Magazine PRO

Një përleshje e përgjakshme ka ndodhur mbrëmë në komunën e Lipjanit, më saktësisht në sheshin e qytetit, ku të përfshirë ishin rreth tetë persona, raporton GazetaDemos.

Siç merr vesh Demos nga burimet në vendin e ngjarjes, katër nga të përfshirët në përleshje kanë pësuar lëndime.

Njëri ndër të lënduarit është goditur me mjet të mprehtë, thikë, me çrast nga ekipet emergjente është dërguar në Emergjencë për vazhdimin e trajtimit mjekësor.

Policia ka arritur që të arrestojë disa persona, ndërsa mediat lokale kanë publikuar pamje nga momenti kur i riu i therur merret nga ekipi mjekësor.

VIDEO: KLIKO

Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes të rinjve në vendin tonë. Për pasojë, konfliktet jo rrallëherë eskalojnë edhe në rrahje brutale, për çka nevojitet ndërhyrja e Policisë, raporton Gazeta Sinjali.

Një përleshje e tillë ka ndodhur mbrëmë në sheshin “Adem Jashari” në Lipjan, ku disa persona kanë mbetur të lënduar, ndërsa njëri prej tyre është në gjendje të rëndë.

Burime të Sinjalit bëjnë me dije se rasti është regjistruar më 27 gusht, rreth orës 21:45, kur në konflikt janë përfshirë disa persona.

Gjatë përleshjes, një person ka mbetur i therur rëndë me thikë, plagë që dyshohet se ia ka shkaktuar një i mituri D.L. Për pasojë, ai është dërguar me urgjencë në QKUK-Prishtinë, ku gjendet në gjendje kritike për jetën, ndërsa personat e tjerë të lënduar pas tretmanit janë liruar.

Në vendin e ngjarjes kanë dalë hetuesit e Stacionit Policor Lipjan, hetuesit rajonalë dhe forenzika, të cilët kanë sekuestruar edhe thikën që u përdor në rast.

Me vendim të Prokurorit, të dyshuarit janë ndaluar: dy të miturit për 24 orë, ndërsa tre të rriturit për 48 orë.

Një pamflet skandaloz të vitit 2012, me titullin “Globalizimi i Ballkanit Perëndimor: Krimi Transkombëtar, Islami Fundamental dhe Aleancat e Padrejta”, autor i së cilit është Dimal Basha, kryetari aktual i Kuvendit të Kosovës, me një studiuese maqedonase Jana Arsovka, hedh akuza të rënda në drejtim të imazhit të Ushtrisë Çlirimtare të Kosovës.

Në pamfletin në fjalë, të botuar në revistën ‘Open Edition‘ me qëllim të ngritjes akademike në SHBA, pretendohet se fondet për Ushtrinë Çlirimtare të Kosovës vinin nga trafikantë droge.

“Sipas rasteve të hetuara, fondet për UÇK-në vinin nga shqiptarë të zakonshëm në diasporë, si dhe nga trafikantë droge që vepronin në të gjithë Evropën Perëndimore dhe SHBA-në. Kjo mbështetje nuk kufizohej vetëm në para, por trafikantët e drogës dërgonin gjithashtu njerëz të armatosur për të luftuar përkrah UÇK-së dhe blinin armë në emër të UÇK-së”, thuhet ndër të tjera në pamflet.

Lidhur me shkrimin e kryetarit aktual të Kuvendit të Kosovës kundër UÇK-së, ka reaguar ashpër ish-komandanti i Ushtrisë Çlirimtare të Kosovës, Sami Lushtaku.

Lushtaku ka hedhur akuza kundrejt Lëvizjes Vetëvendosje, duke thënë se ata që mendojnë serbisht dhe i shërbejnë Beogradit.

Ai thotë se gjuha e LVV-së çdo herë ka qenë e njëjta.

“Gjuha e Lëvizjes Vetëvendosje gjithmonë ka qenë e njëjtë, nuk është e re. Këta që mendojnë serbisht dhe i shërbejnë Beogradit, të njëjtën gjuhë e kanë pa përjashtime”, u shpreh Lushtaku për “Front Online”.

I pyetur se si e ka parë zgjedhjen për kryetar të Kuvendit të Kosovës të Dimal Bashës, Lushtaku nuk dha koment.

“E kemi parë që u zgjedh kryetar, por veç për këtë punë nuk kam koment”, përfundoi Lushtaku.

Prokuroria ka përdorur një video si provë materiale për të treguar zhvillimet e tragjedisë së Maria Clara Urdangaray në Hotel Sonoma.

Xhirimi tregon momentin kur nga ora 1:53:59 nuk lëviz asgjë, por në minutën 1:54:35 shihet xhami duke u thyer bashkë me kornizën e dritares dhe më pas Maria Clara duke rënë bashkë me të.

Njësia Forenzike ka konfirmuar se ajo mbante një atlete të djathtë me numër 38, me një njollë të kuqe të ngjashme me gjak, raporton emisioni MAT në Klan Kosova.

Avokati i Endrit Nikës, Drilon Imeri, ka përshkruar versionin e tij.

“Endriti thotë që ajo vazhdimisht kishte sjellje agresive me motive xhelozie… në një moment ajo e tërheq prej këmbëve, ai e mban për t’u qetësuar, pastaj ajo shkon te xhami… dhe më pas ndodh krisma e lehtë dhe ai e sheh që Clara mungon, trupin poshtë”, ka treguar avokati.

Raporti i autopsisë tregon se Maria Clara, në momentin e rënies, kishte veshur bluzë të shkurtër dhe pjesën tjetër të trupit të zhveshur.

Momentet e regjistruara tregojnë se tragjedia ndodhi në pak sekonda, duke lënë ende shumë pyetje për rrethanat e vdekjes së saj.

Videoja e publikuar nga Klan Kosova është e hijezuar për të mbrojtur dinjitetin e viktimës. /Klankosova.tv

Mediumi kroat “index.hr” ka shkruar sot se autoritetet kroate kanë arrestuar një pilot kroat J.I të forcave ajrore kroate dhe të dashurën e tij A.M e nacionalitetit serb nga qyteti i Mitrovicës, nën dyshimet për spiunazh.

Gazeta Express mëson ekskluzivisht se e arrestuara A.M. është 46 vjeçarja Ana (Dragomir) Murganiq, me banim në Mitrovicën e Veriut, në rrugën “Ivo Lola Ribar”.

Sipas burimeve, Murganiq ka shoqëruar disa herë në udhëtime Miodrag Miliçeviqin, drejtorin e OJQ’së “Aktiv” dhe ish anëtarin e ekipit menaxhues për krijimin e Asociacionit të Komunave me Shumicë Serbe, Igor Kallamar. Kjo edhe e dëshmon lidhjen e saj me zyrtarë të lartë të Listës Srpska.

 

 

Po ashtu, merret vesh se Murganiq ka punuar edhe në EULEX dhe UNMIK. Ajo dyshohet për lidhje të afërta me shumë gjyqtarë dhe prokurorë të EULEX-it, te cilët sipas burimeve dyshohet se mund t’i ketë shantazhuar.

Një burim i ka thënë Gazetës Express se shërbimet serbe kanë rekrutuar dhe nxitur punësimin e serbëve brenda organizatave ndërkombëtare në Kosovë, duke i shfrytëzuar për sigurim të informacioneve dhe në të njëjtën kohë për interferim në drejtesi e sidomos ndaj njerezve të UÇK-së.

Murganiq sipas burimeve ka informuar në vazhdimesi zyrtarët e Listës Srpska për zhvillimet në këto organizata.

 

 

Në operacionin për arrestimin e saj dhe pilotit kroat, sipas mediumit kroat është përfshirë edhe Europol.

Siç raporton ky medium, hetuesit dyshojnë se piloti ushtarak i jepte sekrete partneres së tij, dhe ajo ia dërgonte ato Listës Serbe.

 

 

Index shkruan se e mori këtë informacion nga burime të besueshme por se kur kanë provuar ta konfirmojnë, kanë hasur në heshtje të institucioneve kroate.

“Drejtoria e Policisë na tha të kontaktonim Ministrinë e Mbrojtjes, meqenëse policia ushtarake është e përfshirë në këtë rast, por Ministria e Mbrojtjes ende nuk ka dhënë asnjë informacion.Jozyrtarisht kemi mësuar se të dy të dyshuarit janë marrë në pyetje sot dhe se pritet një vendim nëse ata do të përfundojnë në paraburgim”, shkruan Index.hr.

 

“Sipas informacionit që arritëm të mbledhim, hetuesit dyshojnë se piloti ushtarak kroat, i cili ishte i angazhuar në KFOR (forca ndërkombëtare paqeruajtëse e NATO-s në Kosovë), i dha partneres së tij informacione konfidenciale që ajo ua kaloi anëtarëve të Listës Serbe, partisë së pakicës serbe në Kosovë.”, shton raportimi i mediumit kroat.

Siç raporton ky medium, dyshohet se J.A.i ka dhënë të dashurës së tij informacione rreth lëvizjeve të serbëve në Veri të Kosovës nga fundi i vitit 2022 deri në këtë vit, si dhe lëvizjeve të trupave të KFOR-it.

Ish-kryeministri i Kosovës, Isa Mustafa, ka reaguar ashpër pas publikimit të artikullit të Dimal Bashës të botuar në vitin 2012 ku akuzonte UÇK-në.

Mustafa në një prononcim për GazetaBlic, thotë se përveç shkarkimit të Bashës, janë edhe shumë persona tjerë që duhet të shkarkohen si ata që e propozuan, ata që e votuan dhe ata që e uruan, duke theksuar se në të kundërtën duhet pranuar se “ky shtet është kriminal, i çliruar dhe i ngritur nga kriminelët dhe drogagjijtë”.

Tutje ai shton se edhe në këtë rast duhet ta ruajm dinjitetin e shtetit tonë dhe atyre që luftuan, punuan dhe u flijuan për lirinë që e gëzojmë.

Për fund, Mustafa thekson se njerëz me veprime të tilla nuk duhet të qëndrojnë në krye të Kuvendit e as në Kuvend.

“Janë shumë për shkarkim. Ata që e propozuan, ata që i thurrën lavd, ata që e votuan, ata që e uruan. Ose të pranojmë se ky shtet është kriminal, i çliruar dhe i ngritur nga kriminelët dhe drogagjijtë. Edhe në këtë rast është obligim ta ruajmë dinjitetin e shtetit tonë, të atyre që luftuan, punuan dhe u flijuan për lirinë që e gëzojmë. Njerëz me pikëpamje dhe veprime të tilla nuk duhet të qëndrojnë në krye të Kuvendit e as në Kuvend”, tha ai.

Kryetari i Lidhjes Demokratike të Kosovës, Lumir Abdixhiku, ka thënë se nuk mund të bashkëpunojmë më një parti që denigron çdo institucion të Kosovës.

Ai ka folur në Debat Plus për akuzat e Vetëvendosjes së LDK “është me Serbinë” sa i përket certifikimit të Listës Serbe.

“PZAP ka vendosur me obligim që të certifikohet Lista Serbe. Ministria e Punëve të Brendshme ka çu letër ka thënë në rregull është me Listën Serbe, Ministria e Punëve të Jashtme nuk ka dërgu asnjë dokument dhe PZAP ka certifikuar. Por ky vazhdon me këtë narracion. Nuk jemi me Serbinë, por je duke e denigruar Kushtetutën. E denigron Gjykatën Supreme, Kuvendin dhe për këtë ne duhet të dalim kundër sepse kjo nuk është Kosova ime”, ka thënë Abdixhiku.

Sipas Abdixhiku, VV në vazhdimësi ka denigruar Gjykatën Kushtetuese dhe Supreme.

“Ka vendim të Gjykatës Supreme që thotë s’mundesh me qenë edhe ministër edhe deputet dhe vazhdon me i pas 10-15 ministra që janë edhe ministra edhe deputetë. S’ta bon hesap kurrkush Gjykatën Supreme të Republikës së Kosovës”, ka thënë ai.

“Ata i kanë pasur partnerë të koalicionit. A po harrojnë që Slavko Simiçi është votuar prej Vetëvendosjes para 4 viteve”, ka thënë Abdixhiku.

Nënkryetari i sapozgjedhur i Kuvendit të Kosovës nga radhët e LDK-së, Kujtim Shala, është shembulli më i mirë se si koha, hapësira dhe ligjësitë e zakonshme të arsimit nuk vlejnë për disa njerëz të veçantë. Sipas biografisë së publikuar në faqen zyrtare të Akademisë së Shkencave dhe Arteve të Kosovës, ku ai sot është akademik i rregullt, Shala arriti diçka që në botën normale do të konsiderohej e pamundur: e përfundoi magjistraturën në vitin 2001 dhe vetëm një vit më vonë, në vitin 2002, mbrojti edhe doktoraturën. Po, e lexuat drejt – vetëm një vit nga një gradë në tjetrën. Në një vend ku studentët shpesh presin me vite të tëra për të dhënë një provim të vetëm, ai përfundoi një doktoratë në kohën sa dikush tjetër mezi do të shkruante hyrjen e tezës.

Nëse do të vendosnim ta krahasonim me standardet ndërkombëtare, Shala del të jetë përfaqësues i një rruge krejt të re akademike. Në universitetet amerikane, mesatarisht një doktoratë në shkencat shoqërore zgjat 5-6 vite. Në Evropë, studentët shpresojnë të mbarojnë për 4-5 vite, por shpesh përfundojnë duke kaluar dekadën e tyre më të bukur duke bredhur arkivave, bibliotekave dhe duke luftuar me profesorët e komisionet. Por për Shalën, e gjithë kjo është luks i panevojshëm. Ai e përshpejtoi procesin aq shumë sa duket se as Einsteini nuk do ta kishte mbajtur hapin. Nëse në Harvard një doktorant për 5 vite lodhet duke analizuar një temë të vetme, Shala në një vit jo vetëm që i analizoi, por i mbylli kapitujt, i vuri pikën mbi “i” dhe mori titullin e madh “doktor shkencash”.

Kjo ngritje marramendëse shkencore nuk është e vetmja mrekulli në biografinë e tij. Kujtim Shala, përveç që është profesor në Universitetin e Prishtinës dhe deputet për disa mandate, mban edhe postin e nënkryetarit të LDK-së, dhe që prej vitesh është akademik i rregullt në ASHAK. Një listë e tillë angazhimesh do ta linte çdo njeri normal pa frymë, por jo Shalën. Ai, përveç të gjitha këtyre detyrimeve politike, partiake dhe akademike, arriti të gjejë kohë edhe për “punën kolosale shkencore” që e ngriti në nivelin më të lartë. Duket se për të, dita ka 48 orë e java 14 ditë. Shkencëtarë të mëdhenj në botë, të cilët gjithë jetën e tyre ia përkushtojnë një fushe të vetme, do të turpëroheshin duke parë ritmin e Shalës.

Mund ta krahasonim, bie fjala, me Isaac Newton-in, i cili për dekada punoi mbi ligjet e tij të famshme të mekanikës. Apo me Charles Darwin-in, që pas udhëtimit me “Beagle” i kushtoi më shumë se 20 vite kërkimeve para se të publikonte “Origjinën e Specieve”. Por kujt i duhen kaq vite? Shala, me një vit të vetëm, duket sikur e përmblodhi gjithë “evolucionin” shkencor të një jete të tërë në një periudhë të shkurtër kohore. Kjo është arsyeja pse ai meriton të quhet jo thjesht akademik, por edhe fenomen shkencor – një lloj Usain Bolt-i i arsimit, që thyen rekorde me shpejtësi të pabesueshme.

Por le ta pranojmë: në Kosovë gjërat funksionojnë ndryshe. Aty ku bota i respekton rregullat e lojës, ne shpesh i shpikim rregullat tona. Në këtë rast, Shala i tregoi botës se nuk ka pse të humbasësh vite të tëra në kërkime, nëse e ke mundësinë t’i përfundosh punët me një të rënë të lapsit. Në fund të fundit, kush tha që shkenca është e ngadaltë? Ndoshta është vetëm çështje e talentit të lindur – dhe Shala, sipas biografisë së tij, është shembulli më i gjallë i këtij “talenti”.

Pra, nënkryetari i Kuvendit, deputeti, nënkryetari i partisë, profesori dhe akademiku, arriti të bëjë për një vit atë që bota e qytetëruar e bën për gati një dekadë. Një rast i tillë meriton të hyjë në librat e Guinness-it, ose të paktën në tekstet universitare si shembull i një “supernjeriu” të arsimit. Sepse, me të drejtë, përballë këtij karrierizmi të rrufeshëm, mbetet vetëm një pyetje: a jemi ne të tjerët shumë të ngadalshëm, apo është Shala thjesht shumë, shumë i shpejtë?

Hulumtimi i Insajderit ka zbuluar se “frizeri më i shtrenjtë në rajon”, Rizah Bajrami – i njohur ndryshe si Rizza – është kapur në shkelje të rëndë ligjore. Në nëntor të vitit 2024, Inspektorati Shëndetësor i Kosovës zbuloi se në klinikën “Rizza Hair Clinic” po punonin tre persona të pa licencuar nga Ministria e Shëndetësisë, të cilët ofronin shërbime për mbjellje flokësh dhe estetike pa asnjë leje pune. Për këtë shkelje të rëndë të Ligjit për Shëndetësi, klinika u gjobit me 5 mijë euro.

Inspektorati Shëndetësor i Kosovës, pas konstatimit të shkeljeve serioze ligjore gjatë një inspektimi të zhvilluar më 19 nëntor 2024 në Fushë Kosovë, e ka gjobitur me 5 mijë euro klinikën për mbjellje të flokëve dhe ndërhyrje estetike “Rizza Hair Clinic L.L.C”, me themelues Rizah Bajramin, ndërsa pronare figuron emri i Igballe Bunjakut.

Sipas vendimit të siguruar nga Insajderi, përmes kërkesës për qasje në dokumente zyrtare në Ministrinë e Shëndetësisë, klinika është kapur duke ofruar shërbime shëndetësore pa licencën e nevojshme për tre mjekë që ishin duke ushtruar aktivitetin.

Në raportin e inspektimit janë hasur tre persona që nuk kishin autorizim për të ushtruar aktivitetin shëndetësor. Ndërkohë, specialistja e regjistruar nga klinika në Ministrinë e Shëndetësisë, e cila kishte edhe licencë valide, nuk është gjetur në klinikë. Sipas raportit, siç është cituar nga menaxherja, ajo nuk ofron shërbime prej më shumë se një muaji.

Për më tepër, në hapësirat e klinikës janë gjetur produkte të ekspozuara për shitje pa përshkrim mjekësor, çka përbën një tjetër shkelje të rregullave në fuqi për institucionet shëndetësore.

Drejtori i Klinikës, Rizah Bajrami ka thënë për Insajderin se nuk është në dijeni për ndonjë gjobë duke mohuar se ka staf pa licencë në klinikën e tij.

“Na qëndrojna me staf me krejt në rregull që shumë vite. Na këna dal që jena në rregull. Nuk kemi informacion që kemi marr gjobë sepse unë jam drejtor i klinikës nuk jam pronar. Duhet me bisedu me staf të brendshëm”, ka thënë berberi Riza.

Kryetari i Kuvendit të Kosovës, Dimal Basha, ka reaguar në lidhje me pamfletin anti-UÇK të botuar në vitin 2012 ku ai është bashkautor.

Ai ka thënë se ai e ka shkruar vetëm kapitullin e tretë që ka të bëjë me depërtimin e siç thotë ai Islamit fundamentalist në Evropën Juglindore.

Basha ka thënë se ai çmon luftën e UÇK-së dhe nuk ka shkruar asnjëherë kundër saj.

Në këtë formë ai ka provuar të distancohet nga autorësia e një pamfleti me akuza ndaj UÇK-së.

Postimi i plotë i Bashës:

Të dashur qytetarë,

Nuk është hera e parë që sulmohem me të pavërteta nga qarqe të caktuara, mirëpo para gjithë qytetarëve kam përgjegjësinë dhe obligimin t’ju jap llogari dhe sqarim për akuzat e ngritura sot.

Punimi që po qarkullon në media është i vitit 2012, në kohën kur unë kam qenë student. Autorësia ime në këtë artikull i përket vetëm Kapitullit 3, i cili trajton depërtimin e Islamit fundamentalist në Evropën Juglindore, me fokus Kosovën. Këtu përfundon përgjegjësia ime lidhur me punimin në fjalë.

Në lidhje me këtë çështje, tashmë është sqaruar për media edhe vet autorja Jana Arsovska, e cila ka dërguar një email demantues, dhe e ka bërë të qartë që unë kam dorëzuar për publikim vetëm Kapitullin 3 dhe mbaj përgjegjësi vetëm për përmbajtjen në atë kapitull.

Unë, Dimal Basha, e çmoj lart luftën e Ushtrisë Çlirimtare të Kosovës dhe sakrificën e popullit tonë për liri. Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë.

I kërkoj falje qytetarëve që janë shqetësuar nga ky raportim i rremë, dhe prandaj lus mediat që të raportojnë drejtë dhe saktë, e në veçanti për tema kaq të ndjeshme, që nuk lidhen vetëm me mua personalisht, por me tërë popullin e Republikës së Kosovës.