Vendimi i Qeverisë për mallrat serbe, reagon kryeministi i serbisë

Kryeministri i Serbisë, Millosh Vuçeviq e ka mirëpritur vendimin e Qeverisë së Kosovës për heqjen e ndalesës për futjen e produkteve nga Serbia në pikëkalimin kryesor kufitar në Merdar.

Vuçeviq tha se kështu, Qeveria e Kosovës e ka ulur tensionin që ekziston prej kohësh, ndërsa përmendi furnizimet me ushqime dhe ilaçe për serbët.

Ai, siç raporton RTS, tha se do të dëshironte që vendimi të mos ishte vetëm për pikëkalimin kufitar në Merdar, por në të gjitha anët.

“Është një përpjekje e mirë e palës gjermane, e cila theksoi fazën e re të marrëveshjes së CEFTA-s. Ne jemi gjithmonë të gatshëm për marrëveshje, nuk mendojmë se kompromiset janë gjë e keqe, veçanërisht nëse do të krijojnë kushte më të mira për jetën e serbëve në Kosovë”, u tha Vuçeviq gazetarëve në Shkup, ku po qëndron në një vizitë zyrtare.

Ai foli për takimin rajonal për Procesin e Berlinit, ndërsa paralajmëroi se me kancelarin gjerman, Olaf Scholz do të flitet edhe për CEFTA-n.

Murati tregon si do të duken skemat e pensioneve të moshës pas rritjes në 20%

Ministri i Financave ka publikuar “grafikonin” me shumën e re të pensioneve të moshës, që u rritën sot.

“+20% rritje e pensioneve. +100 milionë euro shtesë në vit. 304,016 përfitues. Kështu do të duken skemat e pensioneve të moshës, pas rritjes”, shkroi Hekuran Murati.

Ai, së bashku me kryeministrin Albin Kurti, dolën në një konferencë për media për të njoftuar për rritjen e pensioneve për 20%.

Kurti tha se janë “mbi 300 mijë veta në Republikën e Kosovës që do të përfitojmë”, me ç’rast kostoja buxhetore e kësaj tha se është “plus 100 milionë euro”.

Ai tha se kjo rritje po bëhet këtë muaj, pasi duan ta fusin këtë në planifikimin e buxhetit për vitin e ardhshëm, për të cilin tha se do të votohet në këtë muaj në mbledhjen e Qeverisë.

Kurti tregon nëse do të rriten pagat për mësuesit dhe policët

Kryeministri u pyet nëse do të ndryshojnë pagat e mësuesve dhe policëve dhe mësimdhënësve, në konferencën për media ku njoftoi për rritjen e pensioneve.

Albin Kurti tha se “pagat në sektorin publik janë rritur në vitin e kaluar”.

Kurti konfirmon vendimin për futjen e mallrave serbe në Kosovë

Kryeministri i Kosovës Albin Kurti ka konfirmuar vendimin për ndryshimin e masës së sigurisë për produktet e importuara nga Serbia përmes pikës kufitare në Merdare..

Kurti ka thënë se vendimi është ndërruar nga qarkullimi i kufizuar në kontroll të shtuar, vetëm në këtë pikë kontrolli derisa të vijnë skaneret të cilët do të vendosen dhe në pika tjera kufitare..

“Sot MPB-ja  i ka shkruar drejtorit të doganave. Kosova e ka ndërruar masën e sigurisë, nga qarkullimi i kufizuar tek kontrolli i shtuar, në një pikë kufitare. Ne po e bëjmë këtë ndryshim, derisa të na vijnë skanerin të cilët do të vendosen në të gjitha pikat. Derisa të na vijnë skanerët ne hapin një pikë kufitare, që do ta ketë kontroll të shtuar”, ka thënë Kurti.

Rritja e pensioneve nga Qeveria, kaq është shuma që do të marrin kategoria e luftës

Kryeministri i Kosovës, Albin Kurti, përmes një konference për media, ka njoftuar se është marrë vendimi për rritjen e pensioneve për 20 për qind.

Pensionet do të rriten nga muaji tetor, ndërsa për kategoritë e luftës do të fillojnë nga muaji janar i vitit 2025.

“Duke filluar nga muaji tetor 2024 do të rrisim për 20 për qind të gjitha pensionet si në vijim: pensioni bazik i moshës, pensioni kontributpagues i plotë dhe parcial, pensioni i aftësisë së kufizuar për fëmijë dhe për të rritur, pensioni për personat e verbër, pensioni për personat paraplegjikë dhe tetraplegjikë, pensioni familjar, pensioni invalidor i punës dhe pensioni i parakohshëm për punëtorët e Trepcës. Ndërkaq nga muaji janar i vitit 2025 do të rriten për 20 për qind pensionet e përcaktuara me ligjin për kategoritë e luftës, përkatësisht familjet e dëshmorëve, invalidëve, veteranëve, pjesëtarëve të UÇK’së, viktimat e dhunës seksuale të luftës, viktimave civile dhe familjeve të tyre”, tha Kurti.

Kaq është shuma e pensioneve që do t’i marrin pensionistët nga ky muaj

Kryeministri Albin Kurti ka bërë të ditur se do të rriten pensionet nga muaji tetor për 20 për qind. Në një konferencë bashkë me ministrin Murati, Kurti ka bërë të ditur se rritja e pensioneve do të vlejë nga ky muaj.

Pensioni bazik i moshës do të rritet në 120 euro, pensioni kontributpagues për kategorinë e parë do rritet në 218 euro, për kategorinë e dytë 237 euro, për të tretë 256 euro dhe për të katërtën 318 euro.

Ndalimi i produktëve serbe në Kosovë, Qeveria pritet të marr këtë vendim

Ministria e Punëve të Brendshme raportohet se ka ndryshuar masën e sigurisë ndaj produkteve që hyjnë nga Serbia përmes pikës kufitare Merdarë.

Siç ka mësuar KOHA nga burimet e saj, Kosova ka ndalur importet nga Serbia pas arrestimit të tre policëve kosovarë nga forcat serbe, tensioneve në veri dhe dyshimeve se nëpërmjet mallrave janë futur ilegalisht armë, vitin e shkuar.

Masa e sigurisë më pas u ndryshua duke u lejuar importimi i lëndës së parë dhe gjysmë produkteve të nevojshme për prodhim final.

 

 

Më vendimin e ri, i cili u është përcjellë të hënën institucioneve përkatëse nga ministri i Punëve të Bredshme, Xhelal Svecla, ndalimi i importimit të këtyre produkteve do të zëvendësohet me “kontroll të detajuar” për maunet që hyjnë nga Serbia.

Ndryshimi i masës së sigurisë vlen vetëm për pikën kufitare në Merdarë derisa ajo mbetet në fuqi në pikë kalimet kufitare të tjera me Serbinë.

Dy amerikanë fituan çmimin “Nobel” për mjekësi, ja çfarë zbuluan

Çmimi “Nobel” në mjekësi iu dha shkencëtarëve Victor Ambros dhe Gary Ruvkun për zbulimin e tyre të mikroARN-së dhe rolin e saj në rregullimin e gjeneve pas transkriptimit.

Të dytë zbuluan një parim krejtësisht të ri të rregullimit të gjeneve që është dëshmuar thelbësor për organizmat shumëqelizorë, duke përfshirë njerëzit.

Ata janë shtetas amerikanë dhe punojnë në SHBA. Vlera e çmimit këtë vit është 970 mijë euro. Nëse ka më shumë se një fitues, vlera e parave do të ndahet.

Vdes akademiku i njohur kosovar

Është ndarë sot nga jeta akademiku kosovar, piktori Tahir Emra.

Lajmin e ka bërë të ditur Akademia e Shkencave dhe Arteve të Kosovës.

Ata kanë njoftuar që i ndjeri do të varroset në varrezat e qytetit të Gjakovës më 8 tetor, teksa AShAK-u po atë ditë do të mbajë mbledhje komemorative në orën 11:00, e më pas do të bëhen edhe homazhet deri në orën 12:30.

“Me pikëllim të thellë njoftojmë se sot, më 7 tetor 2024, në moshën 86-vjeçare ndërroi jetë piktori i shquar, ndër më të shquarit e artit shqiptar, akademik Tahir Emra”, thuhet një njoftimin e AShAK-ut.

“Akademik Emra u lind në Gjakovë më 1938. Shkollën fillore e kreu në vend­lindje, ndërsa të mes­men të artit më 1959 në Pejë”.

“Në vitet 1959-1961 punoi mësues vizatimit në vendlindje, më pas studioi në Akademinë e Arteve Figurative në Beograd. Diplomoi më 1966 për pik­turë, teksa një vit më vonë u zgjodh ligjërues e pastaj profesor në Shkollën e Lartë Pedagogjike të Prishtinës, në Degën e Arteve Figurative”.

“Më pas vijoi studimet pasuniversitare, magjistroi më 1970 dhe më 1974 u zgjodh docent për vizatim dhe pikturë në Akademinë e posathemeluar të Arteve të Universitetit të Prishtinës dhe më 1982 profesor ordinar”.

“Ka qenë docenti dhe prodekani i parë shqiptar i Akademisë së Arteve, pastaj shef katedre në dy mandate. Gjatë viteve ’90, për disa vite ka mbajtur mësim me studentët në atelienë e shtëpisë së tij. Për dhjetë vjet (1994-2004) ka mbajtur mësim në lëndët vizatim dhe pikturë edhe në Akademinë e Arteve të Universitetit të Tetovës. Ishte njëri nga themeluesit e Shoqatës së Artistëve Figurativë të Kosovës dhe pjesëmarrës i rregullt në aktivitetet e saj”.

“Anëtar korrespondent i Akademisë së Shkencave dhe të Arteve të Kosovës është zgjedhur në vitin 2000, ndërsa anëtar i rregullt në vitin 2008. Për një mandat ka qenë sekretar i Seksionit të Arteve të ASHAK-ut”.

“Ka hapur disa ekspozita të pavarura dhe ka marrë pjesë në ekspozita kolektive brenda dhe jashtë vendit. Veprat e tij gjenden në shumë galeri e muze të botës, në institucione dhe në koleksione private”.

“Në vitin 2013 Akademia e Shkencave dhe e Arteve të Kosovës botoi monografinë e piktorit Tahir Emra me riprodhimet e veprave më të njohura dhe me studimin e piktorit Kujtim Buza”.

Haga deklarohet rreth kërkesës së Jakup Krasniqit për pjesëmarrjen në varrimin e të vëllait

Azem Krasniqi, vëllai i ish-kryetarit të Kuvendit të Kosovës, Jakup Krasniqit, vdiq më 5 tetor.

Lajmi u bë i ditur nga familjarët në orët e mbrëmjes të së shtunës.

Ai u varros të dielën në fshatin e tij të lindjes, në Negroc të Drenasit, njofton Klankosova.tv.

Por, vëllait të të ndjerit, Jakupit i cili tash e katër vjet po gjykohet në Hagë, me gjasë nuk iu lejua pjesëmarrja në varrim.

Klankosova.tv ka dërguar pyetje në adresën elektronike të Dhomave të Specializuara, por nuk mori përgjigje konkrete nga DhSK-ja.

Zëdhënësja Angela Griep, tha se korniza ligjore e Dhomave të Specializuara të Kosovës u lejon personave të paraburgosur që t’i bëjnë kërkesa Panelit kompetent kur ka arsye bindëse humanitare.

“Paneli do të vendosë për këto kërkesa.Të gjitha dokumentet publike, duke përfshirë parashtresat nga Mbrojtja dhe vendimet e gjyqtarëve publikohen në faqen e internetit të KSK-së, kështu që nëse dhe kur ndonjë informacion i mëtejshëm për këtë çështje është i disponueshëm dhe publik, ai do të publikohet në faqen e internetit të KSK-së”, thuhet në përgjigjen e dërguar me shkrim.