Evrodeputeti polak e djeg flamurin e Bashkimit Evropian

Eurodeputetit polak të ekstremit të djathtë, Grzegorz Braun , i cili kandidon për president të Polonisë në zgjedhjet e ardhshme, iu hoq imuniteti parlamentar.

Gjatë një vizite në një institucion shtetëror në Katowice të Polonisë, Braun vuri re flamurin e Bashkimit Evropian pranë flamurit polak në korridor. Ai iu afrua flamurit, e hoqi dhe pastaj e hodhi në mënyrë demonstrative në dysheme.

“Emblema të tilla nuk i nënshtrohen asnjë mbrojtjeje ligjore në territorin e Republikës së Polonisë. Kjo është Polonia, jo Brukseli”, bërtiti Brauni.

Pastaj, për ta përfunduar këtë vepër, ai e spërkati flamurin me benzinë ​​dhe i vuri flakën në oborrin e institucionit.

“A kështu trajtohet një mik?” – Thirrja e fortë në Parlamentin Evropian për Kosovën nga eurodeputeti holandez

Eurodeputeti holandez, Thijs Reuten ka bërë thirrje të fuqishme që Këshilli i Bashkimit Evropian të heqë pengesat dhe të pranojë aplikimin e Kosovës për anëtarësim në BE.

Në një fjalim të mbajtur në Parlamentin Evropian, Reuten theksoi se Kosova është një partner që ndan vlerat dhe perspektivën gjeopolitike të BE-së, dhe se bllokimi i aplikimit të saj për anëtarësim është i papranueshëm.

“Kosova është partneri ynë, ndan vlerat tona dhe ka të njëjtin orientim gjeopolitik. Megjithatë, Këshilli i BE-së vazhdon të bllokojë pranimin e thjeshtë të kërkesës për anëtarësim të këtij partneri. A kështu trajtohet një partner?” u shpreh Reuten, duke kritikuar qëndrimin e Këshillit.

Ai i bëri thirrje BE-së të heqë masat kufizuese, të normalizojë marrëdhëniet mes të gjitha vendeve anëtare dhe Kosovës, si dhe të njohë zyrtarisht shtetësinë e saj.

Reuten propozoi gjithashtu që, edhe pa miratimin e Këshillit, Komisioni Evropian mund të nisë përgatitjen e opinionit për aplikimin e Kosovës, si një hap drejt integrimit të mëtejshëm.

Kosova ka dorëzuar zyrtarisht aplikimin për anëtarësim në BE më 15 dhjetor 2022, por procesi mbetet i bllokuar për shkak të mosnjohjes së pavarësisë së saj nga Serbia dhe pesë vende anëtare të BE-së: Qipro, Greqia, Rumania, Sllovakia dhe Spanja.

Sondazhi i fundit: Vetëvendosje ka rënie, tani është te 37%

Ish-diplomati Blerim Camaj, ka folur lidhur me zhvillimet politike në vend.

Camaj foli edhe rreth mundësisë së shkuarjes në zgjedhje të jashtëzakonshme.

Sipas tij, edhe nëse ndodh kjo nuk do të ndryshonte shumë në rezultat.

Madje, ai tha se sipas një sondazhi që ka parë Lëvizja Vetëvendosje ka pësuar rënie.

“Dëgjova për një sondazh të fundit ku Lëvizja Vetëvendosje ka pësuar rënie. Po mua mu tha që tani është te 37 përqindëshi”, deklaroi Canaj në Klan Kosova.

Vuçiq sfidon Perëndimin: “Po shkoj te Putini, po s’u pëlqeu, më ndëshkoni mua”

Presidenti i Serbisë, Aleksandar Vuçiq, ka zgjedhur të marrë pjesë në paradën ushtarake në Moskë për nder të 80-vjetorit të fitores ndaj fashizmit, pavarësisht tensioneve me Perëndimin. Ai e ka përshkruar pjesëmarrjen si një akt personal që mund të ketë pasoja për të.

“Jam i bindur se Serbia do të mbetet në rrugën evropiane. Nëse BE-ja dëshiron të ndëshkojë dikë, le të më ndëshkojë mua. Unë do ta pranoj dënimin dhe do të kërkoj që të mos ndëshkohet i gjithë vendi”, tha Vuçiq.

Vuçiq mbërriti në Moskë përmes Bullgarisë, Turqisë dhe Azerbajxhanit, pasi Letonia dhe Lituania nuk i lejuan kalimin e avionit presidencial në hapësirën e tyre ajrore. Ai u prit nga zëvendësministri i Jashtëm rus, Aleksandar Grushko.

“Udhëtuam përmes Bullgarisë, Turqisë dhe Azerbajxhanit, dhe kur na u lejua korridori, vazhduam rrugën. Mbërrita në Moskë ku më priti zëvendësministri i Punëve të Jashtme, Aleksandar Grushko, një nga figurat më të rëndësishme të diplomacisë ruse”, tha Vuçiq.

Disa ministra serbë kishin kërkuar masa reciproke ndaj Letonisë dhe Lituanisë, por Vuçiq tha se ai ishte kundër.

“Populli serb nuk ka pse të turpërohet, por duhet të jetë krenar për luftën e tij kundër fashizmit. Nëse ndonjë popull ka të drejtë të krenohet me luftën kundër fashizmit, ai është populli serb”, shtoi ai.

Ai do të takohet me patriarkun Kirill, ku do t’i dorëzojë një dekoratë, si dhe me presidentin e Kazakistanit, Zhomart Tokajev. Të premten, pas paradës, Vuçiq do të ketë takime me presidentin kinez Xi Jinping dhe më pas me presidentin rus Vladimir Putin.

Lufta Pakistan- Indi, lajmërohet kosovari që jeton atje: Nuk di as çka do të bëjë…

Pas shpërthimit të luftës mes Indisë dhe Pakistanit, është lajmëruar i shqetësuar një kosovar që jeton atje.

Ceki Hoti, përmes një video në TikTok, iu është përgjigjur ndjekësve, të cilët e kanë pyetur pse nuk po largohet nga Pakistani.

Ai deklaron se nuk po mundet të largohet pasi janë mbyllur rrugët.

“Ja ka nisë lufta mes Pakistanit dhe Indisë, nuk muj me ikë, se s’ka, portet janë mbyllë, rrugët janë mbyllë, s’kam viza ka me shku, kshtu që cka ka me bo s’di as vet, po jam tu kqyrë” thotë ai në një video në Tiktok, drejtuar ndjekësve.

Dy javë pas një sulmi vdekjeprurës terrorist në rajonin e kontestuar të Kashmirit, India ka lëshuar raketat drejt Pakistanit. Qeveria indiane pretendon se ka kryer nëntë “sulme precize ndaj kampeve terroriste” në Kashmir. Pakistani, në anën tjetër, thotë se ka rrëzuar disa aeroplanë indianë dhe kërcënon me një kundërpërgjigje të menjëhershme ndaj Indisë.

Përshkallëzimi i tensioneve nuk është befasues. Që pas sulmit terrorist të 22 prillit, zyrtarët indianë fajësuan grupin terrorist pakistanez Lashkar-e-Taiba dhe akuzuan autoritetet pakistaneze për bashkëpunim.

Kryeministri pakistanez, Shehbaz Sharif, i hodhi poshtë këto akuza dhe i bëri thirrje Shteteve të Bashkuara që të ndikojnë mbi Indinë për të shmangur përshkallëzimin. Këto sugjerime nuk u morën parasysh nga Nju-Delhi

Qeveria Kurti, LDK-ja merr këtë vendim

Lidhja Demokratike e Kosovës në ora 13:15 do të dorëzon kallëzim penal, për keqpërdorim të detyrës zyrtare dhe tejkalim të autorizimeve ndaj ish-Kryeministrit Kurti dhe ish ministrave, të rizgjedhur deputetë.

 

 

 

Në njoftimin e tyre, thuhet se ky kallëzim do të dorëzohet në Prokurorinë Speciale, në Prishtinë.

Njoftimi i plotë:

Të nderuar përfaqësues të medieve,

Sot (e enjte), në orën 13:15, Lidhja Demokratike e Kosovës dorëzon kallëzim penal për keqpërdorim të detyrës zyrtare dhe tejkalim të autorizimeve ndaj ish-Kryeministrit Kurti dhe ish ministrave, të rizgjedhur deputetë.

Vendi: Prokuroria Speciale, Prishtinë.

Haradinaj: Nuk marrim pjesë në tryezën për qeveri tranzicioni me VV-në

Kryetari i AAK-së, Ramush Haradinaj, ka theksuar se partia e tij nuk do të marrë pjesë në tryezën për krijimin e një qeverie tranzicioni që përfshin Lëvizjen Vetëvendosje, duke i referuar përpjekjeve të tjera të partive opozitare për të negociuar me Albin Kurtin.

“[A merr pjesë AAK-ja në një tryezë për krijimin e një qeveri tranzicioni ku është edhe VV-ja?] Jo, po aty opozita atëherë përfaqësohet prej atyre që veçse kanë bërë takime me VV-në, si rasti i PDK-së, LDK-ja nuk ka pasur takim por kanë komunikuar me letra. Ne jemi përfaqësuar përmes tyre, ne vet nuk marrim pjesë, ne e kemi sqaruar pozicionin tonë. Po ashtu siç kemi mendim se çfarë bëjnë ata tjerët, nuk i ndalojmë kolegët tjerë të opozitës që t’i konsumojnë këto mundësi”, ka deklaruar Haradinaj.

Ai gjithashtu ka theksuar se AAK-ja nuk është dakord me nxitimin e Kurtit për të shpallur veten kryeministër pa marrë akoma përgjigje nga LDK-ja pas letrës së dërguar për koalicion.

“Unë nuk po shoh që ka shumë perspektiv, është më se e qartë që Albini ende pa marrë përgjigjen e LDK-së thoshte unë jam kryeministri, në rregull ti mos thuaj prit njëherë çfarë thonë këta që u ke dërguar një letër, pra ishte i palogjikshëm nxitimi ashtu”, ka theksuar ai në Debat Plus

Haradinaj ka shtuar se, përkundër kësaj, AAK-ja është e hapur për komunikim me opozitën dhe mbështet bashkëpunimin opozitar, por pa krijuar “ura” me VV-në.

“Ne me opozitën mund të kemi më shumë komunikim, ta zëmë nuk humb asgjë LDK nëse komunikon më shumë me PDK-në, se jemi opozitarë në bazë të detyrës, sikur të kishim qenë në opozitë me VV-në do të ishte e logjikshme me komuniku me ta. Jam për të mos u mbyllur dyert, përpos gatishmërisë tonë që mos me kriju ura me VV-në, ne jemi të interesuar me bashkëpunim opozitarë”, ka deklaruar Haradinaj.

Ky është moti për sot

Sot parashikohet të mbajë mot me diell dhe vranësira, ku mund të ketë reshje të izoluara shiu në zona të caktuara, të shoqëruara me ndonjë vetëtimë dhe bubullimë.

Era do të fryjë nga perëndimi dhe jugperëndimi, e cila shpesh herë pritet të jetë mjaft e fuqishme në pjesën më të madhe të vendit, me shpejtësi prej 20-70 km/h. Ka mundësi të ketë dëme materiale, raporton MeteoKosova, transmeton Gazeta Sinjali.

 

 

Temperaturat minimale do të lëvizin nga 8 deri në 11°C, ndërsa ato maksimale nga 20 deri në 22°C.

Nga fjalët te raketat? Frika për një përshkallëzim të madh mes Indisë dhe Pakistanit

Pakistani është zotuar të kundërpërgjigjet kundër Indisë, duke paralajmëruar se rezervon të drejtën për t’iu përgjigjur sulmeve me raketa gjatë natës në një “kohë, vend dhe mënyrë që zgjedh vetë”.

Islamabadi e konsideroi sulmin e Indisë një “akt lufte” që pretendon se ka synuar qëllimisht zonat civile, duke vrarë të paktën 26 persona dhe duke plagosur 46 të tjerë – një akuzë e mohuar kategorikisht nga New Delhi.

Ndërsa Pakistani zhvendosi tanke pranë Kashmirit të mërkurën, kryeministri Shehbaz Sharif tha se forcat e armatosura ishin autorizuar të ndërmerrnin “veprime përkatëse”, shkruajnë mediat e huaja, përcjell Telegrafi.

Banorët që jetonin rreth kufirit de facto ikën sot pasi India nisi sulme ndaj asaj që i quajti nëntë “kampe terroriste” brenda Pakistanit gjatë natës.

Të dy vendet e armatosura me armë bërthamore shkëmbyen më pas zjarr artilerie.

Pakistani tha se pesë njerëz u vranë në granatimet pranë Vijës së Kontrollit, dhe India tha se të paktën shtatë u vranë nga ana e tyre.

Dhe ndërsa “tymi u qetësua”, ushtria indiane këtë mëngjes tha se kishte qenë proporcionale në veprimet e saj, “e fokusuar, e matur dhe jo-përshkallëzuese”.

Por Komiteti i Sigurisë Kombëtare i Pakistanit, i kryesuar nga kryeministri, tha se sulmet ishin kryer me një “pretekst të rremë” të “kampeve imagjinare terroriste”.

India thotë se po sulmonte bazat e përdorura nga ata që i fajëson për një sulm në anën e Kashmirit të drejtuar nga India muajin e kaluar – masakra më e keqe e civilëve në Indi që nga viti 2008.

Kështu, frika e një konflikti të plotë midis dy fuqive bërthamore vazhdon të përshkallëzohet, me kryeministrin indian Narendra Modi që anuloi sot planet për të vizituar Evropën.

Ndërkohë, aeroplanët luftarakë fluturuan me zhurmë në qiellin mbi territorin e Himalajeve këtë mëngjes dhe shpërthime mund të dëgjoheshin pranë “Vijës së Kontrollit” në një sulm që zgjati 25 minuta.

Të mbijetuarit “vëzhguan pasojat e shkatërrimit” ndërsa zyrtarët e lartë në të dyja palët vazhduan të “rrihnin gjoksin”.

Mehmetaj zbardh detaje: Hetuesi policor që e hetonte Pecin, mori grant 60 mijë euro nga Ministria e Bujqësisë

Gazetari Lirim Mehmetaj po pretendon se një hetues policor i Krimeve Ekonomike të Policisë së Kosovës, i cili ishte duke hetuar disa raste ku dyshohet se ishte përfshirë ministri në detyrë i Bujqësisë, Faton Peci është përfshirë në një aferë korruptive.

Sipas Mehmetajt, zyrtari policor Rrahman Përçuku, ka përfituar një grant me vlerë 60 mijë euro nga ministria e Bujqësisë, në emër të bashkëshortes së tij.

“Hetuesi që ka pas me hetu Faton Pecin te krimet ekonomike për aferën e fundit, por edhe aferat e tjera përfshirë këtë për funksionalizimin e fabrikës për grumbullimit të nënprodukteve shtazore ka dalë që është përfitues i subvencioneve nga Faton Peci”, pretendon Mehmetaj.

Në një video ai tregon listën e përfituesve të granteve, ku si e katërta në listën e përfituesve del Halime Përçuku BI me projektin: “Investime në turizmin rural-Bujtina”.

“Zonja që e ka përfitu grantin është bashkëshortja e Rrahman Përçukut i cili supozohet mi hetu aferat korruptive të Faton Pecit. Tash veç diçka duhet me mendu. Paramendojeni dikë që nuk e ka qasjen në informacion që e kam unë edhe kish shku si pa të keq në hetuesi me paraqit rastet korruptive të Faton Pecit. Cka ndodhë aty? Edhe në momentin që zyrtari largohet prej hetuesisë ky e thërret Faton Pecit edhe i thotë qiky erdh. Edhe ndodhë shantazhi atje“, thotë Mehmetaj.