Vetura hedhet në erë me eksploziv, humb jetën një person

Vdes afaristi i njohur

Aleanca Kosovare e Bizneseve ka njoftuar se ka vdekur pronari i kompanisë “Tricom”, Muharrem Ahmeti.

Në një postim në Facebook AKB shprehu ngushllime për familjen dhe miqtë e tij.

“Humbje e madhe për botën e biznesit të Kosovës. Me pikëllim të thellë mora lajmin për ndarjen nga jeta të mikut tim dhe afaristit të njohur Muharrem Ahmeti, pronar i kompanisë “Tricom”. Ai ishte njeri i ndershëm, punëtor i palodhur dhe biznesmen me vizion, që la gjurmë të forta në ekonominë e vendit.
Kjo është një humbje e madhe për komunitetin e bizneseve të Kosovës dhe për të gjithë ata që e njohën. Ngushëllimet më të sinqerta për familjen dhe miqtë e tij.
U prehtë në paqe, miku ynë Muharrem Ahmeti”, thuhet në njoftim.

14 vjeçarja që u hodh nga kati i tretë është gjallë, thotë se do të hidhet përsëri nëse ndodh kjo gjë

Doktoresha e shëndetit mendor, Nikolina Bode, ka zbuluar se vajza 14-vjeçare e cila u hodh pasditen e së shtunës nga kati i tretë, në qytetin e Korçës, thotë se do e bëjë përsëri këtë veprim.

“Nuk ka frikë nga humbja e jetës dhe e përdor si kërcënim që në rast se përsëritet ngjarja, do e bëjë përsëri. Është hera e parë, kemi patur raste suicide te fëmijët ku rasti mbetet i njëjti, edukimi në familje dhe përballja me elementin social. Arsyet familjare janë madhore. Ajo që është problem në këtë situatë është se tentativa e vetëvrasjes, por edhe qëllimi i kësaj tentative dhe vendosmëria pa ndjerë frikë dhe pendesë. E para është vetë nëna, që është në kontakt të afërt me fëmijët e saj, janë dhe tre të tjerë që kanë qenë vëzhgues të kësaj situate dhe ky model është i frikshëm që shikohet nga fëmijët e tjerë. Merren si modele në rrethin e ngushtë familjar, e shikojnë dhe reagojnë pa aspak kritikë duke i dhënë të drejtë motrës së tyre për këtë veprim. Nuk duan të humbin motrën, por i japin të drejtë në lidhje me situatën”, shprehet doktoresha, shkruan A2CNN.

“Vajza thotë se unë e dua lagjen dhe lagjja më do mua, por për konflikte të vogla hyjnë në lojë të mëdhenjtë dhe njoftimi i policisë nga mami bën që të realizoj këtë veprim. Është veprim banal i pazgjidhur si duhet nga të rriturit”, shton doktoreshë Nikolina Bode.

Kurti nga Mitrovica: Më 12 tetor, Faton Peci bëhet kryetar pa balotazh

Kryeministri në detyrë i Kosovës, Albin Kurti ka marrë pjesë në një tubim në shkollën “Migjeni” në Mitrovicë në përkrahje të kandidatit për kryetar të Mitrovicës, Faton Peci.

Kreu i Qeverisë tha se numri 105, 12 tetori është dita kur Faton Peci do të jetë kryetar i Mitrovicës.

Sipas kryeministrit, më 12 tetor, fitorja në këtë komunë do të jetë pa balotazh.

“Lagjia Ilirida është me Faton Pecin, e Mitrovica mbarë mbështet kandidatin tonë për kryetar. Në tubimin e mbajtur në shkollën “Migjeni”, atje ku Fatoni edhe e ka kryer gjimnazin, përkrahja ishte e madhe për programin dhe vizionin me të cilat garojmë në këto zgjedhje. 105 është numri, 12 tetori është dita, Faton Peci do të jetë kryetari i Mitrovicës. Infrastrukturë, arsim, shëndetësi, bujqësi, çdo fushë merr vëmendjen e duhur dhe përkujdesjen e merituar me fitoren tonë pa balotazh në këtë komunë”, ka shkruar kryeministri.

“Opozita po bëhet gati për formimin e qeverisë me Listën Serbe”

Ministri në detyrë i Financave, Hekuran Murati tha sot se partitë opozitare në parlament po përgatiten që, pas zgjedhjeve lokale, të formojnë një koalicion qeverisës me Listën Serbe.

Murati pretendoi se ka informacione për këtë.

Në një postim në rrjetin social Fcaebook, ministri në detyrë tha se eksponentë të opozitës kanë filluar “ta thonë [këtë] edhe hapur nëpër tubime lokale e nëpër studio televizive”.

“Në këto zgjedhje lokale do të vendoset për shumë më tepër sesa vetëm për komunat. Opozita po bëhet gati për me e ndryshu në tavolinë rezultatin e zgjedhjeve të 9 shkurtit dhe me formu qeveri në koalicion me Listën Serbe”, tha Murati.

“Këtë tashmë kanë filluar ta thonë edhe hapur nëpër tubime lokale e nëpër studio televizive, nëse ua kushtoni vëmendjen e i dëgjoni me kujdes. Po premtojnë se pas zgjedhjeve lokale do të bëhen të gjithë bashkë e ta përmbysin qeverinë”.

Sipas Muratit, opozita me qëllim po e zvarrit hapin e formimit të qeverisë me Listën Serbe.

“Por meqenëse e dijnë se një koalicion me Listën Serbe para zgjedhjeve komunale do të ishte fatal për ta, opozita synimin e ka që me e zvarritë sa të mundet hapin e formimit të qeverisë, ashtu që koalicioni i tyre me Listën Serbe me u zyrtarizu tek pasi të kryhen zgjedhjet komunale”, tha ai.

Murati tutje shtoi se për zvarritje, “një argat po ua bën edhe Gjykata Kushtetuese, e cila po e mban Kuvendin të bllokuar tash e 1 muaj.”

“Në këto zgjedhje lokale do të përcaktohet edhe se çfarë Qeverie do të ketë Kosova – një Qeveri Kurti 3 që e forcon shtetin, apo një qeveri që e pret Listën Serbe në Kuvend për 6 orë derisa të kthehen nga Beogradi me instruksione se si ta sabotojnë shtetin e Kosovës”, u shpreh ai.

Nasim Haradinaj mbështet këtë kandidat për kryetar komune: Luanët mbesin luanë

Ish-nënkryetari i OVL-UÇK-së, Nasim Haradinaj, ka dalë publikisht në përkrahje të kandidaturës së Ramiz Lladrovcit në garën për zgjedhjet lokale në Drenas.

Haradinaj ka shkruar se “luanët mbesin luanë”, përkundër atyre me çfarë ballafaqohen.

“Luanët mbesin luanë sado që ballafaqohen më beteja qoftë edhe hiliqare. Ai gjithmonë ngadhënjen….! +4 kampion”, ka shkruar Haradinaj.

Nga sot kalimi në Tunelin e Llogorasë me pagesë, kjo është shumë që duhet të paguani

Kanë hyrë në fuqi tarifat për kalimin nga Tuneli i Llogorasë, një ndër investimet më të mëdha infrastrukturore në jug të Shqipërisë.

Sipas vendimit të botuar në Fletoren Zyrtare, pagesat do të aplikohen menjëherë për të gjitha kategoritë e automjeteve, me çmime që nisin nga 100 lekë (€0.96) për motoçikletat dhe shkojnë deri në 5000 lekë (€48) për mjetet e peshë të rëndë, njofton shqiptarja.com (shifrat në euro janë bazuar në kursin aktual të këmbimit valutor)

Tarifat sipas kategorive të mjeteve

100 lekë (€0.96) – Mjete motorike me karakteristika motoçiklete, motoçikletë me tre rrota dhe katërçikletë.

250 lekë (€2.40) – Mjete motorike me dy boshte dhe lartësi ≤ 1.30 m (të matura në boshtin e parë), si makinat e pasagjerëve dhe automjetet e lehta të shpërndarjes.

500 lekë (€4.80) – Mjete motorike me më shumë se dy boshte dhe lartësi ≤ 1.30 m, si makina pasagjerësh me rimorkio ose karavan, apo automjete të lehta me rimorkio.

1000 lekë (€9.60) – Mjete motorike me dy ose tre boshte dhe lartësi > 1.30 m, përfshirë autobusë, kamionë dhe mjete të ngjashme me rimorkio.

5000 lekë (€48) – Kategoria IV: mjete motorike me katër ose më shumë boshte dhe lartësi > 1.30 m, përfshirë autobusë dhe kamionë me shumë rimorkio.

Për autoveturat, tarifa është 250 lekë (€2.40) për një drejtim dhe 500 lekë (€4.80) vajtje–ardhje (shifrat në euro janë bazuar në kursin aktual të këmbimit valutor).

Kush përjashtohet nga pagesa?

Sipas udhëzimit, kalimi do të jetë falas për:

Mjetet e policisë

Zjarrfikëset

Ambulancat

Mjetet ushtarake

Mjetet që përdoren nga invalidët

Gjithashtu, në tunel nuk lejohet qarkullimi i mjeteve që transportojnë mallra të rrezikshme.

Nga sezoni veror në përdorim të përhershëm

Tuneli i Llogorasë u hap për herë të parë në korrik të vitit 2024 vetëm për sezonin turistik veror dhe u mbyll në nëntor të po atij viti. Pas përfundimit të plotë të punimeve, ai u hap përfundimisht në maj të këtij viti. Deri më tani, kalimi ka qenë pa pagesë për të lehtësuar lëvizjen gjatë sezonit veror.

Ky projekt ka kushtuar 20.4 miliardë lekë (195 milionë euro) dhe konsiderohet një ndër investimet më strategjike për zhvillimin e jugut të vendit.

Forcat izraelite kanë pezulluar sulmet në Gaza pas urdhrit të Trump

Presidenti Donald Trump ka reaguar pas përgjigjes së Hamasit ndaj planit të kreut të shtëpisë së Bardhë,  duke pranuar lirimin e pengjeve dhe negociatat mbi pika të tjera.

Trump vlerësoi përgjigjen dhe i bëri thirrje Izraelit që të ndalojë menjëherë bombardimet e Gazës. Në një mesazh video, kreu i Shtëpisë së Bardhë e përshkroi momentin si një ditë të veçantë dhe të pashembullt dhe afër paqes në Lindjen e Mesme.

“Kjo është një ditë shumë e veçantë, ndoshta e pashembullt në shumë mënyra. Dua të falënderoj vendet që ndihmuan: Katarin, Turqinë, Arabinë Saudite, Egjiptin, Jordaninë dhe shumë të tjera. Kaq shumë njerëz kanë luftuar kaq shumë. Është një ditë e mrekullueshme. Do të shohim se si do të përfundojë. Duhet ta themi fjalën e fundit për këtë dhe ta bëjmë të ndodhë. Mezi pres që pengjet të kthehen në shtëpi te prindërit e tyre”, tha Trump.

Pas kësaj, brenda natës, zyra e Kryeministrit Benjamin Netanyahu dha dritën jeshile për të zbatuar fazën e parë të planit 20-pikësh të presidentit amerikan. Sipas agjencisë izraelite të lajmeve N12, Tel Avivi iu bind deklaratës së Trump dhe që nga mëngjesi i sotëm, sulmet e IDF në të gjithë Rripin e Gazës janë pezulluar.

Por ky raport, është mohuar nga mbrojtja civile e Gazës, e cila pretendon se Izraeli kreu dhjetëra sulme ajrore dhe bombardime artilerie në Rrip gjatë natës, pavarësisht apelit të Trump. (A2 Televizion)

Aeroporti i Mynihut mbyllet për herë të dytë brenda 24 orëve, shkak të dronët

Aeroporti i Mynihut është mbyllur sërish – për herë të dytë brenda 24 orëve të fundit, duke shkaktuar sërish ndërprerje të mëdha në udhëtimet ajrore. Shkak për këtë mbyllje janë bërë dronë me origjinë të panjohur, të cilët janë vërejtur pranë zonës së aeroportit.

Incidenti ka rritur ndjeshëm shqetësimet lidhur me sigurinë ajrore, pasi prania e dronëve mund të përbëjë rrezik serioz për aeroplanët që fluturojnë ose ulen në pistë.

“Nëse nuk na lejohet të rifillojmë fluturimet sot, numri i pasagjerëve të bllokuar do të jetë edhe më i madh sesa dje, kur kishim rreth 3,000 persona të ngelur në aeroport,” është shprehur përfaqësuesi zyrtar i aeroportit për agjencinë e lajmeve Reuters.

Kujtojmë se edhe të enjten në mbrëmje, Aeroporti i Mynihut u detyrua të pezullonte përkohësisht të gjitha operacionet, pasi autoritetet ngritën dyshime për praninë e dronëve në afërsi të pistave të fluturimit. Mbyllja zgjati për disa orë dhe shkaktoi vonesa dhe anulime të shumta.

Ky nuk është rasti i vetëm që përfshin fluturimet dhe dronët në hapësira të ndaluara. Vetëm gjatë javës së kaluar, aeroportet ndërkombëtare në Kopenhagë dhe Oslo u mbyllën përkohësisht për arsye të ngjashme — dronë të paidentifikuar që u shfaqën në zonat e ndjeshme ajrore.

Ndërkohë, këtë javë, të martën, një tjetër incident u regjistrua në Norvegji, ku një dron u vu re pranë aeroportit të qytetit Brønnøysund, duke detyruar autoritetet të marrin masa të menjëhershme për të siguruar zonën dhe për të parandaluar ndonjë aksident të mundshëm.

Situata e përsëritur në disa vende të Evropës ka shtuar presionin mbi autoritetet e aviacionit civil për të forcuar masat e sigurisë dhe për të hetuar burimin e këtyre dronëve misteriozë që po ndërpresin aktivitetin normal të aeroporteve.

Izraeli reagon pasi Hamasi pranoi planin e paqes të Trumpit

Zyra e kryeministrit izraelit, Benjamin Netanjahu ka reaguar pasi Hamasi ka pranuar propozimin e presidentit amerikan, Donald Trump për përfundimin e luftës në Gaza.

Në një deklaratë për shtyp zyra njoftoi se Izraeli është i gatshëm të bashkëpunojë me liderin amerikan në të gjitha fazat e armëpushimit.

“Izraeli është i gatshëm për zbatimin e menjëhershëm të fazës së parë të planit të Trumpit për lirimin e menjëhershëm të të gjithë pengjeve”, thuhet në deklaratë. Ata shtuan se parimet e Izraelit përputhen me vizionin e Trumpit.

“Do të vazhdojmë të punojmë në bashkëpunim të plotë me presidentin dhe ekipin e tij për të përfunduar luftën në përputhje me parimet e vendosura nga Izraeli, të cilat përputhen me vizionin e Trumpit për përfundimin e luftës”, thuhet më tej.

Në deklaratë nuk përmendet thirrja e Trumpit drejtuar Izraelit për të ndalur menjëherë sulmet në Gaza – një kërkesë që presidenti amerikan e ka cilësuar si të domosdoshme për të siguruar lirimin e sigurt dhe të shpejtë të pengjeve.

Trump kishte reaguar përmes rrjeteve sociale duke thënë se kjo është një ditë e madhe për Lindjen e Mesme.

“Bazuar në deklaratën e publikuar nga Hamasi, besoj se ata janë të gatshëm për paqe të përhershme. Izraeli duhet menjëherë të ndalojë bombardimet në Gazë, në mënyrë që të mund të shpëtojmë pengjet në mënyrë të sigurt dhe të shpejtë! Aktualisht është shumë e rrezikshme për ta bërë këtë. Ne tashmë jemi në bisedime për detajet që duhen përpunuar. Kjo nuk ka të bëjë vetëm me Gazën, por me paqen e shumëkërkuar në Lindjen e Mesme”, deklaroi lideri amerikan.

Lëvizja Hamas publikoi të premten në mbrëmje përgjigjen zyrtare për përfundimin e luftës në Gazë, disa orë pasi ai dha një ultimatum që deri të dielën në orën 18:00, sipas kohës së Uashingtonit, të pranohet plani i paqes, përndryshe do të pasojë “ferri që bota nuk ka parë ndonjëherë”.

Në deklaratë, Hamasi bën të ditur se, pas konsultimeve të gjera me udhëheqësinë e tij, fraksionet palestineze, ndërmjetësuesit dhe “shtetet mike”, ka vendosur t’i përgjigjet pozitivisht pikave kyçe të propozimit.

Militantët theksuan se vlerësojnë përpjekjet e bashkësisë ndërkombëtare, përfshirë edhe iniciativën e presidentit Trump, me synimin për përfundimin e luftës, shkëmbimin e të burgosurve, hyrjen urgjente të ndihmës humanitare, ndalimin e okupimit dhe ndalimin e zhvendosjes së popullit palestinez.