Me kthimin e stinës së dimrit, është rikthyer edhe masa e mbështetjes për familjet e cenueshme për energjinë elektrike.
Qeveria në detyrë e Kosovës e ka miratuar sot fillimin e zbatimit të masës, e cila do t’i ndihmojë familjet e cenueshme me pagesa të faturave të energjisë elektrike.
Për t’i plotësuar kushtet për subvencionimin e faturave të energjisë elektrike, ekonomitë familjare duhet të kenë të ardhura më të ulëta sesa 150 euro për person.
“Rikthehet edhe masa e mbështetjes, pra e konsumatorëve të cenueshëm, për energjinë elektrike. Është programi që subvencionon faturën e plotë ose të pjesshme për të gjitha ato familje që të ardhurat mesatare për anëtarë të familjes i kanë më të ulëta se 150 euro në muaj”, tha ministri në detyrë i Financave, Hekuran Murati.
“Pra, nëse një familje katër anëtarëshe ka më pak se 600 euro në muaj i bie të kualifikohet për këtë program”, shpjegoi ai.
Vitin e kaluar, Murati tha se ka pasur rreth 80 mijë familje përfituese nga kjo masë.