Këta pritet të jenë drejtorët e rinj të klinikave në QKUK

Procesi i përzgjedhjes së drejtorëve të rinj në klinikat e Qendrës Klinike Universitare të Kosovës (QKUK) po shkon drejt finalizimit, ndërsa tashmë janë bërë të ditur emrat e disa prej udhëheqësve që pritet të marrin drejtimin e klinikave kryesore.

Indeksonline ka mësuar emrat që pritet të udhëheqin klinikat e QKUK-së, ndërsa në disa raste procesi ende nuk është përmbyllur ose ka dështuar.

Burime të indeksonlinet kanë thënë se në Klinikën e Kirurgjisë Torakale pritet të zgjedhet dr. Afrim Tahiri, ndërsa dr. Arsim Gashi pritet të drejtojë Institutin e Psikiatrisë Forenzike në QKUK. Ismet Jusufi pritet ta udhëheqë Klinikën e Anesteziologjisë, derisa Edmond Komoni po ashtu pritet të udhëheq Klinikën e Neurologjisë.

Ndërsa Klinikën e Gjinekologjisë do të vazhdojë ta udhëheqë dr. Zef Nderaj, ndërsa dr. Shpëtim Thaçi pritet të jetë drejtori i ri i Klinikës së Pulmologjisë.

Dr. Fakir Spahiu pritet të përzgjedhet shef në Repartin e Mjekësisë Nukleare.

Ndërkohë, konkursi për drejtor të Klinikës së Radiologjisë ka dështuar, pasi procesi nuk ka nxjerr një kandidat fitues.

Ka dështuar edhe përzgjedhja për drejtor të Institutit Paraklinik.

Në listë ishte vetëm një kandidat, dr. Jeton Shatri, mirëpo procesi nuk ka rezultuar me emërim.

Sa i përket Klinikës së Alergologjisë, gara ende nuk është mbyllur.

Në konkurrim për pozitën e drejtorit janë dr. Leonora Sfarça dhe dr. Bardha Selmanaj-Bislimi, ndërsa vendimi final pritet të merret në ditët në vijim.

Aksident fatal në Klinë: Humb jetën zyrtari i Gjykatës Themelore

Driton Haliti, 43-vjeçar, vdiq sot në fshatin Dollc të Klinës, vendin ku shkaktoi një vetaksident me veturë.

Si pasojë e plagëve të marra nga përplasja e veturës, Haliti vdiq në vendin e ngjarjes sot rreth orës 05:00 të mëngjesit.

Vdekjen e 43-vjeçarit e konstatoi një ekip mjekësor që iu përgjigj thirrjes për intervenim në aksident, bëri të ditur Policia e Kosovës në një njoftim për media.

Katër persona të tjerë u lënduan si pasojë e aksidentit, sipas policisë.

Policia tha se katër të lënduarit janë dërguar për trajtim në Spitalin e Përgjithshëm në Pejë dhe se të njëjtit janë jashtë rrezikut për jetë.

Driton Haliti ishte i diplomuar në Fakultetin Juridik të Universitetit Haxhi Zeka në Pejë dhe punonte si zyrtar në Gjykatën Themelore në këtë qytet.

Kosova e dyta më e varfër në Evropë, Murati: Kemi përparim, në qeverisjet e kaluara ishim të fundit

Sipas të dhënave të Fondit Monetar Ndërkombëtar (FMN) për vitin 2025 të publikuar nga Platforma WolrdAtlas, Kosova renditet e dyta si vendi më i varfër në Evropë, pas Moldavisë.

Lidhur më këtë ka folur ministri në detyrë i Financave Hekuran Murati, duke thënë se në qeverisjet e kaluara Kosova ka qenë e fundit, duke shtuar se Kosova tash ka shënuar ngritje.

“Po të ishte gazetaria si duhej do ta kishte shpërfaq gjithë trendin si ka qenë, pra Kosova ka qenë e fundit kur ne kemi marrë qeverisjen dhe tash kemi ngritje më lartë në atë tabelën e rangimit. Në fakt nëse shihet viteve të kaluara, pra deri në vitin 2019 diferenca e Kosovës me vendet e tjera ka shku duke u rrit, pra vendet e tjera i kanë ikë Kosovës, kurse tashti lëre që e kemi ngushtu diferencën por edhe e kemi kalu një shtet dhe presim që shumë shpejtë ky trend të vazhdojë dhe nëse vazhdon ky trend dhe qeverisja e mirë t’i kalojmë edhe shtetet e tjera”, ka thënë Murati.

Sipas tij, Kosova ka përparim në raport me shtetet e tjera.

“FMN-ja aty ka raporturar të ardhurat për kokë banori të bazuar në fuqinë blerëse. Unë nuk po bëj vlerësime, unë vetëm e thash që nëse shikohet trendi, pyetja do të mund të ishte shtruar pak më ndryshe sepse trendi tregon që Kosova ka përparim në raport me shtetet e tjera, pra kemi qenë në vendin e fundit gjatë qeverisjeve të kaluara, tash po kemi kaluar Moldavinë dhe presim t’i kalojmë edhe shtetet tjera nëse vazhdohet ky trend”, ka deklaruar Murati.

Hamza: Kosova po rrëshqet drejt varfërisë, duhet kthesë urgjente për shtetin dhe qytetarët

Kryetari i Partisë Demokratike të Kosovës, Bedri Hamza, ka reaguar pas raportimeve të fundit për mirëqenien dhe zhvillimin ekonomik në Evropë, duke ngritur shqetësimin për gjendjen sociale dhe ekonomike në vend.

Hamza ka deklaruar se Kosova është renditur ndër dy vendet më të varfra në Evropë, me vetëm Ukrainën, e cila ndodhet në gjendje lufte, para saj.

“Kosova u rendit ndër dy vendet më të varfra në Evropë, me vetëm Ukrainën, e cila është në gjendje lufte, para nesh. Një lajm që duhet të na shqetësojë të gjithëve, sepse tregon qartë kah po rrëshqet vendi ynë”, ka shkruar Hamza.

Sipas tij, kjo gjendje po reflektohet drejtpërdrejt në jetën e përditshme të qytetarëve dhe familjeve kosovare, të cilat po përballen me vështirësi ekonomike, rritje çmimesh dhe mungesë perspektive për të ardhmen.

Ai ka kritikuar qeverisjen e viteve të fundit, duke thënë se fokusi i pushtetit ka qenë në përçarje dhe propagandë, në vend të zhvillimit dhe mirëqenies së qytetarëve.

“Viteve të fundit, energjia e pushtetit është harxhuar në përçarje, propagandë dhe konflikte të pafundme politike, ndërkohë që qytetarët kanë mbetur të vetmuar përballë çmimeve të larta, pasigurisë dhe mungesës së perspektivës”, ka theksuar ai.

Kreu i PDK-së ka bërë thirrje për një kthesë të madhe politike dhe shoqërore, duke kërkuar rikthim te bashkëpunimi, puna, zhvillimi dhe partneriteti me aleatët ndërkombëtarë.

Hamza ka shtuar se Kosovës i duhen institucione serioze që punojnë për mirëqenien e qytetarëve, stabilitetin e shtetit dhe krijimin e një jete më të mirë për familjet kosovare.

“Ky vend meriton më shumë. Dhe unë besoj se bashkë mund t’ia kthejmë Kosovës drejtimin e duhur, para se të bëhet tepër vonë”, ka përfunduar Hamza.

Aksidenti tragjik sot – ky është personi që humbi jetën

Një aksident i rëndë trafiku ka ndodhur në orët e hershme të mëngjesit në fshatin Dollc të Klinës, ku si pasojë një person ka humbur jetën dhe katër të tjerë kanë mbetur të lënduar.

Viktima e aksidentit është identifikuar si Driton Isa Haliti, i cili ka ndërruar jetë në vendngjarje si pasojë e lëndimeve të marra.

Sipas policisë, dyshohet se automjeti ka dalë jashtë kontrollit dhe ka përfunduar në një zonë ku po zhvilloheshin punime në segmentin e autostradës Prishtinë–Pejë.

Të lënduarit janë dërguar për trajtim mjekësor, ndërsa autoritetet po hetojnë shkaqet e aksidentit.

Ky është drejtori i ri i QKUK-së

Shërbimi Spitalor dhe Klinik Universitar i Kosovës ka shpallur rezultatet përfundimtare për disa nga pozitat kyçe drejtuese në shëndetësinë publike.

Sipas dokumentit zyrtar të publikuar nga SHSKUK, Mentor Zejnullahu është përzgjedhur drejtor i ri i Qendrës Klinike Universitare të Kosovës.

Në procesin e vlerësimit, Zejnullahu ka grumbulluar gjithsej 86.3 pikë (62.5 pikë në testin me shkrim dhe 23.8 pikë në intervistë), duke u renditur i pari në këtë garë.

Përveç QKUK-së, SHSKUK ka përmbyllur procesin e përzgjedhjes së drejtorëve edhe për dy spitale të përgjithshme rajonale.

Spitali i Përgjithshëm në Vushtrri, drejtor është përzgjedhur Besim Muzaqi me një total prej 75.7 pikësh (51.5 në test dhe 24.2 në intervistë).

Ndërsa në spitalin e Përgjithshëm të Ferizajt, pozitën e drejtorit e ka fituar Ilir Hamdiu, i cili ka grumbulluar 75.3 pikë (53.5 në test dhe 21.8 në intervistë)./Insajderi

Cana: Kurti i frikësohet Ardian Gjinit

Psikologia e njohur Edona Cana ka reaguar lidhur me prezantimin e listës zgjedhore në Gjakovë, duke thënë se përzgjedhja e këtij qyteti nuk ka qenë rastësi, por bart një simbolikë të veçantë politike.

Sipas Canës, Gjakova është zgjedhur pasi, siç shprehet ajo, “është qyteti ku ende dhemb”, duke aluduar në sfidat dhe mungesën e zhvillimit në vitet e fundit.

Ajo ka vlerësuar lart kandidatin e Aleancës për kryeministër, Ardian Gjinin, duke theksuar se ai vjen pikërisht nga Gjakova dhe se, pavarësisht “luftës hibride, gjuhës së urrejtjes dhe sulmeve politike”, ka arritur të fitojë mandatin e tretë në krye të komunës.

Cana ka shtuar se Aleanca në Gjakovë vazhdon të jetë forca me numrin më të madh të votave, duke argumentuar se qytetarët nuk kanë harruar izolimin, mungesën e investimeve dhe bllokadat që, sipas saj, i janë bërë qytetit në vitet e fundit.

Në fund të reagimit, ajo ironizoi edhe prezantimin politik të kundërshtarëve, duke thënë se “kishte shumë ‘lista fituese’, pak subjekt politik”, duke lënë të kuptohet se emri i partisë po zbehet në komunikimin publik.

15-vjeçarja pështyn dhe godet me shqelm zyrtarin policor

Një 15-vjeçare është dërguar për 24 orë në mbajtje pasi dyshohet për sulm ndaj një zyrtari policor në Prizren.

E dyshuara është arrestuar pak para mesnatës së të dielës në rrugën “Ekrem Hoxha”, në një pompë të derivateve.

Sipas raportit policor 24-orësh, ajo dyshohet se e goditi me shqelm zyrtarin policor derisa ai po hynte në marketin e gjendur në pikën e derivateve. Dyshohet se e pështyu atë dhe se rezistoi gjatë arrestimit, duke i shkaktuar lëndime dy zyrtarëve.

“Është arrestuar e dyshuara f/k për shkak se fillimisht e kishte fyer dhe më pas sulmuar – goditë me shqelm zyrtarin policor derisa kishte qenë duke hyrë në marketin e një pompe të derivateve. E dyshuara gjatë arrestimit ka shfaqë rezistencë dhe si pasojë ka lënduar dy zyrtar policor”, thuhet në raportin 240orësh.

“Të dyshuarës i është dhënë trajtim mjekësor në stacion policor, kurse zyrtarët policor kanë marr tretman mjekësor.”

Rasti është nën hetim në drejtim të veprave penale “sulm ndaj personit zyrtar” dhe “lëndim i lehtë trupor”.

Burrë e grua përfundojnë në Polici pas sherrit në banesë në Prishtinë, gruaja merr trajtim mjekësor

Një rast i dhunës në familje është raportuar në një nga komplekset banesore në rrugën B në Prishtinë, ku pas një konflikti mes bashkëshortëve ka ndërhyrë Policia, raporton Gazeta Sinjali.

Ngjarja ka ndodhur në Rrugën B, ku njësitet policore kanë dalë menjëherë pas marrjes së informacionit për përleshje brenda banesës.

Burime të afërta me hetimin bëjnë të ditur se në Stacionin Policor “Jugu” janë shoqëruar bashkëshortët D. Sh dhe M. G, të cilët janë intervistuar në cilësinë e të dyshuarve.

Sipas deklarimit të M. G para hetuesve, problemet mes çiftit kishin nisur pas presionit psikologjik që pretendon se po i bëhej nga bashkëshortja, ndërsa situata më pas kishte eskaluar në përplasje fizike.

Ai ka deklaruar se në një moment është goditur nga bashkëshortja dhe më pas kishte reaguar duke e goditur edhe ai atë, duke pretenduar se ka vepruar në vetëmbrojtje.

Pas incidentit, gruaja ka pranuar tretman mjekësor për lëndimet e pësuara.

Me urdhër të Prokurores kujdestare, rasti është iniciuar si “Dhunë në familje”, ndërsa pas procedurave policore të dyshuarit janë liruar në procedurë të rregullt.

Hetimet lidhur me rastin vazhdojnë.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

“Më ngacmonte prej ditësh” – Punëtorja e Viva Freshit në Prishtinë denoncon kolegun 71-vjeçar: Dyshohet se e preku në fytyrë gjatë pauzës

Një rast shqetësues ngacmimi është raportuar në një nga pikat e “Viva Fresh Store” në Prishtinë, ku një punëtore e re ka kërkuar ndihmën e Policisë pasi pretendon se prej ditësh ishte duke u përballur me sjellje të papërshtatshme nga një koleg shumë më i moshuar, raporton Gazeta Sinjali.

Burime të afërta me hetimin bëjnë të ditur se ngjarja ka ndodhur mbrëmjen e së shtunës në rrugën “Bajram Bahtiri”, brenda hapësirave të marketit ku viktima dhe i dyshuari punonin bashkë.

Sipas deklarimit të viktimës A. B, ajo kishte hyrë në një nga zyrat e lokalit gjatë pauzës për të ngrënë ushqim, kur në hapësirë ka hyrë edhe i dyshuari O. S.

Ankuesja ka deklaruar para hetuesve se i dyshuari fillimisht ka nisur me komente dhe fjalë që ajo i ka konsideruar ngacmuese, ndërsa situata është bërë edhe më shqetësuese kur ai dyshohet se është afruar fizikisht dhe e ka prekur në fytyrë.

E reja ka deklaruar se kjo nuk ishte hera e parë dhe se sipas saj, ngacmimet nga i dyshuari kishin vazhduar prej disa ditësh, derisa vendosi ta raportojë rastin në Polici.

Pas denoncimit, Policia ka ndërmarrë veprimet hetimore dhe për rastin është njoftuar Prokurori i Shtetit kujdestar, i cili ka urdhëruar inicimin e rastit si “Ngacmim”.

Me vendim të prokurorit, O. S është ndaluar për 48 orë, ndërsa hetimet për rastin janë duke vazhduar.

Sinjali – aty ku e vërteta flet para lajmit!

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.