Ramabaja reagon pas intervistës së Thaçit: Ka mbaruar koha e haxhiqamilëve, i shërbyen Serbisë

Aktivisti i palodhur i Vetëvendosjes, Sadri Ramabaja, është acaruar tej mase pas intervistës së mbrëmshme të ish-presidentit Hashim Thaçi nga qelia në Hagë.

Thaçi dje pati një intervistë me shkrim që u publikua në Rubikon të Adriatik Kelmendit, ku ish-presidenti flet për ndarjen nga babai, jetën në burg, si dhe për ngjarjet e mëdha politike në Kosovë.

Por, si duket intervista e ish-presidentit e ka pezmatuar tmerrësisht aktivistin dhe showman-in e studiove televizive të natës, Sadri Ramabaja.

Në një shkrim plot vrer, Ramabaja tha se po tentohet të ndërtohet një figurë mesianike për Thaçin, mirëpo sipas tij, tashmë veçse ka përfunduar epoka e ‘haxhiqamilëve’. Për më tepër, ai tha se këta individë u shërbejnë interesave të Serbisë.

“Rrjedhimisht individët e përzgjedhur i kanë shërbyer, secili në mënyrën e vet, interesave serbe, duke e dëmtuar rënd marshin e historisë dhe etapat politike që do t’i krijonin rrethanat për çlirimin e Kosovës dhe faktorizimin e Kombit”, shkroi Ramabaja.

Për më tepër, figurën e Thaçit ai e krahasoi me atë të Haxhi Qamilit, kryengritësit të Shqipërisë së Mesme që ishte kundër shtetit të pavarur shqiptar të shpallur në vitin 1912.

“Epoka e haxhiqamilve është stivuar tashmë në sirtarët e historisë”, tha në fund Ramabaja duke marrë shkas nga intervista e ish-presidentit të Kosovës, i cili bashkë me krerët e tjerë të UÇK-së po mbahet në Hagë që nga viti 2020.

Ky është vendimi i fundit i Gjykatës Kushtetuese lidhur me bllokimin e Kuvendit

Gjykata Kushtetuese ka vendosur lidhur me kërkesën e deputetëve të PDK-së dhe LDK-së lidhur me votimin e fshehtë, për konstituimin e Kuvendit të Kosovës.

Sipas vendimit të Kushtetueses të publikuar sot, deputetëve u ndalohet çdo veprim pas kalimit të afatit prej 30 ditësh për konstituimin e Kuvendit.

Në vendim tutje theksohet caktimi i masës së përkohshme.

“TË CAKTOJË ex officio masën e përkohshme përmes të cilës ndalohet çdo vendim dhe veprim i deputetëve të zgjedhur të Kuvendit të Republikës së Kosovës lidhur me Seancën Konstituive pas përfundimit të afatit 30 (tridhjetë) ditor, sikurse është përcaktuar me paragrafin 2 të pikës II të dispozitivit të Aktgjykimit KO124/25;

II. TË URDHËROJË që masa e përkohshme hyn në fuqi më 27 korrik 2025, në kohëzgjatje deri më 8 gusht 2025;

III. T’UA KUMTOJË këtë Vendim palëve;

IV. TË PUBLIKOJË këtë Vendim në Gazetën Zyrtare, në pajtim me nenin 20.4 të
Ligjit;

V. Ky Vendim hyn në fuqi më 27 korrik 2025”, thuhet në vendimin e Gjykatës Kushtetuese.

E premte përvëluese, ky është parashikimi i motit për sot

Masat e nxehta dhe të fuqishme ajrore me origjinë nga Afrika Veriore janë fuqizuar sot më tej, duke ngritur vlerat maksimale deri në 39°C.

Këto masa pritet të intensifikohen edhe më shumë gjatë ditës së sotme dhe sidomos të shtunën, kur temperaturat maksimale mund të arrijnë deri në 43 apo 44°C – duke thyer rekordin absolut të temperaturës më të lartë të regjistruar ndonjëherë në Kosovë.

Deri më tani, ky rekord mbahet nga vlera prej 42.0°C, e regjistruar më 24 korrik 2007 në Prizren, ndërsa më herët, po ashtu në Prizren, ishte regjistruar 40.8°C më 25 korrik 1987, njofton MeteoKosova.

E rëndë: Vajza 26-vjeçare mbyt babain

Policia e Fierit në Shqipëri ka zbardhur një ngjarje të rëndë kriminale në një familje, e cila fillimisht u kallëzua si aksidentale nga vetë autorja.

Ngjarja ka ndodhur mbrëmjen e 23 korrikut 2025, në fshatin Frashër.

Rreth orës 23:00, Emanilda Rama 26 vjeçe, njoftoi Policinë se babai i saj, shtetasi Anesti Rama, 56 vjeç, kishte ndërruar jetë aksidentalisht në banesën e tyre. Por gjatë deponimeve të para dhe veprimeve të menjëhershme hetimore, oficerët e Policisë konstatuan mospërputhje në versionin e dhënë dhe dyshime të forta për një vrasje të mundshme, transmeton Euronews Albania.

Hetimet e mëtejshme zbuluan se 26-vjeçarja kishte vrarë babain e saj, për motive ende nën hetim, duke e mbytur me një tel.

Pas krimit, dyshohet se ajo ka bashkëpunuar me nënën e saj, shtetasen V. R., 53 vjeçe, për të pastruar trupin dhe për të inskenuar ngjarjen si një aksident.

Në përfundim të veprimeve të deritanishme hetimore, Emanilda Rama është arrestuar për veprën penale të vrasjes, ndërsa e ëma është shoqëruar në ambientet e Policisë, ku po merret në pyetje për rolin e saj në ngjarje dhe për përpjekjen për të penguar zbardhjen e saj.

Hetimet janë në vijim, nën drejtimin e Prokurorisë së Fierit, për të dokumentuar plotësisht me prova ligjore të gjitha rrethanat dhe përgjegjësitë penale të përfshira në këtë rast tronditës.

Lladrovci shpërthen pas zhvillimeve në PDK: S’ka bir nane që më largon nga partia

Kryetari i Drenasit, Ramiz Lladrovci, ka reaguar në lidhje me kandidaturën e tij, pasi javën e ardhshme Kryesia e Partisë Demokratike të Kosovës (PDK) pritet të votojë për kandidatët për kryetarë komunash. Në rastin e Drenasit, do të përcaktohet kandidati mes Lladrovcit dhe kundër-kandidatit të tij.

Lladrovci ka përsëritur se një situatë e tillë nuk ka ndodhur më parë, që dikush tjetër të vendosë në emër të degës së PDK-së në Drenas.

Ai theksoi se Komuna e Drenasit ka qenë disa herë kampion në performancë dhe hodhi pyetjen pse komunat që do të vendosin për fatin e Drenasit nuk kanë qenë në të njëjtin nivel të performancës, duke iu referuar Kryesisë së PDK-së.

Megjithatë, Lladrovci ka theksuar se “nuk ka bir nëne që e largon nga PDK-ja”.

Ai gjithashtu deklaroi se po tentohet të instalohen “bedelët” për të qeverisur me Drenasin.

Postimi i plotë i Lladrovcit:

Dega e PDK-së në Drenas, vazhdimisht para nominimeve për kryetar komune, por edhe për zgjedhjet nacionale, është përballur me dyshime e hile të natyrave të ndryshme, rreth kandidatit për kryetar, përbërjes së asamblesë, apo kandidatëve për deputetë.

Kësaj here, për zgjedhjet lokale të 12 tetorit, sfida ka marrë përmasa të një dukurie që më herët nuk ka ndodhur, zgjedhjen e kandidatit për kryetar të komunës nga anëtarët e Kryesisë së PDK.

Pyetja e parë që shtrohet, sa e njohin degën e PDK-së dhe punën në komunën e Drenasit 43 anëtarët e Kryesisë?

Cili është kriteri për të votuar, dhe më e rëndësishmja, a po votojnë për kryetarin e qytetarëve të Drenasit apo për Kryetarin e pëlqyer të Kryesisë së Partisë!

Përkundër se dega e PDK-së në Drenas, mbase e vetmja shprehu gatishmëri të zhvillonte zgjedhjet e brendshme, pas vitit 2021, Kryesia vendosi të mos ketë zgjedhje në asnjë degë, as në ato që ishin me kryesi të emëruara.

Në këto rrethana u kontestua legjitimiteti i kryetarit të degës, legjitimitet i kontestuar që nga viti 2021, nga ata që u larguan nga PDK dhe krijuan subjekt tjetër politik. Është kontestim nga ata që e shanë partinë dhe udhëheqësit e saj, punuan kundër PDK-së me mbi 18 profile të rreme, u kontestua nga ata që shkaktuan dëme milionëshe me ndikim në vota negative për projekte zhvillimore. Ky kontestim u legjitimua nga Selia qendrore.

Sigurisht, as për Kryetarin dhe Kryesinë e PDK-së nuk është i lehtë presioni që vije nga ata që e themeluan subjektin opozitar në Drenas më 2021 dhe tash përzgjodhën bedelin e ri “për projekt strategjik”.

Kontestimi i kandidaturës time, sipas statutit, nuk ndodhi rastësisht. Ata që i humbën zgjedhjet më 2021, nuk dëshironin proces normal të zgjedhjeve të brendshme. Si i emëruar, në krye të degës, për herë të parë po aplikohet kandidim i dalë nga “votimi i fshehtë”.

Pas dështimit në zgjedhjet nacionale, kundër kandidati i deklaruar, në publik me ndjekësit e vet, kishte paralajmëruar garën për kryetar të Drenasit, duke theksuar se “do të garonte me apo pa miratimin e partisë”. Unë jam gati për garë.

Votimi “i fshehtë” në Kryesi të PDK-së po afron. E kuptoj se më shumë se për kandidaturën time, bëhet fjalë edhe për integritetin anëtarëve të kryesisë së PDK-së të cilët nuk duan të ballafaqohen me shefin e bedelëve. Disiplinën partiake, kam dëshmuar se e çmoj më shumë se anëtarët e emëruar të Kryesisë.

Si themelues i PDK-së, me një biografi që fillon në vitet ’80, për disa anëtarë të Kryesisë së PDK-së mund të duket film, ndërsa për kryetarët e komunave të PDK-së brenda 7 vjetëve të garës së performancës komunale jam i paarritshëm.

Sukseset e mia janë vlerësuar nga faktorë vendorë e ndërkombëtarë, i dëshmuar me punë dhe performancë të shkëlqyer, në zbatim të ligjit dhe transparencës. Ky sukses i atribuohet zyrtarëve komunalë, Kabinetit por edhe qytetarëve kampionë të Drenasit. 

Nga anëtarët e Kryesisë së PDK-së pres objektivitet, t’i thonë jo dëshirës së keqbërësve dhe bedelëve të vitit 2021 dhe 2025, të cilët tashmë janë bashkuar kundër qeverisjes së mirë.

Konsideroj se në mbledhjen e Kryesisë së PDK-së, ku pritet të votohet për kandidatët për disa kryetarë të komunave, anëtarët nuk duhet të jenë të pranishëm. Ashtu, ata nuk do të bëhen pjesë e padrejtësisë ndaj kryetarit kampion të performancës.

Qeverisja lokale matet me 119 treguesit e performancës, tregues përcaktojnë komunën kampion. Anëtarët e Kryesisë lë të informohen nga komunat nga vien përse nuk i kanë komunat e veta kampion të performancës e pastaj lë të marrin vendim për kampionin e performancës për gjashtë herë.

Drenasi me qytetarët e saj, do ta japin përgjigje për situatën, pres të jetë përgjigje e fuqishme për të mos lejuar pushtet të tretë e as qeverisje të bedelëve.

Po e përsëris: Dje, sot, nesër, PDK. Nuk ka bir nane që mund të më largojë nga PDK dhe vizioni i heronjve tanë të luftës dhe paqes!

Ky është i riu nga Kosova që humbi jetën në Gjermani

Një i ri nga komuna e Vitisë, Florent Frangu, ka humbur jetën tragjikisht në Gjermani, ku jetonte dhe punonte. Sipas informacioneve, ai ka vdekur si pasojë e një aksidenti.

Për vdekjen e tij ka reaguar edhe kryetari i komunës së Vitisë, Sokol Haliti.

“Me dhimbje të thellë mora lajmin për ndarjen nga jeta të më të dashurit tuaj, Florent Frangu. Humbja e tij është një goditje e madhe për familjen, miqtë dhe të gjithë ata që patën fatin ta njohin si njeri të ndershëm e të respektuar”, thuhet në mesazhin ngushëllues të Halitit, i cili shprehu mbështetje dhe lutje për familjen në këto momente të rënda.

Burri i motrës së Fitore Pacollit udhëheq organizatën që fitoi fonde nga Qeveria

Deputeti LDK-së, Paris Guri, ka reaguar ashpër ndaj deklaratave të deputetes së Lëvizjes Vetëvendosje, Fitore Pacolli, lidhur me përfshirjen e burrit të saj në organizatën “Defy Them”.

Pacolli kishte deklaruar se bashkëshorti i saj nuk është më pjesë e organizatës tash e dy vite, duke i cilësuar akuzat për përfitime financiare si shpifje. Por Guri nuk është bindur nga kjo deklaratë dhe ka dalë me një postim të drejtpërdrejtë në rrjetet sociale, duke kërkuar sqarime për drejtimin aktual të organizatës.

“Fitore Pacolli po thotë që burri i saj nuk është më pjesë e ‘Defy Them’ tash e dy vite, dhe se krejt këto janë shpifje. Hajde, po të besojmë, por vetëm na trego kujt ia ka lënë organizatën burri yt,” shkruan Guri.

Ai më pas zbulon se drejtori ekzekutiv aktual i organizatës është Kombëtar Uskana, bashkëshorti i Shqipe Uskanës, e cila është motra e Fitores Pacolli.

“Pra, edhe nëse paratë s’i ka marrë burri yt, i ka marrë burri i motrës tane,” thotë ai, duke e mbyllur postimin me një mesazh të prerë: “Fitore, kthej paret– cent më cent!”

Nëse e shihni këtë person, lajmërojeni Policinë

Policia e Kosovës, gjegjësisht sektori i Hetimeve të Kryeqytetit, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në identifikimin e personit që shihet në fotografi.

Sipas policisë, personi i dyshuar kërkohet për përfshirje në veprat “Ngacmim” dhe “Sulm”.

Për çdo informatë që mund të çojë në identifikimin e tij, policia lut qytetarët që të kontaktojnë në numrin e telefonit: 192 ose përmes emailit: info@kosovopolice.com.

Deputetja Fitore Pacolli provon të frikësojë mediat me “padi” pas raportimeve se edhe burri i saj mori mijëra euro nga shteti

Deputetja e LVV-së, Fitore Pacolli, e cila kohëve të fundit ka qenë e pranishme vazhdimisht në media për grantet që kanë fituar nga ministria e Bujqësisë, vëllai dhe daja i saj, tashmë është rikthyer përsëri në faqet e mediave përsëri për të njëjtën çështje.

“Vox Kosova” dje ka raportuar bazuar në disa dokumente, se si organizata që drejton burri i deputetes Fitore Pacolli ka fituar një shumë rreth 50 mijë euro në dy vite nga Ministria e Kulturës Rinisë dhe Sportit që drejton Harjulla Çeku.

Për këtë ka reaguar sot vetë deputetja Pacolli, duke publikuar një fotografi me biçikletë e duke i cilësuar si shpifje dhe duke thënë se do t’i drejtohet gjykatës.

“Por këta shpifës kanë hasur në një gur të fortë: as një grimcë nuk ma heqin, e lëre më të më thyejnë.Dëgjohemi më vonë”, ka shkruar Pacolli.

Postimi i plotë:

Mirëmëngjesi ☀️

Dita e re, shpifje të reja!

Paska me më shku e diela duke shkruar padi. E diela e padive 🤣. Ju që shpifët dje, tashmë veçse jeni futur në listë. E ju që do shpifni sot e njëjta ju pret.

Para disa ditësh, një raport i pavarur i shoqërisë civile më shpalli si gruan më të sulmuar. Dhe po, është e vërtetë më kanë sulmuar më së shumti.

Por këta shpifës kanë hasur në një gur të fortë: as një grimcë nuk ma heqin, e lëre më të më thyejnë.

Dëgjohemi më vonë

E sulmon dhe e fyen policin pas aksidentit – Policia përdor sprej për ta neutralizuar sulmuesin

Një incident i rëndë është regjistruar pas mesnate në qytetin e Gjilanit, ku një person ka sulmuar fizikisht dhe verbalisht zyrtarët policorë në vendin e një aksidenti trafiku, raporton Gazeta Sinjali.

Burimet e Sinjalit bëjnë me dije se më 24 korrik 2025, rreth orës 00:45, pas një aksidenti në rrugën “Lufta e Gjilanit 44”, njësia patrulluese ka dalë në vendngjarje për të trajtuar rastin.

Mirëpo, sapo zyrtarët kanë nisur veprimet procedurale, i dyshuari, Flamur Bislimi, 23-vjeçar i cili ishte njëri nga shoferët e përfshirë në aksident, ka shfaqur sjellje arrogante dhe provokuese ndaj tyre.

Sipas Policisë, i njëjti ka penguar zyrtarët në kryerjen e detyrës, duke i fyer dhe shtyrë fizikisht, konkretisht njëri prej zyrtarëve është shtyrë me duar në krahë gjatë përpjekjes për ta vendosur nën kontroll.

Për ta neutralizuar situatën dhe shmangur përshkallëzimin, zyrtarët janë detyruar të përdorin spray OC dhe ta shoqërojnë të dyshuarin në stacionin policor.

Pas intervistimit dhe konsultimit me prokuroren kujdestare, është marrë vendim që Flamur Bislimi të ndalohet për 48 orë për veprën penale “Sulm ndaj personit zyrtar”, ndërsa hetimet janë në zhvillim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.