Brahimaj: Glauk Konjufca se ka asnjë votë më shumë se 57, Osmani bëri gabim që e mandatoi

Deputeti i AAK-së, Lahi Brahimaj ka deklaruar se mandatari për kryeministër të Kosovës, Glauk Konjufca nuk do t’i siguron votat për kryeministër të vendit.

Sipas tij, Konjufca mund t’i merr 57 vota, një votë më shumë se Kurti, por asessi 61 vota.

Derisa, ai ka kritikuar presidenten e vendit, Vjosa Osmanin duke thënë se ka mandatuar Konjufcën, pa u siguruar paraprakisht se i njëjti i ka 61 vota të sigurta në Kuvend.

Tutje, ai ka ripërsëritur qëndrimin e kësaj partie se nuk do ta votojnë kandidatin e LVV-së, Glauk Konjufcën për kryeministër.

“Kjo është për të bllokuar më shumë situatën, që nga dita e parë e deri më sot Kurti ka gjetur forma e modalitete si me e pengu e me vonu për me dal nga kjo situatë, edhe kjo është një lloj triki i Kurtit që unë po provoj, por opozita nuk po i jep votat, kështu që Aleanca dhe partitë e tjera opozitare nuk kanë votë për Glauk Konjufcën, ka mundësi që Glauku do t’i merr 57 vota një votë më shumë se deputeti Kurti, por assesi 61 vota. Mendoj që presidentja ka bërë një gabim që e ka mandatuar pa e dëshmuar se i ka 61 vota, nuk ka asnjë votë nga aleanca. Kështu që ai është i interesuar me menaxhuar me buxhetin e vitit 2026, pa pasur një parlament, pa i dhënë llogari askujt deri në pafundësi, zgjedhja më e mirë për Kosovën është me shkua në zgjedhje sa më parë”, deklaroi Brahimaj në Tëvë1.

Plagosja e zyrtarit të BE-së në Gjakovë: Çka dihet deri më tani?

Gazeta Sinjali raportoi dje ekskluzivisht për një ngjarje të rëndë ku një zyrtar i Zyrës së Bashkimit Evropian në Kosovë është dërguar me urgjencë në QKUK pas plagëve të rënda të marra me mjet të mprehtë.

Sinjali raportoi se ngjarja është evidentuar më 04.11.2025, kur fillimisht në Urgjencën e QKMF-së në Gjakovë është paraqitur një person i plagosur, i cili më pas është transferuar në Spitalin Rajonal “Isa Grezda” për trajtim të mëtejmë. Për shkak të gjendjes së tij shëndetësore, ai më pas është transportuar në QKUK.

Nga burimet e veta, Sinjali mësoi se personi  i plagosur është identifikuar si Stefan Ilianov Sheynov, rreth 49-vjeçar, zyrtar i Zyrës së BE-së, i cili gëzon imunitet diplomatik.

Çka thanë nga QKUK-ja për gjendjen e zyrtarit evropian?

Drejtori i emergjencës, Naser Syla bëri të ditur se gjendja e tij është stabile, sipas së cilit zyrtari “është transferuar në Klinikën e Kirurgjisë Vaskulare për trajtim të mëtutjeshëm”.

Ndërkohë, edhe drejtori i kësaj klinike, Nazmi Kolegci njoftoi se pavarësisht plagëve të marra, gjendja e tij është stabile.

“Lëndimet janë politraumë ka lëndime në kokë, qafë dhe gjoks. Lëndime më të shpeshta që janë lëndimet në kokë, ka edhe një lëndim plagë prerëse-shpuese afër veshit të majtë, gjithashtu i ka edhe dy plagë tjera të vogla në pjesën e përparme të gjoksit dhe ka një frakturë të brinjës së tretë djathtas dhe ka një pneumotoraks, domethënë ka ajër në mushkëri që është sasia e vogël, që është duke u observuar”, ka thënë Kolgeci.

“Pra deri tani nuk kemi pasë nevojë me bë një ndërhyrje kirurgjikale, po pavarësisht gjendja është stabile këtë e observojmë dhe e presim në rast se sasia e ajit që është e futur në mushkëri rritet dhe atëherë është e nevojshme trajnimi kirurgjik. Mirëpo deri tani gjendja është stabile”, tha drejtori i Klinikës së Kirurgjisë Torakale.

Kolgeci shtoi tutje se të njëjtit i janë kryer të gjitha analizat laboratorike dhe imazherike dhe normalisht që kemi konsultuar edhe kirurgun vaskular, ortopedin dhe ORL, janë fushat domethënë ku pacienti ka pësuar lëndime dhe ka pranuar ndihmë.

Reagimi i Zyrës së BE-së në Kosovë

Lidhur me këtë ngjarje ka reaguar edhe Zyra e Bashkimit Evropian në Kosovë ku ka thënë se janë të tronditur nga lajmi se zyrtari i tyre në Gjakovë është therur me thikë.

Zëdhënësi i kësaj zyre, Nikola Gaon, ka thënë se janë duke u zhvilluar hetime nga autoritetet.

“Jemi të shokuar nga ky lajm dhe i dëshirojmë shërim të shpejtë dhe të plotë. Hetimi është duke u zhvilluar dhe autoritetet po përcaktojnë faktet. Meqenëse është hetim aktiv, nuk jemi në gjendje të japim detaje të mëtejshme në këtë kohë”, ka thënë ai.

Po ashtu, Prokuroria Speciale ka nisur hetime lidhur me rastin.

Zëdhënësja e Prokurorisë Speciale, Arbnora Luta, ka deklaruar se po ndërmerren të gjitha masat e nevojshme hetimore me qëllim të zbardhjes së plotë të gjendjes faktike.

“Në koordinim me njësitë relevante të Policisë së Kosovës, Prokuroria Speciale është duke ndërmarrë të gjitha masat e nevojshme hetimore me qëllim të zbardhjes së plotë të gjendjes faktike”, ka deklaruar Luta.

Në rast janë përfshirë njësitë hetimore të Drejtorisë Rajonale të Policisë në Gjakovë, ndërsa me urdhër të Prokurorit të Krimeve të Rënda, rasti është iniciuar si “Vrasje në tentativë”.

Hetimet po vazhdojnë.

Hasani: Kurti e ka uzurpuar pushtetin, paradite deputet e pasdite kryeministër

Ish-kryetari i Gjykatës Kushtetuese, Enver Hasani, ka deklaruar se nuk ka Gjykatë Kushtetuese në botë që të lejon që paradite të marrësh vendime në Qeveri, e pasdite të shkosh në kuvend si deputet.

Hasani në emisionin “Konfront” në KTV, deklaroi se historia politike e kushtetuese, do ta mbajë në mend kryeministrin në detyrë Albin Kurti, si uzurpator të pushtetit.

“Jam i sigurt që historia politike dhe kushtetuese do ta rekordojë, një njeri ka uzurupuar pushtetin dhe është deputet. Paradite shkon voton ligj aty. Qeveri në detyrë është ajo që ka shkëputur çdo legjitimitet politik me parlamentin, shumë e thjeshtë është mund të pyesësh edhe në ‘chatgpt’.”

“Ky po sillet si me qenë qeveri në dorëheqje, edhe ashtu ska të drejtë. Nga Qeveria voton ligje, pasdite shkon parlament dhe voton. Ky është uzurpim. Cila Kushtetutë e lejon këtë? Nuk ka Gjykatë Kushtetuese në botë që e lejon një gjë të tillë”, deklaroi Hasani.Hasani tutje tha se me ligj “ekziston qeveri që i ka përfunduar mandati por ata nuk mbajnë edhe postin e deputetit”.

Hasani tutje tha se me ligj “ekziston qeveri që i ka përfunduar mandati por ata nuk mbajnë edhe postin e deputetit”.

Kjo është 25 vjeçarja nga Kosova qe u gjet e vdekur në Tetovë

Është gjetur pa shenja jete trupi i një 25-vjeçare nga Kosova, që supozohet të jetë studente në Tetovë.

Burime nga Policia bëjnë me dije për Alsat, se 25-vjeçarja që u gjet e vdekur është S.D nga Gjakova.

Portali Arbesh.info ka publikuar edhe foton e vajzës 25 vjeçare e cila humbi jetën mbrëmjen e sotme.

Rutte nga Rumania: Askush mos të guxojë të sulmojë vendet e NATO-s

Sekretari i Përgjithshëm i NATO-s, Mark Rutte, të mërkurën u përpoq të qetësonte zërat, lidhur me tërheqjen e pjesshme të trupave amerikane nga Rumania, duke siguruar se Uashingtoni mbetet i përkushtuar për mbrojtjen e krahut lindor të aleancës.

Ai tha se rregullimet në pozicionimin e forcave amerikane nuk janë të pazakonta dhe se, edhe pas këtij ndryshimi, pozicionimi i forcave amerikane në Evropë mbetet më i madh sesa ka qenë për shumë vite. “Mendoj se po bëjmë shumë bujë për këtë tërheqje”, shtoi Rutte.

SHBA-ja njoftoi javën e kaluar tërheqjen e një brigade nga Rumania dhe nuk do ta zëvendësojë, duke theksuar se kjo është një shenjë pozitive e rritjes së kapaciteteve dhe përgjegjësisë evropiane.

Megjithatë, SHBA-të vazhdojnë të mbajnë një prani të fortë në Evropë dhe aftësinë për të përmbushur angazhimet ndaj NATO-s.

Rutte gjithashtu përmendi operacionin “Eastern Sentry” dhe stërvitjen ushtarake “Dacian Fall” në Rumani dhe Bullgari, ku do të marrin pjesë rreth 5,000 trupa nga 10 vende të NATO-s, si prova që aleanca është e gatshme të mbrojë çdo centimetër të territorit të saj dhe të dërgojë shpejt forcat e nevojshme në Rumani.

Presidenti rumun Nicușor Dan tha se nuk ka shqetësime lidhur me tërheqjen e trupave amerikane dhe se operacioni dhe stërvitja tregojnë koordinimin për lëvizje të mëdha të trupave ushtarake.

Tragjedi në Tetovë: Gjendet e vdekur një 25-vjeçare nga Kosova

Është gjetur pa shenja jete trupi i një 25-vjeçareje nga Kosova, që supozohet të jetë studente në Tetovë.

Ngjarja ka ndodhur rreth orës 19:00, derisa dyshimet e para janë për vrasje, por nuk përjashtohen variantet e tjera.

Trupi i pajetë është gjetur nga kalimtarë të rastit pas tregut të gjelbër në Tetovë, raporton AlsatMk.

Policia dhe Prokurori Publik janë në vendngjarje duke kryer hetimet.

Armend Zemaj i bindur se do të dalin të parët në zgjedhjet e reja

Deputeti i Lidhjes Demokratike të Kosovës, Armend Zemaj, ka deklaruar se partia të cilës ai i takon mund të dalë subjekti i parë politik nëse mbahen zgjedhjet e jashtëzakonshme parlamentare.

I ftuar në emisionin “DPT te Fidani” në Klan Kosova, Zemaj tha se partia e tij tashmë ka performancë të mirë dhe po punon për të fituar zgjedhjet, raporton Klankosova.tv.

“Unë s’mund të paragjykoj, por ne punojmë për zgjedhjet e jashtëzakonshme që t’i fitojmë. Jemi duke punuar dhe kemi performancë të mirë”, u shpreh ai.

I pyetur nga moderatori Fidan Jupolli nëse LDK ka gjasa reale të dalë e para, Zemaj u përgjigj: “Sigurisht”.

“Kemi rezultat të mirë në zgjedhjet lokale dhe partia në çdo komunë ka më shumë vota sesa në zgjedhjet e kaluara. Do të angazhohemi që t’i fitojmë zgjedhjet”, deklaroi deputeti i LDK-së.

Arrin në 30 numri i të plagosurve nga zjarri në azilin e pleqve në Tuzlla

Njëmbëdhjetë njerëz e kanë humbur jetë dhe më shumë se 30 të tjerë janë lënduar si pasojë e një zjarri që shpërtheu në katin e shtatë të një shtëpie pleqsh në Tuzlla mbrëmjen e së martës, njoftuan të mërkurën autoritetet në kantonin e Tuzllës në Bosnje.

Sipas të dhënave të fundit të pakonfirmuara, 30 persona janë shtruar në spital në Qendrën Klinike Universitare në Tuzlla, ndërsa numri i të lënduarve që deri më tani kanë kërkuar ndihmë mjekësore është më i lartë.

Viktimat janë banorë të shtëpisë dhe trupat e tyre do të dërgohen për identifikim dhe autopsi, sipas autoriteteve. Nuk është e qartë se çfarë e shkaktoi zjarrin, por autoritetet e kanë nisur një hetim në vendin e ngjarjes. Ndërkaq, Drejtori i shtëpisë së pleqve, Mirsad Bakalloviq, dha dorëheqje një ditë pas zjarrit.

Në një njoftim zyrtar disa orë pas zjarrit, shtëpia e pleqve konfirmoi numrin e të vdekurve dhe të lënduarve, dhe shtoi se të lënduarit po trajtohen në Qendrën Klinike Universitare të Tuzllës.

Sipas saj, mes të lënduarve ka edhe oficerë policie, zjarrfikës, punonjës mjekësorë dhe punonjës të shtëpisë së pleqve në Tuzlla.

Mblidhet PDK-ja – Ky është qëndrimi i tyre për Konjufcën

Partia Demokratike e Kosovës gjatë ditës së sotme ka mbajtur mbledhjen e kryesisë.

Nga aty është vendosur që zgjedhjet e parakohshme janë zgjidhja e vetme për tejkalimin e krizës institucionale.

Partia Demokratike e Kosovës vlerëson se dhënia përsëri e mandatarit LVV-së përbën humbje kohe.

Postimi i plotë:

Partia Demokratike e Kosovës ka mbajtur sot mbledhjen e rregullt të Kryesisë, ku u diskutua për zhvillimet aktuale politike në vend, rezultatin e arritur në raundin e parë të zgjedhjeve lokale dhe vazhdimin e angazhimit për fitore në balotazh.

Partia Demokratike e Kosovës vlerëson se dhënia përsëri e mandatarit LVV-së përbën humbje kohe, zvarritje të panevojshme dhe thellim të krizës institucionale, sepse tashmë është e qartë që askush nuk e ka shumicën për ta formuar qeverinë nga kjo legjislaturë.

Në këtë mbledhje u ripërsërit njëzëri qëndrimi se PDK nuk do të japë votë për asnjë mandatar nga LVV, dhe se mbajtja e zgjedhjeve të parakohshme është zgjidhja e vetme për tejkalimin e këtij ngërçi, duke u kthyer qytetarëve të Kosovës të drejtën për të vendosur drejtimin e ardhshëm të vendit dhe për t’i dhënë legjitimitet institucioneve të reja.

Kriza e stërzgjatur gjatë këtij viti, e shkaktuar nga Lëvizja Vetëvendosje, përveç dëmit politik, ka goditur çdo sektor, ndërsa rreziku që buxheti i shtetit të mos kalojë me kohë dhe që vitin e ardhshëm qytetarët të mbeten pa paga, e bën edhe më të domosdoshëm përshpejtimin e procesit drejt zgjedhjeve të reja.

Tutje, kryetari Krasniqi u shpreh mirënjohës për angazhimin e secilit anëtar dhe përkrahës të Partisë Demokratike të Kosovës, që i mundësoi partisë rikthimin në vendin e parë pas 12 viteve sa i përket votës popullore në zgjedhjet lokale me 187.526 vota, me ç’rast PDK ka siguruar 206 ulëse gjithsej në Kuvendet Komunale, duke lënë prapa partitë e tjera.

Po ashtu, në këto zgjedhje lokale PDK ka arritur të rris numrin e votave në total për kandidatët për kryetarë komunash, duke u radhitur e dyta, si dhe ka fituar në tri komuna Ferizaj, Skënderaj dhe Han të Elezit në raundin e parë.

Kryetari Krasniqi kërkoi nga kryesia që të vazhdoj angazhimin dhe mobilizimin për fitore në Mitrovicë, Prizren, Vushtrri, Kacanik, Klinë dhe Dragash, ku PDK është në garë, edhe në ditët e mbetura deri në balotazhin e 9 nëntorit.

Berat Buzhala: Astrit Dehari ka bërë vetëvrasje – “Nëse pushteti do të vriste dikë, do ta vriste Albin Kurtin, jo një aktivist anonim”

Në përvjetorin e vdekjes së aktivistit të Lëvizjes Vetëvendosje, Astrit Dehari, gazetari dhe ish-deputeti, Berat Buzhala ka bërë një reagim të gjatë në rrjetet sociale, ku ka thënë se rasti Dehari është keqpërdorur politikisht nga pushteti aktual.

Buzhala thotë se është e vërtetuar si nga ekspertët vendorë ashtu edhe nga ata ndërkombëtarë se Astrit Dehari ka bërë vetëvrasje në burg, dhe se pretendimet e Lëvizjes Vetëvendosje për vrasje janë “komike dhe tragjike”.

“Astrit Dehari ka bërë vetëvrasje në burg dhe kjo është konstatuar edhe nga ekspertët vendorë edhe nga ata ndërkombëtarë. Arsyet mund të jenë të ndryshme, mirëpo ka dyshime të bazuara se Astriti ka pasur presion nga partia që të mos bashkëpunojë me organet e hetuesisë lidhur me sulmin me zollë ndaj Kuvendit të Kosovës,” ka shkruar ai.

Sipas Buzhalës, një mundësi tjetër është që Dehari të ketë qenë në depresion dhe ta ketë marrë vetë jetën, “ashtu siç kishte bërë edhe vëllai i tij, Arbnori”.

Ai kritikon ashpër narrativën e Vetëvendosjes, duke thënë se po përdoret për qëllime politike:

“Tregimi i LVV-së dhe Kurtit se Astrit Deharin e kanë vrarë në burg është komik dhe tragjik. Po të donte pushteti të vriste dikë, do ta vriste Albin Kurtin, e jo një aktivist anonim. Astrit Dehari nuk ka qenë askush që të ketë arsye dikush ta vrasë në burg.”

Buzhala thotë se për herë të parë kishte dëgjuar për Astrit Deharin vetëm pasi ishte bërë publik lajmi për vdekjen e tij, dhe sipas tij, që nga ajo kohë pushteti aktual ka vazhduar “abuzimin politik” me figurën e Astritit dhe familjen e tij.

Në fund të reagimit, ai i referohet një thënie italiane “Cui bono?” (Kush përfiton?), duke shtuar se përfituesit më të mëdhenj të ngjarjes kanë qenë vetë drejtuesit e sotëm të Vetëvendosjes.

“Pra, kush ka përfituar më së shumti nga vetëvrasja e Astritit? Ka përfituar Albin Kurti dhe ata që sot janë ministra,” shkroi Buzhala.

Ai shton se nuk do të ishte marrë me këtë temë nëse, siç thotë ai, “pushteti nuk do të gënjente çdo vit”, duke paralajmëruar se do të vazhdojë të flasë “për të vërtetën” çdo përvjetor të rastit Dehari.