E rëndë: Kjo është 21 vjeçarja nga Kosova që vdiq aksidentalisht në Gjermani

Një 21-vjeçare nga Kosova ka ndërruar jetë në Reutlingen të Gjermanisë, pasi vetura e saj u përfshi në një vetaksident në autostradën B28.

Y.H, po udhëtonte me veturën e saj ditën e enjte, në momentin kur humbi kontrollin e veturës, që rrëshqiti dhe doli nga rruga, për t’u përmbysur më pas disa herë, shkruan IndeksOnline.

Sipas mediave gjermane, Autostrada B28, nga Metzingen drejt Reutlingen, u mbyll plotësisht pas aksidentit. Një helikopter shpëtimi u aktivizua, gjithashtu.

21-vjeçarja luftoi me vdekjen deri ditën e shtunë, por fatkeqësisht nuk i bëri ballë. Vdekjen e saj e njoftuan dje autoritetet gjermane.

Policia është duke e hetuar rastin dhe shkaqet e aksidentit.

Reagon punëtori i Trepçës i larguar nga puna: Shkova në Gjermani jo me dëshirë, por për të mbijetuar

Pas publikimit të vendimit nga Trepça Sh.A. për shkëputjen e kontratës së punës me punëtorin Fuad Maliqi për mungesë në vendin e punës, ka reaguar vetë Maliqi përmes një deklarate publike, ku jep versionin dhe arsyet e tij për mungesën pesëjavore.

Në shkrimin e tij, Maliqi pranon se nuk ka qenë prezent në punë për pesë javë, por thekson se kjo erdhi pas viteve të tëra të sakrificës, ku përmend pesë lëndime fizike në vendin e punës dhe punë në kushte të pasigurta, pa kërkuar kurrë më shumë sesa dinjitet dhe respekt.

“Nuk ishte mungesë përgjegjësie ajo që më detyroi të largohem – por mungesa e shpresës,” shkruan ai, duke theksuar se ndjehej i harruar dhe i trajtuar si një numër, jo si një njeri. Sipas tij, vendimi për largim nga puna është marrë pa tentuar të dëgjohet ose të kuptohet situata e tij.

Në rrëfimin e tij emocional, Maliqi tregon se është detyruar të largohet nga vendi për të filluar një jetë të re në Gjermani, si shumë të tjerë që, sipas tij, nuk emigrojnë për dëshirë, por për të mbijetuar.

“Trepça ka qenë krenaria e Kosovës. Por pa dinjitetin e punëtorëve të saj, ajo humb kuptimin,” shkruan ai në fund, duke e cilësuar deklaratën e tij si një kujtim, një thirrje dhe një protestë të heshtur për punëtorët që punojnë në terr, dhembje dhe heshtje.

Mustafa: Vjosa Osmani duhet të sqarohet, pse s’qëndroi në Kosovë kur kishte informacione për agresion serb të parandaluar nga Trump

Vjosa Osmani duhet ta bëjë vetëm një ‘sqarim’: pse kur ka [dhe nëse ka] informacione të tilla [për agresion serb në bërje, të parandaluar nga Trump] nuk qëndroi dhe nuk qëndron në Kosovë për t’u ballafaquar me situatën?

Vetëm kaq sqarim i detyrohet vendit – në konferencën e njoftuar për media ‘nga mesi i javës’ – Presidentja e Kosovës, Vjosa Osmani. Kështu tha Isa Mustafa, ish-Kryeministri i Kosovës, në një përgigje për ‘Nacionale’ pyetur rreth fjalëve të saj të dhëna në ShBA që u bënë brum për debat të ashpër në vend; për çka edhe s’vonoi përgënjeshtrimi nga emisari amerikan, Richard Grenell, i cili i atribuoi ‘manipulim’ dhe ‘turp’ fjalëve të saj.

Por, jo veç për ‘konfirmim’ kontraverz të fjalëve të Trump, Isa Mustafa rikujton ashpërsinë dhe kundërshtimin e madh të Vjosa Osmanit – në linjë me Vetëvendosjen – ndaj Marrëveshjes së Uashingtonit, që tash Osmani e lartësoi si marrëveshje të mirë dhe, për më tepër, që “është zbatuar”.

Krejt kjo për Isa Mustafën përbën “mashtrim” nga ana e Vjosa Osmanit, ndërsa tash sheh që ajo bëhet “altoparlante e gabuar”.

“Sa i përket Presidentit Trump, mendoj se nuk i takon znj. Osmani që të interpretojë apo keqinterpretojë fjalët dhe vlerësimet e tij. Çështjet e sigurisë nuk janë të domenit të interpretimit por të bashkëpunimit dhe të komunikimit. Trump është në Kosovë, sepse këtu janë ushtarët e tij, këtu është NATO, e cila nuk është deklaruar në asnjë rast për këtë rrezik, dhe nuk ka ndryshuar shkallën e mobilizimit ushtarak- luftarak”, tha Isa Mustafa.

Por edhe qysh në premisa, Isa Mustafa, e she krejt këtë tregim në dyshim.

“Është e rendit, që kur Presidentja apo Kryeministri ka informacione mbi rreziqet ndaj sigurisë së vendit, ta thërrasin Këshillin e Sigurisë dhe ta njoftojnë edhe opinionin për atë që mund të njoftohet. Po ashtu, kur ka informacione se vendit po i kanoset rreziku nga Serbia, atëherë Presidentja, si komandante supreme, qëndron në shtetin e saj, që më së paku i ngjanë Presidentes Osmani. Ajo në këtë situatë,’të kohëve të fundit’, e cila thotë se është njoftuar nga brifingje të rregullta për rrezikun nga Serbia, më shumë ka qëndruar në vizita jashtë vendit se sa në Kosovë. Kjo tregon se diçka nuk është në rregull, ose me brifingjet ose me seriozitetin e detyrës së saj si komandante supreme, të cilin atribut ka qejf ta përsërisë shpesh”, tha ai.

‘Mashtrimi’ i Osmanit për Marrëveshjen e Uashingtonit

Për Marrëveshjen e Uashingtonit dhe kundërshtimin e saj – që Osmani e vlerësonte “kundër rendit kushtetues” – Isa Mustafa rikujton se me atë tiketë Osmani dhe Vetëvendosja edhe kanë ardhë në pushtet, dhe “të gjithë ata që kanë bashkëpunuar me Trumpin dhe përfaqësuesit e tij janë eliminuar nga skena politike në Kosovë”.

Por, fatkeqësisht – thotë Mustafa – nënshkruesi i asaj marrëveshje, Avdullah Hoti, përveç që është sulmuar dhe kritikuar në masë të madhe nga Osmani dhe Vetëvendosje, “është margjinalizur edhe nga partia e tij (LDK)”.

“Presidenti Trump në vitin 2020, përmes përfaqësuesit të tij special, Richard Grenel, arriti ti ul përfaqësuesit më të lartë shtetëror të Serbisë dhe të Kosovës në Zyrën Ovale në Shtëpinë e Bardhë, takim ky që rezultoi me një marrëveshje shumë të dobishme për të dy shtetet. Zonja Osmani ka kundërshtuar këtë marrëveshje dhe mbi bazën e këtyre kundërshtimeve ka ardhur në pushtet së bashku me z. Kurti. Atëherë mendohej se Trump iku, se nuk kthehet, e tani kur u kthye shumë i fortë, mundohen ta mashtrojnë se e kanë implementuar marrëveshjen dhe të bëhen altoparlantë të gabuar të tij.

Të gjithë ata që kanë bashkëpunuar me Trumpin dhe përfaqësuesit e tij janë eliminuar nga skena politike në Kosovë. Dihet, po ashtu, botërisht se marrëveshja nuk është zbatuar në asnjë pikë. Se Kryeministri i atëhershëm Avdullah Hoti, si nënshkrues i saj është sulmuar dhe kritikuar, për fat të keq jo vetëm nga VV dhe znj. Osmani por është margjinalizuar edhe nga partia e tij”, tha Isa Mustafa për Nacionale.

20-vjeçari nga Rahoveci që vdiq në pushime, mësohen detaje të reja

Të hënën e 14 korrikut, Anid Hoxha, 20-vjeçari nga Rahovenci ka vdekur në plazhin e Dhërmiut.

Sipas raportit të policisë shqiptare, i riu ishte duke luajtur volejboll në një nga plazhet në Dhërmi.

“Specialistët e Stacionit të Policisë Dhërmi referuan materiale për vlerësim, pasi më datë 14.07.2025, pranë një plazhi në Dhërmi, në fushën e volejbollit, dyshohet se ka humbur jetën për shkaqe natyrale shtetasi A. H., 20 vjeç, banues në Kosovë, i cili ndodhej me pushime së bashku me shoqërinë e tij”, thuhet në raport.

Për 20-vjeçarin shkroi edhe Kryetari i Komunës së Rahovecit, Smajl Latifi.

E vrau ish-gruan në vitin 2024, Valon Aliut i bëhet ekzaminimi psikiatrik

Në Gjykatën Themelore të Ferizaj pritet të mbahet sot seanca gjyqësore ndaj Valon Aliut, që dyshohet se e vrau ish-gruan Erona Coklin, më 12 prill 2024 te Qendra për Punë Sociale në Ferizaj.

Ai po aty dyshohet se ai plagosi edhe vellain, derisa këta e çuan për ta parë djalin te QPS-ja.

Aliu e kishte gjuajtur të ndjerën me armë zjarri në kraharor dhe pastaj vëllain e saj në krahun e tij të djathtë.

Derisa e ndjera kishte filluar të largohej ai dyshohet se e kishte goditur edhe njëherë në gjoks dhe pastaj në anën e majt të kokës.

Për vrasjen e rëndë që dyshohet se e bëri Valon Aliu, i është bërë ekzaminim psikiatrik në Institutin e Psikiatrisë Forenzike, i cili e nxori mirë psikikisht.

Mjeku Arsim Gashi që ia bëri këtë ekzaminim është thirrur të dëgjohet sot në gjykatë me kërkesë të avokatit të familjes Cokli

E dhimbshme: Disa ditë pasi i vdiq i biri në aksident, vdes edhe polici nga Peja

Ka ndërruar jetë edhe personi i dytë nga aksidenti që ndodhi më 9 korrik në Nabërgjan të Pejës.

Bëhet fjalë për Mehmet Kelmendin, i cili ishte zyrtar policor në Pejë.

Disa ditë më parë, në këtë ngjarje tragjike, ai humbi edhe të birin, Arbër Kelmendin, 35 vjeç.

Varrimi i Mehmet Kelmendit, 65 vjeç, sipas njoftimit do të bëhet nesër, ndërsa koha e saktë e varrimit do të bëhet e ditur.

Ceremonia e varrimit do të zhvillohet në fshatin Lutogllavë.

E rëndë: Vdes i riu Anid Hoxha nga Rahoveci, po qëndronte me shokët në bregdetin shqiptar

Kryetari i komunës së Rahovecit Smajl Latifi, ka njoftuar për ndarjen nga jeta të 20-vjeçarit nga Rahoveci, Anid Samir Hoxha.

Ai tha se Anidi po qëndronte për pushime në bregdetin shqiptar.

“Me pikëllim të thellë morëm lajmin për ndarjen nga jeta të 20-vjeçarit nga Rahoveci, Anid Samir Hoxha.

Anidi po qëndronte për pushime në bregdetin shqiptar, së bashku me shokët e tij.

Kjo humbje e papritur na preku thellë të gjithëve, familjen, shokët dhe secilin që e njohu Anidin, si djalë të mirë e të dashur.

Ngushëllimet më të sinqerta për familjen Hoxha, miqtë dhe për të gjithë ata që ndjejnë dhimbjen e kësaj humbjeje të rëndë. Qoftë i lehtë dheu për Anidin!”.

Një burrë dhe një grua therin me thikë një person

Një person ka pësuar lëndime trupore pasi është therur me thikë nga një burrë dhe një grua.

Sipas raportit 24-orësh të policisë, ngjarja ka ndodhur mbrëmjen e së hënës.

“Një mashkull kosovar ka pësuar lëndime trupore pasi është therur me thikë nga një mashkull dhe një femër. Viktima është dërguar për trajtim mjekësor, ndërsa një mashkull dhe një femër janë intervistuar si të dyshuar lidhur me rastin. Rasti po hetohet nga njësiti i hetuesisë”, thuhet në raportin e policisë.

Gjykata e obligon Qeverinë të rishikojë statusin e 19 mijë e 500 “veteranëve”

Gjykata Themelore në Prishtinë e ka obliguar Qeverinë e Kosovës që të rishqyrtojë listat e veteranëve të UÇK-së.

Në një aktgjykim të shpallur të hënën në rastin e njohur si “Veteranët”, Gjykata tha se e obligon qeverinë që të formojë komisione të cilat do të bëjnë rishqyrtimin e listës prej 19 e 500 personave aplikues, të cilët dyshohet se e kanë fituar këtë status rrejshëm.

“Meqenëse në këtë procedurë penale gjykata nuk ka mundur të verifikojë individualisht secilin person të përfshirë në listën shtesë prej 19 e 500 personave për të cilët është marrë vendim për njohje të statusit të veteranit të luftës së UÇK-së nga komisioni dhe vendimi i Qeverisë, Gjykata vlerëson se shyqrtimi i vlefshmërisë së këtij statusi duhet t’i nënshtrohet një procesi të ri ligjor, të rregullt, administrativ”, tha kryetari i trupit gjykues.

Gjykata tha se komisioni i ri duhet të rishikojë përmbushjen e kushteve ligjore për secilin nga 19 mijë e 500 personat e përfshirë në listë.

10 nga 12 të akuzuarit për rastin “Veteranët” janë shpallur fajtor për veprën penale ‘keqpërdorim të detyrës apo autoritetit zyrtar’.

Ata janë dënuar me nga një vit burgim secili veç e veç.

Aktgjykimi është shpallur sot nga një trup gjykues i Gjykatës Themelore në Prishtinë, raporton Paparaci.

Në mesin e të dënuarve për këtë rast është edhe ish-kryeministri Agim Çeku.

Të dënuarit e tjerë janë Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari.

Ndërsa, Nuredin Lushtaku dhe Smajl Elezaj janë liruar nga akuza për keqpërdorim të detyrës zyrtare apo autoritetit zyrtar për arsye se të njëjtit nuk e kanë pasur asnjëherë funksion zyrtar.

Djali i Jakup Kransiqit: Babi sot i mbushi 15 vjet nëpër burgje, në moshën 74-vjeçare është duke duruar padrejtësi

Deputeti i PDK-së, Altin Krasniqi i cili është djali i Jakup Krasniqit, ka shkruar për babain e tij, duke treguar se ish-zëdhënësit të UÇK-së sot i bëhen 15 vjet në burgje.

Ai teksa rikujtoi sakrificën e babait të tij, tha se është duke e duruar një padrejtësi, ndonëse i shtyer në moshë, duke iu referuar arrestimit nga Gjykata Speciale e Hagës, atje ku po mbahet në Dhomat e Specializuara.

Shkrimi i plotë:

Sot, babait tim i bëhen 15 vjet në burgje.

Sepse zgjodhi lirinë e një populli, e jo lirinë e tij;

zgjodhi luftën kundër gjenocidit serb, e jo heshtjen ndaj tij;

zgjodhi Kosovën shtet, e jo më kurrë nën Serbi.

Në vend që ta shijonte rolin e gjyshit me mbesat e tij, çdo ditë e më shumë po plaket në qeli, larg vendit të tij.

Prandaj, sot, ende në moshën 74 vjeçare, po duron padrejtësi.

Babë, edhe pse s’munde ta shijosh as rininë, as pleqërinë,

e shijove Kosovën e lirë, të cilës aq shumë i dhe.

_______________________________________

Nga burgjet e Jugosllavisë, te qelitë e Hagës.

Jakup Krasniqi u arrestua dhe më 4 prill 1981 u dënua me 14 vite burg nga sistemi fashist i Jugosllavisë, që udhëhiqej nga të njëjtat politika gjenocidale të Serbisë së sotme.

Në rigjykimin që iu bë, u dënua me 15 vite burg, sepse kishte thënë: “Unë nuk jam jugosllav, unë jam shqiptar.”

Megjithatë, ai mbajti 10 vjet, 3 muaj dhe 19 ditë burg, për t’u liruar më 23 korrik 1991.

Rreth tri dekada më vonë, ai vihet sërish në pranga.

Jo nga Beogradi.

Jo nga UDB-ja.

Jo nga serbët.

Por nga ata që u betuan se do të sillnin drejtësi ndërkombëtare.

Ata që heshtën për masakrat e Serbisë, por u ngutën të hapin dosje për çlirimtarët.

Jakup Krasniqi, sot në moshën 74-vjeçare, vazhdon të mbahet në paraburgim, jo për atë që bëri, por për atë që përfaqëson: historinë e lavdishme të një populli, masakrat e të cilit ende nuk kanë gjetur drejtësi, dhe lirinë e një populli të shtypur e të vuajtur që me shekuj ishte lënë në harresë nga bota perëndimore.

I lodhur nga vitet, i rënduar nga mosha, por kurrë i thyer:

Ai është dëshmi e gjallë se liria nuk falet e as nuk fitohet me fjalë, por me burg, me pushkë dhe me jetë.

Ai është turpi i një bote që po gjykon viktimën, ndërsa e përkëdhel kriminelin.

Ai është simbol i asaj që mbështetësit e politikave të Beogradit do ta donin të shlyer: luftën e drejtë të një populli!

Jeta na tregoi se herë është e padrejtë e herë mizore. Këtë më së miri e dëshmon jeta e Jakup Krasniqit, i cili u mbyll në qelitë e ftohta të dy sistemeve të ndryshme:

Dikur nga uniforma jugosllave, sot nga kravata ndërkombëtare.

Dikur sepse kërkoi zërin e lirisë, sot sepse u bë zëri i lirisë!

Prandaj, natyrshëm më vjen pyetja: A jemi të lirë?

Nëse kjo nuk është padrejtësi historike, atëherë çfarë është?

Sa kohë do të qëndrojmë si spektatorë, ndërsa zërat më të fuqishëm të çlirimit mbahen në burg nga një drejtësi që po i shërben narrativës së Serbisë?

Pesha e prangave të Jakup Krasniqit, e mbajtur për këto 15 vite, atë nuk e rrënoi, por do ta rrënojë të ardhmen e Republikës sonë, të formuar nga po ato dy duar që ende i mbajnë prangat e padrejtësisë!

Kjo nuk është thirrje për mëshirë, kjo është thirrje për drejtësi!

Dhe nëse Kosova ende është shtet i pavarur, sovran dhe demokratik, nuk duhet të heshtë.

Sepse sot është ai, nesër mund të jetë fati ynë historik ai që burgoset!

15 vite burg në total.

15 vite në dy botë të ndryshme.

Por të dyja me të njëjtin qëllim: ta heshtin zërin e lirisë!

Por ai nuk heshti. Dhe nuk do të heshtë.

Dhe nëse ne kemi pak ndërgjegje, pak dinjitet dhe pak kujtesë historike as ne nuk duhet të heshtim.

Liria nuk është e plotë derisa i fundit i çlirimtarëve të jetë i lirë.

Kosova nuk do të ketë qetësi, derisa drejtësia të mos e njohë UÇK-në si atë që ishte: ushtria e një populli që kërkoi liri.

Historia nuk e fal harresën.

Dhe kombet që harrojnë, zhduken!