Publikohet emri i të arrestuarit si i dyshuar për sulmin në Banjskë

Prokuroria Speciale ka njoftuar se e ka ndaluar një person, nën dyshimin për përfshirje në sulmin terrorist të 24 shtatori 2023 në Banjskë të Zveçanit. Përderisa Prokuroria dha vetëm inicialet, ministri i Punëve të Brendshme, Xhelal Sveçla, ka thënë se bëhet fjalë për Stefan Raduloviqin, për të cilin tha se kërkohej.

Sipas njoftimit zyrtar nga Prokuroria Speciale, i dyshuari është arrestuar nga Policia në pikëkalimin kufitar në Merdar. Ai është ndaluar për 48 orë, me vendim të prokurorit. Sipas njoftimit, i arrestuari dyshohet  për kryerjen e veprave penale: “kryerja e veprës terroriste” dhe “veprat e rënda kundër rendit kushtetues dhe sigurisë së Republikës së Kosovës”.

“Prokuroria Speciale e Republikës së Kosovës do të ndërmarrë të gjitha veprimet e nevojshme hetimore në përputhje me legjislacionin në fuqi dhe Kodin e Procedurës Penale, duke garantuar njëkohësisht ruajtjen e integritetit të hetimeve në zhvillim”, thuhet në njoftim të Prokurorisë Speciale.
E ministri Sveçla ka thënë se “terroristët nuk kanë vend në vendin tonë e as nuk do të mund t’i ikin përgjegjësisë pafundësisht”.

“Sot, u arrestua edhe një terrorist i dyshuar, në kërkim, Stefan Raduloviq në lidhje me rastin e sulmit terrorist në Banjskë të Zveçanit me qëllim aneksimin e veriut. Koha e tolerancës ka përfunduar. Ata do të kapën kudo që hasën. Vazhdojmë pa ndalur për kushtetushmëri e ligjshmëri”, ka shkruar ai në Facebook.

Vetëm 386 euro në bankë – Lumir Abdixhiku deklaron pasurinë

Kryetari i Lidhjes Demokratike të Kosovës, Lumir Abdixhiku, ka dorëzuar deklarimin e tij të rregullt vjetor të pasurisë, të cilin Agjencia për Parandalimin e Korrupsionit ka filluar ta publikojë sot.

Sipas të dhënave të deklaruara, Abdixhiku këtë vit ka shtuar dy pasuri të paluajtshme në krahasim me vitin e kaluar. Mes tyre është një banesë me vlerë rreth 120 mijë euro, e regjistruar në emër të bashkëshortes dhe e përfituar si trashëgimi nga prindërit. Po ashtu, ai ka deklaruar edhe një tjetër banesë në pronësi të bashkëshortes, me vlerë 100 mijë euro, gjithashtu e trashëguar.

Në listën e pasurive përfshihet edhe një shtëpi në bashkëpronësi me vlerë 200 mijë euro, si dhe një banesë tjetër e blerë me kredi bankare në vlerë 265 mijë euro, po ashtu e deklaruar si pronë e përbashkët. Gjithashtu është përfshirë një shtëpi prej 200 m², e trashëguar dhe e vlerësuar rreth 150 mijë euro.

Sa i përket pasurisë së luajtshme, ai ka deklaruar një veturë Mercedes-Benz të vitit 2019, me vlerë rreth 25 mijë euro, në pronësi të bashkëshortes.

Në pjesën e aksioneve, bashkëshortja e tij figuron me 25% të pronësisë në kompaninë “AMPERA GROUP”, pa u deklaruar vlera financiare e tyre.
Në llogaritë bankare, Abdixhiku ka raportuar 386 euro kursime, si dhe 4,915.36 euro të ardhura nga paga, ndërsa bashkëshortja ka deklaruar 4,293.40 euro nga paga dhe kursimet.

Sa u përket detyrimeve, ai ka deklaruar kredi për renovim shtëpie me mbetje prej 32,502 euro dhe kredi për blerje banese me detyrim të mbetur 126,020.40 euro.

Në të ardhurat vjetore, Abdixhiku ka raportuar 19,904 euro nga funksioni i deputetit dhe 24 mijë euro nga angazhimi në Kolegjin Riinvest.

Publikohet pasuria e Ramiz Lladrovcit, mbi 100 mijë euro kursime dhe prona të shumta

Agjencia për Parandalimin e Korrupsionit ka publikuar deklarimin vjetor të pasurisë së kryetarit të Komunës së Drenasit, Ramiz Lladrovci, ku evidentohet një portofol i gjerë pasurish të paluajtshme dhe kursime të konsiderueshme bankare.

Sipas deklarimit, Lladrovci posedon disa prona, duke përfshirë një shtëpi prej 480 m² të trashëguar (150 mijë euro), banesa dhe sipërfaqe të mëdha toke që kapin dhjetëra mijëra metra katrorë, me vlera që arrijnë deri në mbi 180 mijë euro për një parcelë.

Në deklarim figurojnë edhe dy banesa në pronësi të tij, njëra 38 m² (40 mijë euro) dhe tjetra 149 m² (105 mijë euro), si dhe disa toka të blera ndër vite me kursime familjare, bashkëfinancime dhe huazime.

Sa u përket mjeteve financiare, ai ka deklaruar mbi 115 mijë euro kursime në bankë, si dhe mjete të tjera më të vogla në llogari të ndryshme.

Në pasuritë e luajtshme, Lladrovci ka deklaruar disa vetura, duke përfshirë një Audi (40.500 euro), Mercedes-Benz (15 mijë euro) dhe Volkswagen, ndërsa një pjesë e automjeteve janë në emër të fëmijëve.

Deklarimi përfshin edhe angazhime në kompani në emër të familjarëve, si dhe huazime të ndryshme financiare që arrijnë në mbi 100 mijë euro.

Të ardhurat vjetore të tij nga paga si kryetar komune arrijnë në rreth 18 mijë euro, ndërsa të ardhura shtesë janë deklaruar edhe nga bashkëshortja dhe fëmijët përmes aktiviteteve të ndryshme profesionale.

Deklarimin e plotë mund ta gjeni KETU

Pasuria e Bedri Hamzës, tri banesa, shtëpi e garazhda

Kryetari i PDK-së, Bedri Hamza ka dorëzuar deklarimin e pasurisë së tij në Agjencinë për Parandalimin e Korrupsionit për vitin 2026.

Sipas deklarimit, Hamza nuk ka pasur ndryshime domethënëse nga viti paraprak, duke deklaruar pasuri të paluajtshme në vlerë prej 244 mijë e 700 euro.

Ai ka gjithsej tre banesa, tre garazhe, një shtëpi dhe një parcelë tokë tokë 1 hektarë, shkruan Telegrafi.

Banesat janë: 98.00 m2, 120.00 m2 dhe 60.00 m2. Ndërsa, garazhet: 16.00 m2, 30.00 m2 dhe 35.00 m2. E, shtëpia është 72.00 m2.Sipas këtij deklarimi, tre banesat janë të blera, dy garazhe janë të blera dhe një është e trashëguar, ndërsa shtëpia dhe toka janë të trashëguara.

Ndërsa, pasuri të luajtshme, ish-kryetari i Komunës së Mitrovicës ka mbi 3 mijë euro, ku përfshihen dy vetura: Renault dhe Audi.

Hamza ka rreth 13 mijë euro para të gatshme në banka komerciale së bashku me bashkëshorten dhe fëmijët.

Poashtu ai me familjen e ngushtë ka mbi 8 mijë euro detyrime financiare në formë kredie.

Bëhet e ditur se Hamza ushtron edhe profesionin e profesorit në kolegjin AAB që nga data 01.10.2017. /Telegrafi/

 

Pasuria e deklaruar e Vjosa Osmanit

Pasuria e deklaruar e Vjosa OsmanitIsh-presidentja Vjosa Osmani ka deklaruar si pronë të paluajtshme në emër të saj vetëm një tokë prej 5.10 ari në vlerë prej 35 mijë eurosh.

Në bashkëpronësi ajo ka deklaruar një shtëpi banimi prej 244 metrash katror bë vlerë 208 mijë euro.

Kurse në pronësi të bashkëshortit ka deklaruar një banesë në vlerë 59 mijë euro, një shtëpi në Australi në vlerë 170 mijë euro si dhe një shtëpi tjetër po në Australi në vlerë prej 510 mijë euro.

Para të gatshme Osmani ka deklaruar 3115 euro.

Të hyra vjetorë Osmani ka deklaruar mbi 10 mijë e 300 euro si mëditje si dhe pagë në vlerë prej mbi 33 mijë eurosh.

Deklarimi i pasurisë së Kurtit, Azemi: Çka bon ky njeri, a han bukë?

Anëtari i LDK-së, Visar Azemi, në emisionin “DPT te Fidani”, ka komentuar deklarimin e pasurisë së kryeministrit Albin Kurti, duke ngritur dyshime mbi shumën e raportuar në bankë.

Azemi ka theksuar se shuma prej 16 eurosh është e pazakontë dhe nuk pasqyron realitetin.

“Është e çuditshme. Njeriu menjëherë pyet: çka bën ky njeri? A ha bukë, a del diku pas punës, a i qet naftë veturës? A janë këto 16 euro të konservuara në bankë? Mua më duket fyese ndaj neve të tjerëve, sepse nuk është gjendja reale. Nuk mundet një kryeministër me jetu me 16 euro në bankë”, ka deklaruar ai.

Tutje, Azemi ka shtuar se pret më shumë transparencë.

“Besoj se do të duhej të ishte më i sinqertë dhe më burrëror. Agjencia Kundër Korrupsionit do të duhej ta hetojë këtë çështje”, është shprehur Azemi

Tragjedia në Ferizaj, policia tregon arsyet pse vdiq 15-vjeçari

Një ngjarje e rëndë ka ndodhur pasditen e së premtes në Ferizaj, ku një nxënës 15-vjeçar ka humbur jetën.

Për KosovaPress, zëdhënësi i Policisë për rajonin e Ferizajt, Kanun Veseli ka dhënë sqarime shtesë rreth këtij rasti.

Ai tha se sipas mjekut kujdestar, viktima është dërguar në këtë qendër pa shenja jete dhe në raportin me shkrim thuhet se viktima dyshohet të ketë pësuar arrest kardiak.

“Sipas mjekut kujdestar, viktima në Qendrën Emergjente në Ferizaj ka arritur pa shenja jete. Për këtë, ai ka lëshuar raport me shkrim, në të cilin konstatohet se viktima kishte pësuar arrest kardiak dhe është rekomanduar që trupi të dërgohet në Institutin e Mjekësisë Ligjore (IML) për kryerjen e autopsies”, tha ai për KosovaPress.

Me rekomandim të mjekut, trupi i pajetë është dërguar në Institutin e Mjekësisë Ligjore (IML) për kryerjen e autopsies.

Lidhur me rastin është njoftuar prokurori i shtetit, i cili ka autorizuar hetuesit rajonalë që të ndërmarrin të gjitha veprimet e nevojshme hetimore.

Me vendim të prokurorit, rasti është iniciuar si “Hetim mbi vdekjen”, ndërsa trupi i pajetë është dërguar për autopsi në IML në Prishtinë.

Dy Mercedesë, banesa e kat shtëpie dhe kursime, Pasuria qindra mijëra eurosh e deputetes Edona Llalloshi

15 vjeçari ndërron jetë në orën e edukatës fizike

Një nxënës 15-vjeçar ka ndërruar jetë pas një rasti të ndodhur sot në shkollën e mesme “Kuvendi i Arbërit” në Ferizaj.

Lajmin e ka konfirmuar për Sinjalin zëdhënësi i Policisë për rajonin e Ferizajt, Kanun Veseli.

Sipas Policisë, më 17.04.2026, rreth orës 15:15, është pranuar informata se në shkollën e mesme “Kuvendi i Arbërit”, në rrugën “Brahim Ademi” në Ferizaj, një nxënës mashkull 15-vjeçar, në rrethana ende të panjohura, është rrëzuar pa ndjenja në sallën e edukatës fizike.

I njëjti është dërguar me urgjencë në Qendrën Emergjente në Ferizaj, ku, sipas mjekut kujdestar, pavarësisht trajtimit mjekësor, ka ndërruar jetë.

Lidhur me rastin janë njoftuar Njësia e Hetimeve e stacionit, hetuesit rajonalë dhe krimteknikët, të cilët kanë dalë në vendin e ngjarjes dhe kanë ndërmarrë veprimet e nevojshme hetimore.

Për rastin është njoftuar prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore (IML) për obduksion.

Hetimet për rrethanat e ngjarjes janë duke vazhduar.

E rëndë: I riu Granit Sherifi vdiq tragjikisht në Podujevë

Një aksident i rëndë ndodhi mesditën e sotme në fshatin Revuç të Podujevës, ku ndërroi jetë pjesëtari i Policisë së Kosovës, Granit Sherifi.

Burime të IndeksOnline pohojnë se Sherifi, gardian në burgun e Dyzit, ishte duke punuar me traktor në momentin e aksidentit.

Burimet bëjnë me dije se Sherifi humbi kontrollin mbi traktor dhe u rrokullis. Fatkeqësisht, ai nuk iu bëri ballë plagëve të marra.