“Më goditi me shuplakë, pastaj nisi të më kërcënojë” – prishtinasi denoncon bashkëshorten për dhunë në familje

Një 30-vjeçar nga Prishtina ka denoncuar bashkëshorten e tij për dhunë në familje dhe kërcënime të vazhdueshme, pas një konflikti që fillimisht ishte trajtuar vetëm si shënim zyrtar, mëson Sinjali nga burime të afërta me hetimin.

Rasti i parë ishte raportuar më 22 prill 2026 në Stacionin Policor “Jugu” në Prishtinë.

Sipas informatave, A. D rreth 30 vjeç kishte deklaruar se gjatë një mosmarrëveshjeje në banesën ku jetonte me bashkëshorten e tij, M. K rreth 31 vjeç, ajo e kishte ofenduar dhe goditur me shuplakë në fytyrë.

Burimet bëjnë të ditur se në atë kohë ai nuk kishte shprehur dëshirë për ndjekje penale.

Edhe e dyshuara kishte pranuar para Policisë se gjatë debatit e kishte goditur bashkëshortin me shuplakë.

Sinjali mëson se pas konsultimit me Prokurorin kujdestar për dhunë në familje, rasti fillimisht ishte trajtuar vetëm si shënim zyrtar.

Por më 9 maj, ankuesi është paraqitur sërish në Polici, duke deklaruar se që nga incidenti i parë kishte qenë vazhdimisht i kanosur për jetë nga bashkëshortja.

Më 10 maj është intervistuar edhe e dyshuara, e cila ka mohuar kërcënimet dhe ka deklaruar se nuk kishte pasur kontakt me ankuesin.

Me udhëzim të Prokurorit kujdestar, rasti është iniciuar në procedurë të rregullt si “Dhunë në familje”.