Kombëtarja e Kosovës do të zhvilloj ndeshjen e fundit në Ligën e Kombeve, ku do të përballet me Lituaninë në stadiumin ‘Fadil Vokrri’ në Prishtinë.
Dardanët do të luajnë këtë sfidë me fillim nga ora 20:45 në një ambient të ngrohtë pasi pritet të ketë shikues jashtëzakonisht shumë.
Pas asaj që ndodhi në Rumani, futbollistët e Kombëtares së Kosovës kërkojnë fitoren pasi duan ta mbyllin në mënyrën më të mirë të mundshme këtë kampanjë kualifikuese.
Për këtë takim përzgjedhësi Franco Foda pritet të bëjë dy ndryshime të detyrueshme në formacionin startues në mungesë të Amir Rrahmanit dhe Lumbardh Dellovës të cilët mungojnë shkaku i kartonëve.
Telegrafi u sjell formacionin e mundshëm të Kosovës, ku pritet të ketë vetëm dy ndryshime nga sfida me Rumaninë.
Në portë si gjithmonë do të jetë Aro Muric, derisa Florent Hadergjonaj do të vendoset në krahun e djathtë të mbrojtjes me Mërgim Vojvodën në krahun e majtë. Dyshja e qendrës së mbrojtjes do të përbëhet nga Fidan Aliti dhe Ilir Krasniqi.
Mesfusha pritet të jetë e njëjta sikurse me Rumaninë me Valon Berishën dhe Elvis Rexhbecajn më të tërhequr derisa Florent Muslija në rolin e mesfushorit ofensivë.
Treshja e sulmit nuk do të ndryshoj me Edon Zhegrovën në krahun e djathtë, Muharrem Jasharin në të majtë dhe Vedat Muriqin në qendër të sulmit.