Haradinaj godet Osmanin, Kurtin e Gërvallën: Kur e përmendni ju Rugovën, atij i rrotullohen eshtrat në varr

Kreu i AAK-së, Ramush Haradinaj, ka reaguar ndaj presidentes Vjosa Osmani, kryeministrit Albin Kurti dhe ministres së Jashtme, Donika Gërvalla, duke thënë se po bëjnë luftë të pa kompromis për të fituar elektoratin rugovist në Podujevë. Haradinaj ka shkruar se secili prej liderëve përmes mashtrimit, pretendon se çmon vlerat e Rugovës, shkruan Gazeta Express.

Haradinaj në reagimin e tij të bërë në ditën e zbulimit të shtatores së Rugovës në Podujevë, ka thënë se Osmani, Gërvalla e Kurti sa herë që e përmendin Rugovën, ish-presidentit i rrotullohen eshtrat në varr.

Kandidati për kryeministër ka thënë se Llapi e ka merituar një shtatore të Rugovës për besnikërinë dhe besimin që llapjanët ia kishin dhënë sa kishte qenë gjallë. Haradinaj tutje ka shtuar se s’është keq të përmendet fjalori i Rugovës, që po të ishte gjallë do të thoshte: “Falënderoj Presidentin Biden, Kryeministrin Staimer, Kryeministrin Scholz, Presidentin Macron, Papën dhe miqtë e Kosovës. Zoti e bekoftë Amerikën dhe popullin e Kosovës.”, raporton Express.

Sipas Haradinajt, Kurti e Gërvalla nuk e thonë një gjë të tillë dhe as s’e mendojnë kurrë, ndërsa për presidenten Osmani thotë se edhe kur e deklaron, njerëzit çdo ditë e më pak i besojnë.

Reagimi i plotë i Haradinajt:

Luftë e pakompromis e Vjosës, Albinit dhe Donikës për elektoratin rugovist në Podujevë. Secili, në formën e vet të mashtrimit, pretendon se çmon vlerat e Presidentit Rugova. Përderisa Albini dhe Donika, për të gjallë të tij, nuk e kanë fshehur urrejtjen dhe mosrespektin ndaj tij, Vjosa, si më e reja, përveç retorikës së pasur pro-rugoviane, asgjë rugoviste nuk ka. Lirisht, njeriu mund të konkludojë se qasja e të treve ndaj politikëbërjes dhe vlerave për të cilat ka qëndruar Prof. Dr. Ibrahim Rugova, ka qenë aq e ultë sa që sa herë e përmendin Rugovën, atij i rrotullohen eshtrat në varr.

Llapi e ka merituar një përmendore të Dr. Rugovës sepse besnikëria dhe besimi i llapjanëve ndaj Rugovës ka qenë unik. Nuk është keq të përmendim fjalorin e Rugovës që sot, po të ishte gjallë, do të thoshte: “Falënderoj Presidentin Biden, Kryeministrin Staimer, Kryeministrin Scholz, Presidentin Macron, Papën dhe miqtë e Kosovës. Zoti e bekoftë Amerikën dhe popullin e Kosovës.”

Albini dhe Donika këtë nuk e thonë as nuk e mendojnë kurrë, përderisa Vjosa, edhe kur e thotë, çdo ditë e më pak njerëz e besojnë dhe kanë të drejtë që nuk e besojnë.

Vazhdojnë të jenë të mbyllura pikëkalimet në Bërnjak dhe Merdar

Edhe në këto orë të pasdites është duke vazhduar në mënyrë normale qarkullimi në pikën kufitare veriore, në Jarinje, raporton Gazeta Sinjali.

Kështu ka konfirmuar për Gazetën Sinjali, zëvendësdrejtori i policisë për rajonin e veriut, Veton Elshani.

“S’ka ndryshim”, thotë Elshani, duke iu referuar edhe deklaratave të tij të mëhershme, ku ka treguar se “qarkullimi në Jarinje po vazhdon normalisht”.

Shqipe Selimi: Policia e Kosovës është mburoja e shtetit

Dje është shënuar 25-vjetori i Policisë së Kosovës, ku me këtë rast është vlerësuar lart puna e saj.

Deputetja e Vetëvendosjes, Shqipe Mehmeti Selimi thotë se Policia e Kosovës është mburoja e shtetit, shkruan Reporteri.net.

Postimi i saj:

25-vjetori i themelimit të Policisë së Kosovës

25 vite shërbim ndaj atdheut!

Qëndresë, përkushtim dhe mbrojtje e palëkundur e qytetarëve tanë.

Policia e Kosovës – mburoja e shtetit!

Deputeti i VV-së: Jemi të shqetësuar me mungesën e veprimeve të sistemit të drejtësisë

Deputeti Arbër Rexhaj ka përmendur se janë mbledhur 5000 fakte, të cilat janë publikuar nga Policia e Kosovës në një konferencë për media.

Rexhaj ka shprehur shqetësimin për mungesën e veprimeve të drejtësisë, duke e cilësuar këtë si një dështim të rëndë për të drejtën dhe përpjekjet e Kosovës për të mbrojtur integritetin e saj.

“Pra janë 5000 fakte deponuara, 5000 fakte të cilat policia e Kosovës publikisht në një konferencë për media ku ministri i Brendshëm dhe drejtori i Policisë kanë treguar pra arsenalin se çfarë kanë gjetur në Banjskë , është vrarë një rreshteri Afrim Bunjaku tashmë dëshmor i kombit ndonëse në anën tjetër nuk kemi asnjë veprim të drejtësisë në këtë aspekt dhe sigurisht kjo është për keqardhje”, ka thënë Rexhaj për Front Online.

Ai ka kritikuar gjithashtu aleatët ndërkombëtarë që, në vend që të bëjnë trysni ndaj Serbisë për dorëzimin e Radojçiqit dhe terroristëve të tjerë, kanë vendosur masa ndaj Kosovës.

Rexhaj e ka cilësuar këtë si një lloj të padrejtësie të madhe që i bëhet Republikës së Kosovës, duke theksuar se sjellja e Bashkimit Evropian dhe aleatëve të tjerë është e padrejtë në raport me Kosovën, veçanërisht në kontekstin e sulmit terrorist në Banjskë që sipas tij  kishte për qëllim aneksimin e një pjese të veriut të Kosovës.

Jep dorëheqje nga Policia, Ibishi: Qeveria t’i lërë hajgaret dhe t’i përmirësojë kushtet për Policinë

Polici Bekim Ibishi ka dhënë dje dorëheqje nga detyra e tij, pikërisht në ditën kur Policia e Kosovës i bëri 25 vjet nga themelimi i saj.

Ai i ka treguar edhe arsyet e tij për largimin nga Policia.

“Policia e Kosovës po përballet me sfida serioze, ku pjesëtarët e saj detyrohen të mbulojnë vetë shpenzimet për rrugën dhe ushqimin e përditshëm, apo qysh thotë populli “Me hi borxh me majtë punën e shtetit”.

“Kjo situatë, bashkë me mungesën e sigurimeve shëndetësore dhe kushtet e vështira të punës, e bën të pamundur për mua të vazhdoj më tutje”, ka shkruar Ibishi në profilin e tij në Facebook.

Shkrimi i plotë i Ibishit pa ndërhyrje:

Në 25 vjetorin e Policisë së Kosovës ju njoftoj se kam dhënë dorëheqje nga policia

Të nderuar,

Me këtë letër ju njoftoj për dorëheqjen time nga Policia e Kosovës. Kam pasur një nder të madh të jem pjesë e këtij institucioni që përfaqëson trashëgiminë kryesore të Ushtrisë Çlirimtare të Kosovës, por fatkeqësisht kushtet aktuale më kanë shtyrë të marr këtë vendim.

Policia e Kosovës po përballet me sfida serioze, ku pjesëtarët e saj detyrohen të mbulojnë vetë shpenzimet për rrugën dhe ushqimin e përditshëm, apo qysh thotë populli “Më hi borxh me majtë punën e shtetit”.

Kjo situatë, bashkë me mungesën e sigurimeve shëndetësore dhe kushtet e vështira të punës, e bën të pamundur për mua të vazhdoj më tutje.

Jeta e një polici patrulle vlerësohet me një shtesë minimale për rrezikshmëri vetëm me 60 euro.

Qeveria e Kosovës t’i lërë hajgaret me një anë dhe t’i përmirsojë kushtet për Policinê e Kosovës dhe qytetarët e saj.

I falënderoj të gjithë kolegët e mi për mbështetjen dhe bashkëpunimin gjatë kësaj kohe dhe uroj që kushtet të përmirësohen për të gjithë ata që vazhdojnë të shërbejnë.

Me respekt, Bekim Ibishi

Zbulohet shtatorja e Ibrahim Rugovës në Podujevë – PAMJE

Është zbuluar në Podujevë, shtatorja e Ibrahim Rugovës, ish-presidentit historik të Republikës së Kosovës.

Shtatorja u zbulua nga Teuta Rugova, vajza e ish-presidentit, presidentja Vjosa Osmani, kryeministri Albin Kurti, kryetari i Podujevës, Shpejtim Bulliqi si dhe nga ish-presidenti Fatmir Sejdiu.

Është zbuluar në Podujevë, shtatorja e Ibrahim Rugovës, ish-presidentit historik të Republikës së Kosovës.

Shtatorja u zbulua nga Teuta Rugova, vajza e ish-presidentit, presidentja Vjosa Osmani, kryeministri Albin Kurti, kryetari i Podujevës, Shpejtim Bulliqi si dhe nga ish-presidenti Fatmir Sejdiu.

Kjo vepër është punuar nga artisti Gëzim Muriqi.

E rëndë: Vdes një fëmijë 2 vjeçar nga Podujeva, Policia jep detaje

Një rast i rëndë ka ndodh në familjen Uka nga Podujeva. Fëmija i tyre 2-vjeçar ka ndërruar jetë, për arsye që ende nuk dihen zyrtarisht, shkruan Gazeta Sinjali.

Siç mëson Gazeta Sinjali, rasti ka ndodh dje – dhe fëmija fillimisht është dërguar për trajtim mjekësor në Qendrën Klinike të Mjekësisë Familjare në Podujevë.

Nga aty, mjekët e kanë referuar familjen ta çojë të voglin e tyre në Pediatri në Qendrën Klinike Universitare të Kosovës.

Aty fëmija ka mbërritur pa shenja jetë, siç ka konfimruar edhe Policia.

“Nga QKUK është raportuar se një person ka mbërritur pa shenja jete. Në vendin e ngjarjes janë takuar dhe intervistuar dy persona”.

Me vendim të prokurorit trupi i pajetë është dërguar për obduksion në IML, ndërsa rasti është duke u hetuar.

Edhe Kurti po merr pjesë në zbulimin e shtatorës së ish-Presidentit Rugova

Në 34-vjetorin e shpalljes së Kushtetutës së Kaçanikut, po zbluhet shtatorja e ish-Presidentit Rugova në Podujevë, shkruan Gazeta Imazhi.

Sot, në 34-vjetorin e shpalljes së Kushtetutës së Kaçanikut, komuna e Podujevës  ka organizuar ceremoninë e zbulimit të shtatores së ish-presidentit historik të Kosovës, Ibrahim Rugova.

Pas Kurit, edhe presidentja Vjosa Osmani arriti në këtë ceremoni.

Të pranishëm janë edhe familjarët e ish-presidentit Rugova, Teuta dhe Ukë Rugova, shkruan Indeksonline.

Shtatorja do të zbulohet në Podujevë në Parkun e Qytetit.

Më poshtë mund të shihni pamje nga kjo ngjarje.

Në këtë ceremoni ka arritur edhe kryeministri i vendit, Albin Kurti, i shoqëruar edhe nga ministria e punëve të jashtme, Donika Gërvalla, ministrin e bujqësisë, Faton Peci.

Presidentja Osmani: Rugova po i kthehet Llapit në bronz, banorë i përhershëm i Podujevës!

Presidentja e shtetit, Vjosa Osmani ka thur fjalë miradije për ish-presidentin, Ibrahim Rugova, me rastin e shpalosjes së shtatores në Podujevë.

“Jam e nderuar që sot ndodhem në Podujevë. Në mesin e njerëzve që në kohët më të vështira u radhitën tek njeriu vizionar presidentit historik, Dr. Ibrahim Rugova.

Sot Rugova po i kthehet Llapit në bronz duke u bërë banorë i përhershëm i Podujevës.

Njësoj sikurse ishte kthyer nga Italia në Kosovën e lirë, i gjithë Llapi ishte quar në këmbë për ta pritur atë.

Shtatorja e presidentit Ibrahim Rugova po përurohet në 7 shtatorin historik, ditën kur ishte miratuar Kushtetuta e Kaçanikut”, ka thënë ajo, transmeton Indeksonline

Ai kurrë askujt nuk i punoi pas shpine. Për të parimet nuk ishin idale, por forca udhëheqese që ndërmori për Kosovën.

Reagon Bajqinovci: Asnjë reagim nga BE dhe opozita për bllokimin e pikave kufitare nga serbët

Mefail Bajqinovci, deputet i VV-së, ka shkruar një status, në të cilin ka kritikuar opozitën dhe Bashkimin Evropian, transmeton Gazeta Metro.

Bajqinovci ka shkruar se nuk ka lexuar asnjë shkrim nga BE-ja dhe opozita për “bllokimin e pikave kuftiare nga ana e Serbisë”.

Tutje, ai ka shkruar se BE-ja nuk flet kur bëhet fjalë për Kosovën.

“Nuk lexova asnjë reagim apo dënim nga Bashkimi Evropian apo nga opozita për bllokimin e pikave kufitare, nga ana e serbisë për qytetarët shqiptarë nga ekstremistët serbë, të cilët veprojnë nën pranin e policisë pra me lejen e shtetit serb. Në çdo pikë kufitare, qytetarët e e Kosovës, të pajisur me dokumente të ligjshme të Republikës së Kosovës, po kthehen mbrapsht dhe pengohen të kalojnë nga shteti serb” – ka shkruar Bajqinovci.