Vdes babai i Salih Mustafës
Ka ndërruar jetë babai i Salih Mustafës, shkruan GazetaDemos.
I njëjti që disa ditë ishte në gjendje të rëndë shëndetësore.
Ndërkaq, duhet të ceket se Gjykata Speciale nuk ia lejoi takimin me babain Salih Mustafës.
Haliti:Pas 28 dhjetorit, Kurtin do ta shohim në opozitë
Kandidati për deputet nga radhët e Partisë Demokratike të Kosovës, Xhavit Haliti ka thënë se pas zgjedhjeve parlamentare të 28 dhjetorit, Kurti dhe LVV do të jenë në opozitë.
Ai ka thënë se Kurti nuk ka qenë në gjendje të formojë Qeverinë si fitues i zgjedhjeve dhe se e ardhmja e tij politike do të jetë opozita.
“Kurti nuk ka qenë i zoti me ba Qeverinë. Kjo është paaftësi e tij me komunikua me partitë politike dhe me njerëz që mbase kishin pranuar me hy në koalicion me të. Pas këtyre zgjedhjeve, Kurtin do ta shohim në opozitë, kjo është e ardhmja e tij politike”, ka thënë Haliti në emisionin “InfoNata” në Tëvë1.
Sa i përket pritjeve të PDK-së, ka thënë se janë të mobilizuar për t’i fituar zgjedhjet.
Ai tha se në zgjedhjet e kaluara ka vërejtur një hezitim për ta votuar PDK-në, por kësaj radhe siç ka thënë ai do të jetë ndryshe.
“Fushata e PDK është duke shkuar mirë, Bedriu është njeri i qëlluar dhe po pritet mirë në opinion, partia është e mobilizuar për t’i fituar zgjedhjet. Kjo është situata. Në zgjedhjet e kaluara kam hetuar se ka pasur një hezitim për ta votuar PDK-në, por kësaj radhe nuk ka”, ka thënë Haliti.
Haliti ka komentuar edhe deklarata e Kurtit për premtimet e partive tjera dhe posaçërisht ato të kandidatit për kryeministër të PDK-së, Bedri Hamza për rritje pagash.
Ai ka thënë se për këto do të ishte mirë që Hamza e Kurti t’i ballafaqojnë argumentet, por siç ka thënë ai “ nuk e besoj që z.Kurti është në gjendje me ulur me z.Hamza për të trajtuar çështjet që po flasim”
Buzhala: Qeveria s’është për sadaka, për këtë punë është Halil Kastrati – veprim i ndyrë i Kurtit
Gazetari Berat Buzhala, në emisionin Rubikon në Klan Kosova, ka kritikuar vendimin e fundit të tij për të ndarë nga 100 euro për fëmijë dhe pensionistë në prag të zgjedhjeve të parakohshme parlamentare të 28 dhjetorit.
Ai tha se ky nuk është segmenti i vetëm ku Albin Kurti e ka bërë të kundërtën e asaj çka e ka thënë.
“Kurtit edhe i leverdis ngapak që ne diskutojmë tash këtë çështje. Çka ka bërë ky, e ka shtrirë horizontalisht sadakanë, të prek sa më shumë nëna, fëmijë, njerëz që kanë nevojë, por qeveri nuk duhet me qenë organizatë e tillë, sepse për ashtu e kemi Halil Kastratin. Pra, ne kemi organizata që ndihmojnë njerëz, që e kanë punë të veten ata”, deklaroi Buzhala.
Veprimin e Kurtit, Buzhala e quajti “të ndyrë”.
Në ndërkohë, ai foli edhe për situatën me energjinë elektrike në vend, e cila po shkon duke u përkeqësuar.
“Por të mos harrojmë një gjë, sepse dëshira e tij është që ne të diskutojmë për këto, por në 24 orët e fundit ka rënë Blloku 1 i Kosovës B nga sistemi, dhe është hera e dytë që po bie, dhe është rinovuar me 40 milionë euro në pranverë. Për rrymën që e kemi blerë në 24 orët e fundit, vetëm transporti i 1 MW na ka kushtuar 800 euro. Pra, vetëm transporti i tij. Blerja ka kushtuar 90 euro, e transporti 800 euro. Pra, sikur me ble një frigorifer për 100 euro, e transporti me të kushtu deri në shtëpi për 800 euro. Pra kompania që e bën transportin është një kompani greke, me të cilën Kurti është takuar në Greqi”, u shpreh gazetari Berat Buzhala.
Ai bëri thirrje për qytetarët që të mos e shesin votën për 100 eurot e ndara nga Kurti.
Bekim Jashari reagon ndaj deklaratave që krahasojnë veprimet e Qeverisë me krimet e Millosheviqit
Bekim Jashari ka reaguar në Facebook duke i cilësuar si të turpshme dhe të papranueshme disa deklarata të individëve dhe politikanëve të vendit, sidomos atyre që thirren si “shokë” të Kryekomandantit Adem Jashari, të cilët kanë krahasuar veprimet legjitime të Qeverisë së Kosovës për shtrirjen e sovranitetit dhe integritetit territorial në veri me krimet e regjimit gjenocidal të Slobodan Millosheviqit.
Në reagimin e tij, Jashari thekson se krahasime të tilla nuk janë thjesht padije ose lapsus politik, por fytyrë e rëndë ndaj sakrificës së popullit shqiptar. Ai shprehet se veprimet e shtetit të Kosovës, përfshirë shuarjen e strukturave paralele ilegale dhe garantimin e funksionimit të institucioneve në çdo cep të vendit, nuk mund të krahasohen me sundimin e përgjakshëm të Serbisë mbi shqiptarët.
“Populli na njeh mirë. Ai nuk ka harruar të bëmat e secilit prej nesh: kush kemi qenë, çfarë kemi bërë dhe si jemi sjellë ndër vite, sidomos në momentet më të vështira për vendin. Historia nuk fshihet me deklarata ditore dhe as nuk rishkruhet për interesa politike,” shkruan Jashari, duke bërë thirrje për unitet, maturi dhe përgjegjësi kombëtare.
Ai thekson se politika duhet të jetë instrument bashkimi rreth interesave strategjike të Kosovës, dhe jo mjet për përçarje, relativizim të krimeve serbe dhe përfitime partiake. Jashari përfundon duke u bërë thirrje për lidership të përgjegjshëm, me dinjitet kombëtar, që i shërben shtetit dhe atdheut, jo interesave personale apo kalkulimeve politike afatshkurtra.
Postimi i plotë:
Vjen premtimi i madh: Një mijë euro paga…
Kryetari i Lidhjes Demokratike të Kosovës dhe kandidati për kryeministër, Lumir Abdixhiku, ka zhvilluar një takim me mësimdhënës, ku ka theksuar rolin e tyre në edukimin e brezave të rinj dhe rëndësinë e arsimit si themel i zhvillimit të vendit.
Abdixhiku ka deklaruar se mësimdhënësit, pavarësisht sfidave, lodhjes dhe mungesës së vlerësimit institucional ndër vite, kanë vazhduar të kryejnë misionin e tyre, duke e cilësuar shkollën si hapësirën ku formohen dija, karakteri dhe e ardhmja e Kosovës.
Në këtë kuadër, ai ka prezantuar zotimet e LDK-së për sektorin e arsimit, duke përfshirë rritjen e pagës në 1000 euro për secilin mësimdhënës, ndërtimin e 80 çerdheve të reja, si dhe zbatimin e mësimit tërëditor me shujta të ngrohta, aktivitete sportive dhe qëndrim tetëorësh në shkollë.
Po ashtu, Abdixhiku ka bërë të ditur se programi i LDK-së parasheh futjen e kodimit dhe inteligjencës artificiale si lëndë mësimore në shkolla, duke theksuar se arsimi është prioritet i partisë dhe se modeli i zbatuar në Prishtinë synohet të shtrihet në të gjithë Kosovën.
Postimi i plotë:
Për mësimdhënësit dhe mësimin.
Takuam mësimdhënësit. Ata që mbajnë mbi supe barrën më të rëndë të këtij vendi: edukimin e brezave të rinj. Ata që, edhe kur janë nënvlerësuar, të lodhur e shpesh të lënë pas dore nga politika, nuk e kanë lëshuar kurrë misionin e tyre. Sepse shkolla nuk është thjesht një ndërtesë, por vendi ku formohet karakteri, dija dhe e ardhmja e Kosovës.
Prandaj, zotimet tona për arsimin janë të qarta dhe të panegociueshme.
Pagë 1000 euro për secilin mësimdhënës, si respekt real për profesionin dhe dinjitetin e tyre.
Ndërtimin e 80 çerdheve të reja, që fëmijët të kenë fillimin e duhur dhe prindërit mbështetjen që u mungon sot.
Mësimin tërëditor, për shkollë më cilësore, për barazi më të madhe dhe për zhvillim të plotë të nxënësve. Shujta të ngrohta; sport e 8 orë në shkollë.
Dhe futjen e kodimit dhe inteligjencës artificiale si lëndë në shkolla, sepse Kosova nuk duhet të përgatitet për të djeshmen, por për botën e së nesërmes.
Arsimi është themeli.
Dhe aty fillon çdo ndryshim i vërtetë.
LDK dhe ekipi ynë janë të vetmit që kanë sot arsimin si prioritet. Me shembuj konkret nga Prishtina; me model për gjitjë Kosovën. 
Kurti jep lajmin: Ndan nga 100 euro për fëmijë dhe pensionistë
Postimi i Albin Kurtit:
Me 28 dhjetor fitojmë bindshëm dhe festojmë, pastaj me 29 dhjetor gëzohen të gjithë fëmijët e pensionistët.
Sepse me fitoren tonë, Viti i Ri vjen më herët.
Sikurse çdo vit, edhe sivjet kemi vendosur të mbështesim fëmijët dhe pensionistët me shtesat e fundvitit prej 100 eurove.
Mosvotimi i buxhetit nga opozita na e ka vështirësuar punën tejmase, mirëpo ne e kemi bërë të pamundurën që edhe këtë vit të sigurojmë mbështetjen e fundvitit, e cila do të procedohet para natës së Vitit të Ri.
Urime festat e fundvitit, dhe t’i gëzoni bashkë me familjet tuaja!
“Vetëm gjykata vendos” – Kryeziu kundër Policisë për konfiskimin e patentave të shoferëve
Kandidati për deputet nga Partia Demokratike e Kosovës (PDK), Qëndrim Kryeziu (103), ka reaguar përmes një statusi publik lidhur me konfiskimin e patentave të shoferëve nga Policia e Kosovës dhe Ministria e Punëve të Brendshme.
Sipas Kryeziut, organi i vetëm kompetent për pezullimin e patentës së shoferit është gjykata, duke u bazuar, siç thotë ai, në Kushtetutën e Republikës së Kosovës, shkruan Gazeta Imazhi.
“Për ju shoferë që iu është konfiskuar patenta nga policia dhe Ministria e Xhelal Sveçlës, ju njoftoj se organi kompetent dhe i vetëm për pezullimin e patentës është gjykata”, ka shkruar Kryeziu.
Ai shton se, sipas tij, ministria nuk ka të drejtë ta marrë patentën e shoferëve, pasi ajo është lëshuar nga shteti dhe vetëm gjykata mund të vendosë për heqjen apo pezullimin e saj.
Kryeziu ka paralajmëruar se, nëse PDK vjen në pushtet, do të ndërmerren veprime për kthimin e patentave të shoferëve, ndërsa në të ardhmen vendimet për ndalim të drejtimit do t’i takojnë vetëm gjykatës.
“Sapo të vijmë në pushtet, patentat e shoferëve do t’ua kthejmë, ndërsa gjykata do të vendosë pastaj se kujt do t’ia marrë”, ka theksuar ai.
Vritet një 71-vjeçare nga Kosova në Zvicër
Cyrihu është tronditur nga një ngjarje e rëndë kriminale, ku një grua 71-vjeçare me origjinë nga Kosova ka humbur jetën si pasojë e një akti të dhunshëm.
Ngjarja ka ndodhur në komunën Buchs, në kantonin e Cyrihut.
Sipas mediave zvicerane dhe njoftimit zyrtar të Policisë Kantonale të Cyrihut, autoritetet kanë ndërhyrë pas marrjes së një alarmi dhe kanë gjetur viktimën pa shenja jete.
Në vendngjarje janë arrestuar tre persona të dyshuar për përfshirje në rast: një grua 48-vjeçare dhe dy burra të moshave 27 dhe 51 vjeç, të gjithë shtetas zviceranë.
Policia ka konfirmuar se hetimet janë në zhvillim, ndërsa motivi i krimit dhe rrethanat e sakta ende nuk janë bërë publike. Prokuroria kantonale ka marrë përsipër rastin dhe pritet që në ditët në vijim të ketë më shumë informacione zyrtare.
Ngjarja ka ngjallur reagime dhe shqetësim në opinionin publik, ndërsa autoritetet kanë siguruar se po punojnë intensivisht për zbardhjen e plotë të rastit.
Sa % do t’i marrë Vetëvendosje sipas Kurtit
Pak ditë na ndajnë nga zgjedhjet parlamentare të 28 dhjetorit.
Kryetari i VV-së, Albin Kurti është shprehur optimist për një fitore të madhe të Vetëvendosjes.
“Zgjedhjet e kaluara kishim mbi 42%, tani synojmë mbi 50%”, ka thënë Kurti.
Qeveria shpërndan 100 eurot e shumë përfolura
Katër ditë para zgjedhjeve të parakohshme parlamentare të 28 dhjetorit, Ministria e Financave, përkatësisht Thesari i Shtetit ka ekzekutuar subvencionet prej 100 euro për grupin e dytë të studentëve.
Paparaci merr vesh se studentët kanë pranuar në llogaritë e tyre shumën prej 100 eurove.
Grupi i parë i studentëve u subvencionuan tre ditë para raundit të dytë të zgjedhjeve lokale që ishin mbajtur më 9 nëntor.
Atëkohë, studentët u njoftuan përmes një mesazhi në numrat e tyre të telefonit për alokimin e mjeteve.
“Të dashur studentë, më lejoni të ju uroj vitin e ri akademik me lajmin e mirë se ju jeni kualifikuar si përfitues të shtesës së njëhershme prej 100 EUR. Me qeverinë tonë, studentët gjithmonë do ta kenë mbështetjen e shtetit. I juaji, Albin Kurti, kryeministër në detyrë i Republikës së Kosovës”, thuhej në mesazhin telefonik.
Vendimi për subvencionimin me nga 100 euro për studentët ishte marr në tetor të këtij viti, ku ishte njoftuar se përfitues janë mbi 40 mijë studentë.