Kjo është komuna e vetme ku po prin LDK-ja

Komisioni Qendror i Zgjedhjeve ka publikuar përditësimin më të ri të rezultateve preliminare të zgjedhjeve të sotme.

Kur janë procesuar 34 nga 60 vendvotimet në Istog, Lidhja Demokratike e Kosovës po kryeson në këtë komunë me 38.84%, pas saj është LVV me 36.17% dhe e treta AAK me 8.89%.

Nga votat totale, kur janë procesuar 1,819 vendvotime nga 2,498 sa janë gjithsej, apo 72,82%, Lëviza Vetëvendosje prin me 43,09% apo 207,253 Vota. E dyta është PDK 21,82% apo 104,943 Vota, e treta është LDK me 17,98% apo 86,456 Vota.

Në vend të katërt është AAK me 7,63% apo 36,683 Vota.

/Reporteri.net/

Numërohen afër 70% të votave: Ky është rezultati

Lëvizja Vetëvendosje prin me 42.78 për qind pas numërimit të 67,45 për qind të votave.

Rezultatet preliminare të Komisionit Qendror të Zgjedhjeve, tregojnë se Partia Demokratike e Kosovës renditet aktualisht e dyta me 21.92%.

Në vendin e tretë është Lidhja Demokratike e Kosovës me 17,95% të votave.

PDK-ja “shkatërron” me vota VV-në në Skenderaj

PDK-ja është duke prirë bindshëm me vota në Skenderaj kur janë numëruar 24 për qind e votave në këtë qytet.

PDK-ja ka 81.81 për qind ose 2 mijë e 419 vota, ndërkaq VV-ja ka vetëm 324 vota.

LDK-ja ka siguruar 98 vota ndërsa AAK-ja 49.

98% të votave të procesuara- këto janë shifrat e fundit nga KQZ

Komisioni Qendror i Zgjedhjeve ka përditësuar të dhënat mbi pjesëmarrjen e qytetarëve në zgjedhjet e parakohshme parlamentare. Me përpunimin e 97.92% të të dhënave (2,446 nga 2,498 vendvotime gjithsej), pjesëmarrja zyrtare e votuesve ka arritur në 36.13%.

Sipas këtyre statistikave zyrtare, deri në këtë fashë orari të drejtën e tyre të votës e kanë ushtruar saktësisht 708,045 qytetarë nga 1,959,962 sa janë gjithsej në listën e votuesve.

Në krahasim me zgjedhjet e kaluara të mbajtura më 28 dhjetor 2025, ku pjesëmarrja kishte qenë 44.99%, ky trend tregon një rënie të interesimit të qytetarëve për të votuar në mbarë Kosovën.

Nga KQZ-ja rikujtojnë se këto shifra pasqyrojnë vetëm gjendjen në vendvotimet e rregullta, ndërsa votat me kusht, ato të personave me nevoja të veçanta dhe votat e ardhura nga diaspora do të shtohen pas numërimit në Qendrën e Numërimit dhe Rezultateve (QNR).

Kurti reagon pas mbylljes së vendvotimeve, bën thirrje për mbrojtje të votës

Kryeministri në detyrë, Albin Kurti ka reaguar pas mbylljes së vendvotimeve për zgjedhjet e 7 qershorit.

Në një postim, Kurti ka thënë se tani mbrojtja e votës është kusht i pandashëm i legjitimitetit.

“Vullneti i qytetarëve i shprehur në zgjedhjet e sotme është brenda kutive të votimit. Mbrojtja e tij është kusht i pandashëm i legjitimitetit dhe kredibilitetit të procesit zgjedhor”, ka shkruar Kurti.

“Në këto momente, sytë, veshët dhe vëmendja jonë janë te ju komisionerë dhe vëzhgues. Mbi juve peshon një përgjegjësi e lartë institucionale dhe fisnike”, ka thënë ai.

“Ju falemnderit për angazhimin dhe punë të mbarë në numërimin e çdo vote”, ka thënë Kurti.

Agim Bahtiri: Jemi mbi 53%

Agim Bahtiri i Lëvizjes Vetëvendosje ka deklaruar se fitorja në zgjedhjet aktuale do të rezultojë mbi 53 për qind, duke theksuar se ky parashikim, sipas tij, është bërë dy javë më parë dhe do të konfirmohet në përfundim të procesit zgjedhor.

“Kam thënë para dy javësh që do të jemi mbi 53% dhe kjo do të vërtetohet sonte”, u shpreh Bahtiri, pas mbylljes së qendrave të votimit.

Sondazhi i Baton Haxhiut e qet VV-në fituese: Këto janë rezultatet

Lëvizja Vetëvendosje ka fituar 43 për qind të votave në zgjedhjet e 7 qershorit, sipas një sondazhi të realizuar nga Albanian Post.

Sondazhi i publicistit Baton Haxhiu e paraqet Partinë Demokratike të Kosovës partinë e dytë më të votuar, me 22 për qind.

E treta është renditur Lidhja Demokratike e Kosovës me 18 për qind, tregon EXIT POLL-i i realizuar nga Albanian Post.

Sipas projeksionit të Baton Haxhiut, Aleanca për Ardhmërinë e Kosovës ka fituar 7 për qind të votave.

10% të votave i përkasin partive të tjera të cilat nuk e kalojnë pragun dhe atyre të komuniteteve joshumicë.

Sondazhi i Baton Haxhiut/ Albanian Post:

Vetëvendosje 43%

PDK 22%

LDK 18%

AAK 7%

Sondazhi në Kanal 10, kjo është përqindja e partive

Sondazhi i publikuar në Kanal 10 e ka vënë fitues Lëvizjen Vetëvendosje me 48.7 për qind

Ndërkaq në pozitën e dytë është PDK-ja me 20 për qind, LDK-ja me 17.4 për qind.

AAK-ja sipas këtij projeksioni kalon pragun me 6.2 për qind.

Rezultati i Exit Pollit, vjen lajmi i fundit nga Halimi i PIPOS

Fisnik Halimi nga PIPOS ka deklaruar se Exit Polli i këtij procesi zgjedhor pritet të jetë shumë më afër rezultatit përfundimtar që do të dalë nga kutitë e votimit

Ai tha se kjo lidhet me rrethana të ndryshme që kanë ndikuar në realizimin e matjeve, duke theksuar është analizuar e njëjta kulturë votuese si në sondazhet e mëparshme të realizuara nga PIPOS.

“Besoj që kësaj radhe rezultati ka me u afru shumë me realitetin në kuti, për shkak të rrethana të ndryshme. Kemi anketuar sot të njëjtin njerëz, të njëjtën kulturë votuese siç është anketuar nëpër anketat që i kemi bërë paraprakisht”

Ai ka sqaruar gjithashtu se Exit Poll-i nuk është diçka që zhvillohet vetëm në ditën e zgjedhjeve, por një proces i gjatë përgatitor.

“Të gjithëve duhet t’u sqarohet që Exit Polli nuk është akt i një ditë, por është proces që përgatitet për muaj të tërë”, është shprehur ai.

Rama prezanton projektin që do të shkarkojë trafikun në hyrje të Prishtinës

Kryetari i Prishtinës, Përparim Rama, ka njoftuar vijimin e punimeve në hyrje të kryeqytetit, nga drejtimi i Hajvalisë.

Rama bëri me dije se punimet po zhvillohen te “rrethi i Gorenjës”.

“Ky projekt do të ndikojë në shkarkimin e trafikut duke e bërë hyrjen në kryeqytet më të shpejtë dhe më të sigurt” deklaroi kryetari i kryeqytetit.

Ai ka ndarë edhe fotografi nga vendi ku po zhvillohen punimet.