Zbulohet numri i Arben Gashit në listën e LDK-së, surprizë për shumëkënd

Arben Gashi nga Lidhja Demokratike e Kosovës ka bërë të ditur se në këto zgjedhje të kandidojë për deputet, me numrin 28.

Ai përmes një postimi në Facbook, tha se renditja ka rëndësinë e saj, por sipas tij, në fund më e rëndësishmja është lidhja që krijohet me qytetarin.

“Sot u publikuan numrat e kandidatëve në listën e Lidhja Demokratike e Kosovës. Renditja ka rëndësinë e saj, por besoj se në fund më e rëndësishmja është lidhja që krijohet me qytetarin, besimi që ndërtohet dhe puna që bëhet me përkushtim”.

“Demokracia është e bukur sepse i jep secilit mundësinë të zgjedhë me bindje dhe me zemër për Kosovën që dëshiron të shohë nesër. Unë do të garoj me numrin 28.  Me shpresë, me energji pozitive dhe me vullnet për të vazhduar punën në shërbim të qytetarëve dhe të Kosovës sonë. Voto me bindje. Zgjedh me besim. Vendos me shpresë”, ka shkruar ai./Klankosova.tv

Lista e VV-së për deputet, ministri i Kurtit mbetet jashtë saj

Ish-deputeti i VV’së, Hysen Durmishi, ka njoftuar se nuk do të kandidojë për deputet në zgjedhjet e 7 qershorit, shkruan Reporteri.net.

Durmishi ka thënë se kjo është bërë me kërkesë të tij dhe pas konsultimit me kreun e VV’së, Albin Kurtin, njëherit kryeministrin në detyrë.

Durmishi ka qenë zëvendësministër në Qeverinë Kurti 2, e më pas edhe ushtrues detyre i Ministrit, pas dorëheqjes së Liburn Aliut

“E falënderoj Kryeministrin për mirëkuptimin dhe mbështetjen. Jam i bindur se Lëvizja VETËVENDOSJE!, do të dalë bindshëm fituese në këto zgjedhje, madje me rezultat edhe më të madh se ai i 28 dhjetorit të vitit të kaluar. Angazhimi im do të jetë maksimal për fitoren e madhe që na pret. Prandaj, i ftoj të gjithë ata që më kanë mbështetur mua, si dhe çdo qytetar pa dallim, për mobilizim dhe angazhim të përbashkët drejt fitores sonë”, ka shkruar Durmishi./Reporteri.net

Partia Demokratike e Kosovës përpilon listën – mësohet nëse Xhavit Haliti është pjesë e saj

Partia Demokratike e Kosovës është duke përpiluar listën e kandidatëve për deputet për zgjedhjet e 7 qershorit.

IndeksOnline mëson se pjesë e kësja liste të propozuar nga Dega e Pejës pritet të jenë Xhavit Haliti dhe Edonjete Berisha.

Mësohet se për dy emra të tjerë nga Peja pritet të vendoset në orët e mbrëmjes.

Kujtojmë që PDK ka paralajmëruar mbledhjen e Kryesisë në ora 20:00.

Lista për deputetë, kjo raportohet se është 10-tshja e parë e PDK-së

Partia Demokratike e Kosovës ka vendosur për renditjen e kandidatëve në listën e PDK-së.

Gazeta Nacionale ka mësuar për renditjen në top 10-shten e parë.

Sipas burimeve brenda kësaj partie, renditja do të jetë kjo:

Bedri Hamza
Urani Ismaili
Vlora Çitaku
Përparimi Gruda
Arian Tahiri
Sala Jashari
Rrahmani Rama
Arben Mustafa
Ganimte Musliu
Enver Hoxhaj
Kjo renditje duket se përfaqëson përkrahjen e votave që kandidatet kanë marrë në zgjedhjet e fundit.

Kryetari i PDK-së, Bedri Hamza, mbrëmë ka treguar se kriter për renditje në listë do të jetë numri i votave që kandidatët kanë marrë në zgjedhjet e 28 dhjetorit.

Lisat e kandidatëve të PDK-së për deputet do të votohet sonte në mbledhje të Kryesisë së PDK-së.

Kurti prezanton aderimin e ri në VV

Albin Kurti ka prezantuar aderimin e ri në VV, shkruan Demos.

“Si aktiviste e njohur feministe dhe autore, Adelina sjell një përvojë mbi dhjetëvjeçare në mbrojtje të të drejtave të grave, të rinjve dhe komuniteteve të margjinalizuara, duke i bashkuar kauzat sociale me punën konkrete në terren dhe hulumtimin e politikave publike.”, shkroi Kurti

Shkrimi i tij:

Me kënaqësi njoftojmë bashkimin e Adelina Tërshanit me Lëvizjen VETËVENDOSJE!, e cila do të jetë edhe kandidate për deputete në legjislaturën e ardhshme. Si aktiviste e njohur feministe dhe autore, Adelina sjell një përvojë mbi dhjetëvjeçare në mbrojtje të të drejtave të grave, të rinjve dhe komuniteteve të margjinalizuara, duke i bashkuar kauzat sociale me punën konkrete në terren dhe hulumtimin e politikave publike.

​Me formim akademik në Gazetari dhe Menaxhim të Konflikteve, studime të kryera në Itali, ajo përfaqëson një zë intelektual dhe kritik që e pasuron programin tonë për drejtësi shoqërore. Përmes angazhimit të saj në institucione dhe artit si formë rezistence, Adelina do të vazhdojë betejën për barazi edhe brenda Kuvendit të Kosovës

Albena Reshitaj dhe Jeta Statovci në top 10-shte të listës së LDK për deputete

Lidhja Demokratike e Kosovës e ka gati listën e kandidatëve për deputet për zgjedhjet e 7 qershorit.

Kjo parti tashmë ka caktuar edhe numrat për secilin kandidat.

Në top 10-she pritet të jenë dy prurje te reja të cilat janë pjesë e ekipit të Vjosa Osmanit.

IndeksOnline mëson se Albena Reshitaj prite të këtë numrin 7, ndërsa Jeta Statovcit numrin 9.

Mësohet se dy figurat e rëndësishme të LDK-së, Avdullah Hoti dhe Hykmetet Bajrami kanë mbetur jashtë top 10-shës.

Dorëzimi i listave të kandidatëve për deputet nga partitë politike në KQZ do të përfundoje sonte në ora 24:00.

Raportohet se është lënë jashtë top 10-shes në LDK, vjen reagimi i Hotit

Avdullah Hoti ka reaguar pas raportimit të mediave se ka mbetur jashtë top 10-shes së listës zgjedhore të Lidhjes Demokratike të Kosovës.

Ish-deputeti tha se numri i vetëm që ka rëndësi për të është ai i LDK-së.

“Numri i vetëm që ka rëndësi është numri i Lidhjes Demokratike të Kosovës. Numrat e tjerë i përcaktojnë qytetarët”, ka thënë ai.

Pal Lekaj njofton se s’do të jetë kandidat për deputet

Pal Lekaj ka njoftuar se nuk do të garojë për deputet në listën e Aleancës për Ardhmërinë e Kosovës në zgjedhjet e 7 qershorit.

Ai tha se vendimi i tij hap rrugë për anëtarë të rinj në parti.

Lekaj shprehu mbështetje për kandidatin për kryeministër Ardian Gjini dhe për Aleancën për Ardhmërinë e Kosovës, ndërsa theksoi se do të vazhdojë angazhimin për fitoren e partisë në zgjedhje.

Postimi i plotë:

Të nderuar/a struktura të Aleancës,

Të nderuar/a simpatizantë të Aleancës,

Të dashur votues e mbështetës të mi,

Aleanca për Ardhmërinë e Kosovës nuk është thjesht një grupim politik, por që nga themelimi i saj ka qenë dhe mbetet një familje politike që ka dhënë kontribut të jashtëzakonshëm në shtetformimin, zhvillimin dhe sigurinë e atdheut.

Në themel të kësaj rruge qëndron vizioni i Ramush Haradinajt, një burrështetas i cili që nga vitet ’90 artikuloi dhe ndërtoi ideologjinë e një Aleance për Liri dhe Pavarësi. Ai është ndër ideatorët dhe luftëtarët më të mëdhenj të historisë së lirisë dhe pavarësisë së Kosovës, duke i dhënë drejtim dhe forcë një projekti politik me rrënjë kombëtare dhe vizion shtetndërtues.
Unë besova në këtë ideologji që nga ditët e para dhe u rreshtova me zemër e mendje në familjen politike të Aleancës. Bashkë me Ramushin dhe shumë burra e gra të përkushtuar, në etapa të ndryshme të shtetit, përballuam sfida të mëdha dhe shpesh të paimagjinueshme për kohën.

Për më shumë se 26 vite, Ramush Haradinaj ndërtoi një familje të fuqishme politike, duke mbledhur rreth vetes njerëzit më të zotë dhe më të përkushtuar të vendit. Kosova pati fatin që në dy mandate ai, bashkë me familjen politike të Aleancës, të ishte në krye të Qeverisë. Gjatë atyre mandateve u realizuan projekte dhe vendime të rëndësishme, të cilat sot janë pjesë e historisë më të re të Kosovës.

Personalisht, kam pasur nderin të jem në krah të Ramushit gjatë gjithë rrugëtimit të tij politik. Të jesh pranë një udhëheqësi dhe burrështetasi si ai është fat dhe privilegj i veçantë.
Sot, pas 26 vitesh, unë kam vendosur që në zgjedhjet e 7 Qershorit të mos garoj në listën e Aleancës, duke hapur dyert për anëtarët e rinj, por duke dhënë mbështetjen time absolute dhe duke u angazhuar edhe më shumë se asnjëherë më parë që Aleanca, bashkë me kandidatin për Kryeministër z. Ardian Gjini, të dalë fuqishëm në këto zgjedhje, me listën dhe emrat më të mirë që mund të ketë një grupim politik.

Unë besoj se familja jonë politike, bashkë me kandidatin për Kryeministër z. Gjini, me përvojën e akumuluar ndër vite dhe me individët që kanë kaluar nëpër të gjitha etapat e shtetndërtimit, do të dalë faqebardhë në këto zgjedhje dhe do ta kthejë shpresën për qytetarët e vendit.

Kryetari ynë, Ramush Haradinaj, do të mbetet gjithmonë shtyllë dhe themel i familjes sonë politike, andaj ju ftoj të gjithëve që të punojmë për fitoren e datës 7 Qershor.

Gucati: OVL e UÇK-së kërkon kthimin e krahut të luftës në pushtet

Kryetari i OVL UÇK-së, Hysni Gucati, në emisionin “Kosova Today” ka deklaruar se kjo organizatë dëshiron kthimin e krahut të luftës në politikë.

Ai tha se OVL UÇK-ja kërkon të ketë bashkëpunim të ngushtë me secilën parti, megjithatë, ai shtoi se si organizatë dëshirojnë kthimin e krahut të luftës edhe në pushtet.

“Qëllimi ynë ka qenë gjithmonë që të jemi bashkë në një tryezë”, tha Gucati në Klan Kosova.

“Ne ende kemi nevojë për liderë të fortë. Mendoj që korriku nuk do të shkojë e ata do të kthehen”, tha ai për ish-krerët e UÇK-së që po gjykohen në Hagë.

Konflikti familjar degjeneron në dhunë, rrahje masive në pikë të mëngjesit

Një rrahje masive është regjistruar mëngjesin e sotëm në fshatin Zallq të Istogut, ku shtatë persona janë përfshirë në një përleshje fizike mes dy familjeve.

Lajmin e ka konfirmuar për Klankosova.tv zëdhënësi i Policisë për rajonin e Pejës, Fadil Gashi, i cili bëri të ditur se personat e përfshirë kanë pësuar lëndime të lehta trupore.

“Personat kanë lëndime të lehta trupore. Ata që të gjithë janë intervistuar nga prokurori dhe me vendim të tij janë liruar në procedurë të rregullt”, deklaroi Gashi për Klankosova.tv.

Sipas informacioneve që ka siguruar Klankosova.tv, motivi i përleshjes dyshohet të ketë qenë prishja e një miqësie mes dy familjeve, çka më pas ka eskaluar në konflikt fizik.

Policia po vazhdon trajtimin e rastit dhe mbetet të shihet nëse ndaj personave të përfshirë do të ngrihen kallëzime përkatëse pas përfundimit të procedurave hetimore.