Tragjike: Ndërron jetë shqiptari në Turqi pasi mbolli flokët dhe rregulloi dhëmbët

Një ngjarje e rëndë raportohet se ka ndodhur së fundmi në Stamboll.

Siç raporton “The Mirror”, Mentor Rama, 36 vjeçar shqiptar me shtetësi britanike, ka vdekur më 11 nëntor pas mbjelljeve të flokëve dhe implantit të dhëmbëve në Stamboll.

Trupi i pajetë i Mentorit u transferua në Këshillin e Mjekësisë Ligjore në Stamboll. Policia që atëherë ka nisur një hetim mbi vdekjen.

Një zëdhënës i FCDO-së i tha The Mirror: “Ne po mbështesim familjen e një burri britanik që vdiq në Turqi dhe jemi në kontakt me autoritetet lokale”.

Për vdekjen e Mentorit kanë shkruar dhe familjarë të tij.

“Vdekja jote ka lënë një boshllëk që asgjë në këtë botë nuk mund ta mbushë. Nuk mendoja kurrë se do të më duhej të shkruaja fjalë të tilla për ty”, thuhet në postimin e një prej familjarëve të të ndjerit.

“Ti ishe drita jonë, buzëqeshja që na ngrohte, forca që na ngrinte lart sa herë që binim. Dhimbja është kaq e pafundme kur mendoj se nuk do të të shoh më kurrë, nuk do ta dëgjoj më kurrë zërin tënd apo të qeshurën tënde që na bëri të gjithëve të lumtur. Zoti të ruajt në dritën dhe mëshirën e Tij, miku im, lutem që shpirti yt të pushojë në paqe dhe të gjejë një vend në parajsë, ku nuk ekziston as dhimbje as trishtim, do të më mungosh çdo ditë të jetës sime”.

Trupi i Ramës i është dorëzuar familjes së tij dhe është riatdhesuar në Mbretërinë e Bashkuar, raportuan mediat turke.

PDK e çon në Supreme rastin e Mitrovicës, Artan Behrami: Vetëm rivotimi u bën drejtësi qytetarëve

Partia Demokratike e Kosovës ka dorëzuar sot, përmes postës zyrtare, ankesën në Gjykatën Supreme të Republikës së Kosovës, duke kundërshtuar vendimin e PZAP-it që refuzoi kërkesën për përsëritjen e votimit në Mitrovicë.

Deputeti i PDK-së, Artan Behrami, ka bërë të ditur se ky vendim i PZAP është i gabuar dhe nuk pasqyron realitetin e parregullsive të evidentuara në disa qendra votimi në këtë komunë. Ai theksoi se provat e paraqitura nga PDK tregojnë qartë se procesi zgjedhor është cenuar dhe se vullneti i qytetarëve është ndryshuar.

Me ankesën drejtuar Gjykatës Supreme, PDK kërkon rishqyrtim të plotë të rastit dhe marrjen e një vendimi që garanton integritetin e procesit zgjedhor dhe respektimin e votës së qytetarëve të Mitrovicës.

Behrami tha se partia do të vazhdojë rrugën ligjore deri në sqarimin e çdo parregullsie:

“Në Mitrovicë, vetëm rivotimi u bën drejtësi qytetarëve. Në këtë drejtim, PDK nuk do të ndalet!”

Sipas PDK-së, synimi mbetet mbrojtja e votës së lirë dhe forcimi i proceseve demokratike në vend.

Albin Kurti në kishën katolike në Mitrovicë, pritet nga Ahmet Musa: Kërkohet ndërtimi e katedrales katolike dhe largimin e qytetarëve nga islami

Kryeministri i Kosovës, Albin Kurti, ka qenë prezent në kishën katolike në Mitrovicë, ku është pritur nga Ahmet Musa.

Përmes një postimi, Illyrian Kastrioti ka thënë se e vlerëson vizitën e Kurtit në Mitrovicë dhe në kishën që ai e cilëson si pjesë të trashëgimisë shqiptare katolike. Sipas tij, në Mitrovicë, Vushtrri dhe rrethinat e tyre ekzistojnë themelet e mbi 39 kishave dhe katedraleve të vjetra arbërore-katolike, të cilat janë rrënuar gjatë periudhave historike.

Ai ka kërkuar që Qeveria e Kosovës të alokojë një fond të veçantë për rindërtimin e një katedraleje katolike shqiptare në Vushtrri dhe një tjetër në Mitrovicë, duke e konsideruar këtë si hap të rëndësishëm për ruajtjen e trashëgimisë kulturore dhe fetare të vendit.

Kastrioti ka bërë thirrje edhe për pagëzim dhe rikthim në besimin katolik, të cilën e sheh si rrugë të forcimit të bashkimit kombëtar dhe largim nga islami pasi sipas tij shkaktoi përçarje përmes pushtimit të gjatë e barbar osman.

E thotë kryeministri: Nuk do të ketë asnjë pagë nën 500 euro që nga janari

Kryeministri i Shqipërisë, Edi Rama deklaroi sot se nga janari 2026 në Republikën e Shqipërisë nuk do të ketë asnjë pagë nën 500 euro.

Në episodin e 6-të të sezonit 5 të podkastit “Flasim”, në rubrikën “Shënimet e javës” kryeministri Rama tha se “lajmi për pensionet është pasuar nga rritja e pagave, një rritje e konsiderueshme edhe ajo e shtrirë në të gjithë sektorët, por mbi të gjitha e diktuar nga rritja e premtuar e pagës minimale”.

“Nga janari i vitit që po troket kur paga minimale në sektorin publik dhe atë privat, kur ligji që do të kalojmë në parlament i buxhetit 2026 do të sanksionojë se në Republikën e Shqipërisë nuk do të ketë asnjë pagë nën 500 euro”, theksoi Rama.

Për vitin 2026 paga minimale do të rritet me 10 mijë lekë, duke arritur në 50 mijë lekë nga 1 janari 2026, për t’u rritur më tej në 70 mijë lekë deri në fund të mandatit.

E tmerrshme: Këshilltari i Kurtit e quan PDK-në dhe LDK-në “djem të Serbisë”

Hysamedin Feraj, Këshilltari i Kryetarit të Vetëvendosjes, Albin Kurtit, ka përdorur gjuhë, akuza dhe kualifikime prej më të rëndave ndaj kundërshtarëve politikë: Partisë Demokratike të Kosovës dhe Lidhjes Demokratike të Kosovës.

Kështu duke e lidhur me një rast të gjetjes së disa dhjetëra detonatorëve në veri të Kosovës nga Policia dhe KFOR-i.

“Serbi, mbahu mos ki frikë! I ke djemt në Kosovë! Të mbrojnë duke i demaskuar këta filma – LDK-PDK”, shkroi Hysamedin Feraj.

Votat e diasporës në Gjakovë me befasi në rezultat

Kandidati për kryetar të Gjakovës nga radhët e AAK-së Ardian Gjini ka fituar bindshëm edhe sa i përket votave të dërguara me postë.

Ai ka marrë 68.75 për qind ose 396 vota, ndërsa Ardian Gola i Vetëvendosjes 31.25 për qind ose 180 vota.

Nga numërimi i votave me kusht, Gjini ka marrë 32, ndërsa Gola 23 vota.

Ardian Gjini ka fituar mandatin e ri katërvjeçar me 56.69 për qind ose 17.267 vota, ndërsa Ardian Gola ka marrë 43.31 për qind ose 13.467 vota.

Sveçla paralajmëron sulme terroriste nga bandat e Serbisë

Ministri në detyrë i Punëve të Brendshme, Xhelal Sveçla, ka publikuar fotografi të detonatorëve që u gjetën në afërsi të fshatit Gnjezhdan të Leposaviqit.

Ai deklaroi se Serbia, përmes bandave kriminale, vazhdon të planifikojë dhe ndërmarrë sulme terroriste në Kosovë.

“Serbia përmes bandave kriminale e terroriste vazhdon ende të planifikojë e ndërmarrë sulme terroriste në Republikën e Kosovës. Dje Policia e Kosovës së bashku me KFOR-in kanë gjetur dhjetë detonator ndezës me fitila (kabllo) në afërsi të fshatit Gnjezhdan, në Leposaviq”, tha ai.

Sveçla shtoi se Policia në veri po punon për të shmangur dhe minimizuar sulme të rënda.

“Shtrirja e Policisë së Kosovës dhe prania e institucioneve tona të sigurisë ka bërë të mundur që të tilla mjete, që do të përktheheshin në sulme të rrezikshme terroriste, të kapen dhe të shmangen apo minimizohen rastet e sulmeve të rënda që synojnë shkaktimin e dëmit, krijimin e pasigurisë dhe frikësimin e qytetarëve. Por, nuk ka kthim mbrapa. Policia e Kosovës, institucionet e sigurisë dhe mbi të gjitha Republika e Kosovës janë të vendosura në luftën përballë bandave të tilla kriminale, të cilave do t’i përgjigjen ashtu siç e meritojnë. Kushtetueshmëria, ligjshmëria, rendi dhe drejtësia do të ngadhnjejnë mbi çdo celulë terroriste, mafioze e kriminale”, përfundoi Sveçla.

“Opinionistët do të iu habisin!” – Gazetarja zbulon detaje ekskluzive të BBVK4

Detajet më ekskluzive i ka bërë të ditura gazetarja e “Weekend”, Gentiana Gashi, transmeton Klankosova.tv.

Gashi ka paralajmëruar se opinionistët e këtij edicioni do t’i habisin shikuesit.

“Big Brother çdo herë na ka befasuar me opinionistët tanë, kështu që edhe këtë herë qëndroni të vëmendshëm sepse me të zbuluar opinionistët e këtij edicioni, natyrisht që do habiteni dhe do të iu pëlqejnë jashtëzakonisht shumë”, u shpreh Gashi.

Gazetarja dha pak detaje edhe për ambientet e shtëpisë më të madhe në vend.

“Shtëpia është shumë e madhe. Kur erdha dhe e pashë, e kuptova ndoshta edhe atë heshtjen e cila po ofrohet, për shkak se ajo madhështi duhet të jepet në Prime, dhe duhet të zbulohet aty për aty, me t’u ndezur dritat e me t’u hapur dyert e shtëpisë së Big Brother”.

Pas ndarjes nga bashkëshorti emocionohet Teuta Selimi, bën rrëfimin e papritur

Këngëtarja Teuta Selimi, ka bërë një rrëfim të rrallë e të sinqertë në rrjetet sociale.

Në një periudhë të përfolur si delikate në jetën e saj personale, pas lajmeve për ndarjen nga bashkëshorti, artistja ka ndarë një dedikim emocional për fansat e saj, duke pranuar hapur betejat e brendshme që ka kaluar.

Përmes një postimi në InstaStory, këngëtarja ka falënderuar publikun që e ka mbështetur pa kushte, duke zbuluar se kjo mbështetje ka qenë jetike për të në momentet më të vështira.

Kosova në play-off, këta janë kundërshtarët e mundshëm

Shqipëria do të luajë në plejof për kualifikim në Botërorin 2026, ndërsa paraqitjen në plejof e ka të garantuar edhe Kosova.

Por Kosova me fitore 6:0 të martën ndaj Zvicrës, kualifikohet direkt. Kjo ka fare pak gjasa të ndodhë, kështu që edhe te Kosova pritet të bëhen gati për plejof. Nëse vazhdon në plejof, është e sigurt që Kosova do të jetë në vazon e tretë. Dhe rrjedhimisht do të luajë me një përfaqësuese të vazos së dytë në gjysmëfinale të plejofit, kurse do të jetë mysafire.

Sipas pozitave aktuale në grupe, në vazon e tretë për short do të jenë edhe Shqipëria, Maqedonia e Veriut dhe Bosnjë-Hercegovina. Por edhe Maqedonia e Veriut dhe Bosnjë-Hercegovina, njëjtë si Kosova, janë në garë për kualifikim direkt. Rrjedhimisht shumë gjëra mund të ndryshojnë deri të martën mbrëma, kur përfundojnë kualifikimet e rregullta evropiane për Botërorin 2026.

Prej vazos së tretë, sipas gjendjes aktuale, në vazon e dytë mund të lëvizë Shqipëria. Kjo varet nga rezultati i ndeshjes me Anglinë, por edhe nga rezultatet e disa përfaqësueseve të tjera.

Në vazon e dytë, pra rivale potenciale të Kosovës, aktualisht janë Hungaria, Skocia, Sllovakia dhe Çekia. Renditja nëpër vazo bëhet në bazë të ranglistës së FIFA-s.

Shorti për plejof tërhiqet të enjten, ndërsa të mërkurën publikohet ranglista e FIFA-s, në bazë të cilës ndahen përfaqësueset në vazo.

Në vazon e parë pritet të jenë Italia, Turqia, Ukraina e Polonia. Në të katërtn do të jenë fituese të grupeve në Ligën e Kombeve, që nuk përfundojnë në dy pozitat e para në kualifikimet e rregullta. Në vazon e katërt do të jenë Uellsi, Suedia, Rumania dhe Irlanda e Veriut.
Në gjysmëfinale, përfaqësueset e vazos së parë takohen me ato të vazos së katërt.

Përfaqësueset e vazos së parë janë vendase.

Për finale të plejofit, vendasi do të përcaktohet me short. Prej 16 përfaqësueseve në plejof, katër do të kualifikohen në Botëror. Gjysmëfinalet e plejofit janë më 26 mars, ndërsa finalet më 31 mars.