Kërkesa e Osmanit që presidenti të votohet nga populli, deklarohet Haxhiu

Kryetarja e Kuvendi i Kosovës, Albulena Haxhiu ka njoftuar se ka pranuar amendamentet kushtetuese nga Presidentja Vjosa Osmani që parashohin zgjedhjen e presidentit drejtpërdrejt nga populli.

Sipas saj, këto amendamente synojnë të eliminojnë ngërçet që po pengojnë funksionimin dhe stabilitetin e institucioneve.

Haxhiu tha se i bashkohet thirrjes së presidentes për votimin e këtyre amendamenteve kushtetuese.

“Sapo i pranova amendamentet kushtetuese nga Presidentja Vjosa Osmani Sadriu, të cilat parashohin që Presidenti/Presidentja të zgjidhet drejtpërdrejt nga populli. Në këtë mënyrë eliminohen ngërçet që po e pengojnë funksionimin e institucioneve dhe që po e pamundësojnë stabilitetin e tyre. I bashkohem thirrjes së Presidentes për votimin e këtyre amendamenteve”, ka shkruar Haxhiu.

Bedri Hamza ndryshon qëndrim për Presidentin? Ja çfarë tha së fundmi

Kryetari i PDK-së, Bedri Hamza tha se do të vendosin “në bazë të zhvillimeve që do të ndodhin” nëse do të hyjnë në sallën e Kuvendit ose jo nëse do të thirret një seancë për zgjedhjen e Presidentit.

Hamza u pyet sot nga gazetarët se çfarë do të ndodhte nëse nuk kandidohet edhe një emër tjetër për President. Tha se s’do të paragjykojë.

“E pra, çfarë do të ndodhë, t’ia lëmë kohës, ashtu që të mos paragjykoj. Ndoshta partia ka të tjerë, ndoshta koalicioni qeverisës i ka dy kandidatë”, tha ai.

Jeta Statovci flet për zgjedhjen e presidentit: Preferencë dhe bindje imja gjithmonë ka qenë Vjosa Osmani

Kur kanë mbetur edhe disa orë nga saga e mbylljes së çështjes së presidentit, ka ardhur një reagim i deputetes së Guxo, Jeta Statovci.

Indeksonline e ka kontaktuar Statovcin lidhur me preferencën e saj për çështjen e presidentit.

“Preferencë dhe bindje imja gjithmonë ka qenë Vjosa Osmani. Uroj të gjendet konsensusi i gjerë politik për këtë”, ka thënë shkurt Statovci.

Në orën 00:00 përfundon afati ligjor për zgjedhjen e presidentit të ri dhe ende s’ka pajtueshmëri mes subjekteve që jep shpresë për një emër konsensual për presidentin e ri të vendit.

Gruda: PDK nuk e voton Konjufcën dhe nuk merr pjesë në seancë, VV po tallet me Kosovën

Deputeti i Partisë Demokratike të Kosovës, Përparim Gruda, ka deklaruar se PDK nuk do ta mbështesë kandidaturën e Glauk Konjufca për president dhe nuk do të marrë pjesë në seancat për zgjedhjen e tij, duke akuzuar mazhorancën për shkelje të rendit kushtetues.

Ai tha se partia e tij ka vendosur të mos mbështesë asnjë kandidaturë partiake dhe se, sipas tij, shmangia e mbajtjes së seancave për zgjedhjen e presidentit përbën përmbysje të rendit kushtetues.

Sipas Grudës, Kuvendi duhet të mblidhet dhe ta konsumojë procedurën kushtetuese, qoftë për ta zgjedhur apo për të mos e zgjedhur presidentin.

“Ne kemi vendosur që mos të mbështesim kandidaturën e Glauk Konjufcës, asnjë kandidaturë tjetër partiake. Është qëndrim i qartë edhe nuk do të marrim pjesë në seancat. Por ajo që po përgatitet është mos me u mbajt seancat fare si e kuptoj unë, është përmbysje e rendit kushtetues. Sepse sot Kuvendi u desh me u mbledh, me zgjedh ose mos me zgjedh një president. Po kjo që as mos me e zgjedh, as mos me e konsumuar procedurën, është shkelje e Kushtetutës edhe po bëhet me qëllim me përmbys rendin kushtetues, me ja nënshtru krejt rendin kushtetues vullnetit të një partie politike”, tha ai.

Ai tha se VV po tallet me Kosovën.

“Besoj është tallje me krejt Kosovën, sepse rezultati dihet. E vërteta është se ne i kemi vetëm 22 deputetë. Por është edhe një e vërtetë e madhe populli i Kosovës e ka votu 51% Vetëvendosjen, jo 100%, a ashtu? 51%. Me 51% ata kanë mujt me formu qeverinë, me formu Kuvendin, me miratu ligjin për buxhetin e gjëra të tjera, por jo edhe me bë president. Prandaj duhet me u sjell në përputhje me rezultatin zgjedhor. Ky rezultat zgjedhor na ka imponu që të tona me u ulë e me gjet një emër për president. Kjo është e vërteta. Po krejt partitë populiste në botë, në fakt, kur fitojnë 51% e llogarisin sikur kanë fitu 100%, sillemi si 100%. Ajo është komplet tallje me Kosovën, me Kushtetutën, me interesat e qytetarëve të Kosovës. Është papërgjegjësi e pashembullt në Kosovën e pavarur”, tha ai.

“Unë vetë do ta votoja” – Konjufca kërkon kandidat nga opozita dhe përmend Vjosa Osmanin si opsion

I propozuari i Vetëvendosjes për president, Glauk Konjufca, ka thënë se opozita do të duhej të dilte me një emër tjetër.

Sipas tij, është opozita ajo që po e bllokon procesin për zgjedhjen e presidentit.

“Po, Vetëvendosja të bën tokë; ishte propozim i Vetëvendosjes dhe tash ecim përpara. Mendoj që pyetja që po mungon qe tre ditë, pasi nuk po e bëjnë gazetarët, po e bëj unë këtë pyetje.Versioni më i mirë është që opozita ta propozojë kandidatin e vet. Partitë politike PDK dhe LDK duhet ta propozojnë dikë, jam shumë kureshtar të di kush është ai që do ta votonin e që nuk jam unë, në mënyrë që të mos shkojmë në zgjedhje. Nëse nuk bën ai i Vetëvendosjes, atëherë le ta propozojnë”, tha ai para gazetarëve.

I pyetur se çka ndodh në rast se opozita nuk propozon një emër, ai u shpreh: “Atëherë do të shohim, do të vazhdojmë sipas procedurave”

Atij iu përmend edhe emri i Vjosa Osmanit, për të cilën nuk mohoi se ka votë për të.

“Po pra, Vjosa Osmanin ose këdo – edhe unë vetë kam për ta votuar. Nëse opozita nuk e gjen asnjë emër, ky është një përcaktim i qartë për të shkuar në zgjedhje”, deklaroi Konjufca.

Ky është propozimi i PDK-së për Presidente

Kryeakademikja Justina Pula është emri i cili ka mbështetjen më të madhe në diskutimet për presidente konsensuale, brenda Partisë Demokratike të Kosovës, siç ka mësuar KOHA brenda këtij subjekti.

Deputetët e PDK-së pritet të mblidhen me fillim prej orës 14:00 të mërkurën, për të diskutuar pikërisht për çështjen e zgjedhjes së presidentit. Deri tash nuk ka një emër që zyrtarisht ka marrë nënshkrimet për të qenë kandidat për president. PDK-ja nuk ka pranuar të flasë publikisht për emra të përveçëm

Hamza e Kurti janë takuar dy herë deri tash. Nga takimet nuk ka pasur rezultate konkrete për ndonjë kandidat konsensual. Të shtunën, oferta e Hamzës u interpretua nga kryetari i Vetëvendosjes, Albin Kurti, si “hapje e garës” për president. Megjithatë, kjo u mohua nga Hamza që u shpreh se “po që se ka garë, dihet rezultati” duke aluduar në numrat në Kuvend. Sipas Kushtetutës, për ta propozuar një kandidat për president nevojiten të paktën 30 nënshkrime të deputetëve. Lëvizja Vetëvendosje i ka 57 deputetë, ndërsa asnjë parti tjetër nuk i ka e vetme 30 vota.

Më 20 dhjetor 2025, Pula u zgjodh kryetare e Akademisë së Shkencave dhe të Arteve të Kosovës. Pula ka qenë deputete e PDK-së (2011-2014) dhe Ministre e Energjisë dhe Minierave (2008-2011).

Presidentes aktuale Vjosa Osmani i përfundon mandati më 4 prill. E sipas Kushtetutës, Kuvendi nëse dështon ta zgjedhë presidentin jo më vonë se 30 ditë para përfundimit të mandatit të presidentit aktual, atëherë shteti shkon në zgjedhje të reja. Ka pasur interpretime të ndryshme se a duhet të jetë kjo datë 4 apo 5 marsi. Kryeparlamentarja Albulena Haxhiu pati thënë se është 4 marsi, e në LDK një ditë më herët u shprehën se afati përfundon më 5 mars.

Për zgjedhjen e presidentit kërkohen të paktën 80 vota në njërin nga dy rundet e para të votimit, ose 61 vota në rundin e tretë, nga gjithsej 120 deputetë sa i ka Kuvendi.

A do të jetë Andin Hoti kandidat për president, deklarohet Kurti

Kryeministri i Kosovës, Albin Kurti ka deklaruar se brenda pak orësh pritet të ketë qartësi lidhur me çështjen e presidentit, teksa është nisur drejt mbledhjes së Grupit Parlamentar.

I pyetur nëse Andin Hoti është propozuar për president, Kurti tha se edhe vetë është në pritje të diskutimeve dhe vendimeve që do të dalin nga mbledhja.

“Tash jam duke shkuar në mbledhjen e Grupit tonë Parlamentar. Në fakt edhe unë jam kureshtar, porsi ju. Është çështje orësh derisa t’i marrim vesh të gjitha bashkë”, ka thënë Kurti.

Grupi Parlamentar i VV-së ka nisur takimin për çështjen e presidentit.

Zgjerohet konflikti, Irani lëshon raketa balistike drejt Turqisë

Aleanca VeriëAtlantike ka dënuar fuqishëm veprimin e Iranit për synimin e Turqisë me një raketë balistike, duke theksuar se qëndron fuqishëm me të gjithë aleatët e saj.

Ministria e Mbrojtjes së Turqisë njoftoi se sistemet e mbrojtjes ajrore të NATOës rrëzuan raketën iraniane, e cila kaloi hapësirën ajrore të Irakut dhe Sirisë teksa po drejtohej drejt hapësirës ajrore turke. Nuk janë raportuar viktima apo të lënduar si pasojë e këtij incidenti.

Pas incidentit, Ministria turke tha se do të bisedojë me NATOën dhe aleatët e saj për zhvillimet e fundit.

Situata reflekton përshkallëzimin e tensioneve rajonale dhe rritjen e shqetësimeve për sigurinë e vendeve anëtare të NATOës.

Një raketë balistike, e lëshuar nga Irani dhe që po drejtohej drejt hapësirës ajrore të Turqisë, është rrëzuar.

Sistemet ajrore të mbrojtjes të NATO-s në Mesdheun lindor kanë rrëzuar raketën, e cila kaloi përmes hapësirës ajrore të Irakut dhe Sirisë, njofton Ministria e Mbrojtjes e Turqisë, transmeton Zeri.info.

Nuk raportohet për viktima ose të lënduar.

“Ndërsa Turqia qëndron për stabilitet dhe paqe rajonale, ajo është plotësisht e aftë të mbrojë territorin dhe qytetarët e saj, pavarësisht burimit apo origjinës së çdo kërcënimi. Të gjitha masat e nevojshme për të mbrojtur territorin dhe hapësirën tonë ajrore do të merren vendosmërisht dhe pa hezitim. Ne ripërsërisim se e rezervojmë të drejtën për të reaguar ndaj çdo akti armiqësor të drejtuar kundër vendit tonë”.

“Ne bëjmë thirrje për të gjithë palët që të heqin dorë nga veprimet që mund të rrisin më tej përshkallëzimin e konfliktit në rajon. Turqia do të bisedojë me NATO-n dhe aleatët e saj pas këtij incidenti, sipas Ministrisë së Mbrojtjes”, thuhet në njoftimin e Ministrisë turke të Mbrojtjes.

Nait Hasani tregon nëse do ta votonte Andin Hotin për president

Deputeti i Partisë Demokratike të Kosovës, Nait Hasani, ka reaguar ndaj raportimeve se Andin Hoti mund të jetë kandidat i propozuar nga Lëvizja Vetëvendosje për postin e presidentit.

Në një prononcim për media, Hasani tha se do ta votonte Hotin nëse grupi i PDK-së do të qëndronte në sallë.

“Po e votoj Andin Hotin, nëse grupi parlamentar i PDK-së rrinë në sallë, përndryshe jo”, u shpreh Hasani.

Gara për Presidentin: Kush janë emrat e përmendur deri tani?

Skena politike në Kosovë po vlon nga emrat e mundshëm për postin e Presidentit, ndërsa afati kushtetues po skadon. Deri më tani, në publik janë lakuar disa figura, duke filluar nga anëtarë të familjes Jashari, Arsim Bajrami, Shqiptar Demaçi, Glauk Konjufca e së fundmi edhe Andin Hoti.

Sa i përket familjes Jashari, Murat Jashari ka folur zyrtarisht duke mohuar mundësinë e marrjes së kësaj pozite. Ai ka bërë thirrje që emri i familjes të mos përdoret për pikë politike, duke lënë të kuptohet se një përfshirje e tillë do të ndodhte vetëm në rrethana të jashtëzakonshme për shtetin.

Në anën tjetër, Arsim Bajrami tashmë e ka shpallur vetë kandidaturën e tij, ndërsa Shqiptar Demaçi është përmendur si propozim i mundshëm i Partisë Demokratike të Kosovës, ndonëse nga kjo parti e kanë mohuar një gjë të tillë.

Zhvillime interesante raportohen brenda taborrit të pushtetit.

Pas dështimit për të bindur ndonjë anëtar nga familja Jashari, kryeministri Albin Kurti thuhet se i ka ofruar postin Glauk Konjufcës.

Megjithatë, raportimet flasin për një refuzim nga ana e Konjufcës, gjë që ka bërë që vëmendja e Lëvizjes Vetëvendosje të zhvendoset te emri i Andin Hotit.

Gazeta Insajderi u përpoq të kontaktonte me Hotin, por ai nuk u është përgjigjur thirrjeve, duke lënë kështu pikëpyetje rreth kandidaturës së tij.

Sot pritet të jetë një ditë vendimtare, pasi janë paralajmëruar takime mes kryeministrit Kurti dhe krerëve të opozitës, Bedri Hamzës dhe Lumir Abdixhikun , në përpjekje për të gjetur një konsensus.

Gjithçka duhet të qartësohet shumë shpejt. Mandati pesëvjeçar i presidentes aktuale, Vjosa Osmani, përfundon më 4 prill, ndërsa Kuvendi i Kosovës ka afat deri më 5 mars në orën 00:00 për ta zgjedhur presidentin e ri.

Nëse Kuvendi dështon ta bëjë këtë brenda këtij afati, vendi rrezikon të përballet me shpërndarje të legjislativit dhe zgjedhje të reja parlamentare brenda 45 ditësh.

Për të propozuar një kandidat nevojiten të paktën 30 nënshkrime deputetësh.

Procesi i votimit kalon në tri runde: në dy të parët kërkohen 80 vota (2/3 e deputetëve), ndërsa në rundin e tretë mjafton një shumicë e thjeshtë prej 61 votash, me kushtin që në sallë të jenë të pranishëm të paktën 80 deputetë.