshme në Kosovë, në nivele të ndryshme e formate të ndryshme, dhe po i përcjellim mesazhet dhe pritjet tona qartazi. Nuk do të përsëris se çka kam thënë në reagimin tonë të javës së kaluar, kur aksioni në veri të Kosovës u zhvillua kundër këtyre institucioneve që udhëhiqeshin nga serbët atje. Por thelbi është se kemi një situatë që është tashmë e paqëndrueshme dhe shqetësimi ynë kryesor është, që është edhe mesazhi ynë kryesor për autoritetet në Kosovë: shmangni çfarëdo veprimi/hapi, që janë të pakoordinuar dhe mund të kontribuojnë në rritjen e tensioneve dhe përshkallëzimin e situatës edhe më tej”, ka deklaruar Stano para mediave.

Zëdhënësi i BE-së, Peter Stano ka thënë se të gjitha çështjet duhet të zgjidhen në kuadër të dialogut të lehtësuar nga Bashkimi Evropian.

Policia e Kosovës mohon se KFOR-i kërkoi largimin e veturës zyrtare të saj nga Ura e Ibrit (Video)

Forca të shumta të KFOR-it sot kanë zhvilluar trajnime mbi Urën e Ibrit.

Pak metra larg tyre nga të dyja anët e urës qëndronte edhe policia e Kosovës.

E pak minuta pas përfundimit të trajnimit, një pjesëtar policor ka parkuar makinën e tij zyrtare në urë, gjë e cila edhe ‘irritoi’ ushtarin italian, transmeton IndeksOnline.

Ky i fundit ka kërkuar nga polici kosovar ta largojë atë për arsyeje të panjohura.

Por Policia e Kosovës ka mohuar se pjesëtari italian i KFOR-it, u ka kërkuar ta largojnë veturën zyrtare të saj nga Ura e Ibrit.

Në një përgjigje për IndeksOnline zëvendësdrejtori i policisë për rajonin e veriut, Veton Elshani, ka thënë se diçka e tillë nuk ka ndodhur.

”Nuk ka ndodhë diçka e tillë në veri, as me policinë e veriut”, është shprehur ai.

Momenti kur ushtari italian i kërkon policit ta largojë veturën zyrtare nga ura e Ibrit

Abazi: Kurti po bën progress në ndarjen e Kosovës

Deputeti Haki Abazi ka komentuar veprimet e fundit të Qeverisë së Kosovës në veri, duke thënë se kryeministri Albin Kurti është duke progresuar në ndarjen e Kosovës.

Sipas tij, Kurti po krijon një realitet të ri, atij të kalimit nga bashkëpartneriteti dhe përkrahja e NATOs për Kosovën dhe popullin e saj, në një përplasje me NATOn dhe interesat e botës demokratike.

“Kurti nuk ka mandat për të krijuar një situatë dhe raport të tillë. Të gjithë qytetarët Shqiptarë janë për Kosovën në NATO dhe në BE. Veprime të koordinuara dhe veprime me vlerë e argumentime në tavolinë me partnerët ndërkombëtar. Përplasja e Kosovës më NATO është agjendë e Serbisë dhe Rusisë!

Fushatë elektorale me fatin e Kosovës nuk bëhet!”, shkroi Abazi në Facebook.

Postimi i plotë:

Kurti është duke progresuar në ndarjen e Kosovës dhe krijimin e një realiteti të ri, atij të kalimit nga bashkëpartneriteti dhe përkrahja e NATOs për Kosovën dhe popullin e saj, në një përplasje me NATOn dhe interesat e botës demokratike.

Kurti nuk ka mandat për të krijuar një situatë dhe raport të tillë. Të gjithë qytetarët Shqiptarë janë për Kosovën në NATO dhe në BE. Veprime të koordinuara dhe veprime me vlerë e argumentime në tavolinë me partnerët ndërkombëtar. Përplasja e Kosovës më NATO është agjendë e Serbisë dhe Rusisë!

Fushatë elektorale me fatin e Kosovës nuk bëhet!

Krasniqi: Gënjeshtra se Kurti e ka “çliruar veriun” është propagandë kancerogjene

Milazim Krasniqi, profesor universitar, ka komentuar interpretimet se kryeministri Albin Kurti e ka çliruar veriun e Kosovës.

Këtë intereptim, Krasniqi e ka cilësuar si gënjeshtër dhe “metastazë e propagandës kancerogjene”.

Tutje, Krasniqi ka theksuar se sigurinë në veri e mirëmban edhe sot KFOR-it.

“Gënjeshtra e tipit se Kurti e ka “çliruar veriun” është metastazë e propagandës kancerogjene. Prej kujt e paska çliruar veriun, kur sigurinë e mirëmban edhe sot KFOR-i? Hiqeni KFOR-in nga veriu dhe e shihni brenda një dite se sa është çliruar veriu e edhe Kosova! Tentimi për ta keqpërdorë KFOR-in për lojërat e Kurtit, ka qenë evident. Kosova po e paguan atë faturë me izolim, me defaktorizim, me injorim, me kërcënim”, tha ai ndër tjerash.

Zeka: Serbët po heshtin sepse e kanë kuptuar që ëndrrat e tyre po i realizon Albin Kurti

Gazetari Milaim Zeka ka komentuar zhvillimet e fundit në veri. 

“Serbët po heshtin sepse e kanë kuptuar që ëndrrat e tyre po i realizon Albin Kurti”, shkroi ai.

Postimi:

Heshtja serbe ne veri, nje parakiamet per Kosoven

Ata po heshtin. Asnje reagim. Ata e kane kuptuar se enderrat e tyre po ua realizon Albin Kurti. Ata, pra serbet, po e degjojne baben e tyre, Dobrica Qosiqin, i cili tha: -Ne e rifitojme Kosoven vetem kur lideret e saje armiqrsohen me Ameriken. Te tjeret gati ishin. Reagoi edhe nxitesi kryesor i aventurave te Albinit, ambasadori gjerman, i cili çdo jave i jepte infuzion kryeministrit foshnjor qe te vazhdonte me politikat konfliktuale karshi perendimit.

Po i shohe disa qe po tallen me pjesetaret e KFOR-it. Mos ua zini per te madhe. Te tillet tallen edhe me nenat e tyre.

Krejte ne funde, mbreme me rastisi te degjoja nje ”analize” te nje mergimtari, i cili e nxirrte Francen komplet ne anen e Serbise. Zot ruana prej mendimeve te tilla talebane. Franca eshte djepi i bombardimeve ndaje Serbise. Askush ma shume nuk e ka mbeshtetur Rugoven se sa Franca, me perjashtim te SHBA-ve.

Nuk ja vlene mu zgjate me shume. Te kthehemi tek Baba Albin, qe duke i testuar kembet e ures te Ibrit, ka shkaterruar urat shekullore me prendimin, ato qe jane ndertuar me munde dhe sakrifica…!!!

Aksioni i fundit në veri, vjen reagimi edhe nga NATO

Aleanca e NATO-s është shprehur e zhgënjyer me aksionet e fundit në veri të Kosovës, ku janë mbyllur disa komuna paralele serbe.

Në një reagim zedhenjesa e NATO-s, Farah Dakhlallah ka thënë se aksioni ishte i pakoordinuar edhe pse Qeveria i kishte premtuar se do të koordinohej me ta.

NATO ka ripërsëritur se duhet angazhim i plot në dialog.

“Shumë i zhgënjyer nga aksionet e djeshme në veri të Kosovës të cilat nuk ishin të koordinuara me KFOR-in pavarësisht premtimeve të përsëritura për ta bërë këtë. KFOR-i është plotësisht i përgatitur për të mbështetur mandatin e tij të OKB-së Rezoluta 1244 për të gjitha komunitetet në Kosovë. Duhet de-përshkallëzimi dhe angazhimi i plotë në Dialogun e BE-së”, thuhet në reagim.

Osmani: Veprimet për shtrirje të sovranitetit janë legjitime, suksesi varet nga bashkëpunimi me aleatët

Presidentja e Kosovës, Vjosa Osmani, i ka thënë të shtunën Radios Evropa e Lirë se veprimet për shtrirje të sovranitetit në Kosovë, janë veprime legjitime dhe në përputhje me Kushtetutën e Kosovës, por që suksesi dhe qëndrueshmëria e tyre varen prej bashkëpunimit me aleatët.

Ajo i ka bërë këto deklarata, pasi është pyetur rreth reagimeve të Perëndimit më 30 gusht, pas mbylljes së pesë objekteve paralele në veri të Kosovës. Sipas Qeverisë së Kosovës, këto institucione kanë funksionuar nën udhëheqjen e Serbisë dhe kanë cenuar kushtetutshmërinë dhe ligjet e vendit.

Ndihmëssekretari amerikan i Shtetit për Çështjet Evropiane dhe Euroaziatike, James O’Brien, i ka bërë thirrje kryeministrit të Kosovës, Albin Kurti, të ndalë, siç ka thënë ai, “veprimet e pakoordinuara që ndikojnë negativisht në partneritetin tonë”.

Për aksionin në veri kanë reaguar edhe ambasadorët e Gjermanisë, Francës dhe Britanisë së Madhe.

“Situata në veri të Kosovës është shumë sfiduese, sepse përkundur Marrëveshjes së vitit 2013, e cila kërkon që të gjitha strukturat ilegale të shpërbëhen, ato janë forcuar nga [presidenti serb, Aleksandar] Vuçiq në këtë dekadë, dhe janë shndërruar në grupe mafioze, të cilat edhe sfidojnë sigurinë, edhe sovranitetin, por edhe vetë jetën e qytetarëve që jetojnë në veriun e veriut”, ka thënë Osmani në Pragë, ku po merr pjesë në forumin e sigurisë Globsec.

Ajo ka bërë thirrje që të mos lejohet “asnjë forcë e errët, asnjë shtet që ka qëllime dashakëqija ndaj Kosovës dhe rajonit, të krijojë ndarje mes neve dhe aleatëve”.

“Kjo ndarje, në afatgjatë, Kosovës i kushton shumë. Kosova ka mundësi që të jetë e suksesshme në shtirje të sovranitetit, bashkë me aleatët. Kërkohet më shumë komunikim, më shumë konsultim, më shumë koordinim”.

E pyetur nëse zyrtarë të lartë amerikanë, përfshirë shefin e Agjencisë Qendrore të Inteligjencës (CIA) e kanë përmendur nëpër takimet e ditëve të fundit përkeqësimin e marrëdhënieve me Qeverinë e Kosovës, ajo ka thënë se SHBA-ja ka qenë e qartë në çdo nivel se raportet me popullin e Kosovës, me Kosovën si shtet, i ka shumë të fuqishme.

“Ne duhet të gjejmë mënyra për ta forcuar partneritetin, ne duhet të gjejmë mënyra që debati në Kosovë të mos jetë asnjëherë se ‘a jemi prishur me Amerikën apo jo?’, por të jetë sa jemi duke i forcuar ato marrëdhënie, sepse është vetëm në interes të Kosovës”.

Ajo ka thënë se do të takohet në kuadër të Globsec-ut me zyrtarë amerikanë për t’i diskutuar të gjitha sfidat aktuale.

Osmani nuk ka dashur të komentojë pse të shtunën, më 31 gusht, është vërejtur një prani e shtuar e forcave të misionit të NATO-s në Kosovë, KFOR mbi urën kryesore mbi lumin Ibër.

Presidentja ka thënë se për këtë gjë duhet pyetur KFOR-i, por as ky institucion nuk u është përgjigjur pyetjeve të Radios Evropa e Lirë.

Një pjesëtar i forcave italiane të KFOR-it në urën i Ibrit i ka thënë më herët për një korrespodente të REL-it se “nuk pritet ndonjë gjë e veçantë” dhe se pjesëtarët aty gjenden aty “për shkak të operacioneve rutinore”.

Osmani e ka përmendur çështjen e urës kur është pyetur se si mund të gjendet mesi i artë mes veprimeve të Qeverisë dhe kërkesave të Perëndimit.

“Mesi është mirëkuptimi i të gjithëve që ka tema të cilat assesi nuk duhet të bëhen pjesë e dialogut me Serbinë, sepse ato qoftë kanë përfunduar si të tilla, sepse janë arritur marrëveshje, plane të zbatimit, siç është çështja e urës, çështja e shpërbërjes së strukturave ilegale, ato janë mbyllur më vitin 2013, dhe ka tema të cilat as nuk është në interes të Kosovës, sepse do të ishte shkelje e sovranitetit dhe Kushtetutës, në qoftë se ato do të hapeshin për negociata me një shtet tjetër, në këtë rast me Serbinë. Në anën tjetër, ne duhet ta kemi të qartë që një prej fuqive më të mëdha të Kosovës, një prej përparësive më të mëdha të Kosovës ndër vite është që aleatët i ka pasur në anën e saj”.

Perëndimi i ka shtuar së fundmi kritikat ndaj Qeverisë së Kosovës, për ato që i konsideron veprime të njëanshme.

Në mesin e tyre përfshihet edhe përpjekja e Qeverisë së Kosovës në fillim të gushtit për hapje të urës kryesore mbi lumin Ibër,, e cila ndan Mitrovicën Jugore me shumicë shqiptare me Mitrovicën Veriore me shumicë serbe.

Ura është e hapur për qarkullim të këmbësorëve, por jo për automjete.

Ambasadori amerikan në Kosovë, Jeffrey Hovenier, pati paralajmëruar ato ditë kundër hapjes së urës, duke thënë se një veprim i tillë rrezikon ushtarët amerikanë.

Edhe misioni i NATO-s në Kosovë, KFOR, i cili ka prezencë të përhershme mbi urë, pati thënë se nuk do të hezitojë të veprojë, nëse rrezikohet siguria në atë pjesë.