Kurti: Paga mesatare në sektorin privat u rrit për 50%

Kryeministri në detyrë i Kosovës, Albin Kurti, është lavdëruar me rritjen historike të pagave në sektorin privat gjatë vitit 2024, duke thënë se kjo është dëshmi e mbështetjes që qeveria e tij i ka dhënë ekonomisë, shkruan Gazeta Sinjali.

Në një postim në rrjete sociale, Kurti tha se paga mesatare neto është rritur për 50%, ndërsa ajo bruto për 57%, krahasuar me vitin 2020. Ai theksoi se kjo është rritja më e madhe ndonjëherë brenda një viti dhe më e lartë sesa shtatë vjet të qeverisjeve të mëparshme të marra së bashku.

“Kjo rritje ka ndihmuar bizneset, punëtorët, shtetin dhe qytetarët,” tha Kurti, duke cituar të dhënat e Agjencisë së Statistikave të Kosovës.

Përleshje fizike në komunën e Prizrenit? Akuzat tronditëse nga asambleistja e VV-së

Asambleistja e Vetëvendosjes në Kuvendi Komunal Prizren, Dafina Alishani po pretendon për një përleshje fizike mes shefit të kabinetit të kryetarit të Shaqir Totajt, Nehat Elshanit dhe drejtorit të Shërbimeve Publike, Çelë Lamajt.

Dyshimet janë që Elshani e ka goditur me grushte Lamajn.

Në një postim në faqen e saj zyrtare në Facebook, Alishani ka alarmuar për sulmet që po ndodhin ndaj personelit zyrtarë të komunës nga shefi i kabinetit të kryetarit të Prizrenit.

Sipas saj, kryetari Totaj po frikësohet të marrë masa ndaj shefit të kabinetit të tij, raporton IndeksOnline.

“Shaqir Totaj ka heshtur kur është kërcënuar zyrtarja në urbanizëm nga shefi i kabinetit.

Përsëri po hesht pas konfliktit të shefit të kabinetit të tij (Nehat Elshani) dhe drejtorit të Shërbimeve Publike (Çelë Lamaj). Bile ky rast i dytë nuk qenka vetëm konflikt verbal, por edhe fizik! Shaqir TUTAJ, mos u TUT”, ka shkruar ajo.

Tutje ajo ka akuzuar Totaj që është shndërruar në një kryetar ‘kukull’, pasi sipas saj, nuk po arrin me e mbrojtë ekzekutivin e tij nga sulmet që po vijnë shefi i kabinetit.

“Nëse nuk je në gjendje me e mbrojtë ekzekutivin tënd nga belaja e shefit tënd atëherë je vetëm një kryetar kukull asgjë më shumë.  Institucionet duhet të merren me këtë qeverisje që kur nuk realizohen interesat personale të tyre, kërcënojnë, sulmojnë, frikësojnë shërbyes civil dhe staf politik”, ka shkruar Alishani.

Këto pretendime i ka hedhur poshtë, drejtori i shërbimeve Publike, Çelë Lamaj. Ai në një prononcim për IndeksOnline ka thënë se ndodhet jashtë vendit dhe nuk ka pasur asnjë përleshje fizike me Nehat Elashanin.

“Nuk është e vërtetë që ka pasur as përleshje verbale e as fizike. Unë ndodhëm jashtë shtetit dhe pretendimet e tilla janë të pavërteta”, ka thënë Lamaj.

Ai ka thënë se në PDK nuk do të ndodhin kurrë këto përledhje, edhe pse sipas tij, të tjerët i dëshirojnë ato.

Momentet e fundit: Publikohen pamjet kur turisti 34-vjeçar humb jetën në detin e Durrësit

Janë publikuar pamjet e ngjarjes së ndodhur paraditen e së dielës kur dy turistë anglezë u aksidentuan me Jet Ski.

Siç duket në këtë video të siguruar nga Tv Klan, dy turistët anglezë presin të nisen me Jet Ski. Pasi ndihmohen nga punonjësi i pikës së dhënies me qira të mjeteve, ata nisën në orën 09:41.

Gjatë kësaj kohe miqtë e tyre, i filmojnë me telefon, për të dokumentuar xhiron e tyre në det.

Teksa dy turistët anglezë lundrojnë në det, dy efektivë të policisë kufitare paraqiten pranë biznesit për të kontrolluar dokumentacionin.

Tetë minuta pasi nisën nga bregu i detit, viktima Sylvester Obeng, i cili ishte drejtuesi i mjetit kreu një manovër me shpejtësi e për pasojë humbi kontrollin e mjetit duke përfunduar poshtë tij, ndërsa partnerja e tij në det të hapur.

Kjo skenë siç duket në pamje pikaset nga miku i tyre në breg të detit i cili lajmëron pronarin e biznesit dhe efektivët e policisë. Këta të fundit lajmërojnë në radio patrullën që ndodhej në det duke kryer kontrolle.

Mjeti lundrues i policisë kufitare niset me shpejtësi, por arrin 1 minutë më vonë pranë dy turistëve anglezë.

Ata përpiqen tu japin ndihmën e shpejtë, por 34-vjeçari nuk ia doli të mbijetojë. E gjithë dinamika e aksidentit, u deklarua në polici nga partnerja e viktimës e cila i tha bluve se morën me qira mjetin dhe nuk iu kërkua as patentë dhe as iu dha skafandër.

Por mungesa e patentës dhe kokores për policinë janë shkelje të rregullave të mbrojtjes në punë nga pronari i biznesit, 56-vjeçari Luiz Xhumari, i cili këtë të hënë u vu në pranga.

Sipas bluve të Durrësit, ai u ka dhënë me qira Jet Ski-në dy turistëve pa i pajisur ata me skafandër mbrojtëse, por vetëm me jelek shpëtimi.

Gjithashtu nga ana policisë është pezulluar dhe aktiviteti i subjektit.

Për sqarimin e plotë të ngjarjes policia po kryen verifikime edhe ndaj dy shtetasve anglezë, për të parë nëse kanë qenë nën efektin e alkoolit ndonëse deri më tani nuk ka të dhëna të tilla.

Identifikohet trupi i pajetë që u gjet para banesës në Prishtinë

Një grua është gjetur pa shenja jete para hyrjes së shtëpisë së saj mëngjesin e sotëm në Prishtinë, shkruan Insajderi.

Burime të Sinjalit bëjnë të ditur se ngjarja ka ndodhur rreth orës 07:15, në rrugën “Abdurrahman Shala” në kryeqytet.

Viktima është identifikuar si Luljeta Gjinovci, 64 vjeç.

Në vendin e ngjarjes kanë dalë njësitë relevante të Policisë dhe ekipi emergjent, të cilët kanë konstatuar vdekjen. Sipas informacioneve të para, në trupin e viktimës nuk janë vërejtur shenja dhune apo ndonjë element tjetër që do të ngriste dyshime për ndonjë veprim penal të menjëhershëm.

Personi që u gjet i vdekur sot është profesori i njohur Pejan

Gazeta Sinjali ka raportuar gjatë ditës se një person është gjetur pa shenja jete në parkun Karagaç të Pejës.

Derisa, Sinjali mëson se bëhet fjalë për Fahri Shalën, rreth 77 vjeçar, i cili me profesion kishte qenë profesor.

Lajmin për këtë rast e ka konfirmuar edhe Shkodran Nikçi, zëdhënësi i Prokurorisë Themelore në Pejë

“Në parkun Karagaç të Pejës një person është gjetur pa shenja jete. Në vendin e ngjarjes janë njësitet relevante policore dhe prokurorja e krimeve të rënda”.

Venezuela u bën thirrje qytetarëve të largohen mënjeherë nga SHBA

Qeveria e Venezuelës ka lëshuar një paralajmërim zyrtar për qytetarët e saj, duke i këshilluar të shmangin udhëtimet drejt Shteteve të Bashkuara dhe duke u kërkuar atyre që tashmë jetojnë atje të largohen menjëherë, shkruan Gazeta Sinjali.

Në një deklaratë të publikuar nga Ministria e Jashtme, thuhet se SHBA është një “vend i rrezikshëm ku të drejtat e njeriut nuk ekzistojnë për emigrantët”. Ministria u bëri thirrje venezuelianëve që të “mbrojnë jetën e tyre dhe atë të familjeve të tyre dhe të kthehen në atdhe”.

Ministri i Jashtëm i Venezuelës, Yvan Gil, deklaroi se është veçanërisht e rrezikshme të jesh një migrant me prejardhje latino-amerikane, afrikane apo venezueliane në SHBA, duke përmendur si shembull deportimin e qindra migrantëve në një burg me siguri maksimale në El Salvador, ku sipas tij ata jetojnë në “kushte çnjerëzore” dhe i nënshtrohen “torturës psikologjike”.

Ky paralajmërim i Venezuelës pason një alarm të ngjashëm nga Departamenti Amerikan i Shtetit, i cili javën e kaluar këshilloi qytetarët amerikanë të mos udhëtojnë në Venezuelë dhe të largohen sa më shpejt nga vendi, për shkak të “rreziqeve serioze” të ndalimeve arbitrare, krimeve të dhunshme dhe trazirave civile.

Aktualisht, SHBA nuk ka as ambasadë e as konsullatë funksionale në Venezuelë, çka e bën të pamundur ofrimin e ndihmës për qytetarët e saj në territorin venezuelian.

Murati flet për rritje historike të pagës mesatare në sektorin privat

Ministri në detyrë i Financave, Punës dhe Transfereve, Hekuran Murati, duke cituar Agjencinë e Statistikave të Kosovës (ASK), tha se paga mesatare bruto në Kosovë për vitin 2024 është 598 euro.

Ai ka thënë se kjo tregon punën e Qeverisë Kurti për sektorin privat.

Sipas tij nuk ka qeveri më miqësore me bizneset sesa ajo e Kurtit.

Por, teksa, Murati foli për rritjen historike të pagës mesatare, ai nuk e përmendi inflacionin, e sidomos atë të produkteve ushqimore.

“Paga mesatare në sektorin privat vitin e kaluar ka shënuar rritjen më të lartë historikisht! Sipas të dhënave të publikuara nga ASK, në vitin 2024 paga mesatare në sektorin privat ka shënuar 598 euro bruto, apo 83 euro më shumë sesa viti paraprak.  Sa për krahasim, rritja e pagës mesatare në sektorin privat vetëm në vitin 2024 e tejkalon krejt rritjen e pagës mesatare për 7 vite gjatë qeverisjeve të kaluara: Thaçi 2, Mustafa, Haradinaj (vetëm 74 euro rritje në periudhën 2012-2019).  +218 euro (apo 57%) për 4 vite me Qeverinë Kurti 2.  +74 euro (apo 22%) për 7 vite të qeverisjeve të kaluara”.

“Kjo është dëshmia më e mirë se Qeveria Kurti 2 ka qenë qeveria e cila ka mbështetur më së shumti sektorin privat.  Heqja e pagesave për terminale private doganore, heqja e monopolit të arkave fiskale, luftimi i korrupsionit, pagesa e faturave me kohë për operatorët ekonomikë, mbështetja e drejtë me qindra miliona euro grante e subvencione, subvencionimi i punësimit, por edhe subvencionimi i rritjes së pagave, janë vetëm disa nga veprimet dhe masat e shumta që e bëjnë Qeverinë Kurti 2 qeverinë më miqësore ndaj bizneseve, që ka ekzistuar ndonjëherë.  Qeveria për sektorin privat”, ka shkruar Murati.

Prokuroria ia sekuestroi iPhone-n, ministri Peci refuzon ta tregojë kodin

Hetimet penale për dhënien me qira të fabrikës për mbetje shtazore mund të rezultojnë në një test të papritur për Prokurorinë Speciale.
Çështja ndërlidhet me iPhone-n e ministrit në detyrë të Bujqësisë, Faton Peci.

Peci është intervistuar të martën si i dyshuar për një rast penal të keqpërdorimit të detyrës zyrtare, sipas një urdhërese të Gjykatës Themelore në Prishtinë.

Sipas urdhëresës, gjatë aksionit parashihej edhe sekuestrimi i telefonit iPhone të ministrit Peci.

Paparaci ka marrë vesh nga burime brenda organeve të hetuesisë se përmbajtja e urdhëresës së gjykatës mund të ketë rënë në veshët e ministrit Peci para nisjes së aksionit.

“Avokati i ka treguar Pecit, pastaj ai ka shkuar në intervistim por pa telefon”, tha një burim i Paparacit brenda hetuesisë, derisa shpjegoi këtë version për ngjarjet e ditës së aksionit lidhur me dhënien me qira të fabrikës për mbetjet shtazore.

Hetuesit e Njësisë së Veçantë Hetimore të Policisë së Kosovës e ka paralajmëruar Pecin se nëse nuk e dorëzon iphone-n e tij, atëherë do të arrestohej.

Peci, pastaj e ka dërguar telefonin iPhone 16 por ka refuzuar t’ua japë atyre kodin për hapjen e tij, ka marrë vesh Paparaci nga burime brenda hetuesisë.

Telefoni iPhone 16 nuk mund të hapet, për shkak se autoritetet nuk e posedojnë programin për zhbllokimin e tij.

Prokuroria Speciale, e cila e ka në hetim rastin, e ka dërguar telefonin e ministrit Peci për zhbllokim te Njësia e Forenzikës dhe Agjencia e Kosovës për Inteligjencë, por asnjëra prej tyre nuk ka mundur ta hapë atë.

Iphone i ministrit në detyrë të Bujqësisë, pas dështimit për t’u zhbllokuar, i është kthyer sërish Prokurorisë Speciale, ka mësuar Paparaci.

Taulant Hodaj, avokati mbrojtës i ministrit Faton Peci, i kontaktuar përmes telefonit nga Paparaci të hënën ka refuzuar të deklarohet për këtë çështje.

“Nuk kam marrë autorizim nga klienti im që të përgjigjem për këtë rast”, ka thënë Hodaj.

Paparaci, e ka pyetur të hënën edhe Prokurorinë Speciale nëse do të ndërmarrë hapa të tjerë në përpjekje për të zhbllokuar telefonin e ministrit Peci, por deri në momentin e publikimit të këtij artikulli nuk ka marrë përgjigje nga organi i akuzës.

Një opsion mbetet dërgimi i telefonit për ekzaminim jashtë vendit.

Edhe Byroja Federale Hetimore (FBI) në ShBA ka hasur shpeshherë në probleme për hapjen e telefonëve iPhone, për shkak të ngurrimit të kompanisë Apple për dëshifrimin e pajisjeve duke përmendur privatësinë e përdoruesve.

Pas një beteje disa mujore me kompaninë teknologjike Apple në vitin 2016, FBI kishte arritur që ta zgjidhte problemin e kodit të telefonit të terroristit i cili kreu sulmin në San Bernardino. FBI e kishte zhbllokuar telefonin e terroristit përmes mekanizmave të saj, për shkak të refuzimit të Apple për të bashkëpunuar me agjencinë.

U plagos në vendin e punës, duke luftuar me grabitësin serb, Fahri Ademi ende i palëvizshëm

Dy muaj më parë, 42-vjeçari Fahri Ademi u plagos nga të shtënat me armë zjarri gjatë një grabitje të armatosur në Veternik.

Pas disa ditësh trajtimi në Klinikën Intensive në Qendrën Klinike Universitare të Kosovës (QKUK), Ademi u nis për në Turqi.

Plagët e rënda që mori Ademi, derisa u ballafaqua me grabitësin serb, ishin të rënda derisa e lanë të palëvizshëm.

IndeksOnline ka kontaktuar familjarët e Ademit, për të mësuar më shumë rreth gjendjes së tij shëndetësore.

“Ende është i palëvizshëm. Edhe dy javë ka me qëndru në Turqi pastaj kthehet në Kosovë. Njërën këmbë po e ndjen, kurse tjetrën jo. Sipas doktorëve atje, ka gjasa që Fahriu të ecë përsëri. Ata i kanë rekomanduar të vazhdojë me ushtrime. Gjendja e tij emocionale nuk është e mirë, është lodh shumë, është “shkri” si njeri”, ka thënë një familjarë i Ademit për IndeksOnline.

Plagë të rënda dhe të papërballueshme mori edhe vetë grabitësi serb, Millosh Vukojeviq, i cili ndërroi jetë në Klinikën Intenzive në QKUK, pak ditë pasi ndodhi rasti.

Vukojeviq, kishte edhe të kaluar kriminale ku vitin e kaluar ishte i arrestuar për kultivim të bimëve narkotike.

Ky është 17-vjeçari që humbi jetën në aksidentin e rëndë në Prizren

Një aksident i rëndë ka ndodhur pasditen e së shtunës në fshatin Grazhdanik të Prizrenit, ku si pasojë e përplasjes mes një veture dhe një motoçiklete, ka humbur jetën një i mitur.

Bëhet fjalë për 17-vjeçarin Geltian Shala, i cili ndërroi jetë mbrëmë në QKUK në Prishtinë, për shkak të plagëve të rënda që kishte pësuar nga aksidenti, njofton Klankosova.tv.

Familjarët kanë bërë të ditur se varrimi i të ndjerit do të bëhet sot, pas faljes së namazit të Ikindisë.