77.5 milionë euro për bujqësinë në vitin 2026 – detajet e planit të ri të Ministrit Muja

Ministri i Bujqësisë, Pylltarisë dhe Zhvillimit Rural, Armend Muja, ka miratuar Kornizën e Programit Vjetor 2026, e cila përcakton drejtimet kryesore të politikave bujqësore dhe shpërndarjen e buxhetit për sektorin në Kosovë. Programi kap vlerën prej 77.5 milionë euro dhe synon kombinimin e mbështetjes direkte për fermerët me investime zhvillimore dhe masa për stabilizimin e tregut.

Sipas kornizës së re, pjesa më e madhe e buxhetit, mbi 59 milionë euro, është dedikuar për pagesa direkte që synojnë stabilizimin e të ardhurave të fermerëve dhe rritjen e prodhimit vendor. Ndërkohë, 10 milionë euro janë paraparë për Programin e Zhvillimit Rural, i cili fokusohet në modernizimin e fermave, rritjen e kapaciteteve përpunuese dhe forcimin e organizimit të prodhuesve. Rreth 8 milionë euro ndahen për masa të stabilizimit të tregut, përfshirë mbështetjen për inpute bujqësore dhe ndërhyrje në sektorët e ndjeshëm.

Ministri Muja theksoi se programi i ri nuk është vetëm mbështetje financiare, por një qasje më e gjerë transformuese për bujqësinë. Sipas tij, synimi kryesor është rritja e prodhimit vendor, fuqizimi i fermerëve dhe ndërtimi i një sektori më konkurrues dhe të qëndrueshëm në afatgjatë.

Njoftimi i plotë:

Miratohet Vendimi për Kornizat e Programit Vjetor 2026 – Një paketë gjithëpërfshirëse prej 77.5 milionë euro për transformimin e bujqësisë

Prishtinë, 30 prill 2026 – Ministri i Bujqësisë, Pylltarisë dhe Zhvillimit Rural, Armend Muja, ka miratuar Vendimin për Kornizat e Programit Vjetor 2026, duke vendosur drejtimet strategjike, strukturën programore dhe alokimet buxhetore për mbështetjen e sektorit të bujqësisë në Kosovë. Ky vendim përbën bazën themelore për hartimin dhe zbatimin e të gjitha skemave të mbështetjes gjatë vitit 2026 dhe reflekton një qasje të integruar që lidh të ardhurat e fermerëve, investimet zhvillimore dhe stabilitetin e tregut në një kornizë të vetme politike.

Kornizë strategjike e integruar: nga mbështetja direkte te transformimi strukturor – Korniza e Programit Vjetor 2026 është ndërtuar mbi objektiva të qarta: sigurimin e të ardhurave të qëndrueshme për fermerët, rritjen e prodhimit vendor, përmirësimin e konkurrueshmërisë dhe nxitjen e transformimit strukturor të sektorit të bujqësisë. Në kushtet e presioneve të tregut, rritjes së kostove të inputeve dhe konkurrencës nga importet, ky program synon të krijojë një balancë ndërmjet mbështetjes afatshkurtër dhe investimeve afatgjata. Programi ndërthur instrumente të politikës bujqësore që mbulojnë të gjithë ciklin ekonomik – nga prodhimi primar, përpunimi dhe organizimi i fermerëve, deri te ndërhyrjet për stabilizimin e tregut.

Struktura buxhetore: shpërndarje e balancuar dhe e orientuar drejt prodhimit – Buxheti total prej 77,548,188.87 euro është strukturuar në tre komponentë kryesorë, të dizajnuar për të adresuar nevoja të ndryshme të sektorit:

1. Pagesat Direkte – €59,529,064.75 – Ky komponent përbën shtyllën kryesore të mbështetjes dhe synon stabilizimin e të ardhurave të fermerëve dhe përfshin pagesën bazë për sipërfaqe bujqësore, e cila mbulon mbi 130 mijë hektarë tokë të kultivuar, pagesat rishpërndarëse, të dizajnuara për të mbështetur hektarët e parë dhe për të forcuar fermerët e vegjël dhe të rinj, pagesat e lidhura me prodhimin, të orientuara drejt sektorëve strategjik si blegtoria, qumështi, drithërat, pemëtaria, perimet, vreshtaria, bletaria dhe akuakultura dhe eko-skema, që mbështesin praktikat bujqësore të qëndrueshme dhe miqësore me mjedisin.
2. Programi i Zhvillimit Rural – €10,000,000 – Ky komponent synon transformimin strukturor të sektorit përmes investimeve në:

• Modernizimin e fermave dhe rritjen e produktivitetit;
• Zhvillimin e kapaciteteve përpunuese dhe rritjen e vlerës së shtuar;
• Organizimin e fermerëve dhe krijimin e organizatave të prodhuesve;
• Infrastrukturën rurale dhe lidhjen me tregun;
• Mbështetjen e fermerëve të rinj dhe qasjen në financa;
• Digjitalizimin dhe përmirësimin e gjurmueshmërisë në sektor.

1. Masat e Stabilizimit të Tregut – €8,019,124.12 – Ky komponent adreson drejtpërdrejt çrregullimet e tregut dhe kostot e prodhimit përmes:

• Mbështetjes për inpute bujqësore dhe naftë, si masa kryesore për uljen e kostove;
• Formalizimit të tregut të mishit përmes mbështetjes për therje të raportuara;
• Trajtimit të mbetjeve shtazore për siguri sanitare dhe mjedisore;
• Kompensimit për dëmet në bujqësi dhe asgjësimin e kafshëve në raste të sëmundjeve;
• Ndërhyrjeve strategjike fleksibile për stabilizimin e çmimeve dhe sektorëve të ndjeshëm.

Prioritete të qarta politike: prodhim vendor, fermerë të fuqizuar dhe zinxhir vlerë – Korniza e Programit 2026 vendos theks të fortë në: rritjen e prodhimit vendor dhe reduktimin e varësisë nga importet, fuqizimin e fermerëve të vegjël përmes mekanizmave rishpërndarës, mbështetjen e gjeneratës së re të fermerëve, përmirësimin e cilësisë së prodhimit, veçanërisht në sektorin e qumështit, zhvillimin e kapaciteteve përpunuese për të rritur absorbimin e prodhimit vendor dhe ndërtimin e një zinxhiri të qëndrueshëm të vlerës nga ferma në treg.

Disiplinë fiskale dhe zbatim i përshpejtuar – Vendimi përcakton qartë se alokimet buxhetore përbëjnë kufij maksimalë të shpenzimeve dhe nuk mund të tejkalohen. Kjo qasje siguron një përdorim të qëndrueshëm dhe transparent të fondeve publike, në përputhje me parimet e menaxhimit të financave publike. Për të garantuar zbatim të plotë dhe në kohë, janë themeluar tre grupe punuese që do të hartojnë udhëzimet administrative, thirrjet për aplikim dhe zbatimin e programeve. Këto veprime do të operacionalizojnë programin, duke përcaktuar kriteret e pranueshmërisë, procedurat e aplikimit dhe mekanizmat e kontrollit dhe pagesës.

Ministri Armend Muja theksoi se kjo kornizë programore përfaqëson një ndërhyrje të mirë strukturuar për të adresuar sfidat aktuale të sektorit dhe për të ndërtuar themele të qëndrueshme për zhvillimin e tij afatgjatë. Ai nënvizoi se përmes këtij programi, mbështetja publike nuk kufizohet vetëm në subvencionimin e të ardhurave, por shtrihet në nxitjen e investimeve, rritjen e produktivitetit dhe forcimin e kapaciteteve konkurruese të bujqësisë në Kosovë.

“Kjo kornizë programore është një ndërhyrje e menduar mirë për të mbështetur fermerët tanë sot dhe për të ndërtuar një sektor bujqësor modern për nesër. Ne po ndërtojmë një politikë bujqësore që nuk është vetëm subvencionuese, por zhvillimore dhe transformuese”, tha Ministri Muja.

Gjatë prezantimit të Kornizës së Programit Vjetor 2026, komponentët kryesorë u elaboruan nga drejtuesit institucionalë përgjegjës për hartimin e tyre. Programi për Pagesa Direkte u prezantua nga Drejtori i Departamentit të Politikave Bujqësore dhe Tregjeve, z. Isuf Cikaqi, ndërsa Programi për Zhvillimin Rural u prezantua nga Drejtori i Departamentit për Zhvillim Rural, z. Lulzim Shamolli.

Në këtë konferencë, Ministri u shoqërua nga Sekretarja e Përgjithshme e Ministrisë, znj. Venera Çerkini, si dhe Drejtori i Departamentit për Përzgjedhje dhe Miratim të Projekteve të Zhvillimit Rural në kuadër të Agjencisë për Zhvillimin e Bujqësisë, z. Imer Limani. Kjo përbërje institucionale reflekton një koordinim të plotë ndërmjet politikëbërjes dhe zbatimit operacional të programeve.

Vendimi për Kornizat e Programit Vjetor 2026 krijon bazën për një politikë bujqësore moderne dhe të balancuar në Kosovë, duke integruar në mënyrë koherente mbështetjen direkte për fermerët, investimet strukturore në zhvillimin rural dhe mekanizmat për stabilizimin e tregut. Përmes kësaj qasje të integruar, synohet jo vetëm përballimi i sfidave afatshkurtra, por edhe ndërtimi i një sektori bujqësor më produktiv, më të qëndrueshëm dhe më konkurrues në perspektivë afatgjatë.

Pse nuk ia dha dorën Albin Kurtit, flet drenicaku që jeton në mërgim

Qytetari i cili u kap nga kamera e GazetësDemos, i cili nuk ia zgjati dorën Kurtit, foli rreth këtij momenti.

Ai tregoi arsyen ne veprimit të tij ndaj kryeministrit të vendit, shkruan Demos.

“Na ka shti në përçamje, gjysma e populllit është në përçarje sherri i tij”, tha ai.

Mërgimtari shtoi se para 5/6 viteve ka pasur dëshirë që Kurti të udhëhiqte vendin, por sipas tij për këto 6 vite nuk ka parë ndryshim.

Drenicaku nuk ia zgjat dorën Albin Kurtit gjatë homazheve në Gllobar

Arrestohet ish-këshilltari i Kurtit

Ish-këshilltari i kryeministri në detyrë, Albin Kurti, Durim Berisha, është arrestuar nga Policia e Kosovës.

Lajmin e ka konfirmuar avokati i Berishës, Ngadhnjim Makolli.

“Policia me Urdhër të Prokurorit, ka ndaluar për 48 orë klientin tim, Durim Berisha. Ky ndalim vjen pas denoncimit publik në Facebook rreth dyshimeve për keqpërdorim seksual në BIK”, ka shkruar avokati.

Berisha në profilin e tij në “Facebook” ka publikuar vazhdimisht shkrime ku hedh akuza për keqpërdorime seksuale në BIK.

Ai kishte përmendur edhe kërcënime që pretendon se i janë bërë.

Ky do të jetë kandidati i PDK-së për kryeministër

Blerta Deliu-Kodra, ka deklaruar se Bedri Hamza do të jetë sërish kandidati i PDK-së për kryeministër në zgjedhjet e 7 qershorit.

Ajo në Blic Interview me Astrit Gashin tha se Hamza përfaqëson një figurë serioze dhe të përgatitur, i cili “nuk prodhon drama” dhe nuk përdor gjuhë përçarëse apo etiketuese.

Deliu-Kodra shtoi se PDK synon të fuqizojë vizionin e saj politik dhe të bashkëpunojë edhe me forca të tjera, ndërsa theksoi se zgjedhjet e ardhshme do të vendosin mes, siç u shpreh ajo, një Kosove të varfëruar dhe një qeverisjeje me strategji për dalje nga kriza.

“Bedri Hamza, do të vazhdojë të jetë sërish kandidati ynë për kryeministër në zgjedhjet e 7 Qershorit. Bedri Hamza nuk prodhon drama, ka qenë njeri që ka prezantuar një vizion të njeriut serioz e të përgatitur, nuk etiketon, nuk linqon”.

“Unë vazhdoj të mendoj se ne duhet ta fuqizojmë vizionin tonë me PDK-në edhe me të tjerë që duan të bashkohen.Krizat dhe trazirat kanë qenë të mëdha në këto muaj, e për këtë jam e bindur që do të shohim ndryshim në zgjedhjet e qershorit sepse do të jenë dy dilema para të cilave qytetarët do të jenë në ditën e votimit: Dilema të një Kosove të saksionuar e varfëruar dhe dilema për një qeverisje me strategji për ta nxjerrë vendin nga kjo krizë”, tha Blerta Deliu Kodra.

Tragjike: Vetëvrasje në Piranë të Prizrenit – gruaja gjendet pa shenja jete pranë armës

Një rast i rëndë ka ndodhur në fshatin Piranë të Prizrenit, ku një grua është gjetur pa shenja jete, mëson Sinjali.

Ngjarja është raportuar sot, rreth orës 12:05, nga bashkëshorti i saj, i cili ka njoftuar Policinë se gruaja e tij dyshohet të ketë kryer vetëvrasje.

Njësitë policore kanë dalë menjëherë në vendngjarje, ku kanë hasur në viktimën L.A., rreth 43-vjeçare, ndërsa ekipi mjekësor ka konstatuar vdekjen e saj.

Sipas informacioneve fillestare, pranë trupit është gjetur edhe një armë zjarri, e cila dyshohet të jetë përdorur nga viktima

Në vendin e ngjarjes kanë dalë njësitet e hetimeve të stacionit dhe hetuesit rajonalë, të cilët kanë siguruar vendin dhe kanë nisur ekzaminimet.

Rasti është iniciuar si “Hetim i vdekjes”, ndërsa për detaje shtesë pritet raporti i mëtejmë nga autoritetet kompetente.

Gani Geci me lutje: Ju që dikur ishit me Vjosa Osmanin, kthehuni në LDK!

Gani Geci, ish-deputet i LDK-së, ka shkruar një status, në të cilin ka komentuar zhvillimet brenda LDK-së.

Geci ka pasur një lutje për të gjithë që dikur ikën nga LDK-ja bashkë me Vjosa Osmanin, ish-presidente e Kosovës.

Ai ka shkruar se ata që ishin me Osmani, duhet të kthehen në LDK.

Kosova po bëhet gati për zgjedhje, Kurti emëron zëvendësministrin e radhës

Albin Kurti, kryeministër në detyrë, ka emëruar Agon Batushën, zëvendësministër në Ministrinë e Administrimit të Pushtetit Lokal.

Siç njofton ZKM-ja, Kurti i ka uruar suksese Batushës në detyrën e re.

Ndryshe, Batusha, më herët ka qenë deputet nga radhët e Lëvizjes Vetëvendosje.

Komunikata e ZKM-së:

Agon Batusha emërohet zëvendësministër në Ministrinë e Administrimit të Pushtetit Lokal

Prishtinë, 1 maj 2026

Kryeministri në detyrë i Republikës së Kosovës, Albin Kurti, ka emëruar z. Agon Batusha në pozitën e zëvendësministrit në Ministrinë e Administrimit të Pushtetit Lokal.

Kryeministri në detyrë Kurti e uroi z. Batusha për detyrën e re dhe i dëshiroi suksese në përmbushjen e përgjegjësive të reja.

Këto janë çmimet e derivateve sot në Kosovë

Çmimi i naftës për ditën e sotme është 1.68 euro për litër, njëjtë si çmimi i djeshëm.

Kështu është bërë e ditur nga Ministria e Industrisë, Ndërmarrësisë, Tregtisë dhe Inovacionit, e cila ka publikuar përditësimin e çmimeve të derivateve.

Sipas njoftimit, benzina kushton deri në 1.47 euro për një litër, ndërsa gazi 0.85 euro.

Kryetarja e Vlorës: S’ka më shezlongë 20 euro…

Kryetarja e Bashkisë së Vlorës, Brunilda Mersini foli mbi vendimin e miratuar një ditë më parë në këshillin bashkiak për tarifën 700 lekë (7 euro) për plazhet.

Mersini thotë se janë 15 mijë metër katror vijë bregdetare plazh publik që do të jetë falas. Në këto plazhe, sipas Mersinit, do të vendosen 350 çadra dhe shezlongë. Ajo thotë se krahas tyre do të ketë edhe plazhe publike pa çadra dhe shezlong ku qytetarët do të mund të vendosin çadrat dhe shezlongët personal.

Për sa i përket tarifës prej 700 lekësh (7 euro), Brunilda Mersini, kryetare e bashkisë së Vlorës, thotë se këto janë plazhe publike që do të menaxhohen me anën edhe të bashkëpunimit me privati.

Tarifa 700 lekë (7 euro) sipas saj është limiti.

“Pra bizneset private në ndryshim nga një vit më parë ku kishim çmime të ndryshme deri në 2 mijë lekë (20 euro). Këtë vit plazhet private do të shkojnë maksimumi në vlerën 700 lekë dhe jo më tepër”, u shpreh kryebashkiakja.

Tarifa prej 700 lekësh e plazheve private ka ngjallur shumë diskutime në Këshillin Bashkiak dhe në qytetin e Vlorës ditët e fundit./Top Channel

Krimineli i luftës Ratko Mlladiç që u dënua për gjenocid është ‘‘pranë vdekjes’’, avokatët kërkojnë lirimin e tij nga burgu

Avokatët që përfaqësojnë kriminelin e dënuar të luftës nga serbët e Bosnjës, Ratko Mlladiç, janë në pritje të një vendimi nga një gjykatë e OKB-së për kërkesën e tyre që ai të lirohet nga burgu në Hagë, me arsyetimin se është në fund të jetës së tij.

Mlladiç, 84 vjeç, u dënua me burgim të përjetshëm në vitin 2017 për gjenocid, krime lufte dhe krime kundër njerëzimit gjatë luftërave në ish-Jugosllavi midis viteve 1992 dhe 1995. Dënimi për njeriun e njohur si “Kasapi i Bosnjës” u la në fuqi pas apelit në vitin 2021, raporton BBC, përcjell Gazeta Express.

Në një parashtresë të detajuar drejtuar gjykatës të premten, avokatët e tij thanë se Mlladiç ka qenë për një kohë të gjatë i shtrirë në shtrat ose në karrocë me rrota.

Ata shtuan se ai ka pësuar një goditje të dyshuar në tru gjatë një telefonate me djalin e tij, gjë që e ka lënë pothuajse të paaftë për të folur.

Sipas tyre, dy mjekë e kanë vlerësuar gjendjen e tij si të rëndë dhe “rreziku për vdekje të afërt është i lartë”, ndërsa avokatët kanë kërkuar lirimin e menjëhershëm të përkohshëm ose me kusht në një spital ose hospice ku flitet gjuha serbe.

Nënkuptohet se ekipi mbrojtës i Mlladiç po kërkon kthimin e tij në shtëpi, dhe ministri serb i Drejtësisë, Nenad Vujic, ka bërë të qartë se qeveria e tij është e gatshme të japë garanci për gjykatën nëse ai lirohet.

Gjyqtarja Graciela Gatti Santana ka kërkuar një vlerësim të pavarur shëndetësor, i cili pritej të paraqiste gjetjet të premten.

Mlladiç komandoi forcat serbe të Bosnjës në vitet 1990 kundër ushtrive kroate të Bosnjës dhe boshnjakëve (myslimanëve boshnjakë), gjatë një lufte në të cilën trupat e tij kryen “spastrim etnik” në Bosnje-Hercegovinë, rrethuan qytetin kryesor Sarajevë duke shkaktuar vdekjen e më shumë se 10,000 njerëzve, dhe kryen masakrën e 8,000 burrave dhe djemve në Srebrenicë.

Mlladiç u zhduk në vitin 1995 dhe u gjet vetëm në Serbinë rurale në vitin 2011, pas 16 vitesh në arrati. Ai doli në gjyq në Hagë në vitin 2012 dhe u dënua në vitin 2017.

Ai mbahet në një qendër paraburgimi të Kombeve të Bashkuara që nga viti 2011, por avokatët e tij argumentojnë se kjo njësi dhe spitali i burgut nuk janë të mjaftueshme për t’i ofruar kujdesin e nevojshëm, dhe se mbajtja e tij në paraburgim përbën “ndëshkim mizor dhe çnjerëzor” dhe nuk shërben më për asnjë qëllim.

Grupet boshnjake që përfaqësojnë viktimat dhe të mbijetuarit e kundërshtojnë fuqishëm lirimin e ish-komandantit serb të Bosnjës nga burgu, duke e parë atë si një “taktikë ligjore” dhe jo si një kërkesë humanitare. Ata kanë paralajmëruar gjykatën e OKB-së se ekipi i tij mbrojtës ka bërë përpjekje të ngjashme të përsëritura prej vitesh.

Avokatët e tij kërkuan lirimin në korrik 2025, por kjo u refuzua; më pas, në nëntor 2025, ata kërkuan pa sukses një lirim të përkohshëm për të marrë pjesë në një ceremoni përkujtimore për një anëtar të familjes.

Djali i Mlladiçit, Darko, u tha mediave serbe se nuk ka pasur ndryshime në gjendjen shëndetësore të babait të tij dhe se planifikon ta vizitojë atë në spitalin e burgut javën e ardhshme.

Gjyqtarja Graciela Gatti Santana tha se kishte kërkuar nga ekspertët mjekësorë të vlerësojnë gjendjen aktuale të tij dhe mundësitë për trajtim të mëtejshëm, si dhe nëse jetëgjatësia e tij mund të përcaktohet dhe nëse kujdesi që po merr në paraburgim është i mjaftueshëm.