Vendimi i Kushtetueses, VV-ja nuk tërhiqet: Nuk do të votojmë asnjë deputet të Listës Serbe për nënkryetar

Lëvizja Vetëvendosje nuk do të votojë asnjë deputet të Listës Serbe për nënkryetar të Kuvendit të Kosovës, thotë ish-deputeti, Adnan Rrustemi. Një ditë pas njoftimit të Gjykatës Kushtetuese se Kuvendi i Kosovës nuk është i konstituuar pa u zgjedhur edhe nënkryetari nga komuniteti serb, anëtari i LVV-së kritikon Kushtetuesen se i ka dhënë një levë shtesë Listës Serbe për të bllokuar konstituimin e Kuvendit dhe për ta përdorur këtë si një mekanizëm me fuqi vetoje edhe në të ardhmen.

Gjykata Kushtetuese në vendimin e 30 shtatorit ka thënë se seanca konstituive e Kuvendit të Kosovës, që ka nisur më 15 prill, nuk ka përfunduar pasi nuk është zgjedhur nënkryetari nga radhët e komunitetit serb, megjithëse kryeparlamentari i sapo zgjedhur, Dimal Basha, e kishte shpallur të konstituuar legjislaturën e nëntë në fund të muajit gusht.

Vendimi i Kushtetueses vjen pas ankesës së Listës Serbe, partisë më të madhe të serbëve në Kosovë, lidhur me votimin ndaras të kandidatëve për nënkryetarë të Kuvendit nga radhët e komuniteteve jo shumicë.

Rrustemi thotë për KosovaPress se ani pse presin publikimin e plotë të aktgjykimit të Kushtetueses, ky vendim nuk i kontribuon zhbllokimit dhe krijimit të institucioneve, por vazhdimin e bllokadës dhe paqartësisë.

Në njërën nga dy urdhëresat e Kushtetueses, kërkohet që gjatë procedurës së zgjedhjes së nënkryetarit të Kuvendit nga radhët e komunitetit serb, deputetët e Kuvendit të ushtrojnë funksionin e tyre kushtetues në interesin më të mirë të Kosovës dhe në pajtim me Kushtetutën dhe rregulloren e Kuvendit.

Mirëpo, Rrustemi thotë se Grupi Parlamentar i Lëvizjes Vetëvendosje nuk do të votojë asnjë deputet të Listës Serbe për nënkryetar të Kuvendit. Madje ai i bën thirrje edhe partive ish-opozitare në Kuvend për një gjë të tillë, siç thekson, duke marrë parasysh veprimtarinë e Listës Serbe dhe pozicionimin e saj ndaj strukturave kriminale dhe terroriste.

Ndërkaq, sa i përket urdhëresës tjetër, ku Kushtetuesja urdhëron deputetët e Kuvendit që të konstituojnë legjislaturën e nëntë brenda afatit 12-ditor prej publikimit të aktgjykimit të plotë, Rrustemi deklaron se ka shumë paqartësi juridike se çka mund të ndodhë nëse s’ka respektim të këtij afati.

Sipas tij, Kushtetuesja ka pasur mundësi dhe argumente të pafundme për të konstatuar se Lista Serbe ka refuzuar të propozojë kandidat tjetër për nënkryetar pasi deputeti Slavko Simiq nuk i ka marrë votat e nevojshme, si dhe kryetari i Kuvendit, Dimal Basha, ka shterur të gjitha mundësitë për të zgjedhur nënkryetarin nga komuniteti serb.

Kosova nuk ka themeluar institucionet e reja edhe tetë muaj pas përfundimit të zgjedhjeve parlamentare të 9 shkurtit. Në anën tjetër, pas vendimit të djeshëm të Kushtetueses, deputeti i Lidhjes Demokratike të Kosovës, Arben Gashi, ka shkruar në rrjetin social Facebook, se nëse Kuvendi nuk konstituohet brenda afatit kushtetues, ai duhet të shpërndahet dhe të mbahen zgjedhjet e reja.

“Thaçi, pranverën e vitit të ardhshëm do jetë në Kosovë”

Sekretarja e PDK-së, Vlora Çitaku, është shprehur e bindur në kthimin e shpejt të ish-presidentit Hashim Thaçi.

Në një aktivitet elektoral të Partisë Demokratike në Drenas, ajo u shpreh se Hashim Thaçi do të jetë në Kosovë, pranverën e vitit 2026.

”Para juve du me fol si shqiptar”.
”Unë jam ma e bindur se kurrë, se Hashim Thaçi në pranverën e vitit të ardhshëm do të jetë në Kosovë, e do të ishte kënaqësia më e madhe për mu e për secilin anëtar të PDK-së, që me ia mundësu Hashim Thaçit që me vizitu kryetarin e Drenasit, kryetarin nga PDK, Petrit Hajdarin”, shprehej ajo para simpatizantëve të subjektit ndërsa prezantonte kandidatin e tyre për Drenasin.

Dha dorëheqje nga LVV, Mentor Majaci i bashkohet LDK-së në Podujevë

Mentor Majaci dikur aktivist i Lëvizjes Vetëvendosje, i është bashkuar Lidhjes Demokratike të Kosovës në Podujevë.

Lajmin e ka bërë të ditur kryetari i LDK-së në Podujevë, Ekrem Hyseni, i cili përmes një postimi ka theksuar se çdo ditë e më shumë po shtohet numri i atyre që po i bashkohen LDK-së në rrugëtimin e saj drejt zgjedhjeve të 12 tetorit.

Majaci kishte dhënë dorëheqje nga LVV duke e quajtur atë një mekanizëm të pushtetit përjashtues dhe interesash të mbyllura.

Në një postim në Facebook, Majaci kishte shkruar se Vetëvendosje dikur ishte simbol i idealizmit dhe sakrificës qytetare, por sipas tij, është shndërruar në të kundërtën. Ai madje ka kërkuar falje të gjithë atyre që i ka ftuar t’i bashkohen këtij subjekti.

Postimi i plotë i datës 06.09.2025:

Hyra në këtë lëvizje me bindjen e plotë se po i bashkohesha një alternative të sinqertë politike — që do të sillte ndryshim të vërtetë, drejtësi, barazi dhe shpresë për qytetarët e këtij vendi. Fatkeqësisht, gjatë përfshirjes sime kam parë nga afër një realitet shumë të dhimbshëm: keqqeverisje, arrogancë, mosdëgjim të qytetarit, kapje të institucioneve dhe punësime të njëanshme partiake (sidomos në komunën tonë të Podujevës). E vërteta është se, në vend të ndryshimit, po ripërsëritet e njëjta mendësi e vjetër që ky subjekt pretendonte se do ta luftonte.

Vetëvendosje, që dikur ishte simbol i idealizmit dhe i sakrificës qytetare, sot është kthyer në një mekanizëm për pushtet të pandalshëm, përjashtues dhe interesash të mbyllura. Të rinjtë, profesionistët dhe aktivistët e ndershëm po injorohen e përjashtohen, ndërsa po përkrahen mediokriteti dhe besnikëria ndaj individëve, jo ndaj parimeve.

Unë, Mentor Majaci, jap dorëheqje nga përkrahja dhe nga çdo funksion apo anëtarësi në “Lëvizjen Vetëvendosje”, me efekt të menjëhershëm.

Kërkoj falje publike nga çdo qytetar, mik apo bashkëpunëtor që e kam ftuar t’i bashkohet kësaj lëvizjeje, duke u bazuar në bindjen time të sinqertë të dikurshme. Ishte një gabim që tani e kuptoj qartë dhe për të cilin marr përgjegjësi morale dhe njerëzore.

Nga sot, nuk kam më asnjë lidhje me këtë subjekt. Do të vazhdoj të jem i zëshëm, aktiv dhe i përkushtuar si qytetar i lirë, që nuk rri duarkryq përballë padrejtësive.

Me respekt,

Mentor Majaci.

Guvernatori i BQK-së ia bën pagën vetes gati 5 mijë euro

Derisa qytetarët e Kosovës po përballen me një rritje të ndjeshme të çmimit të energjisë elektrike dhe produkteve esenciale ushqimore, Guvernatori i Bankës Qendrore të Kosovës, Ahmet Ismaili ka vendosur të shpërblejë veten dhe punëtorët e BQK-së me rritje të pagës.

Guvernatori i ka rritur vetes pagën nga 4300 euro në 4792 euro në muaj.

Zyra për media e këtij institucioni, në një përgjigje për VOX Kosova, e ka arsyetuar vendimin me një “përshtatje të modelit” dhe një indeksim për të reflektuar pjesërisht inflacionin.

“Në nivel të metodologjisë dhe skemës së pagave të BQK-së është aplikuar një ndryshim që ka ndikuar të gjitha nivelet e stafit, përfshirë edhe pagat e organeve drejtuese. Për Guvernatorin, kjo nënkupton një indeksim prej 9%, që në vlerë bruto përkthehet në 492.5 euro”, thuhet në përgjigje, ku gjithashtu potencohet se kjo rritje “kompenson vetëm pjesërisht fuqinë blerëse të mëparshme”.

Por kjo nuk është hera e parë që drejtues të BQK-së i rrisin vetes përfitimet.

Tre vite më parë, dy anëtarë të Bordit të emëruar nga Lëvizja Vetëvendosje – Bashkim Nurboja dhe Nora Latifi-Jashari votuan për të rritur kompensimin e tyre në cilësinë e anëtarëve të Komitetit për Auditim nga 500 në 750 euro.

Sipas burimeve brenda BQK-së të VOX-it, rritja e pagave nuk ka qenë uniforme, ajo ka ardhur pas një kategorizimi të brendshëm të departamenteve.

Në disa prej tyre, pagat janë rritur deri në 20-25% në emër të “rrezikut të lartë në punë”, ndërsa në të tjera rritja varion nga 8% deri në 15%. Ndërkohë, koeficienti i pagës bazë është rritur në 188 euro.

Kështu, një zyrtari të lartë i është rritur paga nga 1128 në 1316 euro, ndërsa një drejtori nga 1692 në 1880 euro. Kjo ka shkaktuar pakënaqësi brenda institucionit, pasi shumë punëtorë e konsiderojnë këtë vendim si të padrejtë dhe të pabarabartë.

Rritja e pagave nuk ka qenë e vetmja. Sipas informatave të siguruara nga VOX Kosova, menaxhmenti i BQK-së ka vendosur të rrisë edhe kompensimet për udhëtime dhe pjesëmarrje në grupet punuese.

Pas këtij vendimi, mbledhjet e këtyre grupeve janë bërë dukshëm më të shpeshta me pjesëmarrës që, sipas burimeve, kanë lidhje të ngushta me drejtuesit e institucionit.

Kjo ndodh në një kohë kur sipas të dhënave të fundit nga Agjencia e Statistikave të Kosovës, Indeksi i Harmonizuar i Çmimeve të Konsumit (IHÇK) ka shënuar një rritje prej 4.5% në gusht 2025, krahasuar me të njëjtin muaj të vitit të kaluar.

Rritja më e madhe është vërejtur te energjia elektrike, shërbimet turistike dhe produktet bazë ushqimore si mishi, perimet, pemët, djathi, qumështi dhe vezët.

Një anketë e realizuar nga Instituti Ndërkombëtar Republikan (IRI), gjatë muajve maj-korrik 2025, zbulon se 45% e qytetarëve të Kosovës e konsiderojnë koston e jetesës dhe çmimet e larta si problemin më të madh, një rritje e ndjeshme krahasuar me 28% që ishte një vit më parë.

E dhimbshme: Vdes mërgimtarja nga Peja, la pas vetës dy djem

Ka vdekur e reja me prejardhje nga komuna e Pejës, Amanda Gjakova.

E ndjera jetonte e vepronte në Gjermani.

Lajmin për vdejken e saj e ka bërë të ditur familjarët e viktimës.

“Me pikëllim te thelle njoftojme se papritmas u nda nga jeta, ne moshen 29 jeçare AMANDA GUAKOVA, nusja e djalit tone Auronit. Varrimi do te behet ne Germani, e pamja mbahet nesër më 02.10.2025 ne shtepine tone ne Peje. E kujtojme me malle familja Gjakova dhe djemte e saje Keanu dhe Enzo i vogël”, thuhet në njoftim.

Droni serb fluturoi edhe në afërsi…

Serbia sonte gjatë orëve të mbrëmjes ka lëshuar një dron, afër bazës ushtarake në Dumosh.

Po ashtu Indeksonline merr vesh se droni është lëshuar edhe mbi Burgun e Sigurisë së Lartë në Dyz.

Indeksonline ka siguruar pamje nga vendi i ngjarjes, teksa shihej lëvizja e dronit.

Disa ditë më parë lidhur me këtë çështje pati reaguar edhe Ministri i Punëve të Brendshme të Kosovës, Xhelal Sveçla.

Sveçla, pak ditë më parë ka thënë se Beogradi zyrtar ka shkelur hapësirën ajrore të Republikës së Kosovës me disa dronë.

“Ne jemi duke i hetuar në mënyrë profesionale, në bashkëpunim me KFOR-in, por edhe me shërbimet partnere dhe në momentin që kemi më shumë informata patjetër që do t’i ndajmë me publikun”, ka thënë ai.

Pos Sveçlës për këtë çështje ka folur edhe folur edhe Drejtori i Përgjithshëm i Policisë së Kosovë, Gazmend Hoxha.

Hoxha ka thënë po ashtu që janë në koordinim me KFOR-in, që ka nën përgjegjësi hapësirën ajrore të Kosovës.

“Gjatë ditëve të fundit kemi pasur fluturime të dronëve që ne po dyshojmë që vijnë nga territori i Serbisë, në pjesën veriore të Kosovës. Policia është në kontakt me KFOR-in dhe jemi duke e bërë monitorimin se çfarë mund të bëhet. Është e rrezikshme për pjesën e kufirit por për qytetarët tanë jo. Ne jemi duke i mbrojtur. Ndërsa hapësira ajrore është përgjegjësi e KFOR-it, ne e kemi njoftuar KFOR-in dhe partnerët tanë. KFOR-i, është përgjegjësi e tyre dhe janë duke punuar në këtë drejtim”, ka thënë drejtori i Policisë të premten.

Covey për Thaçin: Nuk ishte luftëtar, s’ka të dhëna që ka shkrepur ndonjë plumb nga zemërimi

Gjatë dëshmisë në Hagë, James Peter Covey duke folur për Hashim Thaçin tha se në gjykimin e tij ai nuk ka qenë një luftëtar dhe se nuk ka asnjë të dhënë që ai mund ta ketë shkrepur ndonjë plumb nga zemërimi.

Përpara kësaj, Covey tha se gjithmonë sa herë shkohet në një mision të ri, përballesh me pretendime për të zmadhuar një rol të njërit apo tjetrit.

Ai tha se është detyra e tyre si diplomatë për të kuptuar se kush e kishte autoritetin dhe influencën më të madhe.

Covey theksoi se në misionet e tyre janë ballafaquar me një numër kontraditash dhe si rrjedhojë foli edhe për rolin e Thaçit.

“Është një person që kishte përfunduar në mënyrë automatike në rolin e një Qeverie të Përkohshme, e që sa i përket mandatit të UNMIK-ut nuk kishte më vlerë. Në atë kohë ka qenë shumë i papërvojë në politikën e sigurimit të votës nga votuesit. Nuk ka patur përvojë ekzekutive dhe i cili shpeshherë ka përdorur retorikë të ashpër të cilën e kontestonte me mënyrën e butë të të folurit”, tha ai.

Po ashtu, dëshmitari theksoi që kanë vlerësuar se Thaçi po përpiqej që ta gjente rolin e duhur dhe se kishte ambicie të mëdha.

“Ne që në fillim kemi vlerësuar se ai po përpiqej që të gjente rolin e duhur. Kishte ambicie të mëdha. Ishte shumë e qartë që ishte shumë i zgjuar, por nuk kishte përvojë për këto çështje dhe po përpiqej që të orientohej në gjetjen e një roli për të siguruar ambiciet e tij…Gjykimi ynë ishte krejt i qartë që ky person që ndodhej pranë nesh nuk ishte luftëtar dhe nuk besoj që ka ndonjë të dhënë që ky njeri ka gjuajtur ndonjëherë ndonjë plumb si rezultat i mërzisë apo zemërimit”, u shpreh Covey, raporton “Betimi për Drejtësi“.

Covey tha tutje se ka vlerësuar që ky person, duke iu referuar Thaçit, nuk ishte një luftëtar dhe nuk ka gëzuar respekt nga ana e atyre që kanë luftuar në terren dhe kanë humbur shokë të tyre.

“Prandaj edhe nuk ndjehem rehat kur më paraqiten një numër dokumentesh që nuk paraqesin personin që nuk e kemi gjetur ne. Nuk parashikojnë procesin që kishim ndërmarrë ne”, tha ai.

Ndërkaq, duke folur për Sami Lushtakun, dëshmitari tha se nuk ka mundur Thaçi ta ndëshkojë atë dhe se nuk e di se kush mund ta kishte bërë një gjë të tillë.

Në anën tjetër, lidhur me krimet që pretendohet se kanë kryer nga UÇK-ja, dëshmitari tha se Hashim Thaçi dhe Agim Çeku e kishin të vështirë t’i ndalonin ato veprime.

“Çeku respektohej sigurisht, për disa çështje ka pas influencë të madhe. Mendimi ynë në atë kohë ishte që ishin disa njerëz me të cilët nuk bëhej dot shaka, njerëz që ndiqnin interesat e tyre. Disa prej tyre ishin si të thush “gangsterë” të një lloji apo një lloji tjetër nga mënyra siç e shihnim ne. Ishte e vështirë për ata që ta ndalonin atë veprimtari”, tha Covey.

Kurse, për Thaçin tha se vlerësimi i tyre ishte se nuk kishte kontroll.

Me kaq përfundoi seanca e sotme, për të vazhduar sërish nesër me pyetjet shtesë të avokatit Luka Mishetiq.

Serbia lëshon dronin mbi bazën ushtarake në Dumosh

Serbia ka lëshuar një dron, afër bazës ushtarake në Dumosh.

Indeksonline ka siguruar pamje nga vendi i ngjarjes, teksa shihej lëvizja e dronit.

Disa ditë më parë lidhur me këtë çështje pati reaguar edhe Ministri i Punëve të Brendshme të Kosovës, Xhelal Sveçla.

Sveçla, pak ditë më parë ka thënë se Beogradi zyrtar ka shkelur hapësirën ajrore të Republikës së Kosovës me disa dronë.

 

 

“Ne jemi duke i hetuar në mënyrë profesionale, në bashkëpunim me KFOR-in, por edhe me shërbimet partnere dhe në momentin që kemi më shumë informata patjetër që do t’i ndajmë me publikun”, ka thënë ai.

Pos Sveçlës për këtë çështje ka folur edhe folur edhe Drejtori i Përgjithshëm i Policisë së Kosovë, Gazmend Hoxha.

Hoxha ka thënë po ashtu që janë në koordinim me KFOR-in, që ka nën përgjegjësi hapësirën ajrore të Kosovës.

“Gjatë ditëve të fundit kemi pasur fluturime të dronëve që ne po dyshojmë që vijnë nga territori i Serbisë, në pjesën veriore të Kosovës. Policia është në kontakt me KFOR-in dhe jemi duke e bërë monitorimin se çfarë mund të bëhet. Është e rrezikshme për pjesën e kufirit por për qytetarët tanë jo. Ne jemi duke i mbrojtur. Ndërsa hapësira ajrore është përgjegjësi e KFOR-it, ne e kemi njoftuar KFOR-in dhe partnerët tanë. KFOR-i, është përgjegjësi e tyre dhe janë duke punuar në këtë drejtim”, ka thënë drejtori i Policisë të premten.

Pamjet :

Dimri i hershëm godet Kosovën – priten reshje të mëdha bore, ja kur do të kemi reshje debore

Cikloni i fuqishëm nga Deti Mesdhe tashmë ka marrë rrugëtimin drejt Greqisë, ku pritet të sjellë reshje të dendura nga sonte e deri të premten në Ballkanin Lindor dhe Qendror, përfshirë Kosovën, Maqedoninë e Veriut, Greqinë, Bullgarinë, Rumaninë, Serbinë dhe pjesërisht Shqipërinë dhe Malin e Zi.

Nën këto kushte, të enjten dhe të premten, me depërtimin e masave të ftohta me origjinë nga Siberia, reshjet e shiut lokalisht do të shndërrohen në reshje bore, përfshirë edhe disa zona të ulëta, si Kosovë, Maqedoni të Veriut, Bullgari dhe Serbi. Reshjet e borës janë fenomen mjaft i rrallë dhe i pazakontë për fillimin e tetorit në rajonin tonë.

Kjo ngjarje vjen si pasojë e fenomenit atmosferik “Rex Block”, ku një anticiklon (presion i lartë) vendoset në veri të një cikloni (presion i ulët). Kjo bën që moti të mbetet i bllokuar për disa ditë: rajonet nën presionin e lartë përjetojnë mot të qetë e me diell, ndërsa zonat më jugore nën presionin e ulët kanë reshje dhe kushte të paqëndrueshme.

Gjatë ditës së sotme në Kosovë, moti po karakterizohet me vranësira të shpeshta dhe intervale kohore me diell, ndërsa më vonë gjatë ditës, sidomos në mbrëmje, pritet të shtrihen gradualisht reshjet e shiut. Në zonat e larta malore reshjet do të jenë në formë bore. Temperaturat do të mbeten të larta edhe sot.

Të enjten dhe të premten moti do të jetë i vranët dhe me reshje të dendura shiu dhe bore. Fillimisht, të enjten, bora do të shfaqet në zonat malore, ndërsa me depërtimin e masave të ftohta gjatë pasdites dhe mbrëmjes, pritet të përfshijë edhe disa zona të ulëta, kryesisht në Rrafshin e Kosovës.

Reshjet intensive të shiut dhe borës do të vazhdojnë edhe të premten. Më të përqëndruara priten në Rrafshin e Kosovës, kryesisht në formë bore dhe shqotës, ndërsa në Rrafshin e Dukagjinit reshjet do të jenë kryesisht në formë shiu, me gjasa të ulëta për borë. Temperaturat maksimale do të lëvizin prej 1°C deri në 7–8°C në Rrafshin e Dukagjinit.

Në zonat ku reshjet janë më intensive dhe në formë shiu, mund të ndodhin vërshime lokale, ndërsa në zonat me reshje bore në Rrafshin e Kosovës priten shtresa lokale të borës, të paktën 5–15 cm në zonat e ulëta dhe të paktën 30 cm në zonat malore./ MeteoKosova/

Bëhuni gati: Nga nesër mot ekstrem në Prishtinë: Shi i dendur, paralajmërohet dhe reshje bore

Drejtoria për Siguri dhe Emergjenca e Prishtinës ka paralajmëruar qytetarët që të jenë të kujdesshëm, pasi nga 1 deri më 3 tetor pritet një ulje e ndjeshme e temperaturave.

Sipas Drejtorisë, në disa zona malore të kryeqytetit mund të ketë edhe reshje bore.

Po ashtu, Drejtoria ka apeluar që qytetarët të tregojnë kujdes në qarkullim për shkak të lagështisë dhe mundësisë së akullit, si dhe të shmangin lëvizjet e panevojshme në zonat e rrezikuara nga përmbytjet.

Sipas të dhënave të Institutit Hidrometeorologjik të Kosovës, gjatë periudhës 1–3 tetor 2025 priten reshje intensive shiu në Prishtinë dhe rrethinë, të cilat mund të shkaktojnë vështirësi në komunikacion dhe rrezik për përmbytje të shpejta. Temperaturat do të ulen ndjeshëm, duke arritur deri në 1–2°C. Në zonat malore pranë kryeqytetit ka mundësi të bien reshje bore, sidomos gjatë netëve më të ftohta ose në rast të reshjeve të vazhdueshme. Këshilla për qytetarët: tregoni kujdes në qarkullim për shkak të lagështisë dhe mundësisë së akullit dhe shmangni lëvizjet e panevojshme në zonat e rrezikuara nga përmbytjet. Ju lutemi të merrni masat e nevojshme për sigurinë tuaj.”, thuhet në njoftimin e Drejtorisë në Facebook.