Dy vëllezërit e akuzuar për sulmin në Ibër Lepenc po hetohen edhe për vrasje në Pejë

Dy vëllezërit e akuzuar në rastin e sulmit terrorist në Ibër Lepencit, janë duke u hetuar edhe për vrasje, të kryer në rajonin e Pejës. Kjo është bërë e ditur në seancën fillestare, ku ata u deklaruan si të pafajshëm për sulmin e kryer në Varagë, nëntorin e vitit 2024.

Përkundër provave të forta që i lidhin me një prej akteve më të rënda terroriste të kryera në vendin tonë, tre të akuzuarit për rastin “Ibër Lepenci” thanë se nuk ndihen fajtorë.

Ata u deklaruan në seancën fillestare, që u mbajt pas një kërkese të rrëzuar të mbrojtjes për përjashtimin e prokurorit të rastit, Bekim Kodraliu. Deklarimet e tyre, erdhën pasi Kodraliu lexoi aktakuzën, për veprat “Rrezikimi i rendit kushtetues me shkatërrimin apo dëmtimin e instalimeve dhe pajisjeve publike”, “Kryerja e veprës terroriste” dhe atë të spiunazhit.

”Dëshiroj të deklaroj se nuk ndihem fajtor për veprën penale, e cila më vihet barrë”, ka thënë i akuzuari Igor Dimoviq.

Kryetari i trupit gjykues, Vesel Ismaili, ua rikujtoi atyre periudhën 30 ditore për kërkesat për hedhjen e aktakuzës dhe kundërshtimin e provave.

Por në seancë, u kuptua edhe një tjetër çështje: që të dy vëllezërit Viqentijeviqit, janë duke u hetuar edhe për vrasje nga Prokuroria Themelore e Pejës dhe këtë e bënë të ditur derisa u konfirmuan të dhënat e tyre personale.

Përkundër që për rastin në fjalë nuk ka ende aktakuzë, Nebojsha Vllajiq, avokati i Jovan Viqentijeviq, kërkoi që lëndët të bëhen bashkë.

”Kërkesë për bashkimin e procedurës penale ndaj klientit që po zhvillohet në Gjykatën në Pejë, ku akuzohet me vëllain për vrasje”, deklaroi Vllajiq.

“Lidhur me kërkesat për hedhjen e aktakuzës dhe kundërshtimin e provave ne do t’i parashtrojmë në këtë gjykatë në formë të shkruar brenda afatit, por njëkohësisht do ushtrojmë kërkesë për bashkimin e procedurës penale ndaj të mbrojturit që po zhvillohet në Gjykatën Themelore të Pejës”, tha ai.

Por, kërkesa mori një kundërshtim të shpejtë nga prokurori Bekim Kodraliu, i cili potencoi se rasti është ende në fazën hetimore.

“Ai (avokati) është profesionist dhe duhet t’i kuptojë disa çështje juridike. Procedura penale në Pejë është duke u zhvilluar, është procedurë nën hetim dhe nuk ka mundësi ligjore që e njëjta lëndë të bashkohet me lëndën që është vetëm duke u zhvilluar. Ne nuk mund të ndërhyjmë në kompetenca të Gjykatës Themelore në Pejë, ngase do të pengonim hetimin në Pejë”, deklaroi Kodraliu, Prokuror në Prokurorinë Speciale.

Bazuar në aktakuzën e Prokurorisë Speciale, vëllezërit Dragisha dhe Jovan Viqentijeviq më 29 nëntor 2024, ne fshatin Varagë, Komuna e Zubin Potokut, kishin vendosur rreth 20kg eksploziv në pjesën e kanalit të “Ibër- Lepencit”, ndërsa Igor Dimoviq, akuzohet për armëmbajtje pa leje./RTV Dukagjini

Vdes në moshë të re Loriku, ishte nipi i artistes së njohur

Këngëtarja e njohur shqiptare, Ganimete Abazi – Ganja, po përballet me një humbje të rëndë familjare.

Artistja ka njoftuar se nipi i saj, Loriku, ka ndërruar jetë në moshë të re, duke lënë pas dhimbje të madhe tek familjarët dhe të afërmit.

Lajmin e trishtë, Ganja e ka bërë të ditur përmes një postimi në rrjetin social Facebook.

Në mesazhin e saj prekës, ajo ka shprehur dhimbjen për largimin e parakohshëm të nipit, duke e kujtuar me fjalë zemre.

Miratohet në lexim të parë Projektbuxheti i vitit 2026

Në Kuvendin e Kosovës është mbledhur për të vazhduar seancën e jashtëzakonshme të ndërprerë të premten, me një pikë të rendit të ditës “Shqyrtimi i parë i Projektligjit nr. 10/L-001 mbi ndarjet buxhetore për Buxhetin e Republikës së Kosovës për vitin 2026”.

Me 66 vota për, Kuvendi ka miratuar në lexim të parë Projektligjin mbi ndarjet buxhetore për buxhetin e vitit 2026.

32 deputetë votuan kundër, ndërsa pesë abstenuan.

Projektligji për ndarjet buxhetore për vitin 2026 ishte në rend dite në seancën e mbajtur të premten, mirëpo Lëvizja Vetëvendosje s’arriti të siguronte shmangien nga afatet për ta shqyrtuar atë në parim.

Buxheti i propozuar është në vlerë prej 4 miliardë eurosh, dhe për hyrjen në fuqi si Ligj, duhet të miratohet edhe në lexim të dytë.

Rritja e pensioneve, shtesave, paga e 13-të, Kurti: Rritjen ekonomike nuk e mbajmë në shtet, por e shpërndajmë

Kryeministri i Kosovës, Albin Kurti, ka marrë fjalën e tij në seancën për buxhetin, ku paraprakisht opozita pati kritika për projektbuxhetin, të cilin e ndërlidhën me ekspozenë që prezantoi në seancën e votimit të qeverisë.

Sipas tij, nuk do te ishte normale nëse buxheti do të ishte në përputhje, pasi sipas tij duhet të shikohet programi qeveritar.

Kurti përmendi të ‘mirat’ e buxhetit, shifrën prej 4 miliardë që e quajti kryefjalë, por edhe premtimet e tjera

“Do të ishte jonormale që të sjellim buxhet në përputhje me ekspozenë. Zotimet në fushatë, ekspozeja, programi i ri qeveritare më pastaj rishikimi i buxhetit. Në këtë buxhet, kryefjala është shifra prej afër katër miliardë euro, ku një miliard euro janë buxhetuar për investime kapitale.

Risi është paga e 13-të, pra kush punon 12 muaj në sektorin publik i merr 13 paga. Gjithashtu është i përfshirë zbatimi i rritjes së pagës bazë me 0.5% për çdo vit përvojë pune. Pra kemi dyfishim të shtesë së përvojës së punë.

Buxheti i vitit 2026 përfshin rritjen e pensioneve, të shtesave për fëmijë, për lehona, pagesa për të rinj e gra që angazhohen nga super puna. Synimi ynë vjen nga orientimi ynë. Rritjen të mos e mbajmë për shtet por ta shpërndajmë në shoqëri.” – tha Kurti

Çështja e Presidentit, Kurti jep këtë njoftim

Kryeministri i Kosovës, Albin Kurti ka deklaruar se do të fillojë konsultimet për çështjen e presidentit.

Këtë deklaratë ai e bëri rrugës derisa po shkonte në seancën e jashtëzakonshme në Kuvendin e Kosovës.

“Brenda ditës do të fillojmë edhe bisedimet për Presidentin apo Presidenten e Kosovës”, tha shkurtimisht Kurti.

Edhe javën e kaluar kryeministri kishte bërë të ditur se pas miratimit të marrëveshjeve ndërkombëtare dhe buxhetit të vitit 2026 do të niste konsultimet me partitë politike për çështjen e presidentit.

Skandaloze: Gazetarja mitrovicase që përcolli Banjskën dhe rrezikoi jetën e saj përjashtohet nga puna pasi guxoi t’i bëjë pyetje Kurtit dhe të protestojë për paga

Gazetarja e RTK-së, Edina Avdiu, nga Mitrovicë, është përjashtuar nga puna në transmetuesin publik, pasi më herët kishte sfiduar me pyetje kryeministrin në detyrë, Albin Kurti, lidhur me zgjidhjen e çështjes së buxhetit të RTK-së.

Sipas njoftimit të bërë nga vetë gazetarja përmes një postimi publik, ajo nuk është më pjesë e këtij institucioni. Avdiu kishte qenë aktive edhe në protestat e gazetarëve për paga dhe kushte më të mira pune.

Postimi i plotë:

Publikut,

Ne nje shtet normal, demokratik ku gazetaret i kane duart e lira te shkruajne te verteten, neser une do te isha ne pune.

Por jo!

Kete postim po e bej sonte, pikerisht ne oren 19:30 sepse nga sonte, nuk do te me shihni me ne ekranin e Radio Televizionit te Kosoves, si cdo mbremje tjeter, tash e tre vjet.

Kjo, jo per shkak se ka munguar vullneti dhe angazhimi nga ana ime, por se menaxhmenti aktual i RTK-se, i cili po funksionon pa mandat, ka vendosur te mos e vazhdoj kontraten time te rregullt.

Ky njoftim me erdhi para disa javesh, me shkrim, nga administrata e RTK-se, e cila si sot tre vjet me pare me njoftoi se ‘Komisioni i perzgjedhjes eshte percaktuar se Ju
jeni kandidatja me e suksesshme, andaj permes ketij e-maili, Ju njoftojme se jeni pranuar ne
vendin e punes per te cilin keni aplikuar’

Ndersa tre vjet pas, pa asnje arsyetim, me vleresime vjetore mbi mesatare nga redaktoret e lajmeve, pa asnje verejtje ne dosjen time e njejta administrate me njoftoi se kontrata nuk do te ripertrihet.

Pra, nuk me largoi publiku, por direkt u.d kryeredaktori Blerim Haxhiaj i cili edhe muaj me pare nisi procedura disiplinore ndaj meje te cilat ju kthyen mbrapshte.

Kjo pasi:
“KOMISIONI AD HOC I RADIOTELEVIZIONIT TË KOSOVËS, në takimin e mbajtur
më 09.10.2025, mori këtë:
VENDIM
1. Aprovohet si e bazuar në tërësi ankesa me nr.1773/25 datë 22.09.2025 e palës ankuese Edina
Avdiu, e sistemuar në vendin e punës – Gazetare 1.
ll Shfuqizohet vendimi 1726/25 i datës 11.09.2025, me të cilin të
punësuarës Edina Avdiu i është shqiptuar masa e lehtë disiplinore “Verejtje me shkrim”

Megjithate lufta per te me degraduar e ne fund larguar, nuk pushoi.

Paralajmerimi per mosvazhdim te kontrates nga nje institucion publik sic eshte RTK-ja, erdhi ne muajin e peste te shtatezanise time, per cka eproret e mi ishin ne dijeni.

Arsyetim as vendim nuk mu percoll, POR arsyet qe dihen jane se;

Ne keto 3 vite angazhimi ne transmetuesin publik, partise ne pushtet nuk i konvenonte as kur e mbaja mikrofonin ne dore e beja pyetje, as kur e lshoja ne toke, ndaj vendosen qe te ma merrnin nga dora.

Ne te dy rastet u ftova nga u.d kryeredaktori i cili me thoshte se presioni nga partia ne pushtet eshte i madh, presion qe i erdhi ne zarf me 200 mijeshen nga Qeveria, nderkohe qe pyetja ime per kryeministrin ishte, pse nuk kam rroge?

Presion u provua te ushtrohej edhe ndaj meje si gazetare, natyrisht jo direkt nga partia, por permes veglave te tyre brenda RTK-se, ne pozita te redaktoreve.

Me gjithe presionin, censuren, mbledhjet e bezdisshme te mengjesit, ku temat refuzoheshin se nuk i konvenonin partise ne pushtet, ku gazetaret fshehnim koken prapa ekranit te kompjuterit per te mos na u dhene tekste qe vinin direkt nga partia, megjithate arrija disi te realizoja nje a dy kronika te balancuara per edicionin qendror.

Ndikimi i partise ne pushtet, ne Dhomen e Lajmeve po ndihej aq fort, sa ‘erdhi dita’ qe gazetaret gezoheshim nese nje dite shpetonim pa na u dhene ndonje detyre e ketij lloji (lexo propagande).

Ne keto rrethana, qe per te qene reale, nuk ishin te tilla kur une fillova punen, arrita te realizoj 803 kronika, e qindra lidhje direkte.

Por puna me e madhe qe kam bere, mendoj une, jane kronikat qe s’i kam bere, tekstet qe s’i kam lexuar.

Nje nder to eshte ky tekst, i shkruar ne zyret e partise, qe me erdhi si urdher nga redaktorja ta lexoja, ne diten qe kryeparlamentar u zgjodh Dimal Basha. Insistimi ishte qe thjeshte ta lexoja, pa bere pyetje dhe pa mu pergjigjur se kush ishte autori.

Natyrisht se une refuzova ta lexoja kete tekst me cilesime e joprofesional per edicionin qendror te lajmeve.

Sidoqofte, meqe kam punuar e jam angazhuar vetem per interesin e publikut, po e le ne rubriken e komenteve, tekstin e asaj dite, qe publiku ta lexoj dhe kuptoj; pse une nuk jam me pjese e televizionit publik te Kosoves.

E rëndë: Gjendet i vdekur një burrë në shtëpinë e tij

Pasditen e së dielës, një burrë është gjetur pa shenja jete në shtëpinë e tij në Graçanicë.

Policia ka njoftuar se ekipi mjekësor ka konstatuar vdekjen e viktimës në vendin e ngjarjes.

Me vendim të prokurorit trupi i pajetë është dërguar në IML për obduksion.

“Një mashkull kosovar është gjetur i vdekur në shtëpinë e tij. Në vendin e ngjarjes kanë dalë njësitë përkatëse dhe ekipi mjekësor i cili ka konstatuar vdekjen e viktimës. Me vendim të prokurorit trupi i pajetë është dërguar në IML për obduksion”, thuhet në raportin e policisë.

E dhimbshme: 23 vjeçari shqiptar humb jetën aksidentalisht në autoservis

Në Spitali i Librazhdit është dërguar për mjekim shtetasi L. D., 23 vjeç, i cili dyshohet se është dëmtuar aksidentalisht gjatë kohës që po riparonte mjetin e tij në servisin e shtetasit I. P.

Si pasojë e dëmtimeve të marra, 23-vjeçari ka humbur jetën.

Grupi hetimor po punon për zbardhjen e rrethanave dhe dokumentimin ligjor të rastit.

32-vjeçari humb jetën tragjikisht pasi u përplas nga treni, postimi i fundit në Facebook prek rrjetin

Një 32-vjeçar, humbi jetën pasi u përplas nga një tren në Bangladesh të dielën në mëngjes.

Sipas dëshmitarëve okularë që folën për mediat lokale, 32-vjeçari po qëndronte në shinat e trenit për të bërë një selfie, të cilën më pas e ngarkoi në Facebook.

Rrëfime të tjera thonë se 32-vjeçari po fliste në telefon kur u godit nga treni. Kjo u konfirmua nga një zëdhënës i policisë, i cili tha se “i ndjeri u vra kur u godit nga një tren në lëvizje, ndërsa ishte ulur në shinat e trenit dhe fliste në telefonin e tij celular”.

32-vjeçari vdiq menjëherë pasi u godit nga treni që shkonte për në Daka, ndërsa hetimet për rrethanat e aksidentit vazhdojnë.

Mblidhet përsëri Kuvendi, pritet të votohet ky projektligj

Sot do të vazhdojë seanca për leximin e parë për Projektligjin e Buxhetit 2026.

Kuvendi i Kosovës, ka bërë të ditur se seanca do të vazhdojë me fillim nga ora 10:00.

Përndryshe, kjo seancë u shty për sot, për shkak të mospajtimeve mes partive për të vazhduar me votimin e këtij projektligji, ku Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës kërkuan tri ditë afat për analizimin e buxhetit.