Hoti: Vendimi i ShBA-së është “zile alarmi” për Kosovën, Osmani s’e mbrojti Kushtetutën nga sulmet e Kurtit

Deputeti i LDK-së, Avdullah Hoti, ka reaguar pas vendimit të Shteteve të Bashkuara për të pezulluar Dialogun Strategjik me Kosovën, duke e cilësuar këtë si një goditje serioze për shtetin dhe me pasoja afatgjata nëse nuk ndryshon kursi politik.

“Goditja që mori dje shteti i Kosovës nga ndërprerja e dialogut strategjik Kosovë-SHBA do të ketë pasoja afatgjata nëse nuk ndryshon kursi i zhvillimeve politike. Të mos harrojmë se jemi edhe nën masa financiare të BE-së për më shumë se dy vjet.”

Ai kritikoi Presidenten Vjosa Osmani, duke thënë se vendimi i ShBA-së do të ishte i shmangshëm nëse ajo do të kishte përmbushur detyrimin kushtetues për të mbrojtur Kushtetutën, gjyqtarët e Gjykatës Kushtetuese, institucionet e drejtësisë, gazetarët, bizneset dhe komunitetet pa dallim nga presioni i deputetit Albin Kurti dhe Vetëvendosjes.

“Ky vendim i SHBA-së do të ishte i shmangshëm sikur Presidentja Osmani ta kishte përmbushur detyrimin e saj kushtetues, duke marrë përgjegjësinë për të mbrojtur Kushtetutën dhe gjyqtarët e Gjykatës Kushtetuese, institucionet gjyqësore e prokuroriale, gazetarët, bizneset dhe komunitetet pa dallim nga sulmet dhe presioni i Kurtit dhe Vetëvendosjes. Në vend të kryerjes së obligimit të saj kushtetues, Osmani në vazhdimësi zgjidhte heshtjen ose radhitej pas Kurtit.” – shtoi Hoti.

Sipas Hotit, vendimi i Uashingtonit është një “zile e re alarmi” për ata që mbajnë përgjegjësi politike dhe institucionale, të cilët, sipas tij, “vitet e fundit Kurti i ka tërhequr zvarrë drejt narratives së tij populiste popullizmit të mbrapshtë që solli këtë vendim të SHBA-së”.

“Ky vendim i SHBA-së është zile e re alarmi për ata që bartin përgjegjësi institucionale apo politike, shumë prej të cilëve viteve të fundit Kurti i ka tërhequr zvarrë drejt narratives së tij të popullizmit të mbrapshtë që solli këtë vendim të SHBA-së.

Zilja ra sërish dhe shumë fuqishëm. Nesër, kur mund të bëhet vonë, askush nuk mund të thotë se nuk u zgjua ngase nuk i ra kush ziles.

Zilja kishte rënë edhe në fillim të vitit 2020. Atëherë, LDK-ja zgjodhi partneritetin me SHBA-në para ruajtjes së pozitave qeveritare.”

Lista Serbe e hap fushatën me himn të Serbisë dhe premtimin për “çlirim nga Kurti”

Nën himnin serb, Lista Serbe ka hapur sot fushatën zgjedhore në Mitrovicë të Veriut.

Kryetari i partisë, Zlatan Elek, tha se më 12 tetor qytetarët, sipas tij, do të çlirohen nga kryetarët “jolegjitimë të Kurtit” në komunat në veri.

“Vetëm të bashkuar dhe të bashkuar mund ta çlirojmë qytetin tonë nga kryetarët e rremë, të paligjshëm dhe jolegjitimë të Kurtit dhe për këtë arsye ju kërkoj të telefononi të gjithë fqinjët, miqtë, kumbarët, të afërmit tuaj më 12 tetor për të thënë se numërimi mbrapsht ka filluar dhe se po shkojmë drejt çlirimit të qytetit tonë. Të bashkuar mund të fitojmë dhe ta shpëtojmë qytetin tonë dhe në fund dua t’ju them – Rroftë Lista Serbe, rroftë populli ynë dhe mbi të gjitha rroftë Serbia”, tha Elek.

Kandidati i Listës Serbe për kryetar të Mitrovicës së Veriut është Milan Radojeviq.

Ndërkaq, Ivan Zaporozhac, anëtar i Listës Serbe dhe udhëheqës i listës së këshilltarëve në Mitrovicë të Veriut, tha se kanë përmbushur një premtim duke mos lejuar formimin e qeverisë nga Prishtina.

“Ne e kemi përmbushur premtimin tonë. Ne nuk lejuam të formohet një qeveri në Prishtinë dhe deputetët tanë po qëndrojnë atje me dinjitet dhe mbështesin vullnetin e këtij populli që Kurti nuk mund të sundojë mbi ne”, ka thënë ai.

Polonia shpall fillimin e operacionit “Roja Lindore”

Shtabi i Përgjithshëm i Ushtrisë Polake ka konfirmuar se operacioni i NATO-s, i quajtur “Roja Lindore”, ka nisur në mënyrë efektive. Ky operacion synon forcimin e krahut lindor të aleancës pas rrëzimit të disa dronëve rusë në territorin polak, ngjarje që ka tensionuar situatën në rajon.

Si pjesë e këtij operacioni, Shtabi i Përgjithshëm ka publikuar pamje të uljes së një avioni transportues francez A400 në aeroportin Minsk Mazowiecki, i cili dorëzoi armë për aeroplanët luftarakë Rafale, që tashmë ndodhen në Poloni.

Fillimi i operacionit ishte sinjalizuar më herët nga Sekretari i Përgjithshëm i NATO-s, Mark Rutte, dhe komandanti suprem i forcave aleate për Evropën, Gjenerali Aleksus Grinkevich.

“Pika kyçe është një strukturë krejtësisht e re mbrojtëse,” theksoi ushtria polake.

Forcat aleate që do të marrin pjesë në këtë operacion përfshijnë vende si Danimarka, Franca, Mbretëria e Bashkuar, Gjermania dhe të tjera.

Ministri i Mbrojtjes i Polonisë, Vladislav Kosiniak-Kamysz, deklaroi pas konferencës së NATO-s:

“Ne e dimë se mbrojtja heroike e Ukrainës është e lidhur me të ardhmen e Evropës. Kjo është arsyeja pse po forcojmë aftësitë tona mbrojtëse. Uniteti është forcë dhe gatishmëria është fitore.”

 

Sirena alarmi në Poloni për shkak të kërcënimit me dron, mbyllet aeroporti, avionët luftarakë ngrihen në ajër

Autoritetet në Poloninë lindore, në rajonin kufizues me Ukrainën, u vunë në gatishmëri të lartë të shtunën pasdite, pasi u raportua një kërcënim me dron, me sa duket rus.

Sipas raportimeve, avionë luftarakë u ngritën për t’u përballur me kërcënimin. Në të njëjtën kohë, Aeroporti i Lublinit u mbyll, ndërsa sirenat e alarmit u dëgjuan në disa zona.

https://x.com/nexta_tv/status/1966889057163657695?ref_src=twsrc%5Etfw%7Ctwcamp%5Etweetembed%7Ctwterm%5E1966889057163657695%7Ctwgr%5Edcfcb3d78c70900ffcbb7b631ef1086ee4739757%7Ctwcon%5Es1_&ref_url=https%3A%2F%2Ftop-channel.tv%2F2025%2F09%2F13%2Fvideo-sirena-alarmi-ne-poloni-per-shkak-te-kercenimit-me-dron-mbyllet-aeroporti-avionet-luftarake-ngrihen-ne-ajer%2F

“Nëse shkohet në zgjedhje, VV-ja do të ketë rënie”

Shtatë muaj pas mbajtjes së zgjedhjeve të fundit nacionale ende nuk kemi konstituim të plotë të Kuvendit të Kosovës.

Mbi këtë cështje, gazetari dhe analisti Lavdim Hamidi ka thënë se fajin për këtë bllokadë institucionale e bartë partia e cila doli e para në zgjedhjet e fundit, Lëvizja Vetëvendosje

“Parti e cila ka dalë e para në zgjedhjet e fundit, Lëvizja Vetëvendosje, me gjasë po frigohet për shkak se nuk mund t’a bëjë Qeverinë andaj po mundohet përmes makinacioneve të ndryshme t’i shtyej afatet kohore”- u shpreh Hamidi.

Në një prononcim për GazetaBlic, Hamidi shprehet se vendi do të shkojë në zgjedhje përsëri, pasi që nuk sheh zgjidhje tjetër për formimin e Qeverisë.

“Po padyshim, nuk ka rrugëdalje tjetër. Zgjedhjet do të ndodhin, është cështje kur do të ndodhin? A do të ndodhin në kohën e balotazhit kur do të ketë votim në raundin e dytë për kryetar të komunave apo do të bëhet një kompromis përmes forcave politike parlamentare që zgjedhjet të mbahen në fillim të vitit të ardhshëm kur do t’i skadojë mandati presidentes Osmani dhe të njejtën kohë të ketë zgjedhje që të dalë një legjislaturë e re, të formohet Kuvendi dhe të sigurohen votat e nevojshme për zgjedhjen e presidentes”- theksoi Hamidi.

Po ashtu, ai theksoi se në qoftë se vendi do të shkojë në zgjedhje të reja, Lëvizja Vetëvendosje do të pësojë rënie të votave, sepse patën besimin e qytetarëve dhe dështuan.

“Eshtë herët të flitet por padyshim se partia e parë do të shënoj rënie, këtë do t’a tregojnë qytetarët në kutitë e votimit. Për shkak të këtyre bllokadave që kanë ndodhur në konstituimin e Kuvendit, fajin kryesor e kanë ata. Besimin e qytetarëve e kanë marrë për formimin e insitutcioneve dhe nuk e bënë një gjë të tillë, dështuan”- tha ai.

Sipas tij, as opozita nuk do të pranojë të bëjë koalicion me Lëvizjen Vetëvendosje.

“Albin Kurti e akuzoi rëndë opozitën, i quajti “Hajvana” andaj nuk ka gatishmëri prej opozitës për ndonjë marrëveshje, koalicion”- perfundoi Hamidi.

Rrahje brutale në mes të dy vajzave në Drenas, publikohen pamjet

Dy vajza të një shkolle të mesme në Drenas janë rrahur brutalisht mes vete në oborrin e shkollës.

Aty shihet se janë munduar të ndërhyjnë edhe persona të tjerë për t’i ndarë.

Autoritetet pritet të merren me rastin.

Vrasja mes rafteve të “Interex”, shtyhet gjykimi

Sot ishte paraparë të mbahej seanca e radhës në Gjykatën Themelore të Prishtinës, lidhur me rastin tronditës të vrasjes që ndodhi më 11 shtator 2023 në supermarketin “Interex” në Podujevë.

Megjithatë, seanca nuk u mbajt për shkak të mungesës së gruas së viktimës, e cila është edhe dëshmitare kyçe në këtë proces.

E dëmtuara, Lirie Sylejmani e cila ishte plagosur rëndë në ngjarje nuk ishte në gjendje të marrë pjesë në seancë për shkak të një ndërhyrjeje kirurgjikale të cilën e ka kryer ditëve të fundit. Në mungesë të kuorumit, seanca është shtyrë dhe pritet të caktohet një datë e re.

Sipas aktakuzës së ngritur nga Prokuroria Themelore në Prishtinë më 18 mars 2024, i akuzuari Arsim Syla dyshohet se ka organizuar vrasjen e Valmir Breznicës përmes djalit të tij të mitur, L.S., si akt hakmarrjeje për një konflikt të mëhershëm.

Ngjarja ndodhi në mesditën e 11 shtatorit 2023. Viktima Valmir Breznica, bashkëshortja e tij Lirie Sylejmani dhe djali i tyre 4-vjeçar ndodheshin në supermarket për të bërë blerje. Pikërisht tek sektori i qumështit, ndodhi e papritura.

I mituri L.S., sipas Prokurorisë, u afrua nga pas dhe qëlloi me armë zjarri në drejtim të Valmirit – fillimisht në shpinë e qafë, pastaj edhe në kokë, duke e lënë të vdekur në vend. Një nga plumbat plagosi edhe bashkëshorten e tij, e cila në atë moment ishte duke mbrojtur fëmijën.

Lidhur me rastin, hetimet vazhdojnë.

Kajtazi i ashpër me VV-në: Janë antishqiptar, urgjencë kombëtare të largohen

Analisti politik, Vehbi Kajtazi ka thënë se kryeministri në detyrë, Albin Kurti, po kryen tradhti kombëtare.

Kështu u shpreh ai mbrëmë në emisionin “Rubikon” të Klan Kosovës, lidhur me pezullimin e dialogut strategjik ShBA-Kosovë.

Ndër të tjera Kajtazi tha se është urgjencë kombëtare që Lëvizja Vetëvendosje të largohet nga pushteti, transmeton Klankosova.tv.

“Ky është duke kryer tradhti kombëtare, sepse ky njeri nuk i shërben Kosovës. Ama një fakt që Albin Kurti i shërben Kosovës? Këta janë antishqiptar, është urgjencë kombëtare që Albin Kurtin me krejt këtë strukturë kriminale me i largu, përndryshe ky vend nuk ka me pas të ardhme”, u shpreh Kajtazi.

E trishtë: 21-vjeçari e rrahu nënën vetëm pse shkoi në shitore

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Sinjali mëson se një rast i tillë është raportuar dje rreth orës 14:00 në fshatin Lumbardh të Deçanit.

Sipas burimeve, i dyshuari F.L., rreth 22-vjeëar ka ushtruar dhunë ndaj nënës së tij, C.H, rreth 51-vjeçare.

Ngjarja ka ndodhur pasi viktima kishte shkuar në shitore për të blerë cigare, ndërsa në momentin që është kthyer, djali i saj ia ka mbyllur derën e oborrit. Pasi ia ka hapur derën, e ka kapur për flokë dhe e ka futur me dhunë në oborr, duke i dhënë edhe dy shuplaka në kokë.

Rasti është parë nga dëshmitarja, e cila ka njoftuar Policinë. Patrulla ka ndërhyrë menjëherë dhe ka shoqëruar në stacionin policor si viktimën, ashtu edhe të dyshuarin.

Burimet e Sinjalit bëjnë me dije se i dyshuari jeton vetëm me nënën dhe është kujdestari i saj i vetëm, ndërsa ky është rasti i parë i raportuar i dhunës nga ana e tij. Me vendim të prokurorit kujdestar, 21-vjeçari është ndaluar për 48 orë.

Viktima, pas trajtimit mjekësor, është liruar dhe është kthyer në shtëpi, ndërsa rasti është duke u hetuar.

Serbi i arrestuar dje për krime lufte dyshohet se mori pjesë në vrasjen e…

Me urdhër të Prokurorisë Speciale, hetuesit nga Drejtoria për Hetimin e Krimeve të Luftës, të premten kanë arrestuar personin me inicialet R.D, nën dyshimin për krime lufte gjatë luftës në Kosovë.

Policia e Kosovës në raportin e sotëm ka thënë se ai dyshohet se kreu krime lufte kundër popullatës civile në komunën e Vushtrrisë në vitin 1999 dhe se ai ka marrë pjesë në vrasjen e 71 civilëve shqiptarë.

Policia tha se ai dyshohet se veprën e ka kryer në grup si zyrtar i mobilizuar me njësi të përbëra nga MUP-i serb.

“Komuna Vushtrri 22.05.1999. Sektori për Hetimin e Krimeve të Luftës, më 12.09.2025 pas një pune operative, është ndaluar i dyshuari mashkull kosovar, i dyshuar për veprën penale “Krime lufte kundër popullatës civile” të kryer gjatë luftës në Kosovë 1998-1999 në komunën e Vushtrrisë. Vepra penale është kryer gjatë periudhës kohore 22 maj 1999, duke vepruar në grup dhe të organizuar si zyrtar i mobilizuar me njësi të përbëra nga MUP serb, ka marrë pjesë në privimin nga jeta-vrasjen e 71 civilëve shqiptarë. Pas intervistimit, me vendim të prokurorit i dyshuari është dërguar në mbajtje”, tha sot policia.

Prokuroria Speciale dje tha se në bashkëpunim me Policinë e Kosovës, përkatësisht hetuesit nga Sektori për Hetimin e Krimeve të Luftës, është duke ndërmarrë dhe do të ndërmarrë të gjitha veprimet e nevojshme hetimore, në përputhje me Kodin e Procedurës Penale dhe legjislacionin në fuqi.