Vetëm pak ditë para afatit, Kurti befasisht merr këtë vendim politik

As përgjatë këtyre dy ditëve nuk pritet të ketë ndonjë zhvillim sa i përket krijimit të Qeverisë së re të vendit

Kjo pasi seanca e Kuvendit të Kosovës nuk do të thirret as për sot, nesër apo pasnesër.

Kryeministri në detyrë, njëherësh i mandatuari tanimë për qeverinë e re- Albin Kurti do të udhëtojë për në Londër.

Kurti do të përfaqësojë Kosovën në samitin e Procesit të Berlinit që zhvillohet më 22 tetor në Londër, raporton lajmi.net.

 

 

Procesi i Berlinit synon të përshpejtojë integrimin e vendeve të Ballkanit Perëndimor në Bashkimin Evropian (BE) përmes forcimit të bashkëpunimit rajonal dhe mbështetjes politike, ekonomike dhe teknike nga vendet anëtare të BE-së, veçanërisht nga Gjermania.

Ditë më parë, presidentja Vjosa Osmani ka nënshkruar mandatin përmes së cilit ka mandatuar Albin Kurtin për formimin e Qeverisë së re të Kosovës. Sipas presidentes ky vendim është marrë pas propozimit zyrtar të partisë Vetëvendosje, e cila ka fituar numrin më të madh të mandative në Kuvend nga rezultat e zgjedhjeve të mbajtura më 9 shkurt të këtij viti.

“Sipas Kushtetutës, mandatari për formimin e qeverisë, z. Kurti, është i obliguar që jo më vonë se pesëmbëdhjetë (15) ditë nga dita e dekretimit, t’i paraqesë Kuvendit të Republikës së Kosovës përbërjen dhe programin e qeverisë për miratim”, thuhet në njoftimin e Presidentes. Mandatimi i Kurtit për formimin e qeverisë së re u mundësua vetëm një ditë pas Parlamenti i Kosovës përfundoi një proces të stërzgjatur të konstituimit me zgjedhjen e nënkryetarit të Kuvendit Nenad Rashiq nga radhët e komunitetit serb. Rashiq nuk është nga lista Srpska, ndonëse kjo e fundit pretendon që nënkryetari i kuvendit u zgjodh jashtëligjshëm dhe se i takon asaj ky post, sepse është grupi  më i madh parlamentar  me nëntë deputetë nga radhët e komunitetit serb.”

Pavarësisht se kanë kaluar shumë muaj- Kosova vazhdon të jetë me qeveri në detyrë.

Kuvendi i Kosovës u konstituua me shumë vështirësi, derisa Lista Serbe çështjen e zgjedhjes së nënkryetarit të komunitetit serb e çoi edhe një herë në Kushtetuese.

Kjo u konfirmua për lajmi.net nga Gjykata Kushtetuese të cilët thanë se kanë pranuar tanimë ankesën e Listës Serbe e cila do të trajtohet në vazhdim.

Kurse ditë më parë, kryeministri në detyrë, Albin Kurti ka folur mbi krijimin e qeverisë së re.

Në konferencën për media, ai tha se dita e fundit për ta prezantuar kabinetin e ri qeveritar, është 26 tetori.

“Dita e fundit kur do të mund të mbahet seanca e kuvendit ku unë prezantoj kabinetin e ri qeveritar, është 26 tetori. Shumë shpejt, qysh në këtë javë do të fillojmë komunikimin dhe bisedat për qeverinë qendrore”.

Nëse nuk ka qeveri të re, Kurti u shpreh i gatshëm për zgjedhje të reja.

“Po bëhemi gati për qeverinë Kurti 3, nëse nuk ka, jemi të gatshëm për zgjedhje të reja. Gatishmëria jonë është e plotë, por një herë plani ynë është për qeverinë Kurti 3”.

Nëse ai nuk arrin t’i sigurojë 61 vota deri më 26 tetor, presidentja Osmani, brenda 10 ditësh, duhet t’i ftojë partitë në konsultim dhe, sipas diskrecionit të saj, t’ia japë mandatin një kandidati tjetër që dëshmon se ka shumicën parlamentare.

PDK-ja, LDK-ja, AAK-ja dhe Nisma kanë dërguar sinjale të ndryshme muajve të fundit për mundësinë e bashkëpunimit me Vetëvendosjen, e cila ka shprehur gatishmëri të bashkëpunojë edhe me pakicat joserbe për formimin e Qeverisë

LDK dhe Vetëvendosje befasojnë – formojnë koalicion në një nga komunat më të mëdha të vendit

Një koalicion paszgjedhor është arritur sot në Vushtrri.

Kandidati i Lëvizjes Vetëvendosje, Sylejman Meholli ka nënshkruar koalicion me kandidatin e Lidhjes Demokratike të Kosovës, Xhafer Tahiri.

Siç mëson lajmi.net koalicioni është nënshkruar para pak minutave në Vushtrri.

Në rezultatet e zgjedhjeve në këtë komunë, VV mori 26.28%, kurse LDK-ja mori 21.62 për qind.

Në këtë komunë më së shumti përqindje të votave mori Partia Demokratike të Kosovës me kandidatin e saj Ferit Idrizi.

Idrizi mori saktësisht 38.08% të votave.

Kjo komunë deri tani është drejtuar nga Ferit Idrizi i PDK-së.

Numërohen 60% të votave të Diasporës në Prishtinë, Çeku i VV-së po e ‘deklason’ Ramën

Komisioni Qendror i Zgjedhjeve ka përditësuar të dhënat nga numërimi i votave nga Diaspora për Prishtinë nga zgjedhjet komunale të 12 tetorit.

Nga 60% të votave të numëruara, kandidati i Vetëvendosjes, Hajrulla Çeku del të jetë i pari aktualisht me 54.88% apo 343 vota. Në vend të dytë është Përparim Rama i LDK-së me 26.72% apo 167 vota.

Në vend të tretë është kandidati i PDK-së, Uran Ismaili me 12.32% apo 77 vota dhe në vend të katërt Besa Shahini e PSD-së me 2.88% apo 18 vota.

Nga rezultatet e përmbledhura, Përparim Rama është i pari me 33.74%, i dytë Hajrulla Çeku me 33.13%, i treti Uran Ismaili me 27.71% dhe Bekë Berisha i AAK-së me 3.12%.

Përfundon numërimi i votave me postë në Pejë, rezultat befasues edhe atje

Janë numëruar 100% e votave me postë në komunën e Pejës.

Sipas rezultatit të publikuar nga Komisioni Qendror i Zgjedhjeve, Gazmend Muhaxheri i LDK-së, njëherësh kryetari aktual i Pejës, ka marrë 48.55% të votave të diasporës.

Pas tij radhitet Taulant Kelmendi i VV-së, i cili ka grumbulluar 26.37% të votave me postë.

KQZ ka publikuar po ashtu rezultatet e përmbledhura, ku Muhaxheri vazhdon të kryesojë me 46.23% të votave, derisa Kelmendi mban vendin e dytë me 27.81%.

Çfarë po ndodh me armëpushimin në Gaza? Deklarohet Trump

Presidenti i SHBA-së, Donald Trump, ka thënë se armëpushimi mes Izraelit e Hamasit është ende në fuqi, vetëm disa orë pas luftimeve vrasëse në Gazë të dielën. 

“Po është në fuqi”, tha Trump kur u pyet për armëpushimin në Gazë, raporton “BBC”. 

Izraeli nisi sulmet në jug të Gazës të dielën, pasi ushtria tha se “terroristët kanë gjuajtur me raketa anti-tank dhe kanë shtënë” drejt trupave në Rafah, duke vrarë dy ushtarë.

Hamasi tha se “nuk është në dijeni” për ndonjë luftim në atë zonë që është nën kontrollin e Izraelit.
Deri në mbrëmjen e të dielës, Izraeli goditi dhjetëra caqe të Hamasit, ndërsa burime nga spitalet thonë se 44 persona u vranë.

Hamasi tha se është i përkushtuar ndaj armëpushimit, por akuzoi Izraelin për shkelje dhe paralajmëroi se sulmet mund “ta shtyjnë situatën drejt kolapsit total”.

Në mbrëmje të dielën Forcat e Mbrojtjes së Izraelit (IDF) thanë se është kthyer në fuqi armëpushimi, por kanë shtuar se “do të reagojnë ashpër ndaj çdo dhune”.

E Trump u tha gazetarëve se lidershipi i Hamasit nuk është përfshirë në shkeljet e pretenduara dhe insistoi se ishin “disa rebelë nga brenda”.

“Do të trajtohet siç duhet. Do të trajtohet ashpër, por siç duhet”, tha Trump.

E Izraeli ka njoftuar se pikëkalimi në Rafah do të mbetet i mbyllur deri në një njoftim tjetër.

Ndërkohë këshilltari i Trumpit, Jared Kushner, që ka luajtur rol kyç në negociatat për armëpushim mes Izraelit dhe Hamasit, ka thënë se grupi palestinez po vepron në mirëbesim ndërsa kërkon trupat e pajetë të 16 pengjeve izraelite që ende gjenden në Gazë.

Ja nga sa ulëse kanë siguruar partitë në Kuvendin e Prishtinës

Bekim Salihu, analist politikash në Institutin GAP, ka analizuar rezultatet përfundimtare të zgjedhjeve për Kuvendin Komunal të Prishtinës, duke theksuar se përbërja e re e Kuvendit do ta bëjë të domosdoshëm formimin e koalicioneve për krijimin e shumicës, transmeton IndeksOnline

Sipas tij, Kuvendi i Prishtinës do të ketë këtë përbërje:

LDK – 15 ulëse
PDK – 12 ulëse
VV – 10 ulëse
AAK – 7 ulëse
Feim Kupina – 4 ulëse
Nisma, Guxo dhe PSD – nga 1 ulëse secila

Salihu vlerëson se nëse Përparim Rama (LDK) e fiton garën për kryetar, koalicioni me AAK-në dhe tri partitë e vogla (PSD, Guxo dhe Nisma) nuk do t’i mjaftojë për të arritur shumicën e thjeshtë prej 26 votash. Në këtë rast, Rama do të ketë nevojë për mbështetjen e Feim Kupinës ose për një marrëveshje me PDK-në apo VV-në.

Ndërkohë, nëse Hajrullah Çeku (VV) del fitues, edhe me mbështetjen e Kupinës, AAK-së, Nismës, PSD-së dhe Guxos, nuk do të arrijë shumicën, çka do të thotë se për qeverisje stabile VV-së do t’i duhej mbështetja e PDK-së ose LDK-së.

“Asnjë kryetar komune nuk mund të ndërtojë një qeverisje stabile dhe efektive pa e pasur shumicën në Kuvendin Komunal”, ka theksuar Salihu, duke shtuar se kjo shumicë është thelbësore për miratimin e buxhetit, planeve sektoriale dhe projekteve kapitale.

Analiza e tij nënvizon se përbërja e re e Kuvendit të Prishtinës e bën koalicionin dhe bashkëpunimin politik vendimtar për funksionimin e komunës në mandatin e ardhshëm.

Një kuti pa u mbyllur i gjithë votimi në Gjilan, ky është rezultati

Sipas rezultateve preliminare të publikuara nga Komisioni Qendror i Zgjedhjeve, komuna e Gjilanit pritet të shkojë në balotazh, pasi asnjëri nga kandidatët kryesorë nuk ka arritur të sigurojë mbi 50% të votave në raundin e parë.

Me 99.92% të votave të numëruara, Alban Hyseni nga Lëvizja Vetëvendosje kryeson me 49.82% të votave, shumë pranë kufirit për të fituar pa balotazh.

Kandidati i LDK-së, Arbër Ismajli, ndjek me 34.30%, duke u pozicionuar si sfidanti kryesor në raundin e dytë zgjedhor.

Nëse trendi mbetet i njëjtë deri në përfundim të numërimit, Gjilani do të jetë një nga komunat ku gara do të zgjidhet përfundimisht në balotazh, duke vendosur përfundimisht mes dy figurave kryesore të politikës lokale.

Tërmet në Shqipëri

Pak pas mesnatës, dy lëkundje tërmeti me magnitudë 3,9 dhe 4 të shkallës Rihter, janë regjistruar në Jug të Shqipërisë, sipas të dhënave të publikuara nga Qendra Sizmologjike Evropiane-Mesdhetare (EMSC).

Lëkundjet janë ndjerë në disa qytete të vendit, përfshirë Elbasanin, Beratin dhe zonat përreth Skraparit.

Sipas EMSC-së, tërmetet kanë ndodhur në orën 00:58 dhe 00:59, me epiqendër rreth 16 kilometra në jugperëndim të Çorovodës dhe 77 kilometra në jug të Elbasanit.

Thellësia e lëkundjeve ka qenë vetëm 2.5 kilometra, ç`ka e bën tërmetin të klasifikohet si i cekët dhe për rrjedhojë më i ndjeshëm në sipërfaqe.

Tërmeti është regjistruar rreth 104 kilometra larg Tiranës, dhe sipas raportimeve fillestare nga qytetarët në rrjetet sociale, lëkundjet kanë zgjatur disa sekonda, duke shkaktuar shqetësim, por pa dëme materiale apo viktima të raportuara deri më tani.

“Ekspertët sqarojnë se një tërmet me magnitudë 4.0 është i moderuar, por mund të ndjehet qartë në ndërtesa, sidomos kur ndodh në thellësi kaq të vogël. “Tërmetet e cekëta shpesh perceptohen si më të forta nga popullata, edhe nëse magnituda është mesatare”, thuhet në shpjegimin teknik të EMSC.

Numërohen mbi 85% e votave të Diasporës në Klinë, ja kush po prinë bindshëm, VV-ja e fundit

Janë numëruar mbi 85% e votave me postën në komunën e Klinës.

Kandidati i AAK-së, Zenun Elezaj, po prin bindshëm me 709 vota apo 52.75%, duke lënë pas kandidatin e PDK-së Sokol Bashota me 394 vota apo 29.32%, shkruan Reporteri.net.

I treti renditet Arben Limanaj me 181 ota apo 13.47%, kursei katërti Ramiz Rrusta me 60 vota apo 4.46%.

Përfundon numërimi i votave në Mitrovicë, ky është rezultati

Komisioni Qendror i Zgjedhjeve (KQZ) ka publikuar rezultatet përfundimtare në qytetin e Mitrovicës.

Nga 100 % të rezultateve prin kandidati i Vetëvendosjes Faton Peci me 47.96% apo 15,745 Vota.

Pastaj rënditet Arian Tahiri i PDK-së me 47.60% apo 15,629 Vota. Në pozitën e tretë rënditet Gëzim Pllakollli me 3.71%

Peci e Tahiri do të përballen përsëri mes veti në garën e balotazhit me 9 nëntor.