Arben Gashi tregon nëse do të kandidojë sërish për deputet

Arben Gashi do të jetë sërish kandidat për deputet në listën e LDK-së në zgjedhjet e 7 qershorit.

Lajmin e ka bërë të ditur vet Gashi përmes një postimi në Facebook.

Ai ka bërë të ditur se ka marrë besimin e dy degëve të LDK-së në Pejë dhe Prishtinë për që qenë sërish kandidat për deputet, raporton IndeksOnline.

Postimi i plotë:

Me propozim të Degës së LDK-së në Pejë dhe Degës IV të LDK-së në Prishtinë, jam kandidat edhe për një mandat për deputet në Kuvendin e Kosovës.

Falënderoj strukturat e LDK-së, votuesit dhe qytetarët e Kosovës për besimin e vazhdueshëm ndaj meje. Ju garantoj se do të vazhdoj me përkushtim në mbrojtje të vlerave tona politike, të sistemit demokratik dhe të besimit qytetar, për një Kosovë demokratike, të zhvilluar dhe të përhershme.

Më 7 Qershor është momenti kur së bashku e përcaktojmë të ardhmen e Kosovës.

Na priftë e mbara!

 

“Më jep para për drogë” – 32 vjeçari rrah babanë me shkop në Pejë, pastaj sulmon edhe Policinë

Një rast i rëndë i dhunës në familje ka ndodhur pas mesnate në Pejë, ku një 32-vjeçar dyshohet se sulmoi fizikisht babanë e tij për para, ndërsa më pas, pas arrestimit, goditi edhe një zyrtar policor brenda Stacionit Policor, mëson Sinjali nga burime të afërta me hetimin.

Ngjarja ka ndodhur në rrugën “Lekë Dukagjini” rreth orës 00:00 të datës 10 maj 2026.

Sipas informatave, Policia kishte intervenuar pas raportimit për dhunë në familje.

Burimet bëjnë të ditur se viktima kishte deklaruar para hetuesve se djali i tij, K. G (33-vjeçar), kishte shkuar në shtëpi dhe kishte kërkuar para për të blerë narkotikë.

Kur babai nuk kishte pasur para për t’i dhënë, situata kishte eskaluar.

Sipas deklarimit të viktimës, i dyshuari fillimisht kishte fikur dritat e shtëpisë dhe më pas kishte nisur ta godiste me shuplaka.

Por dhuna nuk kishte përfunduar aty.

Sinjali mëson se më pas ai kishte marrë edhe një shkop, me të cilin dyshohet se e kishte goditur disa herë babanë e tij.

Për rastin, Policia ka arrestuar të dyshuarin dhe e ka shoqëruar në Stacionin Policor në Pejë.

Burimet konfirmojnë se ndaj tij ekzistonte edhe urdhër mbrojtjeje i lëshuar nga Gjykata Themelore – Divizioni Civil, çka bëri që Prokurori të urdhërojë ndalimin e tij për: “Dhunë në familje” dhe “Mospërfillje të gjykatës”.

Por incidenti vazhdoi edhe brenda ambienteve policore.

Sipas informatave, pasi iu dorëzua aktvendimi për ndalim, i dyshuari e grisi kopjen e dokumentit para policëve.

Më pas, gjatë transportimit për në Qendrën e Ndalimit, ai dyshohet se bëri rezistencë aktive dhe në një moment, në korridorin e stacionit policor, e goditi me kokë në pjesën e tëmthit një zyrtar policor.

Pas incidentit të tretë, Prokurori urdhëroi që ndaj tij të shtohet edhe vepra penale: “Sulm ndaj personit zyrtar”.

I dyshuari është dërguar në ndalim për 48 orë, ndërsa hetimet janë në vazhdim.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Arrestohen personat e shumë kërkuar në Prishtinë

Dy persona janë arrestuar në Aeroportin Ndërkombëtar “Adem Jashari” në Prishtinë gjatë ditës së djeshme, pas urdhëresave të lëshuara nga gjykata.

Sipas raportit të Policisë së Kosovës, rasti i parë ka ndodhur rreth orës 10:20, ku një person mashkull kosovar është arrestuar në aeroport dhe më pas është dërguar në vuajtje të dënimit, shkruan Insajderi.

“ANP. Adem Jashari, Prishtinë / 09.05.2026 – 10:20. Në bazë të urdhëresës të lëshuar nga gjykata është arrestuar i kërkuari m/k dhe i njëjti është dërguar në vuajtje të dënimit”, thuhet në raport.

Ndërkaq, në rastin e dytë, rreth orës 17:11, një tjetër person mashkull kosovar është arrestuar në të njëjtin aeroport, bazuar në dy urdhëresa të gjykatës, dhe është dërguar gjithashtu në vuajtje të dënimit.

“ANP. Adem Jashari, Prishtinë / 09.05.2026-17:11. Në bazë të dy urdhëresave lëshuar nga gjykata është arrestuar i kërkuari m/k dhe i njëjti është dërguar në vuajtje të dënimit”, thuhet në raport. /Insajderi.org/

Dy vëllezër rrahen për pronë, përfundojnë në polici

Një incident mes dy vëllezërve ka ndodhur të premten rreth orës 13:45 në Mitrovicë, si pasojë e një mosmarrëveshjeje lidhur me një kontest pronësor.

Sipas informacioneve, dy të dyshuarit meshkuj kosovarë janë përleshur fizikisht ndërmjet vete, ndërsa gjatë përpjekjes për t’i ndalur ata, një viktimë ka pësuar lëndime trupore.

Me vendim të prokurorit, pas inicimit të rastit, dy të dyshuarit janë dërguar në mbajtje.

Raporti i policisë:

Mitrovicë Jugu / 09.05.2026 – 13:45. Dy të dyshuar m/k (vëllezër) pas një mosmarrëveshje rreth një kontesti pronësor ishin përleshur ndërmjet vete. Pas incidentit, trajtim mjekësor ka pranuar viktima m/k e cila kishte tentuar ti ndalojë të dyshuarit. Me vendim të prokurorit pas inicimit të rastit të dyshuarit janë dërguar në mbajtje.

Vëllai rrah vëllan në Prishtinë, intervenon policia

Një person është arrestuar të shtunën në Prishtinë pasi dyshohet se ka sulmuar fizikisht vëllain e tij.

Sipas Policisë së Kosovës, bazuar në deklarimin e viktimës, i dyshuari kishte tentuar të dilte me veturë në qytet në gjendje të dehur, por ishte penguar nga familjarët. Pas kësaj, ai dyshohet se e ka sulmuar fizikisht vëllain e tij, shkruan Gazeta Demos.

Me vendim të prokurorit, i dyshuari është dërguar në mbajtje për 48 orë, ndërsa rasti po hetohet.

“Prishtinë / 09.05.2026 – 23:52. Është arrestuar i dyshuari m/k për shkak se e kishte sulmuar fizikisht vëllain e tij, viktimën m/k. Sipas viktimës i dyshuari kishte tentuar të dal me veturë në qytet në gjendje të dehur por nuk ishte lejuar dhe për atë shkak ishte sulmuar nga i dyshuari. Me vendim të prokurorit i dyshuari është dërguar në mbajtje për 48 orë”, thuhet në raportin 24-orësh të policisë.

Gruaja rrah burrin e saj

Një rast i dhunës në familje është raportuar në Prishtinë.

Sipas Policisë së Kosovës, pas një mosmarrëveshjeje mes bashkëshortëve, një grua dyshohet se e ka sulmuar fizikisht burrin e saj, shkruan Gazeta Demos.

Palët janë intervistuar dhe me vendim të prokurorit janë liruar në procedurë të rregulltë.

‘Prishtinë / 09.05.2026 – 19:40. Pas një mosmarrëveshje në familje në mes dy bashkëshortëve, e dyshuara femër kosovare dyshohet se ka sulmuar fizikisht bashkëshortin e saj viktimën mashkull kosovar. Palët janë intervistuar dhe me vendim të prokurorit janë liruar në procedurë të rregullte”, thuhet në njoftimin 24 orësh të Policisë së Kosovë.

Elijona reagon, tregon se a u aksidentu me Klodin

Elijona dhe Klodi kanë qenë të përfshirë në një aksident të lehtë automobilistik në Prishtinë.

Sipas raportimeve të Prive Klan Kosova, ngjarja dyshohet të ketë ndodhur teksa ata po udhëtonin së bashku me makinë, ndërsa fatmirësisht nuk ka pasur lëndime serioze dhe situata ka kaluar pa pasoja të rënda.

Mirëpo Elijona e demantoi këtë lajm, duke treguar se një gjë e tillë nuk ka ndodhur kurr.

FOTO:

Befason Ismet Beqiri: Nuk hyn në garë për deputet, tregon arsyen

Anëtari i Lidhjes Demokratike të Kosovës, Ismet Beqiri, ka njoftuar se nuk do të garojë për deputet në zgjedhjet e ardhshme, pavarësisht mbështetjes që ka marrë nga dega e partisë në Kodrën e Trimave në Prishtinë.
Në një reagim publik, ai ka falënderuar përkrahësit dhe ka theksuar se vendimi i tij nuk e ndryshon angazhimin brenda partisë

“Në këtë proces zgjedhor nuk do të jem kandidat për deputet, pavarësisht propozimit dhe mbështetjes së plotë nga dega ime e LDK-së në Kodrën e Trimave, Prishtinë”, ka thënë Beqiri.

Ai ka vlerësuar degën e LDK-së në këtë lagje si një nga më të fortat e partisë, duke e cilësuar si strukturë me histori dhe rezultate.

“Dega e I-rë Kodra e Trimave, bastion i LDK-së, ka histori, rezultate dhe krenari”, është shprehur ai.

Beqiri ka theksuar se mbështet plotësisht strukturat lokale në garën zgjedhore, duke shtuar se angazhimi i tij do të vazhdojë.

“Sigurisht, mbështetja ime është e plotë për strukturat e degës për fitore në këto zgjedhje”, ka deklaruar ai.

Në fund, ai ka ritheksuar lidhjen e tij politike dhe emocionale me partinë dhe lagjen.

“Zemra ime rrah për Kodrën e Trimave, Prishtinën, LDK-në dhe Rugovizmin”, ka thënë Beqiri, duke uruar sukses për strukturat e partisë në zgjedhje

Para zyrtarizimit të kandidatëve për deputetë të Kuvendit, reagon Fahrije Hoti

Fahrije Hoti ka reaguar pas zyrtarizimit të kandidimit të saj për deputete në Kuvendin e Kosovës.

Ajo, nëpërmjet një postimi në llogarinë e saj në Facebook, shkroi: ‘Me kokën lart e zemrën plot. Nesër, edhe zyrtarisht!’

Hoti do të jetë pjesë e listës së LDK-së, në kuadër të 20 emrave të propozuar nga Vjosa Osmani.

 

Adelina Thaçi rikandidon për deputete: Duhet të ndalim këtë dergjë që po rrezikon vendin

Ish-deputetja e Lidhjes Demokratike të Kosovës, Adelina Thaçi, ka bërë të ditur se do të jetë sërish kandidate për deputete në zgjedhjet e ardhshme, pasi ka marrë besimin e Degës së 3-të “Presidenti Ibrahim Rugova” në Prishtinë, duke u zgjedhur njëherësh edhe pjesë e Kryesisë së saj.

Përmes një postimi publik, Thaçi ka falënderuar strukturat e degës për besimin e dhënë, duke e cilësuar këtë si përgjegjësi të shtuar për angazhim politik.

Ajo ka theksuar se gjatë mandatit të saj në Kuvend është përpjekur të jetë “zë i sinqertë, profesional dhe i përkushtuar” i votuesve të LDK-së, duke veçuar mbështetësit që, sipas saj, për 36 vjet kanë mbajtur gjallë misionin rugovian.

Thaçi ka bërë të ditur se në legjislaturën e 10-të është renditur e 26-ta për nga aktiviteti parlamentar mes 120 deputetëve, me 10 fjalime në seancat plenare për projektligje dhe çështje të ndryshme, pa përfshirë angazhimin e saj në Komisionin parlamentar për Kulturë, Sport dhe Turizëm, ku ka ushtruar detyrën e zëvendëskryetares.

Sipas saj, ky vlerësim përbën obligim për të vazhduar angazhimin politik me “dinjitet, përkushtim, seriozitet dhe besnikëri”.

Në mesazhin e saj, Thaçi ka bërë thirrje për unitet brenda LDK-së dhe mobilizim për zgjedhjet e 7 qershorit.

“Vetëm LDK e bashkuar mundet dhe duhet ta ndalë këtë dergjë që po rrezikon vendin”, ka shkruar ajo.