Trump s’len vend për dyshime, paralajmëron këtë vend: “Pa marrëveshje të fortë, do t’ju godasim”

Presidenti i Shteteve të Bashkuara, Donald Trump, ka dhënë një deklaratë të fortë kundër programit bërthamor të Iranit, duke paralajmëruar se do t’i japë fund me çdo kusht.

“Mund t’i hedhim në erë butë, ose t’i hedhim në erë egër. Do të preferoja shumë më tepër një marrëveshje të fortë dhe të verifikuar”, ka thënë Trump në një intervistë për NBC News, duke mos lënë vend për dyshime rreth qëllimeve të tij.

Ai ka shtuar se ekzistojnë vetëm dy alternativa: një marrëveshje e sigurt, ose ndërhyrje ushtarake.

“Do të pranonte vetëm çmontim total të programit bërthamor të Iranit, sepse përndryshe ‘bota do të shkatërrohet’”, ka deklaruar presidenti amerikan.

Në anën tjetër, autoritetet iraniane vazhdojnë të këmbëngulin se qëllimi i programit të tyre bërthamor është vetëm për përdorime civile. Por Trump nuk i beson këtyre pretendimeve.

“E dini, energjia civile shpesh çon në luftëra ushtarake, dhe ne nuk duam që ata të kenë një armë bërthamore”, ka theksuar ai.

Tragjedi në gjumë – Babai dyshohet se vrâu vajzën 15-vjeçare dhe plagosi familjen

Prizreni dhe mbarë vendi u tronditën mëngjesin e së martës nga një ngjarje e rëndë që përfundoi me vrasjen e një vajze 15-vjeçare, shtetase turke. Dyshohet se autor i këtij krimi makabër është babai i saj, Mehmet Gorenç, i cili tashmë ndodhet në paraburgim, pas miratimit të kërkesës së Prokurorisë nga Gjykata Themelore në Prizren, transmeton Insajderi.

Sipas burimeve të Klanit, ngjarja dyshohet të ketë ndodhur pas orës 05:00 të mëngjesit, kur i dyshuari ka sulmuar vajzat e tij ndërsa ato ishin në gjumë. Viktima 15-vjeçare nuk arriti të mbijetojë dhe vdiq në vendin e ngjarjes.

Sulmi u krye me një thikë mbi 20 centimetra të gjatë, me të cilën Gorenç dyshohet se plagosi rëndë edhe vajzën tjetër, rreth 10-vjeçare, si dhe bashkëshorten e tij, e cila pësoi lëndime më të lehta.

 

 

Në kërkesën për caktimin e paraburgimit, Prokuroria përmend edhe një deklaratë të rëndë të të dyshuarit drejtuar bashkëshortes së tij: “Duhet të vdesim të gjithë.”

Prokurori ka vlerësuar se paraburgimi është i domosdoshëm për shkak të natyrës së rëndë të veprave penale, të kryera brenda familjes, si dhe për shkak të rrezikut të arratisjes, duke qenë se Gorenç nuk ka vendbanim të përhershëm në Kosovë.

Ai do të hetohet nën dyshimin për kryerjen e veprave penale: “Vrasje e rëndë”, “Vrasje e rëndë e mbetur në tentativë” dhe “Armëmbajtje pa leje”. Masa e paraburgimit është caktuar për 30 ditë.

 

 

Kodi Penal i Republikës së Kosovës parashikon dënim me jo më pak se 10 vjet burg ose burgim të përjetshëm për ata që kryejnë vrasje ndaj fëmijëve, anëtarëve të familjes, në mënyrë mizore apo me rrezikim të jetës së personave të tjerë.

Këngëtari i njohur njofton se është diagnostikuar me kancer

Brad Arnold, vokalisti i grupit “3 Doors Down” njoftoi se turneu veror do të anulohet, sepse ai është diagnostikuar me kancer në veshka në fazën 4 që i është përhapur në mushkëri.

Arnold e dha lajmin përmes një videoje për fansat e tij të mërkurën, duke u thënë atyre se diagnoza “nuk ishte shumë e mirë”, por falë besimit në Zot, ai “nuk ka frikë”.

Në mbishkrim, Brad shkroi se hiti i vitit 2008 i grupit “It’s not my time” është bërë një himn personal në këtë betejë. Kënga flet për forcën, vendosmërinë dhe refuzimin për t’u dorëzuar përballë vështirësive dhe është frymëzuese për shumë njerëz që përballen me sfida të mëdha në jetë.

“3 Doors Down” u formua si grup në vitin 1996 dhe u bë i famshëm në vitin 2000 me albumin “The better life”, që përmbante hitin “Kryptonite”. Anëtarët e grupit kanë ndryshuar herë pas herë dhe aktualisht janë Arnold, kitaristi dhe vokalisti mbështetës Chris Henderson, kitaristi Chet Roberts, bateristi Greg Upchurch dhe basisti Justin Biltonen.

Evrodeputeti polak e djeg flamurin e Bashkimit Evropian

Eurodeputetit polak të ekstremit të djathtë, Grzegorz Braun , i cili kandidon për president të Polonisë në zgjedhjet e ardhshme, iu hoq imuniteti parlamentar.

Gjatë një vizite në një institucion shtetëror në Katowice të Polonisë, Braun vuri re flamurin e Bashkimit Evropian pranë flamurit polak në korridor. Ai iu afrua flamurit, e hoqi dhe pastaj e hodhi në mënyrë demonstrative në dysheme.

“Emblema të tilla nuk i nënshtrohen asnjë mbrojtjeje ligjore në territorin e Republikës së Polonisë. Kjo është Polonia, jo Brukseli”, bërtiti Brauni.

Pastaj, për ta përfunduar këtë vepër, ai e spërkati flamurin me benzinë ​​dhe i vuri flakën në oborrin e institucionit.

Gjestit i vjen urimi i parë nga Ledioni – dhe është plot emocion

Këngëtari e fituesi i “BBVA4” Besart Kelmendi i njohur me emrin artistik Gjesti, ditën e sotme feston ditëlindjen.

Ai mbush plotë 25-vjet jetë, shkruan Indeksonline.

Ishte moderatori Ledion Liço ai i cili i bëri urimin e parë emocionues Gjestit.

“Urime ditëlindja nub, shkëlqe gjithmonë”, shkroi ai, në postimin e ndarë nga finalja e madhe ku shihen duke u përqafuar.

Publiku e deshi, BBVA e fitoi – Gjesti sot feston ditëlindjen, ja sa vite mbushi

Besart Kelmendi, i njohur për publikun me emrin artistik Gjesti, feston sot një nga ditët më të veçanta në jetën e tij – 25-vjetorin e lindjes.

Pas një rrugëtimi të gjatë dhe të ngarkuar emocionalisht në shtëpinë më të famshme në Shqipëri, Gjesti doli fitues i “Big Brother VIP Albania 4”, duke rrëmbyer zemrat e publikut me sinqeritetin, natyrshmërinë dhe energjinë e tij pozitive. Fitorja e tij u komentua gjerësisht në rrjete sociale dhe në media, ku u përshkrua si një triumf i një personazhi të ri, të thjeshtë dhe me shumë potencial për të ardhmen.

Sot, në këtë ditë të veçantë për të, Gjesti feston si një nga emrat më të dashur të momentit në skenën muzikore dhe televizive shqiptare.

Urime ditëlindjen, Gjesti!

“Spinzorushka” – Gresa Behluli plas bombën ndaj vajzave të sponzorizuara

Këngëtarja e njohur Gresa Behluli ka reaguar ashpër sot përmes një postimi në rrjetet sociale, duke shënjestruar ashtuquajturat “vajza të sponzorizuara”.

Në një gjuhë të drejtpërdrejtë e me tone kritike, ajo i ka quajtur këto vajza “spinzorushka”, një term ironik për të përshkruar stilin e jetës së financuar nga burime të paqarta.

Reagimi i Behlulit ka ngjallur menjëherë vëmendje, shkruan “Kosovarja”.

Këngëtarja, e njohur për stilin e saj të drejtpërdrejtë, nuk ka bërë ndonjë përmendje të drejtpërdrejtë ndaj ndonjë personi, por mesazhi duket i qartë: një thirrje për më shumë ndërgjegjësim dhe respekt në rrugë, pavarësisht makinës që ngas apo mënyrës së jetesës.

“A kështu trajtohet një mik?” – Thirrja e fortë në Parlamentin Evropian për Kosovën nga eurodeputeti holandez

Eurodeputeti holandez, Thijs Reuten ka bërë thirrje të fuqishme që Këshilli i Bashkimit Evropian të heqë pengesat dhe të pranojë aplikimin e Kosovës për anëtarësim në BE.

Në një fjalim të mbajtur në Parlamentin Evropian, Reuten theksoi se Kosova është një partner që ndan vlerat dhe perspektivën gjeopolitike të BE-së, dhe se bllokimi i aplikimit të saj për anëtarësim është i papranueshëm.

“Kosova është partneri ynë, ndan vlerat tona dhe ka të njëjtin orientim gjeopolitik. Megjithatë, Këshilli i BE-së vazhdon të bllokojë pranimin e thjeshtë të kërkesës për anëtarësim të këtij partneri. A kështu trajtohet një partner?” u shpreh Reuten, duke kritikuar qëndrimin e Këshillit.

Ai i bëri thirrje BE-së të heqë masat kufizuese, të normalizojë marrëdhëniet mes të gjitha vendeve anëtare dhe Kosovës, si dhe të njohë zyrtarisht shtetësinë e saj.

Reuten propozoi gjithashtu që, edhe pa miratimin e Këshillit, Komisioni Evropian mund të nisë përgatitjen e opinionit për aplikimin e Kosovës, si një hap drejt integrimit të mëtejshëm.

Kosova ka dorëzuar zyrtarisht aplikimin për anëtarësim në BE më 15 dhjetor 2022, por procesi mbetet i bllokuar për shkak të mosnjohjes së pavarësisë së saj nga Serbia dhe pesë vende anëtare të BE-së: Qipro, Greqia, Rumania, Sllovakia dhe Spanja.

Sondazhi i fundit: Vetëvendosje ka rënie, tani është te 37%

Ish-diplomati Blerim Camaj, ka folur lidhur me zhvillimet politike në vend.

Camaj foli edhe rreth mundësisë së shkuarjes në zgjedhje të jashtëzakonshme.

Sipas tij, edhe nëse ndodh kjo nuk do të ndryshonte shumë në rezultat.

Madje, ai tha se sipas një sondazhi që ka parë Lëvizja Vetëvendosje ka pësuar rënie.

“Dëgjova për një sondazh të fundit ku Lëvizja Vetëvendosje ka pësuar rënie. Po mua mu tha që tani është te 37 përqindëshi”, deklaroi Canaj në Klan Kosova.

Vuçiq sfidon Perëndimin: “Po shkoj te Putini, po s’u pëlqeu, më ndëshkoni mua”

Presidenti i Serbisë, Aleksandar Vuçiq, ka zgjedhur të marrë pjesë në paradën ushtarake në Moskë për nder të 80-vjetorit të fitores ndaj fashizmit, pavarësisht tensioneve me Perëndimin. Ai e ka përshkruar pjesëmarrjen si një akt personal që mund të ketë pasoja për të.

“Jam i bindur se Serbia do të mbetet në rrugën evropiane. Nëse BE-ja dëshiron të ndëshkojë dikë, le të më ndëshkojë mua. Unë do ta pranoj dënimin dhe do të kërkoj që të mos ndëshkohet i gjithë vendi”, tha Vuçiq.

Vuçiq mbërriti në Moskë përmes Bullgarisë, Turqisë dhe Azerbajxhanit, pasi Letonia dhe Lituania nuk i lejuan kalimin e avionit presidencial në hapësirën e tyre ajrore. Ai u prit nga zëvendësministri i Jashtëm rus, Aleksandar Grushko.

“Udhëtuam përmes Bullgarisë, Turqisë dhe Azerbajxhanit, dhe kur na u lejua korridori, vazhduam rrugën. Mbërrita në Moskë ku më priti zëvendësministri i Punëve të Jashtme, Aleksandar Grushko, një nga figurat më të rëndësishme të diplomacisë ruse”, tha Vuçiq.

Disa ministra serbë kishin kërkuar masa reciproke ndaj Letonisë dhe Lituanisë, por Vuçiq tha se ai ishte kundër.

“Populli serb nuk ka pse të turpërohet, por duhet të jetë krenar për luftën e tij kundër fashizmit. Nëse ndonjë popull ka të drejtë të krenohet me luftën kundër fashizmit, ai është populli serb”, shtoi ai.

Ai do të takohet me patriarkun Kirill, ku do t’i dorëzojë një dekoratë, si dhe me presidentin e Kazakistanit, Zhomart Tokajev. Të premten, pas paradës, Vuçiq do të ketë takime me presidentin kinez Xi Jinping dhe më pas me presidentin rus Vladimir Putin.